Frutrow tapu Yehovah​—A Gado di e meki sani pasa o ten a wani

„Na en e kenki ten nanga den difrenti pisi ten fu a yari. Na en e poti kownu èn na en e puru den baka.”​—DAN. 2:21.

SAN YU BEN O PIKI?

Fa den sani di Yehovah meki èn profeititori di kon tru, e sori taki Yehovah e du san a abi na prakseri, soifri na a ten di a poti?

San wi o du fu di wi sabi taki Yehovah na a Gado di e meki sani pasa o ten a wani?

Fu san ede den sani di libisma e du noso den sani di e pasa na grontapu, no abi krakti tapu a ten di Yehovah poti fu du sani?

1, 2. Fu san ede wi kan taki dati Yehovah sabi ala sani fu ten?

LANGA ten fosi Yehovah Gado meki libisma, a meki sani di ben o yepi wi fu kon sabi a ten. Na a di fu fo dei di a ben e meki sani, a taki: „Meki sani di e gi leti kon de na loktu fu sori san na dei èn san na neti. Den leti disi o de leki marki na loktu. Den o sori san na den difrenti ten fu a yari, san na dei èn san na yari” (Gen. 1:14, 19, 26). Na so sani pasa soifri soleki fa Yehovah ben wani.

² Te now ete, sabiman no man taki san na ten trutru. Wan buku e taki: „Nowan sma man taki soifri san na ten.” Ma Yehovah sabi ala sani fu ten. En na „a Mekiman fu hemel, . . . a Mekiman fu grontapu, a sma di seti en leki fa a de”. Boiti dati, Yehovah na ’a sma di e fruteri sensi a bigin san o pasa te fu kaba. Na en e fruteri langa ten na fesi san a o du na ini a ten di e kon’ (Yes. 45:18; 46:10). Meki wi luku tu sani di o tranga wi bribi na ini Yehovah èn na ini Bijbel. Den sani disi o sori taki ala ten Yehovah e du san a abi na prakseri, soifri na a ten di a poti. Sobun, meki wi luku (1) den sani di Yehovah meki èn (2) profeititori di kon tru.

DEN SANI DI YEHOVAH MEKI E TRANGA WI BRIBI

3. Gi wan eksempre fu sani di e wroko nanga ten.

³ Furu sani di Yehovah meki e wroko nanga ten, awinsi na pikin sani noso bigi sani. Fu eksempre, planeiti nanga stari e waka na so wan fasi taki wi kan sabi na fesi pe den o de na hemel. A sani disi e yepi sma fu sabi o ten alenten noso dreiten e kon. Te sma de na se noso na busi, dan disi kan yepi den tu fu sabi pe den musu go. A de krin taki Yehovah, a sma di meki stari nanga planeiti, „abi furu makti” èn fu  dati ede wi musu prèise en.​—Leisi Yesaya 40:26.

4. Te wi e luku fa son libisani e wroko nanga ten, dan fa disi e sori taki Yehovah koni trutru?

⁴ Srefi den libisani di Gado meki, e wroko nanga ten. Te yu e luku furu bon nanga meti, dan a gersi leki den sabi soifri o ten den musu du son sani. Sondro fu luku wan oloisi, son fowru sabi soifri o ten den musu frei go na wan tra presi (Yeremia 8:7). Libisma e wroko nanga ten tu. Fu eksempre, wi eigi skin e taigi wi o ten na deiten noso neti. Efu wi ben o frei nanga opolani go na wan tra presi fu grontapu di abi wan heri tra ten leki a presi pe wi komopo, dan nofo tron wi abi wan tu dei fanowdu fu kon gwenti a ten drape. Sobun, te wi e luku den sani di Yehovah meki, dan wi e si furu buweisi taki Yehovah, a Gado di e meki sani pasa o ten a wani, na wan Gado di abi bigi makti èn a koni srefisrefi. (Leisi Psalm 104:24.) Dati meki wi kan bribi taki ala ten a man du san a abi na prakseri fu du.

PROFEITITORI DI KON TRU NA A YOISTI TEN E TRANGA WI BRIBI

5. (a) San na a wan-enkri fasi fa wi kan sabi san o pasa nanga libisma na ini a ten di e kon? (b) Fu san ede Yehovah man taki san o pasa èn o ten a o pasa?

⁵ Den sani di Yehovah meki e leri wi furu fu den ’fasi di a abi, aladi wi no man si en’. Ma den no man gi piki tapu prenspari aksi soleki: ’San o pasa nanga libisma na ini a ten di e kon?’ (Rom. 1:20) A piki de fu feni na ini den sani di Gado meki sma skrifi na ini en Wortu, Bijbel. Te wi e ondrosuku Bijbel, wi e si taki ala ten profeititori kon tru na a yoisti ten! Fu di Yehovah man si sani na fesi, meki a man fruteri wi san o pasa na ini a ten di e kon. Boiti dati, Yehovah kan meki sani pasa soleki fa a wani èn o ten a wani. Dati meki Bijbel profeititori e kon tru na a yoisti ten.

6. San e sori taki Yehovah wani wi fu sabi o ten Bijbel profeititori e kon tru?

⁶ Gado no e si ten leki fa wi e si ten. Ma te a wani fruteri wi fu wan sani di o pasa na wan spesrutu ten, dan a e taki en na wan fasi di wi man frustan. (Leisi Psalm 90:4.) Fu eksempre, a buku Openbaring e taki fu „fo engel di ben de srekasreka gi a yuru, a dei, a mun, nanga a yari, fu go kiri wan di fu dri pisi fu ala den sma”. Wi man frustan san na wan yuru, wan dei, wan mun, nanga wan yari (Openb. 9:14, 15). Te wi e prakseri fa profeititori kon tru na a yoisti ten, dan disi e tranga wi bribi na ini Bijbel èn na ini a Gado di e meki sani pasa o ten a wani. Meki wi luku wan tu eksempre fu profeititori di kon tru.

7. Fa a profeititori fu Yeremia di abi fu du nanga Yerusalem èn nanga Yuda, e sori taki ala ten Yehovah e du san a wani, soifri na a ten di a poti?

⁷ Meki wi luku san pasa na ini a di fu seibi yarihondro Fosi Krestes. „Na ini a di fu fo yari di Kownu Yoyakim, a manpikin fu Yosia, ben e tiri Yuda”, Yehovah gi Yeremia wan boskopu gi ala sma fu Yuda (Yer. 25:1). Yehovah ben taki dati den Babilonsma ben o pori Yerusalem èn den ben o tyari den Dyu fu Yuda go na Babilon. Drape den Dyu ben o ’dini a kownu fu Babilon seibitenti yari langa’. Na ini a yari 607 Fosi Krestes, den legre fu Babilon pori Yerusalem èn den tyari den Dyu fu Yuda go na Babilon trutru. Ma san ben o pasa baka 70 yari? Yeremia taki: „Yehovah taki: ’Te unu de seibitenti yari kaba na Babilon soleki fa mi ben taki na fesi, dan mi o poti prakseri na unu baka èn mi o du san mi pramisi. Iya, mi o tyari unu kon baka na a presi disi’” (Yer. 25:11, 12; 29:10). A profeititori disi kon tru na a yoisti ten. Den Dyu drai go baka na a kondre fu den na ini a yari 537 Fosi Krestes,  baka di den Mediasma nanga den Persiasma fri den fu Babilon.

8, 9. Fa den profeititori fu Danièl e sori taki Yehovah na a Gado di e meki sani pasa o ten a wani?

⁸ Luku wan tra profeititori di abi fu du nanga Gado en pipel fu owruten. Tu yari bifo den Dyu gowe libi Babilon, Gado meki a profeiti Danièl taki na fesi dati a Mesias ben o kon 483 yari baka di a komando ben gi fu bow Yerusalem baka. A kownu fu den Mediasma nanga den Persiasma gi a komando dati na ini a yari 455 Fosi Krestes. Baka 483 yari, na ini a yari 29, Yesus fu Nasaret dopu èn a salfu nanga santa yeye. Na so a tron a Mesias, soifri na a ten di Bijbel ben taki. *​—Neh. 2:1, 5-8; Dan. 9:24, 25; Luk. 3:1, 2, 21, 22.

⁹ Prakseri now san Bijbel taki fu Gado Kownukondre. A taki dati Krestes ben o tron Kownu na hemel na ini 1914. Bijbel e fruteri fu „a marki” di ben o sori o ten Yesus ben o kon. A taki dati na a ten dati, bigi problema ben o de na grontapu, fu di den ben o trowe Satan komoto na hemel (Mat. 24:3-14; Openb. 12:9, 12). Boiti dati, tra profeititori na ini Bijbel e sori taki na ini 1914 ’a reti ten fu den trakondre sma ben o pasa’ èn Krestes ben o tron Kownu na hemel.​—Luk. 21:24; Dan. 4:10-17. *

10. Sortu sani di musu pasa ete, o pasa soifri na a ten di Gado poti?

¹⁰ Heri esi, a „bigi banawtu” di Yesus ben taki fu en o kon. Baka dati, Yesus o tiri wán dusun yari langa. Wi kan de seiker taki den sani disi o pasa soifri na a ten di Gado poti. Di Yesus ben de na grontapu, Yehovah ben poti a „dei nanga a yuru” kaba te den sani disi ben o pasa.​—Mat. 24:21, 36; Openb. 20:6.

’GEBROIKI YU TEN NA WAN KONI FASI’

11. Fu di wi sabi taki wi e libi na ini a ten fu a kaba, dan san wi musu du?

¹¹ Now di wi sabi taki Krestes tron Kownu èn taki wi e libi na ini „a ten fu a kaba”, dan san wi musu du? (Dan. 12:4) Furu sma e si taki den problema na grontapu e kon moro ogri, ma den no e frustan taki disi na wan kontru fu Bijbel profeititori di e taki fu den lasti dei. Kande son sma e fruwakti taki ala sani o bruya na grontapu wan dei. Trawan e bribi taki na wan noso tra fasi libisma o man tyari ’freide èn taki ala sani o waka bun’ (1 Tes. 5:3). Ma fa a de nanga wi? Wi e bribi taki a no o teki langa moro fosi a grontapu fu Satan kon na wan kaba? Efu wi e bribi dati trutru, dan wi o gebroiki wi ten fu dini Yehovah èn fu yepi trawan leri sabi en (2 Tim. 3:1). Wi musu gebroiki wi ten na wan koni fasi.​—Leisi Efeisesma 5:15-17.

12. San wi kan leri fu a sani di Yesus taki fu den dei fu Noa?

 ¹² Fu di furu sani de na ini a grontapu disi di kan hari wi prakseri, meki a no makriki fu ’gebroiki wi ten na wan koni fasi’. Yesus ben gi a warskow disi: „Neleki fa sani ben de na ini a ten fu Noa, na so a o de te a Manpikin fu libisma kon.” Fa a ben de na a ten fu Noa? Gado ben taki na fesi dati a grontapu fu a ten dati ben o kisi pori. Wan bigi frudu ben o kiri sma na heri grontapu. Noa, „wan preikiman fu retidu”, ben e fruteri den sma fu en ten a boskopu fu Gado (Mat. 24:37; 2 Petr. 2:5). Ma den ben e „nyan, den ben dringi, man ben teki uma fu trow èn uma ben trow nanga man. . . . Ma den no ben poti prakseri na san ben e pasa, teleki a frudu kon èn a wai den alamala puru”. Dati meki Yesus warskow den bakaman fu en: „Un musu de srekasreka tu, bika a Manpikin fu libisma o kon na wan yuru di unu no ben prakseri” (Mat. 24:38, 39, 44). Wi musu de leki Noa, wi no musu de leki den sma fu en ten. San o yepi wi fu de srekasreka?

13, 14. San wi no musu frigiti fu Yehovah efu wi wani tan dini en, aladi wi e wakti a ten di a Manpikin fu libisma o kon?

¹³ Wi no sabi o ten a Manpikin fu libisma o kon. Ma san wi no musu frigiti, na taki ala ten Yehovah e du san a abi na prakseri, soifri na a ten di a poti. Te Yehovah e taki dati wan sani musu pasa, dan a sani dati o pasa trutru na a ten di a poti, awinsi san e pasa na grontapu èn awinsi san libisma e bosroiti fu du. (Leisi Danièl 2:21.) Odo 21:1 e taki: „Na ati fu wan kownu de leki liba na ini na anu fu Yehovah. A e tyari en go pe a wani.”

¹⁴ Yehovah kan meki sani pasa na so wan fasi, taki den sani di a abi na prakseri e pasa na a ten di a wani. Furu prenspari sani di pasa na grontapu abi fu du nanga profeititori di kon tru. Disi de so spesrutu nanga den profeititori di abi fu du nanga a bun nyunsu fu Gado Kownukondre di e preiki na heri grontapu. Fu eksempre, prakseri den kondre di ben de fosi ondro a tiri fu Communist-sma noso ogri-ati tiriman. Sma no ben fruwakti taki bigi kenki ben o kon so esi na ini den kondre disi. Ma den kenki disi meki taki wi man preiki a bun nyunsu now na ini furu kondre pe a wroko fu wi ben tapu fosi. Fu dati ede, awinsi san wi e du, meki wi gebroiki wi ten na wan koni fasi èn tan dini Yehovah, a Gado di e meki sani pasa o ten a wani.

SORI TAKI YU E BRIBI TAKI YEHOVAH E DU SAN A ABI NA PRAKSERI, NA A YOISTI TEN

15. Fa wi kan sori bribi te Yehovah en organisâsi e tyari kenki kon?

¹⁵ Efu wi wani tan du a Kownukondre preikiwroko na ini den lasti dei disi, dan wi musu bribi taki Yehovah e du san a abi na prakseri, na a yoisti ten. Fu di grontapu e kenki doronomo, a de fanowdu son tron fu kenki a fasi fa wi e preiki. Son leisi Yehovah en organisâsi e tyari kenki kon fu yepi wi preiki a bun nyunsu na wan moro bun fasi. Te wi e du ala san na organisâsi e taigi wi èn te wi e gi yesi na Gado Manpikin di de na „ede fu a gemeente”, dan wi e sori taki wi e bribi na ini a Gado di e meki sani pasa o ten a wani.​—Ef. 5:23.

16. Fu san ede wi kan bribi taki Yehovah o yepi wi na a yoisti ten?

¹⁶ Yehovah wani taki wi no musu frede fu taki nanga en na ini begi èn wi musu abi ala frutrow taki a o „yepi wi na a yoisti ten” (Hebr. 4:16). Disi e sori taki a lobi wi trutru èn a e broko en ede trutru nanga ibriwan fu wi (Mat. 6:8; 10:29-31). Te  wi e begi Yehovah Gado fu yepi wi èn wi e du san a e taigi wi, dan wi e sori taki wi e bribi na ini en. Wi no musu frigiti tu fu begi gi den brada nanga sisa fu wi.

17, 18. (a) San Yehovah o du heri esi nanga den feanti fu en? (b) Nanga sortu sani wi musu luku bun?

¹⁷ Now a no a ten fu „lasi bribi” (Rom. 4:20). Now na a ten fu abi wan tranga bribi di o gi wi deki-ati fu du san Gado wani. Den feanti fu Gado, sobun, Satan nanga den wan di a e tiri, e pruberi fu tapu a wroko di Yesus gi wi fu du (Mat. 28:19, 20). Didibri e feti nanga wi, ma wi sabi taki Yehovah na „wan libi Gado, di de wan Frulusuman fu ala sortu sma, spesrutu fu sma di e gi yesi na en ala ten”. „Te tesi miti den sma di e dini Gado fayafaya, dan Yehovah sabi fa fu frulusu den.”​—1 Tim. 4:10; 2 Petr. 2:9.

¹⁸ Heri esi, Yehovah o pori na ogri grontapu disi. Wi no sabi soifri fa disi o pasa èn o ten a o pasa, ma wi sabi taki na a yoisti ten Krestes o figi den feanti fu Gado puru na grontapu. Dan ala sma o sabi taki Yehovah na a wan-enkri sma di abi a reti fu tiri hemel nanga grontapu. Sobun, wi ben o meki wan bigi fowtu efu wi ben o frigiti na ini sortu ’ten nanga spesrutu pisi ten’ wi e libi! Wi musu luku bun taki wi no e bigin denki taki ’ala sani o tan soifri soleki fa den ben de sensi di Gado bigin meki sani’.​—1 Tes. 5:1; 2 Petr. 3:3, 4.

’NANGA PASENSI WI MUSU WAKTI YEHOVAH’

19, 20. Fu san ede wi musu wakti Yehovah nanga pasensi?

¹⁹ Di Yehovah meki libisma, a ben wani taki den ben musu libi fu têgo so taki den ben kan tan leri fu en èn fu den moi sani di a meki. Preikiman 3:11 e taki: „Ala sani a meki moi na a reti ten. Srefi têgo ten a poti na ini den ati, so taki libisma noiti no man kon sabi finifini fa a tru Gado meki den sani fu en.”

²⁰ Wi breiti srefisrefi taki noiti Yehovah kenki san a ben abi na prakseri fu du gi libisma (Mal. 3:6). Gado „no e kenki soleki fa skaduw e kenki” (Yak. 1:17). Skaduw e kenki fu di grontapu e drai lontu, ma awinsi omeni ten e pasa, Yehovah no e kenki. A de „a têgo Kownu” (1 Tim. 1:17). Fu dati ede, meki wi ’wakti Yehovah nanga pasensi’ (Mika 7:7). Iya, „abi deki-ati èn no frede, un sma di e wakti Yehovah nanga pasensi”.​—Ps. 31:24.

[Futuwortu]

[Aksi fu a tori disi]

[Prenki na tapu bladzijde 19]

Danièl ben bribi taki den profeititori fu Gado ben o kon tru

[Prenki na tapu bladzijde 21]

Yu e gebroiki yu ten na wan koni fasi fu du a wani fu Yehovah?