Aksi fu leisiman

„Yehovah e si a dede fu den sma di tai hori na en, leki wan seryusu sani.” San disi wani taki?

▪ Wan psalm skrifiman singi: „Yehovah e si a dede fu den sma di tai hori na en, leki wan seryusu sani” (Ps. 116:15). Yehovah e si a libi fu ibri tru anbegiman fu en leki wan sani di warti srefisrefi. Ma den wortu disi fu Psalm 116 wani taki moro leki a dede fu wán sma nomo.

Te wan Kresten dede, dan a no fiti fu taki na ini a beri-lezing dati Psalm 116:15 abi fu du nanga a sma di dede, srefi efu a ben de wan sma di tai hori na Yehovah ala ten. Fu san ede? Bika a tekst disi no abi fu du nanga a dede fu wán sma nomo. A heri grupu fu sma di e tai hori na Yehovah, prenspari gi en. Sobun, a sani di a psalm skrifiman taki dyaso, e sori taki Gado e si a dede fu a heri grupu disi leki wan seryusu sani. Dati meki a no o gi pasi noiti taki den alamala dede gowe.​—Luku Psalm 72:14; 116:8.

Psalm 116:15 e gi wi a dyaranti taki Yehovah no o gi pasi taki sma figi ala den tru anbegiman fu en puru na grontapu. Den sani di pasa nanga den disiten Kotoigi fu Yehovah e sori taki den ben man horidoro awinsi den kisi hebi tesi nanga frufolgu. Disi e sori krin taki Gado no o gi pasi noiti taki sma figi wi alamala puru na grontapu.

Fu di Yehovah abi ala makti èn fu di a o du seiker san a abi na prakseri, meki wi sabi taki a no o gi pasi noiti taki sma figi wi alamala puru na grontapu. Prakseri nomo fa a ben o de efu Gado ben o meki dati pasa. A ben o gersi leki den feanti fu en tranga moro en èn dati no kan noiti! Sosrefi, den sani di Yehovah abi na prakseri no ben o kon tru, bika a wani taki den tru anbegiman fu en musu libi na grontapu. Noti no kan tapu en fu du san a abi na prakseri (Yes. 45:18; 55:10, 11). Srefi a santa wroko di sma e du gi Yehovah na grontapu ben o kaba, efu nowan sma ben o de moro fu dini en dyaso na grontapu na ini a fesidyari fu en agersi tempel. Efu nowan tru anbegiman fu Gado ben o de moro na grontapu, dan nowan sma ben o de fu seti a „nyun grontapu”, dati na den reti-ati sma na grontapu di o de ondro a tiri fu a „nyun hemel” (Openb. 21:1). Dan Krestes no ben o man tiri wan dusun yari tu, bika sma no ben o de na grontapu fu a tiri den.​—Openb. 20:4, 5.

Efu Gado ben o gi pasi taki den feanti fu en figi ala den futuboi fu en puru na grontapu, dan sma ben o tweifri na a posisi nanga a bigi nen fu en. Den ben o aksi densrefi efu Gado abi a reti trutru fu de a Moro Hei Tiriman. Sosrefi, fu di Yehovah abi lespeki gi en santa nen èn gi ensrefi, meki a no o gi pasi taki ala den anbegiman fu en dede gowe. Prakseri disi tu: Gado „no e du kruktudu”, sobun, ala ten a o kibri den sma di e tai hori na en (Deut. 32:4; Gen. 18:25). Efu Gado ben o gi pasi taki sma figi ala den anbegiman fu en puru na grontapu, dan disi no ben o kruderi nanga en Wortu pe skrifi: „Yehovah no o gowe libi en pipel, fu di a e prakseri a bigi nen fu en” (1 Sam. 12:22). Fu tru, „Yehovah no o gowe libi a pipel fu en. A no o libi a pipel di a teki leki a gudu fu en”.​—Ps. 94:14.

A de wan bigi trowstu fu sabi taki ala ten a pipel fu Yehovah o de na grontapu! Sobun, awinsi san e pasa, meki wi tai hori na Gado ala ten fu di wi e bribi san a pramisi: „Awinsi sortu fetisani sma meki fu feti nanga yu, a no o abi bun bakapisi. Yu o krutu iniwan sma di e taki ogri fu yu na fesi krutu. Disi na a gudu di den futuboi fu Yehovah kisi. Mi e si den leki reti-ati sma.”​—Yes. 54:17.

[Prenspari pisi na tapu bladzijde 22]

Noiti Gado o gi pasi taki sma figi en heri pipel puru na grontapu