„Yu kan meki wan fowtow gi wi?”

Baka a di fu tu dei fu wan distrikt kongres, Josué di e tan na a Betel fu Meksikow go luku a foto Querétaro nanga wan tu mati. Javier nanga Maru, wan trowpaar fu Kolombia di ben kon drape nanga fakansi, aksi Josué fu meki wan fowtow fu den. Fu di Josué nanga den Kotoigi mati fu en ben weri moi krosi nanga den lapelkarta, meki Javier nanga Maru aksi den efu den ben komoto na wan spesrutu presi. Josué fruteri den taki den ben go na wan distrikt kongres fu Yehovah Kotoigi èn a gi den wan kari fu kon arki den lezing fu sonde.

Ma Javier nanga Maru ben e syen pikinso fu go, fu di den no ben abi krosi di fiti gi so wan okasi. Ma toku Josué gi den a nen fu en nanga a telefon nomru fu a bijkantoro pe a ben wroko.

Sowan fo mun baka dati, Josué skreki di a kisi boskopu fu Javier wan dei. Javier nanga en wefi Maru ben go na a kongres èn now den ben wani taki wan Yehovah Kotoigi kon na den na Meksikow City pe den ben e tan na a ten dati. A no langa baka dati, Javier nanga Maru bigin studeri Bijbel èn wantewante den bigin go na den konmakandra tu. Baka tin mun den tron preikiman. Bakaten, Javier nanga Maru ben musu froisi go na Toronto, na ini Kanada, ma den tan go na fesi èn te fu kaba den dopu.

Bakaten, Josué kisi wan brifi fu Javier pe a fruteri en san meki taki a teki a tru bribi. Javier skrifi: „Fosi a kongres, mi nanga mi wefi ben taki dati wi ben abi Gado fanowdu na ini wi libi. Di wi si fa unu ben weri so moi, wi prakseri taki a ben musu fu de so, taki na wan spesrutu konmakandra unu ben go. Na a kongres wi fruwondru trutru di wi si fa sma sori wi switifasi, fa den suku sidonpresi gi wi, fa den yepi wi fu suku den Bijbeltekst, èn fa den sma drape ben e tyari densrefi. A gersi leki den no ben e span taki wi ben weri fakansi krosi.”

Iya, Josué si trutru taki Kownu Salomo ben abi leti di a taki: „Sai yu siri na mamanten èn no meki yu anu rostu fosi neti tapu, bika yu no sabi pe a siri o gro. A kan de dyaso noso a kan de drape, noso a kan taki a o gro bun na ala tu presi” (Preik. 11:6). Yu kan sai siri tu te yu e gebroiki ibri okasi fu fruteri sma fu wan kongres noso wan publikitaki di o hori. Kande Yehovah wani gebroiki yu fu hari den wan di e angri fu kisi leri fu en, neleki Javier nanga Maru.​—Yes. 55:1.

[Prenki na tapu bladzijde 32]

Fu kruktu-anusei go na reti-anusei: Alejandro Voeguelin, Maru Pineda, Alejandro Pineda, Javier Pineda, nanga Josué Ramírez na a bijkantoro fu Meksikow