Yu kan de koloku awinsi sani no e go bun na ini yu trowlibi

’A rai di mi wani gi den sma di trow, a no fu mi, ma na fu Masra.’​—1 KOR. 7:10.

YU KAN TYARI DISI KON NA KRIN?

Fu san ede wi kan taki dati Gado tyari trowpatna kon na wán?

Fa owruman kan yepi Kresten di abi problema na ini den trowlibi?

Fa wi musu si a trowlibi?

1. Fa Kresten e si a trowlibi èn fu san ede den e si en na a fasi dati?

TE KRESTEN e trow, den e meki wan sweri na fesi Gado. Sobun, den e teki wan seryusu frantwortu na den tapu (Preik. 5:4-6). Yehovah na a sma di seti a trowlibi èn na en tyari trowpatna „kon na wán” (Mark. 10:9). Son tron den wèt fu wan kondre no de a srefi leki den di fu Bijbel te a abi fu du nanga a trowlibi. Ma toku den futuboi fu Yehovah musu si a sweri di den meki di den trow, leki fa Yehovah e si en. Den musu si en leki wan seryusu sani, awinsi den trow di den no ben e dini Yehovah ete.

2. Sortu aksi wi o luku na ini na artikel disi?

² Wan bun trowlibi kan tyari furu koloku kon. Ma san yu kan du te a no e go bun na ini yu trowlibi? Wan trowlibi di no bun kan kon bun baka? Sortu yepi de gi trowpatna di no abi wan bun trowlibi?

A TROWLIBI O DE WAN PRISIRI NOSO WAN HEBI?

3, 4. San kan pasa efu wan sma no e teki koni bosroiti te a e suku wan trowpatna?

³ Te wan Kresten abi wan bun trowlibi, a o de koloku èn disi e gi Yehovah grani. Ma efu trowpatna e prati noso broko trow, dan disi e tyari furu sari nanga tra problema kon. Efu wan Kresten e denki fu trow, dan en trowlibi o bigin bun efu a e meki Gado tiri en. Ma efu wan sma no e teki koni bosroiti te a e suku wan trowpatna, dan a no o de koloku èn a o sari. Fu eksempre, son yongu sma e bigin hori nanga wan sma aladi den no lepi nofo fu teki den frantwortu fu a trowlibi na den tapu. Trawan feni wan sma tapu Internet èn a no e teki langa fosi den trow nanga en. Ma te fu kaba den e si taki den no de koloku srefisrefi nanga a patna fu den. Dan yu abi trawan di du wan seryusu sondu na ini a pisi ten di den ben e hori nanga makandra. Disi kan meki taki den no e lespeki makandra moro. Sobun,  te den trow nanga makandra, dan a trowlibi fu den no e bigin bun kwetikweti.

⁴ Son Kresten no „trow nanga wan sma di de wan bakaman fu Masra” (1 Kor. 7:39). Furu tron den e sari fu di a sma no e dini Yehovah. Efu disi pasa nanga yu, dan yu musu aksi Gado pardon fu a sani di yu du èn aksi en fu yepi yu. A no o puru den bakapisi fu a fowtu di yu meki. Ma efu yu abi berow trutru, dan a kan yepi yu fu horidoro (Ps. 130:1-4). Du ala muiti fu plisi en now èn na ini a ten di e kon, dan ’a prisiri di Yehovah e gi’, o gi yu krakti fu horidoro.​—Neh. 8:10.

TE A TROWLIBI DE FU BROKO

5. Efu wan sma no abi wan koloku trowlibi, dan sortu sani a no musu prakseri?

⁵ Son sma di no de koloku nanga a trowlibi fu den e prakseri kande: ’Mi no de koloku, sobun fu san ede mi ben sa wani tan na ini a trowlibi disi? Kande mi ben o de moro koloku efu mi ben trow nanga wan tra sma! Efu mi gowe libi mi trowpatna, dan mi kan de fri baka! A no ben o moro bun fu broko a trow? Kande mi no o man broko a trow na wan fasi di e kruderi nanga Bijbel, ma efu mi prati nanga mi trowpatna, mi o man abi prisiri na ini a libi baka!’ We, na presi fu denki na a fasi disi èn na presi fu prakseri o switi a libi ben kan de, wan Kresten musu suku rai na Gado, a musu teki den rai èn a musu pruberi fu de koloku nanga a trowlibi fu en.

6. Fruteri san Yesus ben wani sori na Mateyus 19:9.

⁶ Efu wan Kresten ben o broko trow, dan a kan taki Bijbel no e gi en pasi fu trow baka nanga wan tra sma. Yesus taki: „Efu wan man broko trow nanga en wefi, ma a wefi no du hurudu èn a man trow nanga wan tra uma, dan a du sutadu” (Mat. 19:9.) Dyaso a wortu „hurudu” wani taki sutadu nanga tra seryusu sondu di abi fu du nanga seks. A prenspari srefisrefi taki wan Kresten aksi Gado rai te a e prakseri fu broko trow, aladi en noso en trowpatna no du hurudu.

7. San sma kan denki te Kresten trowpatna e prati noso broko trow?

⁷ Te trowpatna e prati noso broko trow, dan disi kan sori taki den no abi wan bun matifasi nanga Yehovah. Na apostel Paulus ben taki a seryusu sani disi: „Efu wan sma no sabi fa fu tiri en eigi osofamiri, dan fa a o man sorgu a gemeente fu Gado?” (1 Tim. 3:5). Fu taki en leti, efu ala tu trowpatna e taki dati den na Kresten, ma toku den e prati noso broko trow, dan sma kan si den leki hoigriman. Den e fruteri sma san Bijbel e taki, ma den srefi no e du dati.​—Rom. 2:21-24.

8. San na a problema te wan Kresten trowpaar bosroiti fu prati noso broko trow?

⁸ Te dopu Kresten trowpaar e bosroiti fu prati noso fu broko trow aladi Bijbel no e gi den pasi fu du dati, dan a musu de so taki  den no abi wan bun matifasi nanga Yehovah. Soleki fa a sori, dan wan fu den noso ala tu no e du san Bijbel e taki. Efu trutru den ben e ’frutrow na tapu Yehovah nanga den heri ati’, dan den no ben o denki taki den no man du noti moro fu meki a trowlibi kon bun baka.​—Leisi Odo 3:5, 6.

9. Sortu bun bakapisi son Kresten kisi fu di den tan nanga a trowpatna fu den?

⁹ Furu trowpaar kisi so furu problema taki den ben denki taki den no ben o man tan nanga makandra moro. Ma sonwan fu den trowpaar disi ben man tyari kenki kon, so taki den abi wan koloku trowlibi now. Te wan Kresten di abi furu problema na ini en trowlibi e bosroiti fu no gowe libi en trowpatna wantewante, dan nofo tron a kan kisi bun bakapisi. Luku san kan pasa te wan Kresten sisa abi wan masra di no de na bribi. Na apostel Petrus skrifi: „Un uma, . . . saka unsrefi na ondro un eigi masra, so taki te sonwan fu den no wani du san Gado wortu e taki, dan a fasi fa unu e tyari unsrefi kan meki den teki a bribi sondro fu unu taigi den wan sani, bika den si nanga den eigi ai fa unu e tyari unsrefi na wan krin fasi èn nanga bigi lespeki” (1 Petr. 3:1, 2). Iya, efu wan Kresten e tyari ensrefi bun, dan en patna di no de na bribi kan tron wan anbegiman fu a tru Gado bakaten! Kresten di e du muiti fu tan nanga a trowpatna fu den e gi Gado grani èn disi kan tyari bigi blesi kon gi a heri osofamiri.

10, 11. (a) Sortu sani di wan trowpaar no e fruwakti kan pasa na ini a trowlibi fu den? (b) San kan yepi wan Kresten te disi pasa?

¹⁰ Furu Kresten di e bosroiti fu trow e teki tra dopu Kresten leki patna, fu di den wani plisi Yehovah. Ma srefi te den e du disi, sani kan pasa di den no e fruwakti. Son leisi a kan pasa taki wan fu den trowpatna kon siki, so taki a no de so bun moro na en frustan. Noso a kan taki wan fu den trowpatna no wani go na ini a preikiwroko moro. Na disi pasa nanga Linda * di de wan fayafaya Kresten sisa èn wan lobi-ati mama. A no ben man du noti di en masra bigin du sani di no bun. Te fu kaba den ben abi fu puru en masra fu a gemeente, fu di a no ben abi berow. Kresten di de na ini situwâsi leki disi, kan firi leki den no man du noti fu meki den trowlibi kon bun baka. San den musu du dan?

¹¹ Kande yu e aksi yusrefi: ’Mi musu tan meki muiti fu meki mi trowlibi kon bun baka, awinsi san e pasa?’ We, nowan sma kan teki a bosroiti disi gi yu èn nowan sma musu du dati tu. Ma wan tu prenspari sani de di kan meki taki toku yu bosroiti fu tan nanga yu trowpatna, awinsi unu abi bigi problema. Yehovah e warderi en trutru te wan Kresten di abi problema na ini en trowlibi, e tan nanga en trowpatna fu di en konsensi no e gi en pasi fu gowe libi en. (Leisi 1 Petrus 2:19, 20.) Efu wan Kresten e du ala san a man fu meki en trowlibi kon bun baka, dan Yehovah o gebroiki en Wortu nanga en yeye fu yepi en.

DEN DE KLARIKLARI FU YEPI

12. Fa den owruman o denki fu wi te wi e suku yepi na den?

¹² Efu yu abi problema na ini yu trowlibi, no draidrai fu suku yepi na lepi Kresten. Den owruman de leki skapuman fu wan ipi skapu èn den de klariklari fu sori yu sortu rai  Gado e gi na ini Bijbel (Tori 20:28; Yak. 5:14, 15). No denki taki den owruman o wisiwasi yu nanga yu trowpatna te unu e suku yepi èn te unu e taki nanga den fu wan seryusu problema di unu abi na ini un trowlibi. Fu taki en leti, den o lobi èn lespeki unu moro te unu e du disi, fu di den e si taki unu wani plisi Gado trutru.

13. Sortu rai skrifi na 1 Korentesma 7:10-16?

¹³ Te wan Kresten di abi wan patna di no de na bribi, e kon suku yepi na den owruman, dan den owruman o sori en rai soleki a wan di Paulus gi. A ben skrifi: „A rai di mi wani gi den sma di trow, na taki wan wefi no musu prati fu en masra. A no mi e gi a rai dati, ma na Masra. Ma efu toku a e prati fu en masra, dan a musu tan sondro masra, noso a musu meki en bun baka nanga en masra. Wan masra no musu gowe libi en wefi tu. . . . Wefi, yu sabi efu yu o man frulusu yu masra? Masra, yu sabi efu yu o man frulusu yu wefi?” (1 Kor. 7:10-16) A de wan bigi blesi te wan trowpatna di no de na bribi e tron wan anbegiman fu Yehovah!

14, 15. (a) O ten wan Kresten kan bosroiti fu gowe libi en trowpatna? (b) Fu san ede wan Kresten musu begi fu a tori disi èn denki bun san na a problema trutru?

¹⁴ Ma toku son sani kan pasa di kan meki wan Kresten wefi bosroiti fu „prati fu en masra”. Fu eksempre, sonwan fu den prati fu di a masra no wani sorgu na osofamiri kwetikweti. Trawan bosroiti fu du disi fu di a masra e du sani nanga den di ogri so te, taki den frede taki den kan lasi den libi. Tra wefi e gowe fu di a masra fu den e tapu den fu dini Gado.

¹⁵ A didon na yu fu bosroiti efu yu o tan nanga yu trowpatna noso efu yu o gowe libi en. Ma efu wan dopu Kresten musu teki so wan bosroiti, a musu begi fu a tori disi èn a musu go denki bun san na a problema trutru. Fu eksempre, a de so taki na soso a patna di no de na bribi e meki taki a Kresten no man dini Yehovah? Noso a Kresten srefi no e du nofo muiti fu studeri Bijbel doronomo, fu go na den konmakandra, èn fu preiki?’

16. Fu san ede wan Kresten musu denki bun fosi a teki a bosroiti fu broko trow?

¹⁶ Fu di wi wani tan mati fu Gado ala ten èn fu di wi e si a trowlibi leki wan warti sani, meki wi musu denki bun fosi wi teki a bosroiti fu broko trow. A nen fu Yehovah santa, sobun wi leki futuboi fu en no wani du sani di ben o gi en porinen. Dati meki wi no wani suku wan fasi fu broko trow nanga wi trowpatna, soso fu di wi wani trow nanga wan tra sma.​—Yer. 17:9; Mal. 2:13-16.

17. O ten yu kan taki dati „Gado wani taki un musu libi na ini freide”?

¹⁷ Wan Kresten di trow nanga wan sma di no de na bribi musu du ala muiti fu abi wan bun trowlibi. Ma efu a Kresten du ala san a man fu tan nanga en trowpatna di no de na bribi èn toku en trowpatna no wani tan nanga  en moro, dan a no musu denki taki na en abi a fowtu. Paulus skrifi: „Efu a patna di no de na bribi wani gowe, dan meki a gowe. Te dati pasa, dan wan brada noso wan sisa no de fruplekti fu tan nanga en patna. Gado wani taki un musu libi na ini freide.”​—1 Kor. 7:15. *

FRUTROW NA YEHOVAH TAPU

18. Sortu bun bakapisi wan sma kan kisi te a meki muiti fu tan nanga en trowpatna, ma toku a trow fu en broko te fu kaba?

¹⁸ Awinsi sortu problema yu abi na ini yu trowlibi, aksi Yehovah meki a gi yu deki-ati èn frutrow na en tapu ala ten. (Leisi Psalm 27:14.) Luku san pasa te fu kaba nanga Linda di wi ben kari na ini na artikel disi kaba. Aladi a du muiti furu yari langa fu tan nanga en masra, a trow fu en broko te fu kaba. Ma yu denki taki a e firi leki na fu soso a du so furu muiti? „Kwetikweti”, na so a taki. „Sma na mi lontu si krin taki mi du muiti fu libi soleki fa Yehovah wani. Mi abi wan krin konsensi. Ma a moro moi sani na taki mi ben man yepi mi umapikin na ini den yari dati fu abi wan tranga bribi. A tron wan fayafaya dopu Kotoigi fu Yehovah.”

19. San kan pasa efu trowpatna e du muiti fu meki den trowlibi kon bun baka?

¹⁹ Wan Kresten uma di nen Marilyn breiti taki a frutrow na Gado tapu èn taki a du muiti fu tan nanga en masra. A taki: „Mi ben wani broko a trow, fu di mi masra no ben e sorgu mi èn mi ben e go na baka na ini a tru bribi. Fosi, mi masra ben de wan owruman, ma bakaten a no ben teki koni bosroiti na ini a bisnis fu en. A no ben e go na den konmakandra moro èn wi no ben e taki moro nanga makandra. Wan leisi, gensman fu a tirimakti fu a kondre du ogri-ati sani na ini a foto pe wi ben e tan. A sani disi meki mi kon frede so te, taki mi no ben wani bumui nanga tra sma moro. Ne mi kon frustan taki mi srefi ben abi fowtu èn mi ben musu tyari kenki kon. Wi bigin taki nanga makandra baka, wi bigin studeri Bijbel makandra baka, èn wi bigin go na den konmakandra doronomo. Den owruman sori wi switifasi èn den yepi wi furu. Ne wi trowlibi kon bun baka. Bakaten mi masra ben kan teki frantwortu na en tapu baka na ini a gemeente. A no ben makriki fu tyari kenki kon, ma te fu kaba wi kon de koloku baka.”

20, 21. Sortu fasti bosroiti trowpaar musu abi?

²⁰ Awinsi wi trow noso awinsi wi no trow, meki wi sori taki wi abi deki-ati èn meki wi frutrow tapu Yehovah ala ten. Efu yu abi problema na ini yu trowlibi, dan hori na prakseri taki yu nanga yu trowpatna „no de tu skin moro, ma wán skin” (Mat. 19:6). Sobun, du ala muiti fu lusu den problema di unu abi. Efu yu e tan nanga yu trowpatna di no de na bribi aladi disi na wan muilek sani fu du, dan kande yu srefi o prisiri bakaten fu di a tron wan anbegiman fu Yehovah.

²¹ Awinsi na ini sortu situwâsi wi de, wi musu tyari wisrefi na so wan fasi taki sma man si krin taki wi na trutru Kresten. Efu wi abi seryusu problema na ini wi trowlibi èn wi e prakseri fu gowe libi wi trowpatna, dan wi musu begi fayafaya, wi musu prakseri bun fu san ede wi wani gowe, wi musu ondrosuku san Bijbel e taki fu a tori, èn wi musu aksi den owruman fu yepi wi. Awinsi san e pasa, meki wi du ala san wi man fu plisi Yehovah Gado na ala fasi èn meki wi sori taki wi e si a trowlibi leki wan warti sani trutru.

[Futuwortu]

[Aksi fu a tori disi]

[Prenspari pisi na tapu bladzijde 10]

Te wan Kresten di abi furu problema na ini en trowlibi e bosroiti fu no gowe libi en trowpatna wantewante, dan nofo tron a kan kisi bun bakapisi

[Prenspari pisi na tapu bladzijde 12]

Frutrow tapu Yehovah ala ten èn aksi en meki a gi yu deki-ati

[Prenki na tapu bladzijde 9]

Yehovah e blesi Kresten di e du muiti fu meki den trowlibi kon bun baka

[Prenki na tapu bladzijde 11]

Na ini a Kresten gemeente wi kan kisi trowstu èn sma kan gi wi Bijbel rai fu yepi wi