Tan dini Yehovah nanga yu heri ati
Tan dini Yehovah nanga yu heri ati
„Mi manpikin, kon sabi a Gado fu yu papa. Dini en nanga yu heri ati.”—1 KRON. 28:9.
SUKU DEN PIKI FU DEN AKSI DISI:
San na a agersi ati?
San na wan fasi fa wi kan ondrosuku wi ati?
Fa wi kan dini Yehovah nanga wi heri ati?
1, 2. (a) Sortu pisi fu a libisma skin Bijbel e gebroiki na agersi fasi, moro leki den tra pisi fu a skin? (b) Fu san ede a prenspari gi wi fu kon sabi san na a agersi ati?
FURU TRON Gado Wortu e gebroiki den pisi fu wan libisma skin na agersi fasi. Fu eksempre, a famiri-edeman Yob ben taki: „Mi ben de den ai fu den breniwan, èn den futu fu den lanwan.” Kownu Salomo taki: „Bun nyunsu e meki bonyo kon fatu.” Yehovah taigi Esekièl: „Mi meki a fesi-ede fu yu tron leki dyamanti.” Yesus ben taki: „Efu yu reti-anu e meki yu sondu, dan koti en puru èn trowe en gowe.”—Yob 29:15; Odo 15:30; Esek. 3:9; Mat. 5:30.
2 Ma wan pisi fu wi skin de di Bijbel e gebroiki na agersi fasi, moro leki den tra pisi fu a skin. Hana, wan anbegiman fu Gado, ben taki fu dati na ini a begi fu en. A taki: „Mi ati e prisiri nanga Yehovah” (1 Sam. 2:1). Fu taki en krin, Bijbel skrifiman taki fu na ati pikinmoro wan dusun leisi, èn furu tron den gebroiki en na agersi fasi. A prenspari gi wi fu kon sabi san na a agersi ati, fu di Bijbel e taki dati wi musu kibri en.—Leisi Odo 4:23.
SAN NA A AGERSI ATI?
3. Fa wi kan kon sabi san na a agersi ati di Bijbel e taki fu en? Gi wan eksempre.
3 Na ini Gado Wortu a no skrifi krin san na a agersi ati, ma toku wi kan kon sabi san a wani taki. Fa so? Meki wi teki leki eksempre, wan bon di abi dusundusun wiwiri. Te yu e tanapu krosibei fu a bon, dan yu kan si wan tu wiwiri nomo, ma yu no o si fa a heri bon tan. Ma efu yu e tanapu moro fara fu a bon, dan yu o man si fa a heri bon tan. Na so a de tu, taki te wi e luku wán tekst nomo di e taki fu na agersi ati, dan wi no o sabi krin san a wani taki trutru. Ma efu wi poti prakseri na den furu presi pe a wortu „ati” skrifi na ini Bijbel, dan wi o frustan san a wani taki. Sobun, san na a agersi ati?
4. (a) San a wortu „ati” wani taki? (b) San den wortu fu Yesus na Mateyus 22:37 wani taki?
4 Bijbel skrifiman e gebroiki a wortu „ati” fu sori fa wan sma de trutru. A wortu abi fu du nanga den sani di wan sma wani, en prakseri, a fasi fa a de, den maniri fu en, den sani di a man du, den sani di a abi na prakseri fu du èn fu san ede a wani du den. (Leisi Eksodes 25:2; Odo 13:12; Tori fu den apostel 2:26.) Wan buku taki dati a wortu disi abi fu du nanga „a heri sma di wi de na inisei”. Ma son leisi a wortu „ati” abi fu du nanga wan tu fu den sani disi nomo. Fu eksempre, Yesus ben taki: „Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan” (Mat. 22:37). Na ini a tekst disi, a wortu „ati” abi fu du nanga den firi fu wan sma èn nanga den sani di a wani trutru. Yesus e kari na ati, a libi, nanga a frustan aparti fu sori taki lobi gi Gado a no wan firi nomo, ma a musu de krin fu si tu na a fasi fa wi e libi èn na a fasi fa wi e denki (Yoh. 17:3; Ef. 6:6). Ma te a wortu „ati” wawan skrifi, dan a abi fu du nanga a fasi fa wan sma de trutru.
FU SAN EDE WI MUSU KIBRI WI ATI
5. Fu san ede wi wani du ala san wi man fu dini Yehovah nanga wi heri ati?
5 Kownu David ben memre Salomo: „Mi manpikin, kon sabi a Gado fu yu papa. Dini en nanga yu heri ati èn nanga prisiri, bika Yehovah e ondrosuku na ati fu ala sma èn a sabi ibri sani di wan sma e prakseri fu du” (1 Kron. 28:9). Iya, Yehovah e ondrosuku na ati fu ala sma, sosrefi a di fu wi (Odo 17:3; 21:2). Soso te a lobi san a e si na ini wi ati, wi o man de mati fu en èn sani o go bun gi wi na ini a ten di e kon. Sobun, a bun taki wi e gi yesi na a rai fu David fu du ala san wi man fu dini Yehovah nanga wi heri ati.
6. San wi musu hori na prakseri efu wi wani tan dini Yehovah nanga wi heri ati?
6 Nownow kaba wi leki Kotoigi fu Yehovah e sori taki wi wani dini en nanga wi heri ati, fu di wi e wroko fayafaya gi en. Ma wi e frustan tu taki na ogri grontapu fu Satan èn den sondu firi fu wi kan abi furu krakti na wi tapu. Disi kan meki taki safrisafri wi no o dini Yehovah nanga wi heri ati moro (Yer. 17:9; Ef. 2:2). Efu wi no wani taki disi pasa, dan wi musu ondrosuku wi ati doronomo. Fa wi kan du dati?
7. San kan sori san de na ini na ati fu wan sma?
7 Neleki fa yu no man si na ati fu wan bon, na so yu no man si na ati fu wan sma. Toku Yesus ben taki na ini a Bergitaki fu en taki yu man si na den froktu fu wan bon efu a bon gosontu noso efu a siki. Na so den sani di sma e du e sori fa den ati de trutru (Mat. 7:17-20). Meki wi poti prakseri na wan fu den sani di sma e du di kan sori san de na ini den ati.
WAN FASI FA WI KAN ONDROSUKU WI ATI
8. Fa Mateyus 6:33 kan yepi wi fu kon sabi san de na ini wi ati?
8 Na ini a Bergitaki, Yesus taigi den sma tu san den musu du fu sori taki den wani dini Yehovah nanga den heri ati. A taki: „Fu dati ede, tan suku fosi a Kownukondre nanga Gado en retidu, dan unu o kisi ala den tra sani tu” (Mat. 6:33). Den sani di wi e poti na a fosi presi na ini wi libi e sori san de na ini wi ati trutru. Den e sori san wi wani, san wi e denki èn san wi e prakseri fu du na ini a ten di e kon. Sobun, wan fasi fa wi kan sabi efu wi e dini Gado nanga wi heri ati, na fu prakseri bun sortu sani wi e poti na a fosi presi na ini wi libi.
9. Sortu kari Yesus gi wan tu man, èn fa a piki fu den sori san ben de na ini den ati?
9 Meki wi luku wan sani di pasa syatu baka di Yesus gi den bakaman fu en a rai fu „tan suku fosi a Kownukondre”. Wi o si fa den sani di sma e poti na a fosi presi na ini den libi, e sori san de na ini den ati trutru. Lukas fruteri taki Yesus „ben de nomonomo fu go na Yerusalem” aladi a ben sabi heri bun san ben o miti en drape. Di en nanga den apostel fu en „ben de na pasi”, Yesus miti wan tu man èn a gi a kari disi: „Tron wan bakaman fu mi.” Den man dati ben wani teki a kari fu Yesus, ma den ben wani du wan tu tra sani fosi. Wan fu den man piki: „Gi mi na okasi fosi fu go beri mi papa.” Wan trawan taki: „Masra, mi o waka na yu baka, ma gi mi na okasi fosi fu taki den sma na ini mi oso adyosi” (Luk. 9:51, 57-61). Wi kan si krin taki Yesus ben de heri tra fasi leki den man disi. Yesus ben de nomonomo fu du a wani fu Gado. Ma den sani di den man disi taki, e sori taki a kari fu Yesus no ben de so prenspari gi den. Den poti den eigi wani na a fosi presi. A de krin taki den no ben de klariklari fu dini Gado nanga den heri ati.
10. (a) San furu sma na ini a ten disi du di den kisi a kari fu tron bakaman fu Yesus? (b) Sortu syatu agersitori Yesus fruteri?
10 Wi de tra fasi leki den man dati. Wi teki a kari fu Yesus fu de bakaman fu en èn now wi e dini Yehovah ibri dei. Na a fasi disi wi e sori fa wi e denki trutru fu Yehovah. Ma aladi wi e dini Yehovah fayafaya, wi musu hori na prakseri taki wi musu kibri wi ati. Gi san wi musu kibri wi ati? Meki wi luku san Yesus taigi den man di no teki a kari fu tron en disipel. A gi den a warskow disi: „Efu wan sma e bigin plugu a gron èn a e luku go na den sani di de na en baka, dan a sma dati no fiti gi a Kownukondre fu Gado” (Luk. 9:62). San wi kan leri fu na agersitori disi?
WI E „TAN DU BUN”?
11. San pasa nanga a wroko fu a wrokoman fu Yesus en agersitori èn fu san ede?
11 Meki wi prakseri pikinso moro fu na agersitori fu Yesus, so taki wi kan frustan moro bun san a ben wani leri wi. A wrokoman e plugu a gron. Ma aladi a e du dati, a e tan prakseri fa a de na en oso pe den famiri nanga mati fu en e prisiri. A e prakseri a nyanyan, a poku, èn a lafu di den e lafu nanga makandra. Efu a ben de na oso, a no ben o de na ini a faya son e wroko. A wani den sani disi trutru. Baka te a plugu wan heri pisi fu a gron, a e angri srefisrefi gi den prisiri sani dati. Ne a e drai luku „den sani di de na en baka”. Aladi furu wroko musu du ete teleki a heri gron prani, a wrokoman no de nanga ala en prakseri na a wroko. Dati meki a no man du en wroko bun moro. A no de fu taki dati a basi fu a wrokoman no breiti, bika a wrokoman no e du en wroko bun.
12. Fa wan Kresten na ini a ten disi kan de leki a wrokoman na ini na agersitori fu Yesus?
12 Prakseri now fa wan srefi sortu sani kan pasa na ini a ten disi. A wrokoman na ini na agersitori fu Yesus kan de iniwan Kresten na ini a ten disi. A gersi leki a e go bun nanga en na ini a tru anbegi, ma a no e kibri en ati. Meki wi teki leki eksempre, wan brada di e go na den konmakandra èn di e go na ini a preikiwroko. Aladi a e du den sani dati, a e tan prakseri wan tu sani fu a grontapu disi di a lobi. Na ini en ati, a wani den sani dati trutru. A brada e dini Gado wan tu yari kaba, ma now a wani den sani fu grontapu so te, taki a e drai luku „den sani di de na en baka”. Aladi furu de fu du ete na ini a diniwroko, a e meki tra sani puru en prakseri èn a no e dini Gado so bun moro leki fosi (Fil. 2:16). Yehovah, „a Masra fu a kotiwroko” e sari te wan fu den futuboi fu en no e du en wroko so bun moro.—Luk. 10:2.
13. San a wani taki fu dini Yehovah nanga wi heri ati?
13 A de krin san Yesus ben wani leri wi. Fu dini Yehovah nanga wi heri ati, no wani taki nomo dati wi e go doronomo na den gemeente konmakandra èn na ini a preikiwroko (2 Kron. 25:1, 2, 27). Efu dipi na ini en ati wan Kresten e tan lobi „den sani di de na en baka”, sobun, efu a e tan lobi son grontapu sani, dan a kan lasi en matifasi nanga Yehovah te fu kaba (Luk. 17:32). Soso te wi e ’tegu trutru gi ogri èn e tan du bun’, wi o de sma di „fiti gi a Kownukondre fu Gado” (Rom. 12:9; Luk. 9:62). Awinsi a gersi leki son sani fu a grontapu fu Satan bun noso switi fu du, wi musu sorgu taki noti no tapu wi fu dini Gado nanga wi heri ati.—2 Kor. 11:14; leisi Filipisma 3:13, 14.
TAN NA AI!
14, 15. (a) Fa Satan e pruberi fu meki wi lasi a faya di wi abi gi a diniwroko fu Yehovah? (b) Fruteri wan agersitori fu sori fa Satan e pruberi fu kori wi.
14 Fu di wi lobi Yehovah, meki wi gi wisrefi abra na en. Furu fu wi sori bun langa kaba taki wi wani dini Yehovah trutru nanga wi heri ati. Ma Satan no kaba nanga wi. A wani abi krakti tapu wi ati ete (Ef. 6:12). A no de fu taki dati a sabi taki wi no o gowe libi Yehovah wantronso. Dati meki Satan e gebroiki „a grontapu disi” fu kori wi, so taki safrisafri wi e lasi a faya fu dini Gado. (Leisi Markus 4:18, 19.) Fu san ede Satan man kisi furu sma na a fasi disi?
15 Wan agersitori kan yepi wi fu piki na aksi disi. Kon meki wi taki dati yu e sidon e leisi wan buku na wan lampu di e skèin krin. Ma wantronso ala sani kon dungru. Yu sabi taki a lampu bron, sobun, yu e poti wan nyun lampu èn leti de baka na ini a kamra. A tra neti, yu e leisi baka na a nyun lampu di yu poti. Ma san yu no sabi, na taki wan sma kenki a nyun lampu di yu ben poti. A poti wan tra lampu di e skèin pikinso moro swaki. Ma kande yu no man si srefi taki a leti no e skèin so krin moro. A tra dei a sma e kenki a lampu dati baka èn a e poti wan tra lampu di swaki pikinso moro a wan di a ben poti kaba. Te now ete yu no e si taki a leti kon moro swaki. Fu san ede? Fu di a leti kon swaki safrisafri. Na so a de tu taki a grontapu fu Satan kan abi krakti na wi tapu, so taki safrisafri wi e lasi a faya di wi ben abi gi a diniwroko fu Yehovah. Efu wan Kresten no de na ai, a no e si taki disi e pasa nanga en èn Satan kisi en kaba.—Mat. 24:42; 1 Petr. 5:8.
BEGI PRENSPARI SREFISREFI
16. San wi kan du so taki Satan no kisi wi nanga den triki fu en?
16 San wi kan du so taki Satan no kisi wi nanga den triki fu en èn so taki wi tan dini Yehovah nanga wi heri ati? (2 Kor. 2:11) A prenspari srefisrefi fu begi. Paulus gi en Kresten brada nanga sisa a deki-ati fu ’tanapu kánkan te Didibri kon nanga den triki fu en’. Baka dati a gi den a rai disi: „Tan begi na ala sortu fasi èn begi fayafaya na ibri okasi.”—Ef. 6:11, 18; 1 Petr. 4:7.
17. San wi e leri fu a fasi fa Yesus ben e begi?
17 Fu man kakafutu gi Satan, wi musu teki na eksempre fu Yesus di ben wani dini Yehovah nanga en heri ati. Luku san Lukas skrifi fu a fasi fa Yesus begi a neti bifo a dede: „Sani ben kon so hebi gi en, taki a bigin begi nanga moro faya” (Luk. 22:44). Yesus ben abi a gwenti kaba fu begi fayafaya. Ma na a okasi disi a begi „nanga moro faya”, fu di disi ben de a moro hebi tesi di a ben o kisi na grontapu. Ne Yehovah piki a begi fu en. Na eksempre fu Yesus e sori taki son leisi wi kan begi nanga moro faya leki fa wi gwenti. Sobun, te wi e kisi moro hebi tesi èn te Satan e kon nanga moro hebi triki, dan wi musu begi nanga moro faya meki Yehovah kibri wi.
18. (a) San wi musu aksi wisrefi te a abi fu du nanga begi, èn fu san ede? (b) San na wan tu sani di kan abi krakti tapu wi ati èn fa dati kan pasa? (Luku a faki na tapu bladzijde 16.)
18 San o de a bakapisi fu den fayafaya begi fu wi? Paulus taki: „Begi Gado ala ten, begi en fayafaya èn taki en tangi tu. Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati” (Fil. 4:6, 7). Iya, efu wi wani tan dini Yehovah nanga wi heri ati, dan wi musu begi fayafaya èn wi musu begi furu (Luk. 6:12). Sobun, aksi yusrefi: ’Mi e begi fayafaya? Mi e begi furu?’ (Mat. 7:7; Rom. 12:12) A piki fu yu e sori efu trutru yu wani dini Yehovah nanga yu heri ati.
19. San yu o du fu tan dini Yehovah nanga yu heri ati?
19 Na ini na artikel disi wi si taki den sani di wi e poti na a fosi presi na ini wi libi, e sori fa na ati fu wi de. Wi musu sorgu taki noti tapu wi fu dini Yehovah nanga wi heri ati. Wi no musu meki den sani di wi libi na baka noso den triki fu Satan abi krakti na wi tapu. (Leisi Lukas 21:19, 34-36.) Fu dati ede, neleki David wi e tan begi Yehovah fu yepi wi fu dini en ’nanga wi heri ati’.—1 Kron. 29:19.
[Aksi fu a tori disi]
[Faki na tapu bladzijde 16]
DRI SANI DI KAN ABI KRAKTI TAPU WI ATI
Neleki fa wi kan du son sani fu abi wan gosontu ati, na so wi kan du sani tu fu meki wi agersi ati tan gosontu. Luku den dri prenspari sani disi:
1 Nyanyan: Efu wi wani hori wi trutru ati gosontu, dan wi musu nyan gosontu nyanyan. Na so a de tu taki efu wi wani hori wi agersi ati gosontu, dan na wan agersi fasi wi musu nyan gosontu nyanyan tu. Disi wani taki dati wi musu studeri Bijbel doronomo, wi musu denki dipi fu san wi leri èn wi musu go na den konmakandra doronomo.—Ps. 1:1, 2; Odo 15:28; Hebr. 10:24, 25.
2 Oefen a skin: Efu wi wani tan abi wan gosontu ati, dan wi musu oefen a skin ten na ten fu meki na ati naki moro esi. Na so a de tu nanga wi agersi ati. Te wi e preiki fayafaya èn te wi e pruberi fu du moro na ini a preikiwroko, dan a o tan gosontu.—Luk. 13:24; Fil. 3:12.
3 Sma na wi lontu: Wi e libi èn e wroko na ini wan grontapu pe sma no e lespeki Gado. Disi kan abi sowan krakti na wi tapu, taki wi trutru ati nanga wi agersi ati kon siki. Ma wi e firi bun te wi de nanga wi Kresten brada nanga sisa di e broko den ede nanga wi trutru èn di e dini Yehovah nanga den heri ati.—Ps. 119:63; Odo 13:20.
