„Luku bun nanga a srudeki fu den Fariseiman”

Yesus ben warskow den disipel fu en: „Luku bun nanga a srudeki fu den Fariseiman, dati na a hoigrifasi fu den” (Luk. 12:1). Mateyus skrifi a srefi warskow disi èn a e yepi wi fu frustan taki Yesus ben e taki fu „den leri” fu den Fariseiman.​—Mat. 16:12.

Son leisi Bijbel e gebroiki srudeki fu agersi wan sani di kan meki wan sma kon ogri. Fu di furu sma ben e bribi den falsi leri fu den Fariseiman èn fu di den bigin teki a srefi kruktu denki fu den Fariseiman abra, meki den sma disi ben e du sani di ogri. Fu san ede den leri fu den Fariseiman ben meki sma du ogri?

1 Den Fariseiman ben abi heimemre èn den ben e denki taki den bun moro tra sma.

Yesus ben taki fu a kruktu denki disi na ini wan fu den agersitori fu en. A taki: „A Fariseiman go tanapu, dan a bigin begi na ini en ati: ’Ke, mi Gado, mi e taki yu tangi taki mi no de leki den tra sma, den sma di e kwinsi trawan, den sma di no bun, den sutaman, noso srefi leki a man disi di e teki belasting-moni gi lanti. Tu tron wan wiki mi e faste èn mi e gi a di fu tin pisi fu ala san mi e kisi.’ Disiten a man di ben e teki belasting-moni gi lanti ben e tanapu farawe. A no ben wani opo en ai srefi fu luku go na hemel. Na presi fu dati a ben tan naki na tapu en borsu èn a ben e taki: ’Ke, mi Gado, abi sari-ati nanga wan sondari leki mi.’”​—Luk. 18:11-13.

Yesus ben prèise a man di ben e teki belasting-moni gi lanti, fu di a man ben abi sakafasi. A taki: „Mi e taigi unu: Di a man disi go na en oso, a ben de moro bun leki [a Fariseiman]. Bika den o saka a sma di e hei ensrefi, ma den o hei a sma di e saka ensrefi” (Luk. 18:14). Nofo tron sma ben e denki taki ala man di e teki belasting-moni gi lanti ben kruka. Ma toku Yesus ben wani yepi den wan di ben wani arki en. Wi sabi taki tu fu den, Mateyus nanga Sakeyus, tron disipel fu Yesus.

Kande wi man du son sani di trawan no man du noso kande wi kisi son grani na ini Yehovah organisâsi di trawan no abi. Kande wi e si den swakifasi fu trawan tu. San wi musu du efu wi bigin denki taki wi bun moro den? Wantewante wi musu puru a denki dati na wi ede. Bijbel e taki: „Lobi abi pasensi èn a abi switifasi. Lobi no e dyarusu, a no e meki bigi èn a no abi heimemre, a no e tyari ensrefi na wan fasi di no fiti, a no e suku en eigi bun èn a no e mandi esi. A no e tan memre na ogri di trawan du. A no e prisiri nanga sani di no bun, ma a e prisiri nanga sani di tru.”​—1 Kor. 13:4-6.

Wi musu denki leki na apostel Paulus. Baka di a taki dati „Krestes Yesus kon na grontapu fu frulusu sondari”, a taki: „Mi na a moro bigiwan fu den.”​—1 Tim. 1:15.

Prakseri fu den aksi disi:

Mi e si misrefi leki wan sondusma? Mi e frustan taki na bun-ati fu Yehovah meki mi man kisi frulusu? Noso mi e denki taki mi bun moro trawan fu di mi e dini Yehovah someni yari kaba, fu di mi abi grani na ini Gado organisâsi, noso fu di mi man du son sani di trawan no man du?

  2 Den Fariseiman ben du sma ai sani, fu di den ben wani meki sma si o bun den de. Den ben wani de prenspari sma èn den ben lobi en te sma gi den spesrutu nen fu gi den grani.

Ma Yesus ben gi a warskow disi: „Ala sani di den e du, den e du fu meki sma si den. Bika den e meki den pikin dosu di abi pisi fu Gado Buku na ini kon moro bradi èn den e weri den leki wan tapu. Boiti dati den e meki den franya fu den krosi kon moro langa. Den lobi sidon na den moro prenspari presi na den fesa èn den lobi sidon na fesisei na ini den snoga. Den lobi te sma na wowoyo e gi den odi èn te sma e kari den Leriman” (Mat. 23:5-7). Luku fa Yesus ben de heri tra fasi leki den. A ben de a Manpikin fu Gado èn wan sma di no ben abi sondu, ma toku a ben abi sakafasi. Di wan man taigi Yesus wan leisi taki a bun, dan Yesus taki: „Fu san ede yu e taki dati mi bun? Nowan sma bun. A wan-enkri sma di bun, na Gado” (Mark. 10:18). Wan tra leisi Yesus wasi den futu fu den disipel fu en, so taki den ben kan leri taki den musu abi sakafasi ala ten.​—Yoh. 13:1-15.

Wan tru Kresten musu dini den brada nanga sisa fu en (Gal. 5:13). Spesrutu den wan di wani teki fesi na ini a gemeente musu du disi. A bun te wan brada e „suku fu tron wan sma di e teki fesi na ini a gemeente”, ma a musu wani du disi fu di a wani yepi trawan. A wroko disi a no fu kisi biginen noso makti. Den sma di wani teki fesi na ini a gemeente musu abi „sakafasi” neleki Yesus.​—1 Tim. 3:1, 6; Mat. 11:29.

Prakseri fu den aksi disi:

Mi e du bun gi den brada di abi grani na ini a gemeente, moro leki san mi e du gi trawan, fu di mi wani taki den brada dati gi mi moro frantwortu na ini a gemeente? Mi lobi du sani na ini a diniwroko di o meki taki trawan si mi èn prèise mi? A de so taki ala ten mi wani de moro bun leki trawan?

  3 Den wèt nanga den gwenti fu den Fariseiman ben meki a libi hebi gi den sma di ben wani gi yesi na den wèt fu Yehovah.

Yehovah ben gi den Israelsma a Wèt fu sori den fa den ben musu anbegi en. Ma a no gi den wèt di ben abi fu du nanga ala sortu pikinpikin sani. Fu eksempre, a Wèt ben taki dati den no ben musu wroko na Sabat-dei, ma a no taki soifri san den ben musu si leki wroko èn san den no ben musu si leki wroko (Eks. 20:10). Den Fariseiman ben meki den sma hori wèt nanga gwenti di densrefi ben poti, fu di den ben feni taki a Wèt fu Yehovah no ben e taki fu ala sani. Yesus ben hori Gado Wèt, ma a no ben hori den hebi wèt di den Fariseiman ben poti (Mat. 5:17, 18; 23:23). A ben frustan fu san ede Gado ben poti wèt èn a ben sabi taki Gado ben wani taki sma sori sari-ati nanga lobi gi makandra. Yesus ben sori switifasi, awinsi den disipel fu en no ben du son leisi san a ben wani. Fu eksempre, na a neti di den srudati kon grabu Yesus, a aksi dri fu den apostel fu en fu tan na ai. Ma ibri leisi den ben e fadon na sribi. Ma toku Yesus sori switifasi èn a taki: „A tru taki na ati wani, ma a skin swaki.”​—Mark. 14:34-42.

Prakseri fu den aksi disi:

Mi e meki wan lo hebi wèt èn mi wani nomonomo taki tra sma hori den? Mi wani ala ten taki sma du sani di mi feni bun? Mi wani taki sma du moro leki san den man du?

Prakseri fa Yesus ben de heri tra fasi leki den Fariseiman. Yu e si wan tu sani di yu musu kenki fu kan de moro leki Yesus? Efu yu si taki yu musu kenki, dan a bun fu du dati.

[Prenki na tapu bladzijde 28]

Den Fariseiman ben e tai pikin dosu na den skin.​—Mat. 23:2, 5

[Prenki na tapu bladzijde 29]

Owruman di abi sakafasi e yepi trawan èn den no de leki den Fariseiman di ben abi heimemre

[Prenki na tapu bladzijde 30]

Yu de leki Yesus di no ben e fruwakti tumusi furu fu trawan?