Soleki fa Elva Gjerde fruteri

Sowan 70 yari pasa, wan sma di kon na wi oso taigi mi papa wan sani di kenki mi heri libi. Sensi a prenspari dei dati, furu tra sma yepi mi na ini mi libi. Boiti dati, mi leri sabi wan sma di tron a moro bun mati fu mi. Meki mi fruteri fa mi libi waka.

MI GEBORE na ini 1932 na ini a foto Sydney, na Australia. Mi papa nanga mi mama ben e bribi na ini Gado, ma den no ben e go na kerki. Mi mama ben taigi mi taki ala ten Gado e si san mi e du èn a no o draidrai fu strafu mi te mi du wan ogri. Disi meki taki mi kon frede Gado. Ma toku mi ben lobi Bijbel. Te mi tanta ben kon luku wi satra nanga sonde, a ben fruteri mi furu moi Bijbel tori. Ala ten mi ben breiti te a ben kon.

Di mi ben yongu, mi papa ben leisi wan tu buku di mi mama ben kisi fu wan owru uma di ben de wan Kotoigi fu Yehovah. Den sani di a ben leisi na ini den buku ben hari en prakseri so te, taki a agri fu studeri Bijbel nanga den Kotoigi. Wan neti di mi papa ben e studeri nanga den Kotoigi, a si taki mi ben arki den kibrikibri. A ben wani seni mi go na bedi baka, ma dan a Kotoigi aksi efu mi kan sidon na a studie tu. Na so mi libi bigin kenki èn mi bigin tron wan mati fu a tru Gado Yehovah.

A no langa baka dati mi nanga mi papa bigin go na den Kresten konmakandra. Den sani di mi papa ben e leri, meki taki a kenki en libi. A ben man dwengi ensrefi fu no atibron so esi moro. A sani disi meki taki mi mama nanga mi bigi brada Frank bigin go na den konmakandra tu. * Wi alamala go na fesi teleki wi teki dopu èn tron Kotoigi fu Yehovah. Sensi a ten dati, mi tron mati fu furu bigisma di yepi mi na difrenti ten na ini mi libi.

SAN MI O DU NANGA MI LIBI?

Mi ben yongu ete, ma mi ben lobi fu de nanga den bigisma na ini wi gemeente. Wan fu den ben de Alice Place, na owru sisa di ben preiki gi wi a fosi leisi. Mi ben si en leki mi granmama. Alice leri mi fu preiki èn a gi mi deki-ati fu teki dopu. Sobun, di mi ben abi 15 yari, mi teki dopu.

Mi tron mati tu fu wan owru trowpaar di ben nen Percy nanga Madge [Margaret] Dunham. Den ben abi furu krakti tapu mi libi. Mi ben lobi wiskunde èn mi ben wani gi wiskunde les na skoro. Percy nanga Madge ben de zendeling na ini Latfia bifo a Di Fu Tu Grontapufeti bigin. Ma di a feti bigin, den kisi a kari fu go wroko na a Betel fu Australia, di ben de na ini Sydney. Percy nanga Madge ben poti furu prakseri na mi. Den fruteri  mi furu span tori di den ondrofeni na ini a zendelingwroko fu den. Ne mi kon si taki mi ben o abi moro prisiri fu leri sma sani fu Bijbel, leki fu gi wiskunde les. Sobun, mi bosroiti fu tron wan zendeling.

Percy nanga Madge gi mi a deki-ati fu go pionier, fu di dati ben o sreka mi gi a zendelingwroko. Fu dati ede mi tron pionier na ini 1948, di mi ben abi 16 yari. Boiti mi, yu ben abi ete 10 tra yonguwan na ini wi gemeente di ben pionier nanga prisiri na ini Hurstville, na Sydney.

Den fo yari baka dati, mi pionier na fo tra foto di ben de na ini a kontren fu New South Wales nanga Queensland. Wan fu den fosi sma di mi gi Bijbelstudie ben de Betty Law (now a nen Betty Remnant). Betty ben de tu yari moro owru leki mi èn a ben lobi sma. Bakaten, wi go pionier makandra na ini a foto Cowra, sowan 230 kilometer na west-sei fu Sydney. Wi no pionier langa nanga makandra, ma teleki a dei fu tide mi nanga Betty na bun mati.

Bakaten mi tron spesrutu pionier èn den seni mi go na a foto Narrandera di ben de 220 kilometer na zuidwest-sei fu Cowra. Mi nyun pionier patna ben de Joy Lennox (now a nen Joy Hunter). Ensrefi ben owru tu yari moro mi èn a ben de wan fayafaya pionier. Na wi wawan ben de Kotoigi na ini a foto. Mi nanga Joy ben tan nanga Ray nanga Esther Irons, wan trowpaar di ben abi switifasi. Den ben abi wan manpikin nanga dri umapikin, èn a heri osofamiri ben wani sabi moro fu Bijbel. Mindriwiki Ray nanga a boi fu en ben e wroko na wan burugron pe den ben e kweki skapu èn prani tarwe. Esther nanga den umapikin ben e wroko na wan pikin hotel pe sma ben kan yuru kamra èn bai nyanyan. Ibri sonde mi nanga Joy ben sreka wan bun bigi nyanyan gi a heri famiri Irons nanga ete 12 man di ben e tan na a pikin hotel. Den man disi ben e meki pasi pe den loko ben waka èn den ben e nyan furu! Nanga a wroko disi wi ben man pai pikinso fu a yuru-oso moni di wi ben musu pai. Te wi ben kaba nyan, wi ben e krin a presi. Baka dati wi ben e studeri A Waktitoren nanga a famiri Irons. Ray, Esther, nanga den fo pikin fu den teki a tru bribi èn den tron den fosi preikiman fu a gemeente Narrandera.

Na ini 1951 mi go na wan kongres fu Yehovah Kotoigi na ini Sydney. Drape mi go na wan spesrutu konmakandra di ben hori gi pionier di wani tron zendeling. Moro leki 300 sma ben kon na a konmakandra dati di ben hori na ini wan bigi tenti. Nathan Knorr fu a Betel na Brooklyn taki nanga wi èn a sori wi o prenspari a de fu prati a bun nyunsu na ala sei fu grontapu. Wi alamala ben kaka wi yesi. Bakaten, furu fu den pionier di ben de drape bigin nanga a preikiwroko na a Stille Zuidzee èn na tra presi pe sma no ben preiki ete. Mi ben breiti fu de wan fu den 17 sma fu Australia di kisi wan kari fu go na a di fu 19 klas fu Gileadskoro na ini 1952. Mi ben abi 20 yari nomo di a winsi fu mi fu tron zendeling, kon tru!

MI BEN MUSU TYARI MORO KENKI KON

Na Gileadskoro mi kisi moro sabi fu Bijbel èn mi bribi kon moro tranga. Mi kon si tu taki mi ben musu kenki a fasi fa mi ben de. Mi ben yongu ete èn mi no ben si a libi leki fa a ben de trutru. Mi no ben wani meki fowtu èn mi no ben lobi en tu te trawan ben meki fowtu. Son leisi mi ben strak tumusi. Mi ben denki taki son sani fowtu, aladi dati no ben de so. Fu eksempre, mi skreki trutru di mi si Brada Knorr e prei bal nanga wan grupu yonguwan fu Betel.

A ben musu fu de so taki den leriman fu Gileadskoro di ben abi furu ondrofeni, si taki son sani ben muilek gi mi. Ma na wan switi fasi den yepi mi fu kenki a fasi fa mi ben e denki. Safrisafri mi kon si taki Yehovah na wan lobi-ati Gado di e warderi  san wi e du. A no de wan ogri-ati Gado di no wani taki wi musu abi prisiri na ini a libi. Wan tu trawan na ini a klas ben yepi mi tu. Mi e memre taki wan fu den taigi mi: „Elva, Yehovah no de na hemel nanga wan wipi. No pina yusrefi so!” A krin fasi fa a taki nanga mi naki mi ati trutru.

Baka Gileadskoro den seni mi nanga fo tra zendeling go na Namibia, na ini Afrika. A no langa baka dati wi ben e studeri Bijbel nanga 80 sma. Mi ben lobi a libi na ini Namibia èn mi ben lobi a zendelingwroko, ma na Gileadskoro mi ben kon lobi wan brada di den ben seni go na Switserland. Baka di mi tan wán yari na ini Namibia, mi go na en na ini Switserland. Baka di wi trow, wi go du kringwroko.

WAN HATI SANI MITI MI

Baka feifi yari di wi du a kringwroko nanga prisiri, wi kisi wan kari fu go na a Betel fu Switserland. Na ini a Betelfamiri furu owru brada nanga sisa ben de di ben ondrofeni furu na ini a diniwroko fu den. Mi ben breiti fu de makandra nanga den.

Ma syatu baka di wi doro na Betel, wan sani pasa di hati mi trutru. Mi kon sabi taki mi masra waka gi mi èn a no ben wani dini Yehovah moro. Di a gowe libi mi, mi no ben man bribi san miti mi èn mi ben firi brokosaka srefisrefi. Mi no sabi fa mi ben o du efu mi no ben abi den lobi-ati owru brada nanga sisa na Betel di ben horibaka gi mi. Mi ben man fruteri den ala san mi ben e firi èn den ben e arki mi. Te mi ben wani de mi wawan, dan den ben libi mi tu. Ma den sani di den ben taki èn du trowstu mi. Disi yepi mi na ini a muilek pisi ten disi pe mi ben sari trutru. Na ini a pisi ten disi mi tron wan moro bun mati fu Yehovah tu.

Wan tu owru sma di ben de mi mati, ondrofeni furu na ini a libi èn den leri furu fu den tesi di miti den. Mi memre san sonwan fu den taigi mi furu yari pasa. Madge Dunham taigi mi wan leisi: „Elva, leki wan anbegiman fu Yehovah yu o kisi furu tesi. Ma den moro hebi tesi kan kon fu den moro bun mati noso famiri fu yu. Te den tesi disi miti yu, yu musu frutrow moro tapu Yehovah. Memre taki a no libisma yu e dini, ma na Yehovah!” A sani disi di Madge taigi mi yepi mi fu pasa furu hebi tesi. Noiti mi ben o gi pasi taki den fowtu di mi masra meki, prati mi fu Yehovah.

Bakaten mi bosroiti fu drai go baka na Australia fu pionier pe den famiri fu mi ben e tan. A ben teki bun langa fu doro Australia nanga sipi èn a heri pisi ten dati mi ben lobi taki fu Bijbel nanga wan tu sma di ben de na ini a sipi. Wan fu den sma disi ben de Arne Gjerde, wan man fu Noorwegen di no ben taki furu. A ben lobi den Bijbel takimakandra di wi ben abi. Bakaten Arne kon luku mi nanga mi famiri na ini Sydney. A studeri Bijbel fayafaya èn a no teki langa fosi a dopu. Na ini 1963, mi nanga Arne trow èn tu yari baka dati wi manpikin Gary gebore.

WAN TRA TESI MITI MI

Mi, Arne, nanga Gary ben de koloku trutru. Baka wan syatu pisi ten Arne meki wi oso kon moro bigi, so taki mi papa nanga mama di ben kon owru kaba ben kan tan nanga wi. Ma baka di wi trow siksi yari, datra taigi Arne taki a abi kanker na en edetonton. A ben hebi trutru gi wi di wi yere a nyunsu disi. Arne ben abi fu tan na ati-oso fu wan langa pisi ten fu kisi datrayepi, èn ibri dei mi ben go luku en. Wan pisi ten a ben gersi leki a  ben kon betre, ma dan a kon moro siki èn brudu naki en. Den taigi mi taki a ben o libi ete wan tu wiki nomo. Ma Arne libi moro langa. Bakaten a ben kan go na oso èn mi sorgu en teleki a kon betre. Baka wan pisi ten a ben man waka baka èn a ben man du en wroko baka leki gemeente owruman. Ala ten a ben de nanga prisiri èn a ben lobi lafu. Disi yepi en fu kon betre moro esi èn a ben moro makriki gi mi fu sorgu gi en.

Ma furu yari baka dati, na ini 1986, Arne kon siki baka. Mi papa nanga mama ben dede kaba èn wi ben froisi fu Sydney go na Blue Mountains, wan moi presi krosibei fu den mati fu wi. Bakaten Gary trow nanga wan moi sisa di nen Karin. Den aksi efu wi ben wani tan makandra nanga den na ini wán oso. Baka wan tu mun wi alamala froisi go na wan oso di ben de wan tu strati moro fara fu pe mi nanga Arne ben e libi.

Tina-aiti mun fosi Arne dede a no ben man komoto na bedi moro èn wi ben abi fu luku en doronomo. Fu di mi ben musu tan na oso nanga en nofo tron, meki ibri dei mi ben e studeri Bijbel nanga den buku fu wi tu yuru langa. Na so mi kon leri furu sani di yepi mi fu horidoro na ini a muilek ten dati. Mi ben lobi en te den owru brada nanga sisa fu a gemeente ben kon luku wi. Sonwan fu den kisi den srefi sortu problema leki wi èn den gi mi furu deki-ati. Arne dede na ini april 2003. Ala ten a ben de seiker taki a ben o kisi wan opobaka.

A SMA DI YEPI MI MORO LEKI INIWAN TRA SMA

Di mi ben yongu, mi ben abi ala sortu denki fu a libi èn mi ben wani taki ala sani musu waka bun. Ma mi kon si taki nofo tron wi libi no e waka soleki fa wi denki. Mi kisi furu blesi na ini a libi, ma tu hebi tesi miti mi tu. Mi fosi masra gowe libi mi nanga Yehovah èn a di fu tu masra kon dede, baka di a siki wan heri pisi ten. Ala ten te mi ben e kisi tesi, mi kisi yepi nanga trowstu na difrenti fasi. Ma a sma di yepi mi moro iniwan tra sma, na Yehovah Gado, „a Graniwan di de sensi owruten” (Dan. 7:9). A rai fu en yepi mi fu tron wan moro bun sma, èn fu dati ede mi ondrofeni furu prisiri sani na ini a zendelingwroko. Te mi ben kisi problema, dan ’a bun-ati fu Yehovah hori mi tanapu èn a ben e trowstu mi, so taki mi ben man prisiri baka’ (Ps. 94:18, 19). Mi ben prisiri tu fu di mi famiri horibaka gi mi na wan lobi-ati fasi èn mi ben abi „trutru mati di gebore fu te nowtu de” (Odo 17:17). Furu fu den mati disi ben de owru sma di ben lepi trutru.

A famiri-edeman Yob ben taki: „Owru sma abi koni, èn o moro langa wan sma e libi, o moro sabi a e kisi, a no so?” (Yob 12:12) We, te mi e prakseri mi libi, mi kan taki dati disi de so trutru. A rai nanga a trowstu di lepi owru sma gi mi, yepi mi trutru èn mi ben abi wan bun libi fu di den na mati fu mi. Mi breiti taki mi teki den leki mati.

Now di mi abi 80 yari, misrefi na wan owru sma tu. Den sani di mi ondrofeni meki taki mi man frustan san tra owru sma abi fanowdu. Te now ete mi lobi fu go luku den èn fu yepi den. Ma mi lobi fu de nanga yongu sma tu. Den abi so furu krakti èn den de fayafaya ala ten. Disi e gi mi furu deki-ati. Mi lobi fu yepi den yonguwan te den e suku rai noso yepi na mi.

[Futuwortu]

[Prenki na tapu bladzijde 14]

Mi nanga Joy Lennox e pionier na Narrandera

[Prenki na tapu bladzijde 15]

Elva nanga tra sma fu a Betelfamiri fu Switserland na ini 1960

[Prenki na tapu bladzijde 16]

A ten di mi ben e sorgu gi Arne di a ben siki