Yehovah e kibri wi, so taki wi kan kisi frulusu

„Unu . . . e kisi kibri nanga yepi fu a krakti fu Gado fu di unu abi bribi. Gado e kibri unu fu kan frulusu unu na wan fasi di o kon na krin na ini den lasti dei.”​—1 PETR. 1:4, 5.

SAN YU BEN SA PIKI?

Fa Yehovah hari wi kon na a tru anbegi?

Fa wi kan meki Yehovah tiri wi nanga den rai di a e gi?

Fa Yehovah e gi wi deki-ati?

1, 2. (a) Fu san ede wi kan de seiker taki Gado o yepi wi fu horidoro te na a kaba? (b) O bun Yehovah sabi ibriwan fu wi?

„A SMA di horidoro te na a kaba, na en o kisi frulusu” (Mat. 24:13). Nanga den wortu disi, Yesus sori krin taki wi musu tan dini Gado te na a kaba efu wi wani tan na libi te Gado o strafu na ogri grontapu fu Satan. Ma disi no wani taki dati Yehovah e fruwakti taki wi o man horidoro nanga wi eigi krakti èn nanga wi eigi koni. Bijbel e taigi wi: „Unu kan frutrow Gado. A no o meki unu kisi tesi di hebi moro leki san unu man tyari. Ma te tesi miti unu, a o yepi unu, so taki unu man horidoro” (1 Kor. 10:13). San disi wani taki?

² Yehovah e sorgu taki wi no kisi tesi di wi no man tyari. A man du disi fu di a sabi ala sani fu wi. A sabi den problema di wi abi, a sabi sortu sma wi de, èn a sabi omeni tesi wi man tyari. Ma a de so trutru taki Gado sabi wi so bun? Iya. Bijbel e sori taki Yehovah sabi ala sani fu ibriwan fu wi. A sabi san wi e du ibri dei èn a sabi den gwenti fu wi. A sabi srefi san wi e denki èn san de na ini wi ati.​—Leisi Psalm 139:1-6.

3, 4. (a) Fa den sani di David ondrofeni e sori taki Yehovah e poti prakseri na ibri sma? (b) Sortu moi sani Yehovah e du na ini a ten disi?

³ Yu denki taki na Almakti Gado e poti someni prakseri na sondu libisma leki wi? A psalm skrifiman David ben aksi ensrefi a sani disi. A taigi Yehovah: „Te mi e luku yu hemel, den sani di yu meki, a mun nanga den stari di yu meki, dan mi e aksi misrefi: „San na wan libisma taki yu e prakseri en?” (Ps. 8:3, 4) A kan taki David aksi a sani disi fu di ensrefi si fa Yehovah ben poti prakseri na en. Di David, a moro yongu manpikin fu Isai, ben de wan boi ete di ben musu luku skapu, Yehovah ben e  si en kaba leki „wan man di a lobi”. Dati meki Yehovah ’puru en na den weigron pe a ben e luku skapu èn a poti en leki tiriman’ fu Israel (1 Sam. 13:14; 2 Sam. 7:8). Prakseri nomo fa David ben e firi di a kon frustan taki a Mekiman fu hemel nanga grontapu ben e poti prakseri na san a ben e denki èn fa a ben e firi, aladi a ben de wan boi ete di ben e luku skapu!

⁴ A de wan kefalek sani gi wi tu taki Yehovah e poti prakseri na wi na ini a ten disi. A e tyari den sma di a e si leki ’gudu fu ala den pipel’ kon na wán na ini a tru anbegi èn a e yepi den fu tan dini en (Hag. 2:7). Fu man frustan fa Yehovah e yepi wi fu tan dini en, meki wi luku fosi fa a e hari sma kon na a tru anbegi.

GADO E HARI WI

5. Fa Yehovah e hari sma kon na en Manpikin? Gi wan eksempre.

⁵ Yesus taki: „Nowan sma kan kon na mi, efu a Tata di seni mi kon no e hari en kon” (Yoh. 6:44). Den wortu disi e sori taki wan sma abi Gado yepi fanowdu efu a wani tron wan disipel fu Krestes. Fa Yehovah e hari den sma di de leki skapu kon na en Manpikin? A e gebroiki a preikiwroko nanga en santa yeye. Fu eksempre, di Paulus ben de nanga wan tu tra preikiman na ini Filipi, den miti wan uma di ben nen Lidia, ne den fruteri en a bun nyunsu. Bijbel e taki: „Yehovah opo en ati, so taki a ben kan poti prakseri na den sani di Paulus ben e taki.” Iya, Gado gebroiki en yeye fu yepi en frustan a boskopu èn na so en nanga en osofamiri teki dopu bakaten.​—Tori 16:13-15.

6. Fa Gado hari wi alamala kon na a tru anbegi?

⁶ A de so taki a sani disi pasa nanga Lidia wawan? Kwetikweti. Efu yu na wan dopu Kresten, dan Gado hari yu kon tu na a tru anbegi. Neleki fa wi hemel Tata si wan bun sani na ini na ati fu Lidia, na so a si wan bun sani na ini yu tu. Di yu bigin arki a bun nyunsu, Yehovah gebroiki en santa yeye fu yepi yu frustan san yu yere (1 Kor. 2:11, 12). Di yu meki muiti fu du san yu leri, a blesi a muiti di yu meki fu du san a wani. Di yu gi yu libi abra na en, a ben e prisiri. Iya, sensi yu bigin waka a pasi fu libi, Yehovah de na yu sei fu yepi yu.

7. Fa wi du sabi taki Gado o yepi wi fu tan dini en go doro?

⁷ Now di Yehovah yepi wi fu bigin waka nanga en, a no o libi wi meki wi wawan feni wan fasi fu tan dini en go doro. A sabi taki a no nanga wi eigi krakti wi kon na ini a tru anbegi. A sabi tu taki a no nanga wi eigi krakti wi o man tan na ini a tru anbegi. Na apostel Petrus taigi salfu Kresten: „Unu . . . e kisi kibri nanga yepi fu a krakti fu Gado fu di unu abi bribi. Gado e kibri unu fu kan frulusu unu na wan fasi di o kon na krin na ini den lasti dei” (1 Petr. 1:4, 5). Te yu luku en bun, dan den wortu disi abi fu du nanga ala Kresten èn wi alamala musu poti prakseri na disi na ini a ten disi. Fu san ede? Fu di wi alamala abi a yepi fu Gado fanowdu fu tan dini en go doro.

 GADO KAN TAPU WI FU DU WAN SANI DI NO BUN

8. Fu san ede a kan pasa makriki taki wi du wan sani di no bun?

⁸ Den problema fu na aladei libi èn a sondu di wi abi kan meki taki wi no e si sani soleki fa Yehovah e si den. Te disi pasa, dan a kan pasa makriki taki wi du wan sani di no bun, sondro taki wi sabi dati srefi. (Leisi Galasiasma 6:1.) Na disi pasa nanga David.

9, 10. Fa Yehovah tapu David fu du wan ogri èn fa a e yepi wi na ini a ten disi?

⁹ Di Kownu Saul ben de na baka David fu kiri en, David ben man hori ensrefi fu no du ogri. Srefi di David ben abi na okasi fu du Saul ogri, a no du dati (1 Samuel 24:2-7). Ma a no langa baka dati, David lasi ensrefi. En nanga den man fu en no ben abi watra nanga nyanyan. Nanga ala lespeki den go aksi wan Israel man di ben nen Nabal fu yepi den. Ne Nabal kosi David èn a no ben wani yepi en. A sani disi meki David ati bron so te, taki a ben de nomonomo fu puru atibron tapu Nabal nanga ala den man di ben de nanga en. David no ben prakseri taki Yehovah ben o krutu en te a ben o go kiri sma somarso. Ma Abigayil, a wefi fu Nabal, ben man tapu en fu du na ogri disi. Di David kon frustan taki Yehovah gebroiki Abigayil fu yepi en, a taigi Abigayil: „Blesi fu Yehovah, a Gado fu Israel, di seni yu fu kon miti mi tide! Blesi fu yu, fu di yu na wan uma di de nanga krin frustan. Na yu meki taki mi no poti misrefi na brudu-paiman tide èn taki mi no go suku wan fasi fu frulusu misrefi.”​—1 Sam. 25:9-13, 21, 22, 32, 33.

¹⁰ San wi kan leri fu a tori disi? Yehovah gebroiki Abigayil fu tapu David fu du wan ogri. Na so a e yepi wi tu na ini a ten disi. Ma wi no musu fruwakti taki Gado o seni wan sma fu tapu wi, ibri tron te wi de fu du wan sani di no bun. Wi no musu denki tu taki wi sabi soifri san Gado o du na ini son situwâsi. Boiti dati, wi no musu denki taki wi sabi soifri sortu sani Gado o gi pasi fu pasa fu meki den sani di a abi na prakseri kon tru (Preik. 11:5). Ma toku wi kan de seiker taki Yehovah sabi ala ten na ini sortu situwâsi wi de èn a o yepi wi fu tan dini en go doro. A e gi wi a dyaranti disi: „Mi o gi yu koni èn mi o sori yu a pasi di yu musu waka. Mi o gi yu rai èn mi o luku yu” (Ps. 32:8). Fa Yehovah e gi wi rai? Fa wi kan kisi wini fu dati? Fu san ede wi kan de seiker taki Yehovah e tiri en pipel na ini a ten disi? Meki wi luku fa a buku Openbaring e gi piki tapu den aksi disi.

WI KAN KISI KIBRI TE WI E ARKI RAI

11. Fu san ede wi kan taki dati Yehovah sabi heri bun san e pasa na ini den gemeente fu en pipel?

¹¹ Na ini a fisyun di skrifi na Openbaring kapitel 2 nanga kapitel 3, wi e leisi fa Kownu Yesus Krestes e ondrosuku den seibi gemeente na Pikin Asia. Krestes no e luku den gemeente frafra nomo, ma a e si ala sani. Na ini a fisyun disi, a e taki fu spesrutu sani di ben e pasa na ini den gemeente èn a e taki srefi fu son sma na ini den gemeente. A e prèise den gemeente èn a e gi den a rai di den abi fanowdu. San a fisyun disi wani taki? Den seibi gemeente e agersi den salfu Kresten baka 1914. A rai fu Krestes ben de gi den seibi gemeente, ma toku ala den gemeente fu a pipel fu Gado na ini a ten disi kan kisi wini fu dati. Sobun, wi kan taki dati Yehovah e tiri en pipel nanga yepi fu en Manpikin. Fa wi kan meki Yehovah tiri wi?

12. Fa wi kan meki Yehovah tiri wi?

¹² Wan fasi fa wi e meki Yehovah tiri wi, na te wi e studeri en Wortu. Yehovah e gi wi bun furu rai na ini den buku fu a koni srafu di de  fu frutrow (Mat. 24:45). Ma efu wi wani kisi wini fu den rai, dan wi musu teki ten fu studeri den buku èn wi musu du san wi leri. Te wi e studeri Bijbel, dan wi e meki Yehovah ’kibri wi fu no fadon’ (Yud. 24). Son leisi te yu e studeri wan artikel a gersi leki na gi yu den skrifi en, a no so? We, dan yu musu si a rai di skrifi na ini na artikel leki rai di kon fu Yehovah èn yu musu du san yu leri. Son leisi wan mati kan gi yu wan pingi fu luku bun nanga wan sani. Na so Yehovah kan gebroiki en yeye fu sori yu taki yu e du wan sani di no bun, noso taki yu abi wan fasi di yu musu kenki. Te wi e meki a yeye tiri wi, dan wi e meki Yehovah tiri wi. (Leisi Psalm 139:23, 24.) Fu dati ede a bun fu luku omeni ten wi e gebroiki fu studeri èn omeni muiti wi e du fu studeri.

13. Fu san ede a bun fu luku omeni ten wi e gebroiki fu studeri èn omeni muiti wi e du fu studeri?

¹³ Te wi e gebroiki tumusi furu ten fu du prisiri sani, dan wi no o abi ten moro fu studeri Bijbel. Wan brada taki dati a sani disi kan pasa makriki. Fu san ede? A taki: „Noiti ete someni fasi fu abi prisiri ben de leki now èn yu no abi fu pai so furu moro. Yu man luku sani na telefisi, yu man du sani na computer èn yu man gebroiki yu telefon srefi. Ala sei na wi lontu sani de di wi kan du fu abi prisiri.” Efu wi no luku bun, dan safrisafri wi o gebroiki moro ten fu abi prisiri èn te fu kaba wi no o abi ten fu studeri Bijbel finifini moro (Ef. 5:15-17). Dati meki a bun taki ibriwan fu wi e aksi ensrefi: ’Omeni leisi mi e teki ten fu studeri den dipi tori fu Gado Wortu? Mi e du disi soso te mi musu hori wan lezing noso te mi abi wan prati na den konmakandra?’ Efu disi de so, dan kande wi kan gebroiki a ten moro bun te wi e studeri Bijbel noso te wi e hori na Osofamiri Anbegi. Wi musu suku fu feni a koni fu Yehovah na ini Bijbel, neleki fa wi ben o suku wan gudu di kibri. Na a koni disi o yepi wi fu horidoro èn fu kisi frulusu.​—Odo 2:1-5.

WI KAN HORIDORO TE WI E KISI DEKI-ATI

14. Fa Bijbel e sori taki Yehovah sabi fa wi e firi?

¹⁴ David ben kisi furu problema na ini en libi (1 Sam. 30:3-6). Bijbel e sori taki Yehovah ben sabi fa a ben e firi. (Leisi Psalm 34:18; 56:8.) Gado sabi sosrefi fa wi e firi. Te wi „lasi-ati” noso te wi e firi „brokosaka”, dan a e kon moro krosibei fu wi. David ben sabi a sani dati èn disi ben gi en trowstu. Dati meki a singi: „Mi o breiti èn mi o prisiri, fu di yu sori mi bun-ati, fu di yu si a banawtu fu mi. Yu sabi heri bun fa mi e pina” (Ps. 31:7). Ma Yehovah no sabi nomo fa wi e pina. A e yepi wi tu fu di a e trowstu wi èn a e gi wi deki-ati. Den Kresten konmakandra fu wi na wan sani di a e gebroiki fu du disi.

15. San wi kan leri fu a sani di pasa nanga Asaf?

¹⁵ Wan sani di Asaf ondrofeni e sori fu san ede a bun fu go na den konmakandra. Asaf ben e prakseri fa den reti-ati sma e pina aladi a gersi leki den ogri sma abi wan bun libi. Ne a sani disi meki a firi brokosaka. A bigin  denki taki na fu soso a e dini Yehovah. A taki: „Mi ben kon abi bita-ati. Te na ini mi niri mi firi pen.” Pikinmoro a tapu fu dini Yehovah fu a sani disi ede. San yepi Asaf fu si sani na wan yoisti fasi baka? A taki: „Mi go na ini a gran santa presi fu Gado.” A ben man kenki en denki di a ben de makandra nanga den tra anbegiman fu Yehovah. A ben kon si taki a switi libi fu den ogri sma na soso fu wan pisi ten nomo èn taki te fu kaba Yehovah ben o seti sani kon bun baka (Ps. 73:2, 13-22). Son leisi wi kan firi leki Asaf tu. Den furu problema nanga ogri di wi e si na ini a grontapu fu Satan kan meki wi lasi-ati èn firi brokosaka. Ma te wi e kon makandra nanga den brada nanga sisa fu wi, wi e kisi a deki-ati nanga a yepi di wi abi fanowdu fu tan dini Yehovah go doro.

16. Fa na eksempre fu Hana kan yepi wi?

¹⁶ Ma fa a de te wan sani pasa na ini a gemeente di e meki en muilek gi yu fu go na den konmakandra? Kande yu e syen fu di yu no abi wan grani na ini a gemeente moro, noso kande yu kisi trobi nanga wan brada noso sisa na ini a gemeente. Efu disi pasa nanga yu, dan kande na eksempre fu Hana o yepi yu. (Leisi 1 Samuel 1:4-8.) Penina, a tra wefi fu Hana en masra, ben e tanteri en doronomo. Sani ben kon moro hebi gi en te na osofamiri ben e go na Silo ibri yari fu tyari ofrandi gi Yehovah. Disi ben hati Hana so te, taki a „ben e krei èn a no ben wani nyan”. Ma toku a no meki a sani disi tapu en fu go na a presi pe den ben e anbegi Yehovah. Yehovah ben e si fa Hana ben e meki muiti fu dini en èn a blesi en.​—1 Sam. 1:11, 20.

17, 18. (a) Na sortu fasi wi e kisi deki-ati na den gemeente konmakandra? (b) San yusrefi e denki fu a lobi-ati fasi fa Yehovah e yepi wi fu man kisi frulusu?

¹⁷ A bun te Kresten na ini a ten disi e teki na eksempre fu Hana. Wi musu go doronomo na den konmakandra. Wi alamala sabi taki na den konmakandra wi e kisi deki-ati di de fanowdu trutru (Hebr. 10:24, 25). A switifasi di wi Kresten brada nanga sisa e sori de wan trowstu gi wi. Son leisi wan sani di wan brada taki na ini wan lezing noso wan piki fu wan brada noso sisa kan meki wi firi bun kaba. Te wi de na den konmakandra èn wi e taki nanga wan brada noso wan sisa, dan a kan taki wan sani di e gi wi deki-ati. Son leisi wi kan firi bun kaba te den arki wi nomo (Odo 15:23; 17:17). Te wi e singi gi Yehovah makandra nanga den, dan wi e kisi deki-ati tu èn wi e firi prisiri. Spesrutu te wi de nanga ’prakseri di e trobi wi’, a prenspari fu go na den konmakandra pe wi e kisi deki-ati. Na drape Yehovah ’e trowstu wi’ èn a e yepi wi, so taki wi kan tan dini en go doro.​—Ps. 94:18, 19.

¹⁸ A lobi-ati fasi fa Yehovah e sorgu wi e meki wi firi korostu neleki a psalm skrifiman Asaf di ben singi gi Yehovah: „Yu grabu mi hori na mi reti-anu. Yu o sori mi fa mi musu waka” (Ps. 73:23, 24). Wi de nanga bigi tangi taki Yehovah e kibri wi, so taki wi kan kisi frulusu!

[Aksi fu a tori disi]

[Prenki na tapu bladzijde 28]

Yu srefi na wan sma di Yehovah hari kon

[Prenki na tapu bladzijde 30]

Wi e kisi kibri te wi e gebroiki den rai fu Gado na ini wi libi

[Prenki na tapu bladzijde 31]

Wi kan horidoro te wi e kisi deki-ati