Den ben de klariklari fu go na Ekwador

BRUNO, wan yongu brada fu Italiakondre, ben musu teki wan prenspari bosroiti. A ben kaba nanga skoro èn a ben abi den moro hei cijfer fu en klas. Den famiri fu en nanga den leriman na skoro taigi en taki a ben musu go na wan moro hei skoro. Ma wan tu yari na fesi Bruno ben gi ensrefi abra na Yehovah èn a ben pramisi en taki a ben o poti a wani fu en na a fosi presi na ini en libi. Sobun, sortu bosroiti a teki? A taki: „Mi ben taigi Yehovah na ini begi taki mi ben o du san mi pramisi en èn taki mi ben o poti a wani fu en na a fosi presi na ini mi libi. Ma mi taigi en krin tu taki mi no wani wan soi libi. Mi wani wan span libi pe mi kan du difrenti sani gi en.”

 Wan tu yari baka dati, Bruno go tan na Ekwador na ini Zuid Amerika. A taki: „Yehovah gi mi moro leki san mi aksi en.” Di a doro na Ekwador a ben fruwondru fu si taki someni tra yonguwan ben froisi go drape tu fu du moro gi Yehovah.

YONGUWAN DI E FRUTROW TAPU YEHOVAH

Yehovah e gi wi wan kari fu du moro gi en èn fu abi a frutrow taki a o gi wi furu blesi. A taki: „Grantangi, un luku san mi o du te unu teki a di fu tin pisi fu ala den sani di un musu tyari gi mi èn unu poti dati na ini den maksin, so taki nyanyan kan de na ini mi oso baka. Unu o si fa mi o opo den sroisi fu hemel, so taki blesi fadon leki alen gi unu” (Mal. 3:10). Bruno nanga dusundusun tra yonguwan na heri grontapu teki a kari disi fu Yehovah. Fu di den lobi Gado, meki den bosroiti fu gebroiki den ten, den krakti, nanga den moni fu dini en na wan tra presi noso na ini wan tra kondre pe moro Kownukondre preikiman de fanowdu.

Di den yonguwan disi doro na a kondre pe moro Kownukondre preikiman de fanowdu, den si heri esi taki „a kotiwroko bigi, ma furu wrokoman no de” (Mat. 9:37). Fu eksempre, Jaqueline fu Doisrikondre seni wan brifi gi a bijkantoro fu Ekwador pe skrifi: „Sowan tu yari mi e dini na ini Ekwador, dan mi abi 13 Bijbelstudie kaba èn fo fu den e go na den konmakandra doronomo. Mi no man taigi unu fa mi breiti!” Chantal fu Kanada, taki: „Na ini 2008, mi froisi go na wan kontren na a sesyoro fu Ekwador. Soso wán gemeente ben de drape. Now dri gemeente  de drape èn moro leki 30 pionier de na ini a kontren dati. A moi fu si fa someni sma e go na fesi na ini a tru bribi!” A taki tu: „A no langa pasa mi froisi go na wan foto di de 2743 meter na tapu Andes-bergikontren. Moro leki 75.000 sma e tan na ini a foto, ma soso wán gemeente de. Furu sma e teki a tru bribi èn mi lobi fu preiki drape.”

A MUILEK SON LEISI

A no de fu taki dati a no makriki ala ten fu dini na wan tra presi noso na ini wan tra kondre. Sonwan fu den yonguwan disi ben kisi problema kaba, fosi den teki a bosroiti fu froisi. Kayla fu Amerkankondre taki dati son sma na ini en gemeente taigi en taki a no ben musu froisi. Den no ben man frustan fu san ede a ben wani pionier na ini wan tra kondre. A ben sabi taki na soso yepi den ben wani yepi en, ma den sani di den taki meki a firi brokosaka. Son leisi a ben tweifri efu a teki a yoisti bosroiti. A taki furu nanga Yehovah fu a tori disi èn a taki sosrefi nanga lepi brada nanga sisa. Disi yepi en fu frustan taki Yehovah e blesi den sma di wani du moro gi en. Dati meki Kayla bosroiti fu froisi.

Wan tra problema gi furu sma, na taki den musu leri wan tra tongo. Siobhan fu Ierland taki: „A ben muilek gi mi fu di mi no ben man taki ala san mi ben e denki. Mi ben musu leri fu abi pasensi, mi ben musu leri taki a tongo moro bun èn mi ben musu leri fu no si en leki wan seryusu sani te mi meki wan fowtu.” Anna fu Estkondre taki: „A presi ben faya, a ben doti èn mi no ben man wasi nanga waran watra srefi. Ma den sani disi ben de noti te mi e prakseri omeni muiti mi ben musu du fu leri Spanyorotongo. Son leisi mi ben wani gowe. Ma mi ben musu leri fu si taki mi ben e du son sani moro bun now. Mi no ben musu luku soso den fowtu di mi ben e meki.”

Wan tra sani di kan muilek te wan sma froisi go na wan tra kondre, na taki a kan misi en kondre nanga den sma fu en. Jonathan fu Amerkankondre taki: „Syatu baka di mi doro, mi lasi-ati fu di mi no ben de nanga mi mati nanga famiri. Ma san e yepi mi, na fu studeri Bijbel èn fu go na ini a preikiwroko. A no teki langa fosi mi ondrofeni furu moi sani na ini a preikiwroko èn mi feni nyun mati na ini a gemeente. Disi yepi mi fu firi prisiri baka.”

A kan muilek tu fu kon gwenti a libi na ini wan tra kondre. Nofo tron a libi na ini wan tra kondre no de a srefi leki pe yu e tan. Beau fu Kanada taki:  „Na ini mi eigi kondre mi no ben e si en leki wan kefalek sani fu abi watra nanga faya na ini oso. Ma na ini a kondre disi mi no e kisi den sani disi doronomo.” Na ini furu kondre bun fasi no de fu go fu a wan presi na a trawan. Kande furu sma pôti èn den no sabi leisi noso skrifi. Wan sani di e yepi Ines fu Oostenrijk fu tan du en wroko nanga prisiri, na fu prakseri den moi fasi fu den sma fu a kondre. „Den sma lobi kari trawan kon na den oso, den abi switifasi, den lobi yepi trawan èn den abi sakafasi”, na so a taki. „Ma a moro moi sani, na taki den e angri trutru fu leri moro fu Gado.”

„MI O BLESI UNU SO TE, TAKI UNU NO O MANKERI NOWAN SANI”

Ala den yonguwan disi e dini na ini Ekwador. A no ben makriki gi den fu froisi go dini drape, ma den srefi si taki Yehovah ’du moro leki iniwan sani di den aksi noso prakseri’ (Ef. 3:20). Iya, den feni taki Yehovah ’blesi den so te, taki den no e mankeri nowan sani’ (Mal. 3:10). Luku san den taki fu a diniwroko fu den:

Bruno: „A fosi presi pe mi go dini na ini Ekwador ben de a moi Amasone kontren. Bakaten mi go yepi fu bow wan nyun pisi fu a bijkantoro fu Ekwador. Now mi e wroko na Bethel. Di mi ben de na Italiakondre, mi teki a bosroiti fu poti a wani fu Yehovah na a fosi presi na ini mi libi èn mi kan taki trutru dati a libi fu mi no soi. Yehovah meki mi du furu difrenti sani gi en.”

Beau: „Now mi tron wan moro bun mati fu Yehovah fu di mi man gebroiki ala mi ten fu wroko gi en dyaso na ini Ekwador. Boiti dati, mi kisi a grani tu fu go na difrenti moi presi. Disi na wan sani di mi ben wani du ala ten.”

Anna: „Mi no ben denki taki mi leki wan sisa di no trow ben o man libi leki wan zendeling. Ma now mi kon si taki mi man du disi trutru. Yehovah gi mi furu blesi. Mi abi so furu prisiri te mi e yepi sma fu tron disipel èn te mi e yepi fu bow Kownukondre zaal. Mi breiti tu taki mi abi furu nyun mati now.”

Elke: „Di mi ben de na ini mi kondre Oostenrijk, mi aksi Yehovah furu tron fu gi mi Bijbelstudie, awinsi na wán nomo. Dyaso mi abi 15 Bijbelstudie! Mi breiti trutru fu si fa den e prisiri fu leri moro fu Yehovah.”

Joel: „A de wan span sani fu dini Yehovah na ini wan kondre di yu no sabi. Yu e leri fu frutrow moro na en tapu èn a moi fu si fa a e blesi a muiti di yu e du! Di mi komoto na Amerkankondre kon dyaso, mi go dini na ini wan grupu di ben abi 6 preikiman. Na ini wán yari a grupu kon abi 21 preikiman. Na a Memrefesa 110 sma kon.”

FA A DE NANGA YU?

Efu yu na wan yongu brada noso sisa, yu man go dini na wan presi pe moro preikiman de fanowdu? A no de fu taki dati yu musu prakseri bun, fosi yu teki a bosroiti disi èn yu musu seti sani bun na fesi. Ma a moro prenspari sani di yu musu abi fu man du disi, na lobi gi Yehovah nanga tra sma. Efu yu abi a lobi disi èn yu man froisi go na wan tra presi, dan begi Yehovah meki a yepi yu fu go dini na ini wan tra kondre. Boiti dati, yu musu fruteri yu papa nanga mama èn den owruman fu a gemeente taki yu wani du disi. Kande yu o si taki yu srefi man dini Yehovah na a fasi disi di no soi èn di o gi yu furu prisiri.

[Prenspari pisi na tapu bladzijde 3]

’Mi taki furu nanga Yehovah èn nanga lepi brada nanga sisa fu a tori disi. Disi yepi mi fu frustan taki Yehovah e blesi den sma di wani du moro gi en.’​—Kayla fu Amerkankondre

[Faki/​Prenki na tapu bladzijde 6]

Fa yu kan sreka sani fu go dini na wan tra presi

• Abi a gwenti fu studeri Bijbel

• Luku baka san skrifi na ini Wi Kownukondre diniwroko fu augustus 2011, bladzijde 4-6

• Taki nanga sma di ben dini na ini wan tra kondre kaba

• Pruberi fu kon sabi moro fu a historia fu a kondre èn fu a fasi fa sma e libi drape

• Leri taki a tongo fu a presi drape

[Faki/​Prenki na tapu bladzijde 6]

Son sma di e dini na ini tra kondre man sorgu densrefi fu di . . .

• den e go na den eigi kondre ibri yari fu wroko wan tu mun

• den e yuru den oso noso kamra gi sma

• den e meki sma drai a bisnis fu den

• den e du wan wroko tapu Internet

[Prenki na tapu bladzijde 4, 5]

1 Jaqueline fu Doisrikondre

2 Bruno fu Italiakondre

3 Beau fu Kanada

4 Siobhan fu Ierland

5 Joel fu Amerkankondre

6 Jonathan fu Amerkankondre

7 Anna fu Estkondre

8 Elke fu Oostenrijk

9 Chantal fu Kanada

10 Ines fu Oostenrijk