Dini a Gado di e meki sma kon fri

„Te wi lobi Gado, dan wi o hori den komando fu en. Toku den komando fu en no de wan hebi.”​—1 YOH. 5:3.

YU KAN GI PIKI?

Fa Satan e pruberi fu meki wi denki taki den wèt fu Gado na wan hebi?

Fu san ede wi musu luku bun sortu sma wi e teki leki mati?

San o yepi wi fu tan gi yesi na a Gado di e meki sma kon fri?

1. (a) Fa Yehovah e gebroiki a fri di a abi? (b) Fa Adam nanga Eva ben de fri?

YEHOVAH na a wan-enkri sma di fri fu du ala san a wani. Ma ala ten a e gebroiki a fri di a abi na a yoisti fasi. A no e basi den futuboi fu en na so wan fasi taki den no man du nowan sani di den wani. Na presi fu dati a e gi den pasi fu teki den eigi bosroiti èn fu du ala bun sani di den wani du. Fu eksempre, a wan-enkri sani di Gado ben taigi Adam nanga Eva fu no du, na taki den no ben musu nyan fu „a bon di nen ’Sabi san bun èn san ogri’” (Gen. 2:17). Sobun, den ben de fri fu du san den wani èn toku den ben kan gi yesi na Gado na a srefi ten.

2. Fu san ede Adam nanga Eva tron srafu fu sondu?

² Fu san ede Gado gi Adam nanga Eva pasi fu de so fri? Na fu di a gi den wan konsensi èn a meki den leki fa en srefi de. A ben fruwakti taki a lobi di den ben musu abi gi en leki Mekiman, ben o meki den du san reti (Gen. 1:27; Rom. 2:15). A de wan sari sani taki Adam nanga Eva no ben de nanga tangi taki a Mekiman fu den ben gi den pasi fu de so fri. Na presi fu dati den bosroiti gi densrefi san bun èn san no bun. Den ben denki taki den ben o de moro fri te den ben o du dati. Ma te yu luku en bun, a bosroiti di den teki meki den nanga den pikin fu den tron srafu fu sondu. A bakapisi ben de pina nanga dede.​—Rom. 5:12.

3, 4. San Satan wani wi fu denki fu den wèt fu Gado?

³ Efu Satan ben man kori tu sma di no abi sondu èn efu a ben man kori bun furu engel fu trangayesi Gado, dan a kan du a srefi nanga wi tu. Te now ete Satan e kori sma na a srefi fasi. A wani gi wi a denki taki den wèt fu Gado na wan hebi èn taki den e tapu wi fu abi prisiri na ini a libi (1 Yoh. 5:3). Na so den sma na grontapu e denki. Efu wi e bumui furu nanga den, wi kan  kisi a srefi denki leki den. Wan sisa di abi 24 yari now taki dati takru mati ben abi furu krakti na en tapu. A ben frede fu de tra fasi leki tra yonguwan. Te fu kaba a sisa disi du hurudu. Kande yu srefi ondrofeni omeni krakti mati kan abi na yu tapu.

⁴ A sari fu si taki na ini a Kresten gemeente takru mati de tu. Wan yongu brada taki dati son mati fu en na ini a gemeente ben e hori nanga sma di no ben e dini Yehovah. O moro a ben e moksi nanga den mati disi, o moro a ben e denki leki den. A taki: ’Mi no ben de wan bun mati fu Yehovah moro. Den konmakandra no ben gi mi prisiri moro èn wanwan leisi nomo mi ben e go na preikiwroko. Ne mi kon frustan taki mi no ben musu bumui nanga den mati disi moro èn na dati mi du tu!’ Yu e si omeni krakti mati kan abi na yu tapu? Meki wi luku wan eksempre na ini Bijbel di kan yepi wi na ini a ten disi.​—Rom. 15:4.

A DU SANI FU MEKI MORO NANGA MORO SMA LOBI EN

5, 6. Fa Absalom kori trawan èn san pasa nanga en bakaten?

⁵ Bijbel abi furu eksempre fu sma di ben abi someni krakti tapu trawan, taki den trawan go du sani di no bun. Wan eksempre fu disi na Absalom, wan manpikin fu Kownu David. Absalom ben moi srefisrefi. Ma bakaten a bigin kisi takru prakseri neleki Satan. A ben wani tron kownu na presi fu en papa, aladi a no ben abi a reti fu tron kownu. * Fu man kisi san a wani, Absalom meki a pipel bribi taki a kownu no ben wani yepi den, ma en ben wani yepi den. Neleki fa Didibri du na ini a dyari fu Eden, na so Absalom meki sma denki taki a ben lobi den. Disiten na lei a ben e lei gi en eigi papa.​—2 Samuel 15:1-5.

⁶ Yu denki taki Absalom ben abi bun bakapisi? We, wi sabi taki son sani bigin go soleki fa a ben wani, bika Bijbel e taki: „Na so Absalom ben e du fu meki moro nanga moro Israelsma kon lobi en” (2 Sam. 15:6). Ma bakaten sani no waka bun gi Absalom. A de wan sari sani taki a heimemre fu en tyari dede kon gi en èn gi dusundusun trawan di a kori.​—2 Sam. 18:7, 14-17.

7. San wi kan leri fu a tori fu Absalom? (Luku a prenki na tapu bladzijde 14.)

⁷ Fu san ede Absalom ben man kori den Israelsma so makriki? Kande na fu di den ben wani den sani di Absalom pramisi den. Noso kande a moi fesi fu en kori den. Awinsi fa a no fa, wán sani wi sabi seiker: den no ben tai hori na Yehovah èn na a kownu di a ben poti. Na ini a ten disi Satan e meki sma leki Absalom du sani tu fu kori den futuboi fu Yehovah. Kande den sma disi e taki dati den wèt fu Yehovah hebi tumusi, noso taki sma di no e dini Yehovah abi moro prisiri na ini a libi. Yu man si taki den sani disi na soso lei? Yu o tai hori na Gado ala ten? Yu e frustan taki na Yehovah en „wèt di bun srefisrefi”, sobun a wèt fu Krestes, na a wan-enkri sani di kan meki yu kon fri trutru? (Yak. 1:25) Efu yu e frustan disi, dan yu musu sori taki yu lobi a wèt dati. Yu de fri fu du san yu wani, ma meki den sani dati de sani di e plisi Yehovah.​—Leisi 1 Petrus 2:16.

8. San na wan tu eksempre di e sori taki sma no de koloku te den e trangayesi den wèt fu Yehovah?

⁸ Spesrutu den yongu sma, Satan wani kori. Luku san wan brada di pasa 30 yari taki fu a ten di a ben moro yongu: „Mi ben e si den wèt fu Yehovah leki wan hebi. Mi no ben e si den leki sani di ben kan kibri mi.” Disi meki taki a du hurudu. Ma a no ben de koloku. „Mi ben abi hebi konsensi  fonfon èn a sani di mi du hati mi furu yari langa”, na so a taki. Wan sisa di du hurudu di a ben yongu taki dati a sani disi ben meki a sari trutru èn a ben firi leki a no warti noti. A taki: „Srefi now, baka 19 yari, mi e sari ete te mi e prakseri a sani di mi du.” Wan tra sisa taki dati a sani di a du ben meki den sma di ben lobi en, sari trutru. A sani disi ben hati en srefisrefi. A taki: „A no switi srefisrefi te yu sabi taki yu e libi na wan fasi di Yehovah no feni bun.” Te yu e sondu, Satan no wani yu fu denki den bakapisi fu san yu e du.

9. (a) Sortu sani di abi fu du nanga Yehovah èn den wèt fu en yu musu aksi yusrefi? (b) Fu san ede a prenspari fu sabi Gado heri bun?

⁹ A sari trutru taki so furu yongu sma nanga owru sma ben abi fu leri nanga tranga taki wan sma e kisi soso sari nanga pen te a e trangayesi Gado (Gal. 6:7, 8). Fu dati ede, aksi yusrefi: ’Mi man si den trapu di Satan e gebroiki fu kori mi? Mi e si Yehovah leki a moro bun mati fu mi? Mi e si en leki a sma di e taigi mi ala ten san tru èn di wani a moro bun sani gi mi? Mi e bribi trutru taki ala ten a o gi mi san bun gi mi èn taki noiti a o tapu mi fu kisi sani di o meki mi koloku trutru?’ (Leisi Yesaya 48:17, 18.) Yu kan piki ’Iya’ tapu den aksi disi, soso te yu sabi Yehovah heri bun. Yu musu frustan taki den wèt di skrifi na ini Bijbel e sori taki Yehovah lobi yu èn a no gi yu den wèt fu di a wani tapu yu fu de fri.​—Ps. 25:14.

 BEGI YEHOVAH FU KISI KONI ÈN FU GI YESI NA EN NANGA YU HERI ATI

10. Fu san ede wi musu pruberi fu de leki a yongu Kownu Salomo?

¹⁰ Di Salomo ben de wan yongu man ete, a taigi Yehovah nanga sakafasi: „Mi de leki wan pikin boi ete. Mi no abi ondrofeni kwetikweti.” Dan a aksi Yehovah fu yepi en meki a kisi koni èn fu yepi en fu gi yesi na en nanga en heri ati (1 Kow. 3:7-9, 12). Yehovah arki a begi fu Salomo èn a o arki yu tu, awinsi yu yongu noso owru. A no de fu taki dati Yehovah no o gi yu sabi nanga koni na wan wondru fasi soleki fa a ben gi Salomo. Ma yu kan kisi koni te yu e studeri Bijbel fayafaya, te yu e begi en fu gi yu santa yeye èn te yu e gi yesi na den rai nanga den leri di wi e kisi na ini a Kresten gemeente (Yak. 1:5). Na so Yehovah e meki srefi den yongu futuboi fu en kon koni moro ala den tra sma di no e gi yesi na den rai fu en. Iya, a e meki den kon koni moro „den koniman nanga den sabiman” fu a grontapu disi.​—Luk. 10:21; leisi Psalm 119:98-100.

11-13. (a) Sortu prenspari sani wi kan leri fu Psalm 26:4, Odo 13:20, nanga 1 Korentesma 15:33? (b) Fa yu o gebroiki den tekst disi na ini yu aladei libi?

¹¹ Meki wi luku wan tu tekst now di o leri wi prenspari sani di abi fu du nanga den sma di wi e teki leki mati. Disi o yepi wi fu frustan o prenspari a de fu studeri Bijbel èn fu prakseri bun fu den sani di wi leri. Na so wi kan leri sabi Yehovah moro bun. Psalm 26:4 taki: „Mi no sidon nanga sma di lobi lei. Mi no e moksi nanga sma di e hoigri.” Na Odo 13:20 wi e leisi: „Te wan sma e waka nanga koniwan, dan ensrefi o kon koni, ma te wan sma e waka nanga don sma, dan sani no o waka bun gi en.” Na 1 Korentesma 15:33 skrifi: „Takru kompe e pori bun gwenti.”

¹² Sortu prenspari sani wi kan leri fu den tekst disi? (1) Yehovah wani taki wi musu luku bun suma wi e teki leki mati. A wani yepi wi fu no du wan sani di kan tyari takru bakapisi kon gi wi èn di kan meki taki wi no de mati fu en moro. (2) Den mati fu wi kan meki wi du bun sani noso den kan meki wi du sani di no bun. Na so a de kaba. Yehovah sorgu taki den tekst disi skrifi na so wan fasi taki den ben o naki wi ati. Fu san ede wi kan taki dati? Luku taki den tekst no skrifi leki wan wèt di e taki dati yu no musu du disi noso yu no musu du dati. Ma den skrifi leki sani di ala sma sabi kaba. Sobun, a de leki Yehovah e sori wi fa sani de trutru. A de leki a e taki: ’Luku, na so a tori de. San yu o du? San yu ati e taigi yu fu du?’

¹³ Fu di den dri vers disi e sori fa sani de trutru, meki te now ete wi kan gebroiki den na ini difrenti situwâsi. Aksi yusrefi: ’Fa mi kan wai pasi gi „sma di e hoigri”? Na sortu okasi mi ben o miti den sortu sma disi? (Odo 3:32; 6:12) Suma na den „koni sma” di Yehovah wani mi fu teki leki mati? Suma na den „don sma” di a no wani mi fu teki leki mati? (Ps. 111:10; 112:1; Odo 1:7) Sortu „bun gwenti” fu mi o pori efu mi abi mati di no bun? „Takru kompe” na soso den sma fu grontapu?’ (2 Petr. 2:1-3) Sortu piki yu ben o gi tapu den aksi disi?

14. Fa unu kan kisi moro wini fu na Osofamiri Anbegi?

¹⁴ A srefi fasi fa wi poti prakseri na den dri tekst didyonsro, na so yu musu poti prakseri na tra tekst di e sori yu fa Gado e denki fu son sani di prenspari gi yu nanga yu osofamiri. * Papa nanga mama, a ben o bun efu unu taki fu den sortu sani disi te unu abi na Osofamiri Anbegi. Hori  na prakseri taki unu musu du disi fu yepi ibri sma na ini na osofamiri fu frustan taki Gado gi wi wèt fu di a lobi wi (Ps. 119:72). Efu unu e hori na Osofamiri Anbegi na so wan fasi, dan ala sma na ini na osofamiri o kon moro krosibei na Yehovah èn na makandra.

15. Fa yu kan kon sabi efu yu kisi koni trutru èn efu yu e gi yesi trutru?

¹⁵ Fa yu kan sabi efu yu kisi koni trutru èn efu yu e gi yesi trutru? Wan fasi fa yu kan kon sabi disi na fu luku efu yu e denki na a srefi fasi leki den sma fu owruten di ben e gi yesi na Gado ala ten. Wan fu den sma disi ben de Kownu David. A ben skrifi: „Gado, mi prisiri fu du yu wani. A wèt fu yu de na ini mi ati” (Ps. 40:8). A skrifiman fu Psalm 119 ben taki tu: „Mi lobi a wèt fu yu srefisrefi. Heri dei mi e poti prakseri na en” (Ps. 119:97). Yu musu du furu muiti fu abi a lobi disi. A o kon moro tranga te yu e studeri Bijbel na wan seryusu fasi, te yu e begi, èn te yu e denki bun fu san yu e leri. A o kon moro tranga tu te yu ondrofeni na ini yu eigi libi taki wan sma e kisi furu blesi te a e du san Yehovah e aksi fu en.​—Ps. 34:8.

KRESTEN MUSU FETI FU TAN FRI

16. Efu wi wani wini a feti fu de fri trutru, dan san wi musu hori na prakseri?

¹⁶ Na ini ala den hondrohondro yari di pasa, furu pipel feti bigi feti fu kon fri. We, a fri di yu abi leki Kresten de moro prenspari, sobun yu musu du moro muiti fu feti gi en! Hori na prakseri taki den feanti fu yu a no soso Satan nanga na ogri grontapu disi di kan pori yu denki. Yu musu feti tu nanga yu sondu skin èn nanga yu ati di kan kori yu (Yer. 17:9; Ef. 2:3). Ma Yehovah kan yepi yu fu wini a feti. Ibri tron te yu bosroiti fu du san bun, yu sabi taki tu bun sani o pasa seiker. A fosi sani, na taki yu o meki Yehovah prisiri (Odo 27:11). A di fu tu sani, na taki yu o si taki „a wèt di bun srefisrefi èn di e meki sma kon fri” bun gi yu èn disi o gi yu moro deki-ati fu tan na tapu a pasi di e tyari sma go na têgo libi. Na ini a ten di e kon, yu o kon moro fri soleki fa Yehovah pramisi ala sma di e gi yesi na en.​—Yak. 1:25; Mat. 7:13, 14.

17. Fu san ede wi no musu lasi-ati te wi meki wan fowtu èn fa Yehovah e yepi wi?

¹⁷ A no de fu taki dati wi alamala e meki fowtu son leisi (Preik. 7:20). Ma te disi pasa yu no musu lasi-ati èn yu no musu denki taki yu no warti noti. Efu yu meki wan fowtu, dan du muiti fu meki sani kon bun baka. Kande yu sa musu aksi den owruman srefi fu yepi yu. Yakobus taki: „Te den e begi nanga bribi, dan a sma di siki o kon betre èn Yehovah o meki a kisi ensrefi baka. Boiti dati, efu a du sondu, dan a o kisi pardon fu dati” (Yak. 5:15). No frigiti noiti taki Gado abi sari-ati trutru èn taki na en hari yu kon na ini a gemeente, fu di a si wan bun sani na ini yu. (Leisi Psalm 103:8, 9.) Yehovah o yepi yu ala ten solanga yu e du muiti fu dini en nanga yu heri ati.​—1 Kron. 28:9.

18. San wi musu du so taki Yehovah kibri wi?

¹⁸ Na a lasti neti fosi Yesus dede, a begi nanga den 11 apostel di tan nanga en. A taki den moi wortu disi: „Kibri den, so taki na ogriwan no kan du den ogri” (Yoh. 17:15). Yesus no ben aksi a sani disi gi den apostel wawan, ma a aksi en gi ala den bakaman fu en. Yehovah arki a begi fu Yesus, sobun wi kan de seiker taki a o kibri wi na ini a muilek ten disi. „[Yehovah] na wan skelt gi den sma di e tyari densrefi na wan reti fasi . . . A o meki sani waka bun gi den wan di e tai hori na en” (Odo 2:7, 8). A no makriki ala ten fu gi yesi na Yehovah, ma soso den wan di e gi yesi na en o kisi têgo libi èn den o kon fri trutru (Rom. 8:21). Son sma e denki tra fasi, ma no meki den kori yu!

[Futuwortu]

[Aksi fu a tori disi]

[Prenki na tapu bladzijde 14]

Sortu sma de leki Absalom na ini a ten disi èn fa wi kan wai pasi gi den?