Aksi fu leisiman

Den kan puru wan sma fu a Kresten gemeente efu a abi a gwenti fu luku porno noso sani di abi fu du nanga seks?

▪ Iya, a kan. Disi e sori krin o prenspari a de fu no abi noti fu du nanga porno. Sobun, wi no musu leisi nowan sekstori èn wi no musu luku nowan seksprenki noso fowtow na ini buku, felem, video, noso tapu Internet.

Na ala sei fu grontapu porno de. Na ini a ten disi moro nanga moro sma e luku porno, fu di a makriki fu feni den sani disi tapu Internet. Te wan sma de tapu Internet, a kan pasa son leisi taki wan seksprenki opo kon wantronso sondro taki a go suku en. Na so a pasa taki sma si porno son leisi sondro taki den ben wani dati. Ma yu abi tra sma di e go suku den sani disi tapu Internet. Te den wawan de na oso noso na wroko pe nowan sma e si den, dan den no frede srefi fu luku den sani disi. Ma fu san ede a no bun taki wan Kresten e luku porno?

Wan prenspari sani fu san ede Kresten no musu luku porno, de fu si na ini wan warskow di Yesus gi. A taki: „Iniwan sma di e tan luku wan uma nanga tranga lostu gi en, du sutadu nanga en kaba na ini en ati” (Mat. 5:28). A tru taki a no fowtu te wan man nanga wan uma di trow abi seks na wan fasi di fiti èn a kan gi den prisiri tu (Odo 5:15-19; 1 Kor. 7:2-5). Ma dati a no porno. Porno na seksfowtow noso seksfelem di e sori fa sma abi seks na wan fasi di no fiti kwetikweti èn a e meki sma kisi ala sortu fowtu denki fu seks. We, na gi den denki dati Yesus warskow wi. Fu taki en krin, wan sma di e leisi noso luku porno e du wan sani di no e kruderi srefisrefi nanga a wèt fu Gado di e taki: „Kiri den difrenti pisi fu un skin di kan meki taki unu kisi fu du nanga hurudu, wan libi di no krin, sekslostu, takru lostu  èn nanga bigi-ai di de a srefi leki na anbegi fu kruktugado.”​—Kol. 3:5.

Ma fa a de te wan Kresten luku porno wán noso tu leisi? A de leki a situwâsi fu Asaf di ben o kon na ini problema wan leisi. A ben taki: „Mi dati, pikinmoro mi futu ben komoto na tapu a pasi. Pikinmoro mi futu meki mi grati fadon.” Efu wan Kresten luku fowtow fu mansma nanga umasma di de sososkin noso di abi seks, dan a no kan abi wan krin konsensi èn a no kan de wan mati fu Gado. A ben o firi leki Asaf di ben taki: „Heri dei a sani disi ben e moro mi. Ibri mamanten mi musu taki nanga misrefi fu kan kisi misrefi baka.”​—Ps. 73:2, 14.

Wan Kresten di e luku porno musu frustan taki a e du wan sani di no bun èn taki a abi yepi fanowdu fu kon bun baka nanga Gado. A kan feni yepi na den owruman fu a gemeente pe a de. Bijbel e taki: „Srefi efu wan sma meki wan fowtu sondro fu a sabi, dan unu leki lepi Kresten musu pruberi na wan safri-ati fasi fu tyari so wan sma kon na tapu a reti pasi baka. Ma luku bun taki unu srefi no kisi tesi” (Gal. 6:1). Wán noso tu owruman kan gi en a yepi di a abi fanowdu. Den kan begi gi en èn den kan abi a frutrow taki Yehovah o „meki a [sma] kisi ensrefi baka” èn taki a o „kisi pardon” fu a sondu fu en (Yak. 5:13-15). Neleki Asaf, den wan di kisi yepi fu no luku porno moro, kon si taki a bun fu kon krosibei na Gado.​—Ps. 73:28.

Ma na apostel Paulus ben taki tu dati son sma di sondu no abi berow „fu den morsu sani, a hurudu, nanga den tra ogri di den du sondro fu syen” (2 Kor. 12:21). * Professor Marvin R. Vincent taki dati a Griki wortu gi „morsu sani” abi fu du nanga bun fisti èn lagi sani di sma e du. Son leisi porno abi fu du nanga wan man noso wan uma di de sososkin, noso di abi seks. Ma yu abi porno tu pe moro fisti èn tegu sani de fu si, soleki man di abi seks nanga man, uma di abi seks nanga uma, wan grupu sma di abi seks nanga makandra, sma di abi seks nanga meti, sma di abi seks nanga pikin-nengre, wan grupu sma di e dwengi wan trawan na wan ogri-ati fasi fu abi seks nanga den, ogri-ati sani di sma e du nanga umasma, èn sma di lobi pina èn tai trawan te den abi seks nanga den. Na ini a ten fu Paulus, son sma den frustan ’ben dungru. Den no ben sabi moro san bun noso san ogri. Soso ogri den ben e du sondro fu syen èn den ben gridi fu du wan lo morsu sani.’​—Ef. 4:18, 19.

Na Galasiasma 5:19 Paulus ben taki tu fu „fasi fu libi di no krin”. Wan sabiman fu Ingrisikondre taki dati den wortu disi abi fu du nanga takru lostu di no fiti kwetikweti. Ala Kresten ben o agri taki den sortu fasi fu abi seks di wi kari didyonsro, na fisti tegu sani èn den e meki sma kisi takru lostu fu du sani di no fiti kwetikweti. Na Galasiasma 5:21 Paulus taki dati „den sma di gwenti du” den sortu fisti tegu sani disi „no o kisi a Kownukondre fu Gado”. Sobun, san musu pasa nanga wan sma di abi a gwenti, kande fu wan langa pisi ten kaba, fu luku porno pe sma e du den fisti èn tegu sani disi? Efu a no abi berow èn a no e tapu nanga a sani disi di a e du, dan den o puru en na ini a gemeente, so taki a no pori trawan. Na so a gemeente e tan krin.​—1 Kor. 5:5, 11.

A bun fu sabi taki son sma di ben e luku porno pe sma e du den fisti èn tegu sani disi, go na den owruman èn den kisi a yepi di den ben abi fanowdu fu tyari kenki kon. Yesus ben gi den Kresten na ini na owruten gemeente Sardes a rai disi: „Tranga den sma di tan abra èn di ben de fu dede, . . . tan prakseri san na den sani di yu ben kisi èn di yu ben yere. Tan du den sani disi èn abi berow. Fu tru, efu yu no wiki, . . . yu no o sabi kwetikweti sortu yuru mi o kon” (Openb. 3:1-3). Iya, wan sma kan abi berow èn a kan wai pasi gi den takru bakapisi di porno e tyari.​—Yud. 22, 23.

Ma a moro bun fu no luku porno kwetikweti, so taki wi no e kisi takru bakapisi fu dati. Sobun, meki wi alamala abi a fasti bosroiti fu no abi noti fu du nanga nowan sani di abi fu du nanga porno!

[Futuwortu]

[Prenspari pisi na tapu bladzijde 30]

Wan Kresten di e luku porno musu frustan taki a e du wan sani di no bun èn taki a abi yepi fanowdu fu kon bun baka nanga Gado