Yu e skèin a glori fu Yehovah?
Yu e skèin a glori fu Yehovah?
„Neleki wan spikri, wi e skèin a glori fu Yehovah.”—2 KOR. 3:18.
SAN YU BEN O PIKI?
Fa wi kan skèin a glori fu Yehovah aladi wi na sondusma?
Fa den begi fu wi èn den konmakandra fu wi e yepi wi fu skèin a glori fu Gado?
San kan yepi wi fu gi Yehovah glori ala ten?
1, 2. Fu san ede libisma man sori taki den abi den fasi fu Yehovah?
WI ALAMALA gersi wi papa nanga mama na wan noso tra fasi. Dati meki sma gwenti fu taki sani soleki: ’A boi disi na soso en papa’, noso ’Ai meisje, yu gersi yu mama yèrè!’ Nofo tron pikin e du san den e si den papa nanga mama e du. Ma fa a de nanga wi? Wi kan de leki wi hemel Tata, Yehovah? A tru taki wi no man si en, ma toku wi kan si sortu moi fasi a abi te wi e studeri Bijbel èn te wi e luku den sani di a meki. Wi kan kon sabi en tu te wi e prakseri fu den sani di wi leisi na ini Bijbel, spesrutu den sani di en Manpikin Yesus Krestes taki èn den sani di a du (Yoh. 1:18; Rom. 1:20). Sobun, wi man abi den srefi fasi leki Yehovah. Te wi e sori den fasi fu en, dan wi de leki spikri di e skèin a glori fu en.
2 Fosi Gado meki Adam nanga Eva, a ben sabi taki libisma ben o man du san a wani, den ben o man sori taki den abi den srefi fasi leki en, èn den ben o man gi en grani. (Leisi Genesis 1:26, 27.) Leki Kresten, wi musu sori taki wi abi den fasi fu wi Gado. Te wi e du disi, dan wi abi a bigi grani fu sori sma fa Gado de, awinsi sortu gwenti wi abi noso na sortu fasi wi kweki, awinsi fu sortu ras wi de, noso awinsi omeni skoroleri wi kisi. Fu san ede wi alamala kan abi a grani disi? Fu di „Gado no lobi a wan sma moro a trawan, ma awansi fu sortu kondre wan sma de, efu a e lespeki Gado èn a e du san reti, dan Gado feni en bun”.—Tori 10:34, 35.
3. Fa wi feni en fu dini Yehovah?
3 Salfu Kresten e skèin a glori fu Yehovah, noso den e sori taki den abi den srefi fasi fu en. Na apostel Paulus di ben de wan salfu Kresten tu, taki: „Neleki wan spikri, wi e skèin a glori fu Yehovah di de fu si na tapu wi fesi di no tapu nanga wan duku. Wi alamala e kenki kon gersi en, so taki wi e skèin moro nanga moro glori” (2 Kor. 3:18). Di a profeiti Moses ben saka fu Sinai-bergi nanga den plata ston di ben abi den Tin Komando na tapu, en fesi ben e skèin leti fu di Yehovah ben taki nanga en (Eks. 34:29, 30). A sani di pasa nanga Moses no pasa nanga wi èn wi fesi no e skèin leti neleki en. Ma sma kan si na wi fesi taki wi e prisiri te wi e fruteri trawan fu Yehovah, fu den fasi fu en, èn fu den moi sani di a o du gi libisma. Sobun, awinsi wi na salfu Kresten noso awinsi wi na tra skapu, wi alamala de leki den brenki isri spikri fu owruten, fu di wi e skèin a glori fu Yehovah. Disi wani taki dati wi e gi Yehovah grani nanga a fasi fa wi e tyari wisrefi na ini na aladei libi èn na ini a preikiwroko (2 Kor. 4:1). Yu e libi na wan fasi di Yehovah feni bun èn yu e preiki a bun nyunsu doronomo? Te yu e du dati, dan yu e skèin a glori fu Yehovah.
WI WANI SORI TAKI WI ABI DEN FASI FU YEHOVAH
4, 5. (a) Sortu problema di Paulus ben abi, wi abi tu? (b) San sondu du nanga libisma?
4 Leki futuboi fu Yehovah wi wani gi en grani. Awinsi san wi e du, wi wani sori taki wi abi den fasi fu en. Ma nofo tron wi e du sani di no bun, aladi wi wani du bun. Paulus ben abi a srefi problema disi tu. (Leisi Romesma 7:21-25.) A taki krin fu san ede wi alamala musu feti nanga den sondu firi fu wi: „Ala sma sondu èn den no man sori a glori fu Gado kwetikweti” (Rom. 3:23). Fu di Adam sondu, meki ala libisma de srafu fu sondu sensi den gebore. A sondu disi de leki wan ogri kownu di e tiri den.—Rom. 5:12; 6:12.
5 San na sondu? Sondu na iniwan sani di no e kruderi nanga a fasi fa Yehovah de, nanga den sani di a lobi, èn nanga den sani di a wani wi fu du. Sondu meki taki libisma no de bun nanga Gado moro. A e meki taki wi no de soleki fa Gado ben wani wi fu de. Neleki fa wan sma di gwenti sutu bo kan misi son leisi, na so a kan pasa tu taki son leisi wi e sondu sondro fu wi wani dati noso sondro fu wi sabi srefi (Num. 15:27-31). Sondu abi furu krakti na wi tapu èn a de leki wan skotu na mindri wi nanga wi Mekiman (Ps. 51:5; Yes. 59:2; Kol. 1:21). Furu sma e libi na wan fasi di e meki taki den no kan de mati fu Gado kwetikweti. Dati meki den no abi a bigi grani fu skèin a glori fu Gado. Nowan tra sani tyari so furu ogri kon gi libisma leki sondu.
6. Fu san ede wi kan skèin a glori fu Gado, aladi wi na sondusma ete?
6 A tru taki wi na sondusma, ma toku Yehovah gi wi howpu (Rom. 15:13). Fu di Yehovah meki Yesus dede leki wan frulusu-ofrandi, meki wi abi na okasi now fu kisi frulusu fu sondu. Fu di wi e bribi na ini na ofrandi dati, meki wi no de „srafu fu sondu moro” èn wi man skèin a glori fu Yehovah (Rom. 5:19; 6:6; Yoh. 3:16). Te wi e tan mati fu Gado, dan wi kan de seiker taki a o blesi wi now. Na ini a ten di e kon a o puru ala sondu fu wi èn a o gi wi têgo libi. A de wan bigi grani gi wi taki Gado e si wi leki sma di kan skèin a glori fu en, aladi wi na sondusma ete!
SAN KAN YEPI WI FU SKÈIN A GLORI FU GADO?
7. San wi musu kon frustan efu wi wani skèin a glori fu Gado?
7 Leki sondu libisma, wi alamala abi swakifasi. Efu wi wani skèin a glori fu Gado, dan ibriwan fu wi musu kon sabi sortu swakifasi a abi (2 Kron. 6:36). Wi no musu tapu wi ai gi den swakifasi dati, ma wi musu feti nanga den so taki wi kan skèin a glori fu Gado. Fu eksempre, efu wi e luku porno, dan wi musu frustan taki wi e du wan sondu èn taki wi abi yepi fu den owruman fanowdu. Te wi frustan dati, dan wi musu aksi den fu yepi wi (Yak. 5:14, 15). Disi na a fosi sani di wi musu du efu wi wani gi Gado grani trutru. Ala ten wi musu sorgu taki wi e libi na wan fasi di Yehovah feni bun (Odo 28:18; 1 Kor. 10:12). Awinsi sortu swakifasi wi abi, wi musu tan meki muiti fu basi den, so taki wi kan skèin a glori fu Gado.
8. San wi musu du, awinsi wi na sondu libisma?
8 Yesus ben de a wan-enkri libisma di du ala ten san Gado feni bun, èn di skèin a glori fu Gado dorodoro. Aladi wi no de leki Yesus di no ben abi sondu, toku wi musu meki tranga muiti fu de leki en (1 Petr. 2:21). Yehovah e si fa wi e go na fesi, èn a e si sortu muiti wi e du fu gi en grani. Dati meki a e blesi wi.
9. Fa Bijbel kan yepi wi fu skèin a glori fu Gado moro bun?
9 Bijbel kan yepi wi fu frustan fa wi kan skèin a glori fu Gado moro bun. Wi musu studeri Bijbel bun èn wi musu teki ten fu prakseri fu san wi leisi (Ps. 1:1-3). Te wi e leisi Bijbel ibri dei, dan dati o yepi wi fu go na fesi. (Leisi Yakobus 1:22-25.) Den sani di wi e leri fu Bijbel e tranga wi bribi. Disi o yepi wi fu du ala muiti fu plisi Yehovah èn fu no du nowan seryusu sondu.—Ps. 119:11, 47, 48.
10. Fa begi kan yepi wi fu dini Yehovah moro bun?
10 Efu wi wani skèin a glori fu Gado, dan wi musu „tan begi” (Rom. 12:12). Wi musu begi Yehovah fu yepi wi dini en na wan fasi di a feni bun. Wi kan aksi en fu gi wi en santa yeye, fu gi wi moro bribi, fu gi wi krakti fu kakafutu gi tesi, èn fu man „gebroiki a tru leri na ini Gado wortu na wan yoisti fasi” (2 Tim. 2:15; Mat. 6:13; Luk. 11:13; 17:5). Neleki fa wan pikin e bribi taki en papa o yepi en, na so wi musu bribi taki wi hemel Tata, Yehovah, o yepi wi. Efu wi e aksi en fu yepi wi fu dini en moro bun, dan wi kan de seiker taki a o du dati. Noiti wi musu denki taki Yehovah e fuga fu den begi fu wi. Sobun, te wi e begi, meki wi prèise en, meki wi taki en tangi èn meki wi aksi en fu tiri wi, spesrutu te wi abi bigi problema. Wi kan aksi Yehovah tu fu yepi wi fu du a diniwroko fu wi na so wan fasi, taki wi e gi en grani.—Ps. 86:12; Yak. 1:5-7.
11. Fa den gemeente konmakandra e yepi wi fu skèin a glori fu Gado?
11 Gado gi „a koni srafu di de fu frutrow” a frantwortu fu luku den skapu fu en di a lobi trutru (Mat. 24:45-47; Ps. 100:3). A koni srafu wani yepi wi alamala fu skèin a glori fu Yehovah. Den gemeente konmakandra na wan fu den sani di a srafu e gebroiki fu du disi. Neleki fa wan sma di e meki krosi e kenki wan krosi so taki a kan fiti wi, na so den konmakandra fu wi e yepi wi fu kenki wi libi èn fu tron moro bun Kresten (Hebr. 10:24, 25). Fu dati ede, wi musu doro biten na den konmakandra. Efu wi abi a gwenti fu kon lati, wi no o kisi ala a yepi di wi kan kisi fu den konmakandra.
MEKI WI DE LEKI GADO
12. Fa wi kan de leki Gado?
12 Efu wi wani skèin a glori fu Yehovah, dan wi musu „teki na eksempre fu Gado” (Ef. 5:1). Wan fasi fa wi kan du dati na te wi e leri fu si sani soleki fa en e si sani. Te we e du sani soleki fa wi wani, na presi fu du sani soleki fa Gado wani, dan wi e gi en porinen èn wi e suku soso problema gi wisrefi. Fu di wi e libi na ini wan grontapu di de na ini a makti fu na ogriwan Satan Didibri, meki wi musu du furu muiti fu no lobi nowan sani di Yehovah no lobi kwetikweti, èn nanga wi heri ati wi musu lobi den sani di a lobi (Ps. 97:10; 1 Yoh. 5:19). Wi no musu tweifri srefisrefi taki a wan-enkri bun fasi fa wi kan dini Yehovah, na te wi e du ala sani fu gi en glori.—Leisi 1 Korentesma 10:31.
13. (a) Fu san ede wi no musu lobi sondu kwetikweti? (b) San wi o du efu wi no lobi sondu?
13 Yehovah no lobi sondu kwetikweti, èn na so wi musu denki fu sondu tu. Wi musu tan farawe fu iniwan sani di kan meki wi du sondu. Fu eksempre, wi musu luku bun taki wi no tron sma di fadon komoto na bribi, bika dati na wan sondu di ben o meki taki Gado no feni wi bun moro fu skèin a glori fu en (Deut. 13:6-9). Fu dati ede wi no musu abi noti fu du nanga sma di fadon komoto na bribi noso iniwan sma di e taki dati en na wan brada, ma di e gi Gado porinen. Wi no musu bumui nanga so wan sma, awinsi a de wan famiri fu wi (1 Kor. 5:11). A no e tyari nowan wini kon gi wi te wi e pruberi fu buweisi taki sma di fadon komoto na bribi noso sma di e krutu na organisâsi fu Yehovah, e taki sani di no tru. Fu taki en leti, wi no musu wani sabi srefi san den e taki na ini den buku fu den noso tapu Internet, fu di disi kan meki taki wi nanga Yehovah no de mati moro.—Leisi Yesaya 5:20; Mateyus 7:6.
14. San na wan fu den moro bun fasi fa wi kan de leki Yehovah? Fu san ede?
14 Wan fu den moro bun fasi fa wi kan de leki Yehovah, na fu sori lobi (1 Yoh. 4:16-19). Fu taki en leti, a lobi di wi abi gi makandra e sori taki wi na disipel fu Yesus èn futuboi fu Yehovah (Yoh. 13:34, 35). Fu di wi na sondusma, meki son leisi a muilek fu sori lobi. Ma toku wi musu pruberi fu sori lobi ala ten. Te wi e du muiti fu sori lobi nanga den tra fasi di Kresten musu abi, dan dati o tapu wi fu du hati sani nanga trawan noso fu sondu.—2 Petr. 1:5-7.
15. San wi o du efu wi lobi trawan?
15 Te wi lobi tra sma, dan wi o wani du bun gi den (Rom. 13:8-10). Fu eksempre, lobi gi wi trowpatna o meki taki wi o tai hori na en ala ten èn wi no o du sutadu. Te wi abi lobi nanga lespeki gi den owruman èn te wi e warderi a wroko di den e du, dan wi o gi yesi na den èn wi o saka wisrefi na den ondro. Pikin di lobi den papa nanga mama e gi yesi na den, den e lespeki den, èn den no e taki takru sani fu den. Efu wi lobi tra sma, wi no o si den moro lagi leki wi èn wi o taki nanga den na wan lespeki fasi (Yak. 3:9). Owruman di lobi den skapu fu Gado o sori switifasi gi den.—Tori 20:28, 29.
16. Fa lobi o yepi wi na ini a preikiwroko?
16 Wi musu sori lobi tu gi sma di wi e miti na ini a preikiwroko. Fu di wi lobi Yehovah trutru, wi no o lasi-ati te sma no wani arki wi noso te den no e si a boskopu fu wi leki wan prenspari sani. Na presi fu dati, wi musu tan preiki a bun nyunsu go doro. Lobi o meki taki wi o sreka wisrefi bun gi a preikiwroko èn wi o du muiti fu tron bun leriman fu Gado Wortu. Efu wi lobi Gado nanga tra sma trutru, dan wi no o preiki soso fu di wi musu preiki. Wi o si a preikiwroko leki wan bigi grani èn wi o du en nanga prisiri.—Mat. 10:7.
TAN SKÈIN A GLORI FU YEHOVAH
17. Wi sabi taki sondu kan tapu wi fu skèin a glori fu Gado. Sobun, san wi musu du?
17 Furu sma na ini a grontapu disi no e frustan o seryusu sondu de, ma wi e frustan dati. Fu dati ede wi sabi taki wi musu feti nanga den sondu firi fu wi. Wi sabi taki wi musu du sani fu meki wi konsensi wroko moro bun, so taki a kan warskow wi te wi e kisi wan sondu firi noso te wi e prakseri wan sani di no bun. Disi o yepi wi fu du san de fanowdu fu no sondu (Rom. 7:22, 23). A tru taki wi swaki, ma Gado kan gi wi a krakti fu du san bun, awinsi na ini sortu situwâsi wi de.—2 Kor. 12:10.
18, 19. (a) Fu san ede wi kan wini a feti di wi musu feti nanga Satan èn nanga den ogri yeye? (b) San na a fasti bosroiti fu wi?
18 Efu wi wani skèin a glori fu Yehovah, dan wi musu feti tu nanga Satan èn nanga den ogri yeye fu en. Gado gi wi ala sani fu man wini a feti disi (Ef. 6:11-13). Satan no wani taki Yehovah kisi a glori di A musu kisi, èn a e du ala san a man fu no meki disi pasa. Boiti dati, Didibri e du ala san a man fu pori a matifasi di wi abi nanga Yehovah. Fu dati ede a de wan bigi syen gi Satan te wi nanga milyunmilyun tra mansma, umasma, nanga pikin e gi Gado glori èn e tai hori na en, aladi wi na sondusma. Sobun, meki wi tan prèise Yehovah neleki den yeye na hemel di e taki nanga tranga sten: „Na yu, Yehovah wi Gado, warti fu sma prèise yu gi a glori, a grani nanga a makti di yu abi, bika na yu meki ala sani. Na fu di yu ben wani, meki den sani disi kon de èn na yu meki den.”—Openb. 4:11.
19 Meki wi abi a fasti bosroiti fu skèin a glori fu Yehovah, awinsi san e pasa. A e prisiri Yehovah trutru taki someni sma di e tai hori na en e du muiti fu de leki en èn fu skèin a glori fu en (Odo 27:11). Wi musu firi leki David di singi: „Yehovah mi Gado, nanga mi heri ati mi e prèise yu èn mi o tan gi yu nen glori fu ala ten” (Ps. 86:12). Ala libisma di e gi yesi na Yehovah o man skèin a glori fu en dorodoro èn den o prèise en fu têgo. A o switi fu libi na a ten dati. Yu e skèin a glori fu Yehovah Gado now? Yu wani du dati fu ala ten?
[Aksi fu a tori disi]
[Prenki na tapu bladzijde 27]
Yu e skèin a glori fu Yehovah na den fasi disi?
