Fa yu e gi rai?

Wan sma aksi yu rai wan leisi? Kande sma aksi yu sani soleki: ’San mi musu du? Mi musu go na a fesa disi? Mi musu teki a wroko disi? Mi musu meki mofo nanga a sma disi fu trow?’

Kande wan sma e aksi yu rai fu di a musu teki wan bosroiti di o abi krakti tapu den mati fu en, en osofamiri, noso en matifasi nanga Yehovah. Sortu rai yu o gi en? Yu o taigi en san yu e denki fu a tori, noso yu o taigi en san Bijbel e taki? Fa yu gwenti gi sma rai? Awinsi wan sma aksi yu wan seryusu sani noso wan sani di no de so seryusu, hori na prakseri taki Odo 15:28 e taki: „Na ati fu a reti-ati sma e prakseri dipi fu sani, so taki a kan gi piki.” Meki wi luku feifi sani di Bijbel e taki èn di kan yepi wi fu gi bun rai.

1 Frustan bun san na a tori.

„Te wan sma e gi piki fosi a yere wan tori, dan dati na wan don sani fu du. A o kisi syen.”​—ODO 18:13.

Efu wi wani gi wan sma bun rai, dan wi musu frustan fa a sma e denki èn na ini sortu situwâsi a de. Fu eksempre, efu wan sma ben o bèl yu fu aksi yu san na a moro bun fasi fa a kan doro yu oso, san yu musu sabi fu man yepi en? Efu yu no sabi pe a de, yu no o man taigi en sortu pasi a musu teki fu kon na yu oso, a no so? We, na so a de tu te yu wani gi wan sma bun rai. Yu musu sabi a situwâsi fu en èn yu musu sabi fa a e denki. A kan taki yu no sabi son sani fu en di yu musu sabi fu man gi en bun rai. Efu wi no sabi a situwâsi fu wan sma, a kan taki wi gi en rai di o bruya en.​—Luk. 6:39.

Aksi a sma efu a du muiti kaba fu suku wan piki tapu na aksi fu en. A kan de wan koni sani tu fu aksi a sma di e suku rai, den sani disi: „Sortu rai na ini Bijbel kan yepi yu fu teki wan bosroiti?” „Te yu prakseri den bosroiti di yu wani teki, dan sortu bun noso takru bakapisi yu kan kisi?” „Yu suku rai na ini den buku fu wi kaba?” „Sortu yepi yu kisi kaba fu tra sma soleki den gemeente owruman, yu papa nanga mama, noso a sma di e studeri Bijbel nanga yu?”

Den piki di a sma o gi yu tapu den aksi disi kan yepi yu fu si omeni muiti a sma srefi du kaba fu feni wan piki tapu na aksi fu en. Sosrefi, te wi sabi sortu rai tra sma gi en, dan wi kan hori dati na prakseri te wi o gi en rai. Wi o sabi tu efu trutru a sma wani rai noso efu a wani nomo taki wi taigi en san a wani yere.​—2 Tim. 4:3.

  2 No piki wantewante sondro fu denki.

„Ibriwan sma musu de gaw fu yere. A no musu de gaw fu taki.”​—YAK. 1:19.

Son leisi te wan sma aksi wi rai, wi kan denki taki wi musu piki en wantewante fu yepi en. Ma nofo tron disi no de wan koni sani fu du, spesrutu efu na wan sani di wi no ondrosuku. Odo 29:20 e taki: „Yu si wan man di gaw tumusi fu taki san a e denki? Moro howpu de gi wan sma sondro frustan leki gi en.”

Teki yu ten fu ondrosuku sani, so taki yu sabi taki a rai di yu o gi, e kruderi nanga den koni rai fu Gado Wortu. Aksi yusrefi: ’A fasi fa den sma fu grontapu e denki èn e du sani abi krakti tapu a denki fu mi?’ (1 Kor. 2:12, 13) Memre taki son leisi wi wani yepi wan sma trutru, ma a no abi fu de so taki a rai di wi e gi en, na bun rai. Di na apostel Petrus yere sortu muilek wroko Yesus ben kisi fu du, a gi Yesus a rai disi: „Masra, du yusrefi wan bun. A sani disi no o miti yu kwetikweti.” San wi kan leri fu a sani di Petrus taki? Wi e leri taki awinsi wan sma wani yepi wan trawan trutru, toku efu a no e luku bun, a kan gi rai di e sori taki a ’no e denki leki fa Gado e denki, ma a e denki leki fa libisma e denki’ (Mat. 16:21-23). A bun fu yepi trawan, ma hori na prakseri taki awinsi wi abi ondrofeni, toku Gado koni omeni tron moro wi. Sobun, a prenspari trutru taki wi e denki fosi wi piki.​—Yob 38:1-4; Odo 11:2.

3 Abi sakafasi èn gebroiki Gado Wortu.

„Mi no e du san misrefi wani, ma . . . mi e taki den sani disi soleki fa a Tata leri mi.”​—YOH. 8:28.

Kande yu ben o taigi wan sma: ’Efu mi na yu, dan na so-so-so mi ben o du.’ Awinsi a no muilek fu piki na aksi fu a sma, toku a bun fu du neleki Yesus di ben abi sakafasi. A ben abi moro koni èn moro ondrofeni leki iniwan tra libisma, ma toku a taki: „Mi no taki san misrefi e prakseri. A Tata . . . taigi mi san mi musu taki èn san mi musu leri sma” (Yoh. 12:49, 50). Ala ten den leri nanga den rai fu Yesus ben de sani di en Tata feni bun.

Fu eksempre, na Lukas 22:49 wi e leisi taki di den feanti ben kon fu teki Yesus, den disipel aksi en efu den musu feti noso efu den no musu feti. Wan fu den disipel ben hari en feti-owru srefi. Na Mateyus 26:52-54 a srefi tori skrifi èn drape wi e si taki srefi na ini a muilek situwâsi disi Yesus teki ten fu yepi a disipel dati fu frustan san Yehovah wani. Yesus ben sabi san skrifi na Genesis 9:6 èn a ben sabi den profeititori fu Psalm 22 nanga Yesaya 53. Dati meki a ben man gi koni rai di meki sma tan na libi èn di plisi Yehovah.

4 Luku san den buku fu wi e taki.

„Suma na trutru a koni srafu di de fu frutrow èn di en masra poti fu luku den futuboi fu en, so taki a kan gi den nyanyan na a reti ten?”​—MAT. 24:45.

 Yesus poti a koni srafu di de fu frutrow, fu gi wi difrenti buku nanga tra sani di e gi wi Bijbel leri. Te yu o gi rai di abi fu du nanga prenspari sani noso te yu o sori wan sma san fu du, a bun fu teki ten fu ondrosuku finifini sortu Bijbel rai de na ini den buku fu wi.

Na bakasei fu ibri Studie-Waktitoren fu december wan artikel de di nen „Tori di kon na ini den Waktitoren”. Dyaso yu kan feni furu sani di kan yepi yu te yu e suku rai. Yu kan luku sosrefi na ini a Watchtower Library. * No frigiti fu gebroiki den sani disi. Yu man sori trawan fa fu gebroiki den sani disi, so taki den man feni Bijbel gronprakseri di o yepi den fu teki wan bun bosroiti? Neleki fa wan karta kan sori wan sma fa a musu doro na wan presi, na so den buku fu wi kan yepi wan sma fu teki bun bosroiti di o meki a kisi têgo libi.

Furu owruman e leri preikiman fa den musu gebroiki den artikel di nen „Tori di kon na ini den Waktitoren” noso a Watchtower Library tapu CD-ROM. Te den preikiman abi problema èn te den musu teki bosroiti na ini den aladei libi, dan den srefi o man suku artikel di e sori san Bijbel e taki fu a tori di den wani sabi. Na so den e leri fu ondrosuku sani moro fini èn fu frutrow tapu den rai fu Yehovah di de na ini den buku fu wi. Na a fasi disi den o man „gebroiki den frustan fu man si sani krin, so taki den kan sabi san bun èn san no bun”.​—Hebr. 5:14.

5 Luku bun taki yu no teki bosroiti gi sma.

„Ibri sma sa tyari en eigi lai.”​—GAL. 6:5.

Te fu kaba, ibri sma musu bosroiti gi ensrefi sortu rai a o teki èn san a o du. Yehovah e gi wi alamala na okasi fu bosroiti efu wi wani libi soleki fa en wani noso efu wi no wani du dati (Deut. 30:19, 20). Son leisi a situwâsi fu wan sma abi fu du nanga difrenti Bijbel gronprakseri, ma te fu kaba na a sma srefi o abi fu teki en eigi bosroiti. Te wan sma e aksi wi rai, a bun fu hori a situwâsi nanga yari fu en na prakseri. Aksi yusrefi: ’Mi abi a reti fu gi piki tapu na aksi fu a sma disi?’ Son leisi a moro bun fu meki den owruman piki na aksi fu a sma èn efu na wan yonguwan, a moro bun fu meki en papa nanga mama yepi en.

[Futuwortu]

[Faki/​Prenki na tapu bladzijde 8]

Wan sani di yu kan du na a Osofamiri Anbegi

Wan sani di yu kan du, na fu suku sani di abi fu du nanga wan aksi di wan sma ben poti gi yu. Sortu artikel nanga Bijbel gronprakseri yu kan feni di ben o yepi wan sma di aksi yu wan sani? Kande wan brada noso wan sisa aksi yu fu wan sma di a wani leri sabi fu di a wani trow nanga en. Yu kan gebroiki den artikel di nen „Tori di kon na ini den Waktitoren” na bakasei fu den Studie-Waktitoren fu december. Luku efu yu man feni a tori di yu e suku na den edeprakseri „Studie-artikel” nanga „A Kresten fasi fu libi”. Na ini na Index fu a Watchtower Library na tapu CD-ROM yu kan suku den wortu „Verkering” nanga „Huwelijk” fu feni artikel di abi fu du nanga a tori di yu e suku.

[Faki na tapu bladzijde 9]

Wi e taki Yehovah tangi taki a gebroiki en organisâsi fu yepi wi, so taki wi kan gi den moro bun rai èn kisi den moro bun rai tu. Preikiman 12:11 e taki: „Den sani di koni sma e taki, de leki srapu tiki di sma e teki fu dyuku kaw meki den waka. Den sma di lobi fu tyari odo kon na wán, de leki spikri di naki go na ini udu. Den odo disi komoto fu wán skapuman nomo.” Sma e gebroiki srapu tiki son leisi fu dyuku wan kaw meki a waka pe den wani. Na so wan sma kan gi wan trawan bun rai na wan lobi-ati fasi fu meki a tan waka tapu a reti pasi. Te wan sma e naki spikri go na ini udu, a kan meki wan bun oso. Na so bun rai kan meki wan sma teki bun bosroiti tu. Koni sma „lobi” fu poti prakseri na den „odo” noso den koni rai di e kon fu Yehovah, a „wán skapuman” fu den.

Te wi e gi rai, meki a de rai di e kon fu Yehovah, wi Skapuman. Wi lobi fu arki den wan di e suku rai èn efu wi man, wi lobi fu yepi den tu. Te den rai fu wi e kruderi nanga Bijbel gronprakseri, dan den o de bun rai èn a sma di arki den kan kisi têgo libi.