„A sani di mi winsi, pasa trutru”

Tinafeifi yari pasa Emilia ben de wan gewoon pionier. Ma bakaten a ben abi fu tapu nanga a pionierwroko. No so langa pasa a bigin prakseri fa a ben e prisiri di a ben e pionier èn a ben wani bigin du dati baka.

Ma Emilia en wroko ben teki furu ten èn a no ben de koloku nanga dati. Wan leisi a soktu èn a taigi den sma na wrokope: „Mi winsi taki mi no ben abi fu wroko so furu yuru!” Di en basi ben yere a tori disi, a go aksi en efu a ben wani dati trutru. Emilia taigi en taki na so a de. Ma na a wrokope dati den no ben e gi den wrokoman primisi fu wroko afudei noso wan tu yuru nomo. Efu Emilia ben wani so wan wroko, a ben o abi fu go taki nanga a driktoro. Dati meki Emilia sreka ensrefi fu taki nanga a driktoro èn a begi Yehovah fu de korostu èn fu abi deki-ati.

Na a takimakandra a teki deki-ati fu aksi a driktoro na wan lespeki fasi efu a ben kan wroko wan tu yuru moro mendri. A fruteri a driktoro taki a ben wani gebroiki a ten dati fu yepi tra sma. A taigi en: „Mi na wan Kotoigi fu Yehovah èn mi e yepi sma fu kon sabi san skrifi na ini Bijbel. Na ini a ten disi furu sma no sabi san bun èn san no bun. Den abi bun rai fanowdu èn den sani di mi e fruteri den fu Bijbel prenspari srefisrefi gi den.” Emilia pramisi taki a ben o tan du en wroko bun, ma a ben wani wroko moro mendri so taki a ben kan abi moro ten fu yepi sma.

A driktoro arki Emilia bun, dan a taigi en taki wan leisi en srefi ben prakseri fu du wan sani fu yepi sma. Dan a taki: „Te mi e luku den sani di yu fruteri mi, dan mi musu taki dati mi e agri nanga yu. Ma yu e frustan taki yu no o kisi so furu moni moro?” Emilia taki dati a ben e frustan disi èn efu a ben de fanowdu a ben o abi fu leri fu libi nanga a moni di a ben o kisi. A taki: „A moro prenspari sani gi mi, na fu du wan sani di e yepi sma trutru.” A driktoro taigi en: „Mi abi furu lespeki gi sma di e gebroiki den ten fu yepi trawan.”

Nowan sma na a wrokope dati ben kisi primisi fu wroko moro mendri yuru. Ma Emilia kisi primisi fu wroko fo dei na ini a wiki nomo. Boiti dati a e kisi a srefi moni di a ben kisi fosi. Yu kan frustan taki a ben breiti srefisrefi nanga a sani disi. A taki: „A sani di mi winsi, pasa trutru èn mi man de wan gewoon pionier baka!”

Yu prakseri fu kenki yu libi so taki yu man pionier? Efu yu ben de wan pionier fosi, yu man seti sani fu pionier baka?

[Prenspari pisi na tapu bladzijde 32]

A driktoro taigi en: „Mi abi furu lespeki gi sma di e gebroiki den ten fu yepi trawan.”