Yu e memre disi ete?

Yu man memre san yu leisi na ini den Waktitoren di kon na doro no so langa pasa? Luku efu yu kan gi piki tapu den aksi di e kon now:

Fa a libi fu Salomo kan de wan warskow gi wi?

Gado blesi Kownu Salomo èn a gebroiki en fu du en wani. Ma di a ben de kownu, a trangayesi den wèt fu Gado. A trow nanga na umapikin fu Farao di ben e anbegi falsi gado. Boiti dati, a teki furu tra uma leki wefi. Te fu kaba a meki den uma di ben e anbegi falsi gado kori en fu go anbegi den gado dati tu. Wi musu luku bun taki safrisafri wi no kon abi denki noso gwenti di Gado no lobi (Deut. 7:1-4; 17:17; 1 Kow. 11:4-8).​—15/12, bladzijde 10-12.

Fu san ede wi kan taki dati Sara ben de wan bun uma di ben gi yesi na Gado?

Di Gado taigi Abraham fu gowe libi Ur, dan a ben o abi fu libi en famiri nanga en mati na baka. A ben o abi fu kenki en heri libi èn go na wan presi di a no ben sabi. Ma toku Sara horibaka gi en, fu di a ben frutrow taki Gado ben o blesi en. A ben lespeki Abraham èn a ben de wan uma di ben abi bun maniri.​—1/1, bladzijde 8.

Fu san ede Gado aksi Abraham fu gi en lobi manpikin leki ofrandi?

Wi musu hori na prakseri taki Gado no meki Abraham gi en manpikin leki ofrandi trutru. A sani di Gado aksi Abraham fu du ben sori fa Gado ben o gi en Manpikin Yesus leki ofrandi, wan sani di ben o hebi gi en trutru.​—1/1, bladzijde 23.

Fu san ede wi kan taki dati sensi a fosi yarihondro, tru Kresten di salfu nanga santa yeye ben de na grontapu?

Na ini na agersitori di Yesus ben gi fu „na aleisi” nanga „a takru wiwiri”, a „bun siri” na „den manpikin fu a Kownukondre” (Mat. 13:24-30, 38). A takru wiwiri ben o gro makandra nanga na aleisi teleki kotiten doro. Sobun, wi no man taki krin suma noso sortu grupu na den sma di Yesus agersi nanga na aleisi. Ma wi sabi taki ala ten wan tu fu den sma dati ben de na grontapu teleki now.​—15/1, bladzijde 7.

Sortu sani o pasa fosi Armagedon kon?

Den pipel fu grontapu o meki a prenspari boskopu bekènti taki ’freide de èn taki ala sani e waka bun’ (1 Tes. 5:3). Tirimakti o go feti nanga den falsi kerki (Openb. 17:15-18). Den pipel fu grontapu o go feti tu nanga den tru anbegiman. Dan a kaba o kon.​—1/2, bladzijde 9.

San wi kan du fu no dyarusu?

Luku wan tu sani di kan yepi wi: Leri fu lobi trawan, suku mati di lobi Gado, suku fu du bun, „prisiri nanga sma di e prisiri” (Rom. 12:15).​—15/2, bladzijde 16-17.

Suma e taki Nahuatltongo èn sortu muiti sma e du gi den?

Disi ben de a tongo fu den owruten Astèksma, ma te now ete sowan 1.5 milyun sma e taki en na ini Meksikow. Kotoigi e preiki na ini Nahuatltongo èn wan tu fu wi buku de na ini a tongo dati tu.​—1/3, bladzijde 13, 14.

San wi musu hori na prakseri te wi e gi rai?

Frustan bun san na a tori. No piki wantewante sondro fu denki. Abi sakafasi èn gebroiki Gado Wortu. Efu a kan, dan luku san den buku fu wi e taki. Luku bun taki yu no teki bosroiti gi sma.​—15/3, bladzijde 7-9.

San Yesus ben wani taki di a taigi sma fu waka a di fu tu kilometer? (Mat. 5:41)

Na ini a fosi yarihondro, Israel ben de na ondro a makti fu den Romesma, èn son leisi den Romesma ben e dwengi sma fu wroko gi den. Di Yesus gi sma a rai fu waka a di fu tu kilometer, dan a ben wani sori den taki den ati no musu bron te sma di abi makti taigi den fu du wan wroko.​—1/4, bladzijde 9.