„Wiki” den sma di e sribi
„Wiki” den sma di e sribi
„Unu sabi taki a yuru doro kaba taki un musu wiki.”—ROM. 13:11.
YU KAN TYARI DISI KON NA KRIN?
Fu san ede a prenspari taki Kresten tan na ai?
Fu san ede wi musu arki san sma e taki èn fu san ede wi musu pruberi fu frustan san den abi fanowdu?
Fu san ede wi musu sori switifasi nanga safri-ati na ini a preikiwroko?
1, 2. Fu sortu sribi furu sma musu wiki?
IBRI yari dusundusun sma e dede fu di den e dyonko noso sribi srefi te den e rèi wagi. Trawan e lasi den wroko fu di den no e wiki biten fu go na wroko noso fu di den e fadon na sribi te den e wroko. Ma wan tra sortu sribi de di moro ogri. Dati na te wan sma e sribi na agersi fasi. Bijbel e warskow wi gi a sribi disi te a e taki: „Koloku fu a sma di tan na ai.”—Openb. 16:14-16.
2 Furu sma e sribi na agersi fasi aladi a bigi dei fu Yehovah e kon krosibei moro nanga moro. Son kerki fesiman e taki srefi dati den sma di e go na kerki e sribi. Ma o ten wi kan taki dati wan sma e sribi na agersi fasi? Fu san ede a prenspari gi tru Kresten taki den tan na ai? Fa wi kan wiki den sma di e sribi?
O TEN WI KAN TAKI DATI WAN SMA E SRIBI NA AGERSI FASI?
3. O ten yu ben o taki dati wan sma e sribi na agersi fasi?
3 Nofo tron a de so taki sma di e sribi no e du noti. Ma te wan sma e sribi na agersi fasi, a kan taki a e du furu sani, ma a no e du sani di kan meki taki Gado feni en bun. Kande a e poti ala prakseri na den broko-ede fu na aladei libi, kande a wani abi soso prisiri na ini a libi, noso kande a e du ala san a man fu kisi biginen nanga gudu. A e poti so furu prakseri na den sani disi, taki pikinmoro a no abi ten gi sani di abi fu du nanga Gado. Ma den sma di de na ai e frustan taki wi e libi „na ini den lasti dei”. Dati meki den e du ala muiti fu du san Gado wani.—2 Petr. 3:3, 4; Luk. 21:34-36.
4. San Paulus ben wani sori di a taki: „Meki wi no sribi go doro leki fa den tra sma e sribi”?
4 Leisi 1 Tesalonikasma 5:4-8. Dyaso na apostel Paulus taigi Kresten fu no „sribi go doro leki fa den tra sma e sribi”. San a ben wani taki nanga den wortu disi? Wi e „sribi go doro” te wi no e du san Yehovah feni bun èn te wi e du san a no feni bun. Wan tra fasi fa wi kan „sribi go doro”, na te wi no e hori na prakseri taki heri esi Yehovah o figi ala ogri sma puru na grontapu. Wi musu luku bun taki den ogri sma no abi krakti na wi tapu, so taki wi o denki èn du leki den.
5. Sortu sani den sma di e sribi na agersi fasi, e denki?
5 Son sma e denki taki wan Gado no de di o aksi den frantwortu fu den sani di den e du (Ps. 53:1). Sonwan e denki taki Gado no e poti prakseri na libisma, sobun den no abi fu poti prakseri na en tu. Trawan e denki taki te den de na ini wan kerki, dan den o de mati fu Gado. Ala den sma disi e sribi èn den musu wiki now. Fa wi kan yepi den?
WI SREFI MUSU TAN NA AI
6. Fu san ede Kresten musu du ala muiti fu tan na ai?
6 Efu wi wani wiki trawan, dan wi srefi musu de na ai. Sobun, fa wi kan tan na ai? Wi musu sorgu taki wi no tyari wisrefi leki den sma di e sribi na agersi fasi. Bijbel e taki dati den sma di e sribi na agersi fasi e du ’sani di sma gwenti du na ini a dungru’. Den sani disi na den bradyari fesa di sma e hori, drungufasi, hurudu, sani di sma e du sondro fu syen, feti, nanga dyarusu. (Leisi Romesma 13:11-14.) A no makriki fu no de leki den sma na wi lontu. A de tumusi prenspari fu tan na ai. Te wan sma e rèi wan wagi, a musu hori na prakseri ala ten taki a kan dede efu a fadon na sribi. We, a de moro prenspari gi wan Kresten fu hori na prakseri taki a no musu fadon na sribi na agersi fasi, noso a o dede tu!
7. San kan pasa efu wi no e denki bun fu den sma na ini a kontren pe wi e preiki?
7 Wan Kresten kan bigin denki taki nowan sma na ini a kontren pe a e preiki o arki a bun nyunsu èn taki den no o kenki (Odo 6:10, 11). Kande a e prakseri: ’Efu nowan sma o arki a bun nyunsu, dan fu san ede mi musu du someni muiti fu yepi den?’ A tru taki furu sma e sribi now na agersi fasi, ma a libi fu den kan kenki èn a denki fu den kan kenki tu. Sonwan fu den e wiki èn den e arki a bun nyunsu. Wi kan yepi den te wi srefi e tan na ai. Fu man wiki den wi kan suku nyun fasi fu tyari a Kownukondre boskopu gi den na wan fasi di o hari den prakseri. Fu man tan na ai, wi musu hori na prakseri fu san ede a wroko fu wi de so prenspari.
FU SAN EDE A PREIKIWROKO FU WI DE SO PRENSPARI?
8. Fu san ede a preikiwroko fu wi de so prenspari?
8 Hori na prakseri ala ten taki a preikiwroko fu wi e gi Yehovah grani, awinsi sma no wani arki. Boiti dati, Yehovah e meki wi preiki, so taki sani kan pasa soleki fa a abi na prakseri. Heri esi Gado o krutu sma. Te a o du dati, a o luku efu den arki a bun nyunsu noso efu den no du dati. Den wan di no arki a bun nyunsu o dede (2 Tes. 1:8, 9). Son Kresten e denki taki a no prenspari fu preiki fayafaya, fu di „Gado sa gi wan opobaka na den bun sma èn na den sma di no bun” (Tori 24:15). Ma disi na wan fowtu denki. Gado Wortu e sori taki den wan di de leki „bokoboko” o „dede fu têgo”. Na fu di Gado abi sari-ati, meki a e seni wi fu go preiki. Na so a e gi sma na okasi fu kenki den libi èn fu kisi „têgo libi” (Mat. 25:32, 41, 46; Rom. 10:13-15). Efu wi no preiki, dan fa sma o kisi na okasi fu arki a bun nyunsu di kan meki den tan na libi?
9. Fa yu nanga tra sma kisi wini fu di yu e preiki a bun nyunsu?
9 A preikiwroko e tyari wini gi wi tu. (Leisi 1 Timoteyus 4:16.) Te yu e taki fu Yehovah èn fu en Kownukondre, dan yu bribi nanga yu lobi gi Gado e kon moro tranga, a no so? A preikiwroko yepi yu fu tron wan moro bun Kresten, a no so? A no de fu taki dati a preikiwroko e gi yu prisiri, fu di dati na wan fasi fa yu kan sori lobi gi Gado. Furu sma di kisi a grani fu studeri Bijbel nanga trawan, prisiri fu si fa Gado yeye yepi den Bijbelstudie disi fu kisi wan moro bun libi.
BUN PREIKIMAN DE NA AI
10, 11. (a) Fa Yesus nanga Paulus sori taki den ben de na ai fu si san sma abi fanowdu? (b) Sori fa wi kan tron moro bun preikiman te wi de na ai fu si san sma abi fanowdu.
10 Difrenti fasi de fa wi kan hari sma prakseri nanga a bun nyunsu. Sobun, wi musu de na ai na ini a preikiwroko. Yesus na a moro bun eksempre gi wi. A ben sabi taki wan Fariseiman ati bron aladi a Fariseiman no taki noti. Yesus ben man si tu taki wan uma di ben de wan sondari ben abi berow trutru. A ben sabi tu taki wan uma di en masra dede ben poti ala san a ben abi na ini wan monikisi na a tempel (Luk. 7:37-50; 21:1-4). Yesus ben man yepi sma fu di a ben sabi san den ben abi fanowdu. A ben man du disi na wan heri bun fasi fu di a no ben abi sondu. Ma disi no wani taki dati wi leki futuboi fu Gado di abi sondu, no man si san trawan abi fanowdu. Na apostel Paulus na wan moi eksempre fu disi. A ben e preiki na difrenti fasi fu man hari a prakseri fu difrenti sma di ben abi difrenti denki.—Tori 17:22, 23, 34; 1 Kor. 9:19-23.
11 Neleki Yesus nanga Paulus, wi musu de na ai èn wi musu man si san trawan abi fanowdu, bika na so wi o sabi tu fa fu hari den prakseri. Fu eksempre, te yu e go na wan sma oso fu taki nanga en, pruberi fu si sani di kan meki yu sabi fu sortu kulturu a de, san a lobi, efu a trow noso efu a no trow, noso efu a abi pikin. Efu yu si taki a ben e du wan sani na a momenti dati, dan yu kan taki wan sani fu dati, ma du dati na wan lespeki fasi.
12. San wi musu hori na prakseri te wi e taki nanga makandra na ini a preikiwroko?
12 Wan sma di de na ai no e luku sani di ben o puru en prakseri na san a e du. Te wi de na ini a preikiwroko wi kan kisi deki-ati te wi e taki nanga a sma di e wroko nanga wi. Ma wi musu hori na prakseri taki wi e go na ini a preikiwroko fu preiki gi sma (Preik. 3:1, 7). Sobun, te wi de na ini a preikiwroko wi musu luku bun taki den takimakandra fu wi no e puru wi prakseri na a preikiwroko. Wan bun sani di kan meki taki wi tan poti prakseri na a preikiwroko, na fu taki fu wan moi sani di wi ben sa wani fruteri den sma di wani arki. A kan de wan bun sani fu abi wan cèl na ini a preikiwroko, ma wi musu sorgu taki te wan sma bèl wi, a no e bruya a takimakandra di wi abi nanga den sma na den oso.
ARKI DEN SMA ÈN POTI PRAKSERI NA DEN
13, 14. (a) Fa wi kan kon sabi san e hari wan sma prakseri? (b) San yu kan taki fu meki sma poti prakseri na a boskopu fu Bijbel?
13 Preikiman di de na ai e arki bun te den e taki nanga den sma di den e miti. Sortu aksi yu kan poti gi den sma, so taki den e fruteri yu san den e denki? Kande a sma e broko en ede fu di someni kerki de, fu di ogridu kon lai na ini a birti, noso fu di den tiriman no man tiri a kondre na wan bun fasi. Kande yu kan yepi sma fu kon sabi Gado fu di yu e fruteri den fu a moi fasi fa den sani na grontapu meki. Noso kande yu kan sori den fa den rai fu Bijbel kan yepi den na ini den libi. Pikinmoro ala sma, srefi den sma di no e bribi na ini Gado, wani sabi wan sani di abi fu du nanga begi. Furu sma e aksi densrefi efu wan sma de di e arki begi. Kande trawan abi aksi soleki: Gado e arki ala begi? Efu a no e arki alamala, dan san wi musu du fu a arki wi?
14 Wi kan leri fa fu bigin wan takimakandra, te wi e luku fa den preikiman di abi ondrofeni e taki na ini a preikiwroko. Luku fa den e poti aksi sondro fu meki a sma firi fruferi. Luku fa den e taki èn fa den e poti den fesi fu sori taki den e pruberi fu frustan a sma.—Odo 15:13.
DU SANI NANGA KONI ÈN SORI SWITIFASI
15. Fu san ede wi musu sori switifasi na ini a preikiwroko?
15 Te yu e sribi dipi, yu lobi en te sma e wiki yu? Furu sma no lobi en te wan sma wiki den wantronso. Den lobi en moro te sma e wiki den safrisafri èn na wan switi fasi. Na so wi musu du tu te wi wani wiki den wan di e sribi na agersi fasi. Fu eksempre, efu wan sma ati bron te yu kon preiki gi en, dan san na a moro bun sani fu du nofo tron? Sori switifasi, sori taki yu e frustan fa a e firi èn waka gowe safrisafri (Odo 15:1; 17:14; 2 Tim. 2:24). Efu yu sori switifasi, dan a kan taki a o wani arki te Kotoigi kon na en oso wan tra leisi.
16, 17. Fa wi kan preiki na wan koni fasi?
16 Son tron wi man taki go doro nanga wan sma, aladi a taki kande taki a no wani sabi noti noso taki a abi en eigi bribi. Kande a e taki disi fu di dati na a moro makriki fasi fu tapu a takimakandra. Ma na wan koni èn switi fasi yu kan poti wan aksi gi en di o hari en prakseri, so taki a o wani sabi moro fu a Bijbel boskopu di wi e tyari.—Leisi Kolosesma 4:6.
17 Son tron te wi miti sma di e taigi wi taki den no abi ten fu arki, a moro bun fu sori lespeki gi den èn fu gowe. Ma son leisi yu kan luku efu toku yu man taki wan sani syatu fu hari en prakseri. Son brada nanga sisa man tyari wan Bijbel boskopu na ini wán miniti nomo. Den e leisi wan tekst èn den e poti wan moi aksi di o poti a sma na prakseri-broki, so taki den kan drai go baka wan tra leisi fu gi piki tapu na aksi dati. A syatu fasi disi fu tyari wan Bijbel boskopu e wroko so bun, taki son tron a sma e teki pikinso ten fu arki go doro. Kande yu kan pruberi fu du disi te yu miti so wan situwâsi na ini a preikiwroko.
18. San wi kan du fu preiki moro bun na iniwan okasi di wi kisi?
18 Te wi e sreka wisrefi fu preiki na iniwan okasi, dan wi o man hari a prakseri fu den sma di wi e miti na ini wi aladei libi, so taki den arki a bun nyunsu. Furu brada nanga sisa e sorgu ala ten taki den abi wan traktaat, wan tijdschrift noso wan tra sani na ini den saka noso den tas. Kande den prakseri tu sortu Bijbeltekst den sa wani leisi gi wan sma efu den kisi na okasi fu du dati. Yu kan aksi a dienst-opziener noso wan pionier fu a gemeente fa yu kan sreka yusrefi fu preiki na den sortu okasi disi.
WIKI YU FAMIRI NA WAN SWITI FASI
19. Fu san ede wi musu tan pruberi fu yepi wi famiri?
19 A no de fu taki dati wi alamala wani yepi wi famiri fu gi yesi na a bun nyunsu (Yos. 2:13; Tori 10:24, 48; 16:31, 32). Efu den no ben wani arki a fosi leisi di wi fruteri den a bun nyunsu, dan kande wi no wani pruberi moro fu taki nanga den. Kande wi e denki taki den no o kenki, awinsi san wi taki noso awinsi san wi du. Ma son leisi te sani kenki na ini den libi, a kan taki den kenki prakseri tu. Noso kande yu leri fa fu hori moro bun Bijbel takimakandra, so taki den o arki yu te yu o taki nanga den now.
20. Te wi e taki nanga den famiri fu wi, dan fa wi kan sori taki wi e lespeki a fasi fa den e denki?
20 Wi musu lespeki a fasi fa wi famiri e denki (Rom. 2:4). Wi musu taki nanga den neleki fa wi ben o taki nanga wan sma na ini a preikiwroko. Taki na wan switi fasi èn nanga lespeki. A no ala ten yu abi fu taki nanga yu famiri fu Bijbel. A fasi fa yu e tyari yusrefi kan sori tu fa den leri fu Bijbel yepi yu (Ef. 4:23, 24). Meki den si krin taki a libi fu yu kon moro bun fu di yu kisi leri fu Yehovah (Yes. 48:17). Meki yu famiri si fa wan Kresten musu libi trutru.
21, 22. Fruteri wan ondrofenitori di e sori o prenspari a de fu tan du muiti fu yepi wi famiri leri sabi Yehovah.
21 A no langa pasa wan sisa skrifi: „Ala ten mi pruberi fu preiki gi den 13 brada nanga sisa fu mi. Mi e taki nanga den èn mi e tyari misrefi na so wan fasi, taki den man si sortu wini Bijbel e tyari gi sma. Ala yari mi e skrifi brifi gi ibriwan fu den. Ma toku sowan 30 yari, mi wawan ben de a wan-enkri Kotoigi na ini mi famiri.”
22 A sisa taki tu: „Wan dei mi bèl wan sisa fu mi di ben e libi bun fara. A taigi mi taki a ben aksi a fesiman fu en kerki fu studeri Bijbel nanga en, ma noiti a du dati. Di mi taigi en taki mi ben o breiti fu yepi en, a taki: ’A bun, ma meki mi taigi yu na fesi: Mi no o tron Yehovah Kotoigi noiti.’ Baka di mi seni a buku San Bijbel e leri wi trutru? gi en, mi ben e bèl en ibri wiki fu yere fa a ben feni en. Ma a no ben opo a buku ete fu leisi en. Te fu kaba, mi taigi en meki a go teki a buku. Sowan 15 miniti langa wi leisi èn taki fu den Bijbeltekst di ben skrifi na ini a buku. Baka di mi du disi wan tu leisi, a ben wani studeri moro langa leki 15 miniti. Bakaten na ensrefi bigin bèl mi fu studeri. Son leisi a ben e bèl fruku mamanten fosi mi komoto na bedi srefi, noso a ben bèl tu leisi wan dei fu studeri. Baka wan yari a dopu èn a yari baka dati a bigin pionier.”
23. Fu san ede wi musu tan pruberi fu wiki den sma di e sribi na agersi fasi?
23 Fu wiki sma di e sribi na agersi fasi, na wan sani di wi musu leri fu du èn wi musu tan du muiti fu du disi moro bun. Safri-ati sma de ete di e arki te wi du muiti fu wiki den. Te yu luku a nomru fu sma di e dopu ibri yari, yu kan taki dati moro leki 20.000 sma e dopu ibri mun fu tron wan Kotoigi fu Yehovah. Sobun, meki wi gi yesi na a rai di Paulus gi wi brada Arkepus di ben e libi na ini a fosi yarihondro. A ben taigi en: „Yu musu du a wroko di yu ben agri fu du leki bakaman fu Masra èn yu musu klari en tu” (Kol. 4:17). A tra artikel o yepi wi alamala fu frustan san a wani taki fu preiki fayafaya.
[Aksi fu a tori disi]
[Faki na tapu bladzijde 13]
FA YU KAN TAN NA AI
▪ Tan du Gado wani fayafaya
▪ No du sani di sma e du na ini dungru
▪ Hori na prakseri sortu problema wan sma kan kisi te a e sribi noso dyonko na agersi fasi
▪ Hori na prakseri taki kande sma na ini a kontren pe yu e preiki wani arki a bun nyunsu ete
▪ Suku nyun fasi fu preiki gi sma
▪ Hori na prakseri o prenspari a preikiwroko fu yu de
