Switifasi e puru sari

GEORGE nanga Manon na tu Kotoigi fu Bakrakondre. Wan leisi den ben wani fruteri wan owru uma a bun nyunsu fu a Kownukondre, ma na uma ben grofu nanga den. Bakaten den kon sabi taki na uma disi en manpikin dede èn tu leisi wan masra fu en dede. A ben abi wan siki tu di gersi kokobe. Di den taki go doro nanga en, a no ben grofu so moro, ma toku a no ben sori switifasi tu.

Toku George taigi Manon meki den go luku na uma disi baka. Den ben o tyari wan bosu bromki gi en tu, fu di a ben gersi leki a no abi mati èn a e firi brokosaka trutru. Na uma disi di ben nen Rie, fruwondru srefisrefi di George nanga Manon kon luku en baka èn a ben breiti. Ma a no ben abi ten fu arki den, sobun den meki mofo fu kon wan tra leisi. Di George nanga Manon go baka na a dei di den meki mofo, nowan sma ben de na oso. Den drai go baka wan tu leisi, ma noiti den ben man miti Rie. Den bigin denki srefi taki Rie no ben wani miti den moro.

Baka wan pisi ten, George miti Rie na oso. Rie aksi en pardon taki a no ben de na oso a dei di den ben meki mofo èn a fruteri George taki a ben de na ati-oso. „Yu no o bribi san mi du baka di unu gowe a wan dei”, na so a taki. „Mi bigin leisi Bijbel!” Ne den ben abi wan moi takimakandra èn den bigin nanga wan Bijbelstudie.

O moro Rie ben e studeri Bijbel, o moro a ben e kenki. A no ben e sari moro èn safrisafri a ben kon de wan koloku uma di abi switifasi. A no ben man komoto na oso, ma toku a ben e fruteri iniwan sma di ben e kon na en, fu a nyun bribi fu en. Fu di a ben e siki, a no ben man go furu na den gemeente konmakandra, ma a ben lobi en te den brada nanga sisa ben e kon luku en. A dei di a tapu 82 yari, a go na wan kring konmakandra èn a teki dopu fu sori taki a gi ensrefi abra na Gado.

Baka wan tu mun a lasi libi èn sma feni wan moi puwema di a ben skrifi. Na ini a puwema a skrifi fu a sari di owru sma kan abi te sma no e kon luku den èn a sori o prenspari a de fu sori switifasi. Manon taki: „Den sani di a skrifi na ini a puwema naki mi ati trutru. Mi breiti srefisrefi taki Yehovah yepi wi fu sori switifasi gi en.”

Iya, Yehovah sori lobi nanga switifasi gi wi èn disi e gi wi deki-ati fu sori lobi nanga switifasi gi trawan tu (Ef. 5:1, 2). Wi o abi bun bakapisi leki „dinari fu Gado . . . te wi abi switifasi”.​—2 Kor. 6:4, 6.