San yu kan du fu meki sani tan waka bun na ini a gemeente
San yu kan du fu meki sani tan waka bun na ini a gemeente
„Meki Masra Yesus Krestes sori unu bun-ati, fu di unu abi a yoisti fasi fu denki.”—FIL. 4:23.
FA WI KAN YEPI FU MEKI SANI WAKA BUN NA INI A GEMEENTE . . .
te wi de nanga wi brada nanga sisa?
te wi de fayafaya na ini a preikiwroko?
te wi fruteri den owruman fu wan seryusu sondu di wan sma du?
1. Sortu bun fasi den Kresten fu den gemeente na ini Filipi nanga Tiatira ben abi?
NA INI a fosi yarihondro den Kresten fu a foto Filipi ben pôti. Ma toku den ben lobi fu gi sma sani èn den de wan moi eksempre na ini a fasi fa den sori lobi gi den Kresten brada nanga sisa fu den (Fil. 1:3-5, 9; 4:15, 16). Dati meki na apostel Paulus skrifi na ini wan brifi gi den: „Meki Masra Yesus Krestes sori unu bun-ati, fu di unu abi a yoisti fasi fu denki” (Fil. 4:23). Fu di den Kresten na ini Tiatira ben abi a srefi denki, meki Yesus Krestes di kisi glori na hemel, taigi den: „Mi sabi san yu e du èn mi sabi taki yu abi lobi nanga bribi. Mi sabi fa yu e du a diniwroko fu yu. Mi sabi taki yu e horidoro èn taki den sani di yu e du now, bigi moro den sani di yu ben du fosi.”—Openb. 2:19.
2. Fa a fasi fa yu e tyari yusrefi kan abi krakti tapu yu gemeente?
2 Na so a de tu na ini a ten disi taki ibri gemeente fu Yehovah Kotoigi abi son gwenti di de krin fu si. Son gemeente abi a nen taki den brada nanga sisa e sori lobi trutru. Tra gemeente e horibaka fayafaya gi a Kownukondre preikiwroko èn den abi furu warderi gi den pionier. Te wi alamala e du muiti fu abi bun denki, dan wi e yepi fu meki a wánfasi na ini a gemeente tan èn fu meki sani waka bun na ini a gemeente (1 Kor. 1:10). Ma efu wi abi denki di no bun, dan disi kan meki taki trawan na ini a gemeente no e du so furu moro gi Gado, den no de fayafaya moro na ini a preikiwroko èn kande den o gi pasi srefi taki sma du seryusu sondu na ini a gemeente (1 Kor. 5:1; Openb. 3:15, 16). Fa a de nanga yu gemeente? San yu kan du fu meki taki sani waka bun na ini yu gemeente?
SANI DI YU KAN DU FU MEKI SANI WAKA BUN NA INI A GEMEENTE
3, 4. Na sortu fasi wi kan „prèise [Yehovah] na mindri ala den sma di kon makandra”?
3 A psalm skrifiman ben singi: „Mi o prèise yu [Yehovah] na mindri ala den sma di kon makandra. Te mi de na mindri furu sma, mi o prèise yu” (Ps. 35:18). A psalm skrifiman ben lobi fu prèise Yehovah te a ben de nanga den tra futuboi fu En. Na den alawiki konmakandra soleki a Waktitoren-studie, wi kan gi piki di e sori taki wi de fayafaya èn taki wi abi bribi. Wi alamala musu aksi wisrefi den sani disi: ’Mi e si en leki wan grani fu gi piki na den konmakandra? Mi e du dati so furu leki mi man? Mi e sreka misrefi bun gi den konmakandra so taki mi kan gi bun piki?’ Efu yu na wan osofamiri-edeman a bun fu aksi yusrefi den sani disi: ’Mi e yepi mi pikin fu sreka densrefi, so taki den man gi piki na den konmakandra? Mi e yepi den fu gi piki nanga den eigi wortu?’
4 A psalm skrifiman David ben sori taki a fasi fa wi e singi kan sori taki wi lobi Gado nanga wi heri ati. A taki: „Mi o tan lobi yu nanga mi heri ati, mi Gado, mi o tan lobi yu nanga mi heri ati. Mi o singi prèisesingi gi yu” (Ps. 57:7). Den Kresten konmakandra na moi okasi fu ’singi prèisesingi’ gi Yehovah fu sori taki wi lobi en trutru. Efu wi no sabi son singi, a ben o bun fu leri den te unu abi Osofamiri Anbegi. Meki a de so taki wi abi a fasti bosroiti fu ’singi gi Yehovah wi heri libi langa èn fu singi prèisesingi gi en solanga wi de na libi’.—Ps. 104:33.
5, 6. (a) Fa wi kan gi trawan wan switikon na wi oso èn fa wi kan sori taki wi lobi fu gi sma sani? (b) Sortu krakti disi abi tapu a gemeente?
5 Wan tra fasi fa wi kan sori lobi na ini a gemeente na fu gi wi brada nanga sisa wan switikon na wi oso. Na ini a lasti kapitel fu a brifi di Paulus skrifi gi den Hebrewsma, a gi den a deki-ati disi: „Tan lobi makandra leki brada. No frigiti fu lobi fu gi sma wan switikon” (Hebr. 13:1, 2). Wan heri bun fasi fu gi sma wan switikon, na fu kari a kring-opziener nanga en wefi, noso tra sma na ini yu gemeente di de na ini a furuten diniwroko fu kon nyan nanga yu. Son leisi a bun tu fu kari sisa di den masra dede, osofamiri di no abi papa noso mama, noso tra sma fu kon nyan nanga yu. Wanwan leisi yu kan kari den tu fu kon hori na Osofamiri Anbegi makandra nanga yu.
6 Paulus ben taigi Timoteyus fu gi sma a deki-ati fu „du bun, iya, den musu du furu bun sani, den musu lobi fu gi sma sani èn den musu de klariklari fu prati san den abi nanga trawan. Dan den o seti wan bun fondamenti gi a tamara. A o de neleki wan gudu di den kibri gi densrefi. Na so fasi den kan grabu a trutru libi hori bun steifi” (1 Tim. 6:17-19). Nanga den wortu disi Paulus ben gi den brada nanga sisa a deki-ati fu kon abi a gwenti fu gi sma sani. Awinsi sani no e go bun na moni sei, toku wi kan sori taki wi lobi fu gi sma sani. Fu eksempre, efu yu abi wan wagi èn yu e si taki a muilek gi son sma fu go na a preikiwroko noso na den konmakandra, dan yu kan meki den rèi nanga yu. Efu wan brada noso sisa e kisi yepi na so wan fasi, dan fa a kan sori taki a e warderi disi? Fa a kan sori taki a wani taki sani waka bun na ini a gemeente? So wan brada noso sisa kan gi san a man fu yepi a sma di e tyari en, bika oli gi a wagi e kon diri dei fu dei. Wan tra fasi fa wi kan sori wi brada nanga sisa taki wi lobi den èn taki wi abi den fanowdu na fu meki ten fu de nanga den. Te wi e du bun sani „gi den wan di abi a srefi bribi leki wi” èn te wi de klariklari fu gebroiki wi ten nanga tra sani di wi abi fu yepi den, dan wi o kon lobi den moro. Te wi e du den sani disi, dan trawan na ini a gemeente o wani du a srefi tu.—Gal. 6:10.
7. Fa sani o waka bun na ini a gemeente fu wi te wi no e fruteri sma den inibere tori fu wi brada nanga sisa?
7 Tra sani di kan meki wi lobi wi brada nanga sisa moro na te wi tron mati fu den èn te wi no fruteri trawan den inibere tori fu den. (Leisi Odo 18:24.) Efu wan sma na wan trutru mati fu yu, a no o fruteri trawan yu inibere tori. Te wan brada noso sisa e fruteri wi en inibere tori, fa a e denki noso fa a e firi, èn a e si taki trutru wi no fruteri trawan disi, dan wi nanga en o tron moro bun mati. Te wi e sori taki wi de wan mati di de fu frutrow èn di no e panya den inibere tori fu sma, dan a gemeente fu wi o de leki wan bigi famiri di lobi makandra.—Odo 20:19.
DE FAYAFAYA NA INI A PREIKIWROKO
8. Sortu rai den Kresten fu Laodisea kisi èn fu san ede?
8 Di Yesus ben taki nanga a gemeente fu Laodisea, a taigi den: „Mi sabi san yu e du, taki yu no kowru, ma yu no faya tu. Mi ben winsi taki yu ben kowru noso taki yu ben faya. Sobun, fu di yu no faya èn yu no kowru tu, ma yu brokokowru, meki mi o spiti yu puru na ini mi mofo” (Openb. 3:15, 16). Den Kresten fu Laodisea no ben de fayafaya na ini a diniwroko fu den èn disi ben abi krakti tapu a fasi fa den ben e denki fu makandra. Fu dati ede, na wan lobi-ati fasi Yesus gi den a rai disi: „Mi e piri-ai gi ala den wan di mi lobi èn mi e strafu den, so taki den kan leri wan sani. Fu dati ede, de nanga faya èn abi berow.”—Openb. 3:19.
9. Te wi de fayafaya na ini a preikiwroko, dan sortu krakti dati kan abi tapu a gemeente?
9 Efu wi wani taki sani waka bun na ini a gemeente, dan wi musu de fayafaya na ini a preikiwroko. A gemeente seti fu di wi wani suku sma na ini a birti di de leki skapu èn wi wani yepi den fu kon leri sabi Gado. Dati meki wi musu de neleki Yesus di ben du ala muiti fu meki sma tron disipel (Mat. 28:19, 20; Luk. 4:43). Te wi e du a preikiwroko nanga moro faya, dan wi o „wroko makandra nanga Gado” leki wán man (1 Kor. 3:9). Te wi e si fa tra brada nanga sisa e taki fayafaya fu a bribi fu den na ini a preikiwroko èn fa den e sori taki den e warderi sani di abi fu du nanga Gado, dan wi o lobi den moro èn wi o abi moro lespeki gi den. Boiti dati, te wi e du a preikiwroko „leki wán man”, dan wánfasi o de na ini a gemeente.—Leisi Sefanya 3:9.
10. Te wi e du muiti fu du wi preikiwroko moro bun, dan sortu krakti dati kan abi tapu a gemeente?
10 Te wi e du muiti fu du wi preikiwroko moro bun, dan dati kan de wan deki-ati gi trawan. Te wi e sori moro nanga moro taki wi e broko wi ede nanga sma, èn te wi e du moro muiti fu preiki na so wan fasi taki dati naki den ati, dan wi o kon lobi a preikiwroko moro tu (Mat. 9:36, 37). Efu wi de fayafaya, dan den wan di de nanga wi o wani de fayafaya tu. Di Yesus seni den disipel fu en fu go preiki, a seni den tu na tu. Den no ben musu wroko den wawan (Luk. 10:1). Na so den ben e gi makandra deki-ati èn den ben kan leri fu makandra. Boiti dati, den ben e kisi moro faya gi a preikiwroko tu. Wi lobi fu wroko nanga fayafaya Kownukondre preikiman, a no so? A faya di den abi e gi wi deki-ati èn a e meki taki wi wani go doro nanga a preikiwroko.—Rom. 1:12.
NO KRUTUKRUTU ÈN NO TAPU YU AI GI OGRI
11. Sortu takru denki den Israelsma fu a ten fu Moses ben kon abi èn san den bigin du?
11 Wan tu wiki baka di Yehovah meki den Israelsma tron wan pipel, den no ben breiti moro nanga a fasi fa sani ben e waka èn den bigin krutukrutu. Ne den bigin opo densrefi teige Yehovah nanga den sma di ben e teki presi gi en (Eks. 16:1, 2). Soso wan tu Israelsma di gowe libi Egepte ben man go na ini a Pramisi Kondre. A krutukrutu fu den Israelsma meki srefi taki Moses no kisi primisi fu go na ini a Pramisi Kondre (Deut. 32:48-52). Fa wi na ini a ten disi kan sorgu taki takru denki no abi krakti na wi tapu?
12. San wi kan du fu no tron sma di abi a gwenti fu krutukrutu?
12 Wi musu luku bun taki wi no kisi a gwenti fu krutukrutu. Te wi abi sakafasi èn te wi e lespeki den wan di e teki fesi, dan dati kan yepi wi fu no krutukrutu. Ma toku wi musu luku bun nanga suma wi e bumui. Te wi abi prisiri na wan fasi di no bun, noso te wi e bumui tumusi nanga sma fu skoro noso wrokope di no e lespeki Bijbel, dan sani no o waka bun gi wi. A de wan koni sani te wi no e bumui nanga sma di lobi krutukrutu èn di feni taki den kan du san den wani.—Odo 13:20.
13. Sortu takru bakapisi krutukrutu kan tyari na ini a gemeente?
13 Te sma na ini a gemeente abi a gwenti fu krutukrutu, dan safrisafri den kan bigin tyari densrefi na wan fasi di o meki taki den no de mati fu Yehovah moro. Fu eksempre, krutukrutu kan meki taki freide nanga wánfasi no de moro na ini a gemeente. Boiti dati, te wan sma e krutukrutu fu en Kresten brada nanga sisa, dan dati kan hati den èn te fu kaba so wan sma kan du seryusu sondu. Kande a o bigin fruteri lei fu gi en brada nanga sisa porinen noso kande a o bigin kosi srefi (Lef. 19:16; 1 Kor. 5:11). Na ini a fosi yarihondro, son sma na ini a gemeente ben lobi krutukrutu. Den ’no ben abi lespeki gi den wan di ben e tiri den èn den ben e taki ogri fu den wan di kisi glori (Yud. 8, 16). A no de fu taki dati Gado no ben lobi en kwetikweti taki sma ben e krutukrutu fu den brada di ben e teki fesi na ini a gemeente.
14, 15. (a) Te wi e gi pasi taki sma na ini a gemeente du sondu, dan sortu krakti dati kan abi tapu a heri gemeente? (b) San wi musu du te wi kon sabi taki wan sma e du wan sondu kibrikibri?
14 San wi musu du te wi kon sabi taki wan sma e du wan sondu kibrikibri? Kande a e dringi sopi pasa marki, kande a e luku felem, buku noso fowtow di abi fu du nanga seks, noso kande a e huru (Ef. 5:11, 12). Te wi sabi taki wan sma e du seryusu sondu èn wi no e taki noti fu en, dan disi kan meki taki Yehovah puru en santa yeye fu a gemeente èn freide no o de moro na ini a gemeente (Gal. 5:19-23). Den Kresten fu Korente ben musu puru ala ogri na ini a gemeente èn na so wi musu du tu na ini a ten disi. Efu wi wani taki sani waka bun na ini a gemeente, dan wi musu sorgu taki nowan ogri kon na ini a gemeente. San yu kan du fu meki taki freide tan na ini a gemeente?
15 Soleki fa wi ben taki kaba, dan a prenspari fu no panya son tori fu sma, spesrutu fu den wan di e frutrow wi èn di fruteri wi ala den inibere tori. Te wan sma fruteri yu ala san de na tapu en ati èn yu e go panya dati gi trawan, dan dati na wan ogri-ati sani fu du èn a o hati a sma trutru! Ma te wan sma du wan seryusu sondu, dan den owruman fu a gemeente musu kon sabi dati, bika Bijbel e sori taki na den abi a wroko fu luku den sortu tori disi. (Leisi Lefitikus 5:1.) Sobun, efu wi sabi taki wan brada noso wan sisa du so wan sondu, dan wi musu gi en a deki-ati fu go na den owruman meki den yepi en (Yak. 5:13-15). Efu wi gi en nofo ten fu du dati, ma toku a no go, dan wi srefi musu go taigi den owruman san a du.
16. Te wi go fruteri den owruman fu wan seryusu sondu di wan sma du, dan fa dati e yepi fu meki sani waka bun na ini a gemeente?
16 A Kresten gemeente musu de wan presi pe noti no de di kan pori sma bribi. Te wi e fruteri den owruman fu wan seryusu sondu di wan sma du, dan wi e yepi fu meki a gemeente tan krin. Te den owruman yepi a sma fu frustan taki a du wan seryusu sondu èn a sma abi berow èn a teki a piri-ai di den owruman gi en, dan a no sa pori a gemeente moro. Ma san musu pasa te wan sma di du wan seryusu sondu no abi berow èn a no e teki a lobi-ati rai fu den owruman? Den musu puru en na ini a gemeente so taki a sondu libi fu en no abi krakti tapu tra sma èn na so sani o tan waka bun na ini a gemeente. (Leisi 1 Korentesma 5:5.) Iya, efu wi wani taki sani waka bun na ini a gemeente, dan ibriwan fu wi musu du san reti, wi musu wroko makandra nanga den owruman, èn wi musu kibri wi brada nanga sisa gi sani di kan pori a bribi fu den.
DU MUITI FU TAN ABI ’A WÁNFASI DI WI KISI NANGA YEPI FU A SANTA YEYE’
17, 18. San o yepi wi ’fu tan abi a wánfasi di wi kisi nanga yepi fu a santa yeye’?
17 Fu di den fosi bakaman fu Yesus „tan poti prakseri na den leri fu den apostel”, meki wánfasi ben tan na ini a gemeente (Tori 2:42). Den Bijbel rai nanga den leri fu den owru man ben prenspari gi den trutru. Na so a de tu na ini a ten disi taki a gemeente e kisi a yepi nanga a deki-ati di den abi fanowdu fu de wán, fu di den owruman e teki a rai fu a koni srafu di de fu frutrow. (1 Kor. 1:10). Te wi e teki a Bijbel leri fu na organisâsi fu Yehovah èn wi e gi yesi na den owruman, dan wi e sori taki wi e ’du ala muiti fu tan abi a wánfasi di wi kisi nanga yepi fu a santa yeye’.—Ef. 4:3.
18 Sobun, awinsi san wi e du, meki wi tan du muiti fu meki sani waka bun na ini a gemeente. Te wi e du dati, wi kan de seiker taki ’Masra Yesus Krestes o sori wi bun-ati, fu di wi abi a yoisti fasi fu denki’.—Fil. 4:23.
[Aksi fu a tori disi]
[Prenki na tapu bladzijde 19]
Te yu e sreka fu gi bun piki na den konmakandra, dan yu e yepi fu meki sani waka bun na ini a gemeente
[Prenki na tapu bladzijde 20]
Te wi e leri den singi fu wi, dan wi e yepi fu meki sani waka bun na ini a gemeente
