Meki Yehovah meki yu kon fri trutru

„Luku finifini san skrifi na ini a wèt di bun srefisrefi èn di e meki sma kon fri.”​—YAK. 1:25.

YU KAN TYARI DISI KON NA KRIN?

Sortu wèt kan meki sma kon fri trutru? Suma e kisi wini fu a wèt disi?

San wi musu du fu kon fri trutru?

Fa ala sma di tan gi yesi na Yehovah o kon fri?

1, 2. (a) Fu san ede sma no de so fri na ini a grontapu disi? (b) Na sortu fasi den futuboi fu Yehovah o kon fri na ini a ten di e kon?

WI E libi na ini wan ten pe moro nanga moro sma gridi, den e du ogri èn den no e gi yesi na wèt (2 Tim. 3:1-5). Dati meki tiriman e meki moro wèt, den e poti moro skowtu na wroko, èn den e poti kamera na ala sei fu luku san sma e du. Na ini son kondre, sma e poti alarm na den oso, den e poti moro sroto na den doro nanga fensre, èn den e poti skotu di e naki stroom, soso fu kibri densrefi. Furu sma e frede fu go na strati na neti èn den no e meki den pikin fu den prei na dorosei den wawan, awinsi na deiten noso neti. A krin taki sma no de so fri moro èn a gersi leki sani e kon moro ogri.

² Na ini a dyari fu Eden, Satan ben taki dati wan sma fri trutru te a no e meki Yehovah tiri en. Dati na wan bigi lei! O moro sma e du san den wani èn o moro den e trangayesi Gado, o moro den srefi nanga trawan e pina. Srefi den futuboi fu Yehovah e nyan pina fu a sani disi ede. Ma wi abi a howpu taki wan dei libisma o kon fri fu sondu nanga dede. Dan den o „kon fri na wan tumusi moi fasi leki pikin fu Gado”, soleki fa Bijbel e taki (Rom. 8:21). Fu taki en leti, Yehovah e sreka den futuboi fu en nownow kaba fu kon fri na a fasi disi. Fa a e du dati?

3. Sortu wèt Yehovah gi den futuboi fu en? Sortu aksi wi o luku na ini na artikel disi?

³ Fu man kon fri, Yehovah gi den futuboi fu en wan sani di Yakobus e kari „a wèt di bun srefisrefi èn di e meki sma kon fri”. (Leisi Yakobus 1:25.) Nofo tron te sma e yere a wortu wèt, den e prakseri fu wan sani di e tapu den fu du wan sani. Den no e prakseri fu wan sani di kan meki den kon fri. Dan san na „a wèt di bun  srefisrefi èn di e meki sma kon fri”? Fa a wèt dati e meki wi kon fri?

A WÈT DI E MEKI WI KON FRI

4. (a) San na „a wèt di bun srefisrefi èn di e meki sma kon fri”? (b) Suma e kisi wini fu a wèt disi?

⁴ „A wèt di bun srefisrefi èn di e meki sma kon fri” a no a Wèt di Gado gi Moses, fu di a Wèt dati ben sori den Israelsma taki den na sondusma èn Krestes tyari wan kaba kon na a Wèt dati (Mat. 5:17; Gal. 3:19). Ma fu sortu wèt Yakobus ben taki dan? A ben taki fu „a wèt fu Krestes”. Bijbel e kari en ’a wèt di e taki dati sma musu abi bribi’ èn „a wèt fu wan fri pipel” (Gal. 6:2; Rom. 3:27; Yak. 2:12). Sobun, „a wèt di bun srefisrefi” na ala sani di Yehovah wani taki wi musu du. Den salfu Kresten nanga den „tra skapu” e kisi wini fu a wèt disi.​—Yoh. 10:16.

5. Fu san ede a wèt di e meki sma kon fri no de wan hebi?

⁵ „A wèt di bun srefisrefi” no de leki den wèt fu furu kondre. A wèt disi no muilek fu frustan, a no de wan hebi, èn a no muilek fu gi yesi na en (1 Yoh. 5:3). Yesus taki: „A tyatyari fu mi switi fu tyari èn mi lai lekti” (Mat. 11:29, 30). Boiti dati, wan sma no abi wan lo tra wèt fanowdu te a e hori ensrefi na „a wèt di bun srefisrefi”. A wèt disi abi fu du nanga lobi èn a skrifi na ini na ati èn a frustan fu sma. A no skrifi na tapu plata ston neleki den Tin Komando di Moses ben kisi.​—Leisi Hebrewsma 8:6, 10.

FA „A WÈT DI BUN SREFISREFI” E MEKI WI KON FRI?

6, 7. (a) San den wèt fu Yehovah e du gi wi? (b) A wèt di e meki wi kon fri e gi wi pasi fu du sortu sani?

⁶ Den wèt di Yehovah poti gi libisma e tyari wini kon gi den èn den e kibri sma. Yehovah poti son wèt na grontapu di libisma e hori sondro taki den e si den leki wèt. Fu eksempre, ala sma sabi taki yu no musu dyompo fu wan hei bergi, bika yu o kisi mankeri noso yu o dede. Sma no e si en leki wan hebi fu hori densrefi na a wèt disi, fu di den sabi taki a e tyari wini kon gi den. Den tra wèt fu Yehovah e tyari wini kon gi wi tu. Wi kan kon sabi den wèt disi te wi e poti prakseri na a wèt fu Krestes „di bun srefisrefi”.

⁷ A wèt di e meki wi kon fri e kibri wi. A e gi wi pasi fu du ala bun sani di wi wani du. Den sani disi no e tyari takru bakapisi gi wi èn den no e tyari problema gi tra sma. Sobun, a wèt disi e gi wi pasi fu du san wi wani, solanga den sani dati bun. Disi wani taki dati wi musu du sani di Yehovah feni bun èn di a e aksi fu wi. Wi musu leri fu lobi san Yehovah lobi èn wi no musu lobi san Yehovah no lobi. A wèt di e meki sma kon fri e yepi wi fu du dati.​—Amos 5:15.

8, 9. Sortu wini sma e kisi te den e gi yesi na a wèt di e meki sma kon fri? Gi wan eksempre.

⁸ Fu di wi na sondusma, wi alamala abi takru prakseri. Dati meki wi musu feti nanga den sondu firi fu wi di kan meki wi du sani di no bun. Ma wi kan de fri te wi e gi yesi na a wèt di e meki sma kon fri. Luku san pasa nanga Jay di ben lobi smoko tabaka. Di a bigin studeri Bijbel, a leri taki Gado no lobi a sani disi. Sobun, a ben abi fu teki wan bosroiti. A ben o meki en sondu skin basi en fu di a ben o smoko tabaka go doro, noso a ben o gi yesi na Yehovah? A teki a koni bosroiti fu dini Gado, ma a ben tranga gi en fu no smoko moro. Fa a ben firi di a tapu nanga a takru gwenti disi? A taki: „Mi ben firi so fri èn mi ben breiti trutru.”

⁹ A grontapu disi e gi sma a denki taki den fri te den man du iniwan sani di den wani. Ma te yu luku en bun, dan den e tron srafu fu sondu te den e tyari densrefi na a fasi dati. Disi na san Jay ondrofeni. Den  sma di e gi yesi na a wèt fu Gado di e meki sma kon fri, wani taki Gado yeye tiri den. Na so den e kon fri èn den kan abi „libi nanga freide” (Rom. 8:5, 6). Fa Jay ben man tapu nanga a takru gwenti disi? A no du en nanga en eigi krakti, ma na Gado yepi en. A taki: „Doronomo mi ben e studeri Bijbel, mi ben e begi Gado fu gi mi en santa yeye, èn mi ben e suku yepi na den lobi-ati brada nanga sisa na ini a gemeente.” Den srefi sani disi kan yepi wi alamala fu kon fri trutru. Meki wi luku fa.

LUKU FINIFINI SAN SKRIFI NA INI GADO WORTU

10. San a wani taki fu „luku finifini” san skrifi na ini a wèt fu Gado?

¹⁰ Na Yakobus 1:25 wi e leisi: „Efu wan sma e luku finifini san skrifi na ini a wèt di bun srefisrefi èn di e meki sma kon fri èn a e tan du dati, dan . . . a o de koloku.” A Griki wortu di den gebroiki gi „luku finifini” wani taki fu beni luku wan sani moro bun. Wan sma musu meki muiti fu du disi. Sobun, efu wi wani taki a wèt di e meki sma kon fri abi krakti tapu wi frustan nanga wi ati, dan wi musu meki muiti fu studeri Bijbel bun èn wi musu du dati doronomo. Boiti dati, wi musu teki ten fu prakseri fu den sani di wi leisi.​—1 Tim. 4:15.

11, 12. (a) Sortu sani di Yesus taki e sori taki a prenspari fu gi yesi na den leri fu Bijbel ala ten? (b) Gi sortu sani wi musu luku bun, spesrutu efu wi yongu? Luku a prenki na tapusei.

¹¹ Boiti dati, wi musu tan du san wi e leri fu Gado Wortu. Sobun, a musu de krin fu si na ini wi heri libi taki wi e gi yesi na den tru leri fu Bijbel. Na disi Yesus ben  wani sori di a taigi son sma di ben bribi en: „Efu unu tan du den sani di mi taki, dan unu na mi disipel trutru. Unu o sabi san tru èn dati o meki unu kon fri” (Yoh. 8:31, 32). Wan Bijbel wortubuku e taki dati a wortu „sabi” e sori taki wan sma e frustan taki den sani di a sabi, prenspari srefisrefi na ini en libi. Sobun, wi kan taki dati wi sabi san tru, te a de krin fu si na ini wi heri libi taki wi e gi yesi na den tru leri fu Bijbel. Dan ’Gado wortu o abi furu krakti’ na wi tapu. A o yepi wi fu kenki den fasi fu wi, so taki wi o gersi wi hemel Tata moro nanga moro.​—1 Tes. 2:13.

¹² Aksi yusrefi: A de so taki mi sabi trutru san Bijbel e taki? A de krin fu si na ini mi heri libi taki mi e gi yesi na den tru leri fu Bijbel? Noso mi wani du son sani ete di grontapusma e du? Wan sisa di kweki na ini wan Kresten osofamiri taki dati di a ben yongu, a ben bribi na ini Yehovah, ma noiti a leri sabi en. A skrifi: „Noiti mi leri fu tegu gi den sani di a no lobi. Mi no ben bribi tu taki den sani di mi ben e du, ben kan gi en prisiri noso hati en. Noiti mi leri fu suku yepi na en te mi ben abi problema. Mi ben e du nomo san mi feni bun. Ma now mi sabi taki dati ben de wan don sani, bika mi no ben sabi notinoti.” Koloku a sisa disi kon si bakaten taki a denki fu en no ben bun kwetikweti èn a tyari bigi kenki kon na ini en libi. A tron wan gewoon pionier srefi.

SANTA YEYE KAN YEPI YU FU KON FRI

13. Fa Gado en santa yeye e yepi wi fu kon fri?

¹³ Na 2 Korentesma 3:17 skrifi: „Pe a yeye fu Yehovah de, drape sma de fri.” Fa santa yeye e yepi wi fu kon fri? A e yepi wi fu kisi fasi soleki „lobi, prisiri, freide, langa pasensi, switifasi, bun-ati, bribi, safri-ati, a dwengi di wan sma man dwengi ensrefi” (Gal. 5:22, 23). Sma no kan de fri trutru te den no abi den fasi disi, spesrutu te den no abi lobi. Disi de krin fu si na ini a grontapu disi. Baka di na apostel Paulus kari den fasi di a yeye e meki sma kisi, a skrifi: „Nowan wèt e krutu den sani disi.” San a ben wani taki nanga den wortu disi? Nowan wèt de di kan tapu wi fu kisi den fasi di a yeye e meki sma kisi. Nowan wèt de tu di kan tapu wi fu sori den fasi disi moro nanga moro na ini wi libi (Gal. 5:18). Yehovah wani taki wi musu sori den fasi disi moro nanga moro. Iya, wi musu sori den fu têgo srefi.

14. Fa a yeye fu grontapu e meki sma tron srafu?

¹⁴ Den sma di e meki a yeye fu grontapu abi krakti na den tapu èn di e du iniwan sani di den e firi fu du, e denki kande taki den fri trutru. (Leisi 2 Petrus 2:18, 19.) Ma den no sabi taki den na srafu. Tiriman musu meki wan lo wèt fu tapu den sma disi, so taki den no kan du ala san den wani. Paulus e taki: „Wèt no e meki gi reti-ati sma, ma gi den wan di no e hori wèt èn di trangayesi” (1 Tim. 1:9, 10). Den de srafu fu den eigi sondu skin fu di den e „du san a skin wani”, èn a sondu skin na wan ogri basi trutru (Ef. 2:1-3). Son leisi mira e waka langalanga go na ini wan komki oni fu di na oni e hari den. Ma dan den no man komoto moro. Na so den sma disi e meki den takru lostu fu den hari den fu go du sani di no bun èn den e tron srafu fu sondu.​—Yak. 1:14, 15.

WI KON FRI DI WI KON NA INI A KRESTEN GEMEENTE

15, 16. (a) Sortu wini wi kisi di wi tron wan memre fu a Kresten gemeente? (b) Fu san ede wi kan taki dati wi fri na ini a Kresten gemeente?

¹⁵ Di yu bigin go na a Kresten gemeente, a no ben de leki te yu ben o tron wan memre fu wan sport-grupu. Na den sortu grupu dati, na yu srefi abi fu go skrifi yu  nen fu tron wan memre. Ma yu kon na ini gemeente, fu di Yehovah hari yu kon (Yoh. 6:44). Fu san ede a du dati? Yu denki na fu di a si wan sma di e du san reti? Kande yu ben o piki: „Mi no denki so.” We, dan san meki taki Gado du dati? A si taki yu ben o wani gi yesi na a wèt fu en èn taki yu ben o wani meki a tiri yu na wan lobi-ati fasi. Sensi yu tron wan memre fu a gemeente, Yehovah leri yu en Wortu, so taki sani kan go bun nanga yu. A meki yu kon fri fu di a sori yu taki falsi kerki e leri sma sani di no tru. A leri yu tu fa yu kan kisi den fasi fu Krestes. (Leisi Efeisesma 4:22-24.) Dati meki yu abi a grani now fu de na ini a wan-enkri grupu sma na grontapu di fri trutru.​—Yak. 2:12.

¹⁶ Prakseri a sani disi: Yu e frede te yu de nanga sma di lobi Yehovah nanga den heri ati? Te yu de na a Kownukondre zaal èn yu e taki nanga yu brada nanga sisa, yu e frede taki wan sma o fufuru den sani fu yu? Nôno! Yu e firi korostu trutru. Ma yu denki taki na so yu ben o firi efu yu ben de nanga tra sortu sma na wan tra presi? Kwetikweti! Na mindri a pipel fu Yehovah wi de fri nownow kaba. Disi e sori fa wi o kon fri trutru na ini a ten di e kon.

WI „O KON FRI NA WAN TUMUSI MOI FASI LEKI PIKIN FU GADO”

17. Libisma o kisi wini te „a glori fu den manpikin fu Gado o de fu si”. Fa so?

¹⁷ Paulus ben skrifi na sortu fasi Yehovah o meki en pipel na grontapu kon fri. A taki: „Ala den sani di Gado meki, e wakti fayafaya te a glori fu den manpikin fu Gado o de fu si.” Dan a taki: „Den sani di Gado meki, kon fri fu wan skin di e dede. Na so den o kon fri na wan tumusi moi fasi leki pikin fu Gado” (Rom. 8:19-21). „Den sani di Gado meki” na den sma di abi a howpu fu libi fu têgo na grontapu èn di o kisi wini „te a glori” fu den salfu „manpikin fu Gado o de fu si”. Disi o pasa te den salfuwan na ini hemel o yepi Krestes fu kiri ala ogri sma èn te den o tyari „a bigi ipi” go na ini a nyun grontapu.​—Openb. 7:9, 14.

18. Sortu sani o pasa so taki libisma o kon fri te fu kaba?

¹⁸ Na a ten dati, libisma o kon fri na wan spesrutu fasi fu di Satan nanga den ogri yeye fu en no o man abi krakti na den tapu moro (Openb. 20:1-3). Dati o de wan switi ten! Dan den 144.000 kownu nanga priester o gebroiki a frulusu-ofrandi fu meki ala libisma kon fri te fu kaba fu sondu nanga dede (Openb. 5:9, 10). Baka dati, libisma o kisi tesi fu sori taki a bribi fu den tranga. Dan den wan di tan gi yesi o kon fri dorodoro soleki fa Yehovah ben wani dati sensi a bigin. Sobun, „den o kon fri na wan tumusi moi fasi leki pikin fu Gado”. Denki a tori! A no o de wan muilek sani gi yu moro fu du san Gado feni bun, bika yu no o abi wan sondu skin moro èn yu o sori den fasi fu Gado soifri soleki fa a ben wani dati.

19. San wi musu tan du efu wi wani „kon fri na wan tumusi moi fasi leki pikin fu Gado”?

¹⁹ Yu wani „kon fri na wan tumusi moi fasi leki pikin fu Gado”? Efu yu wani dati trutru, dan meki „a wèt di bun srefisrefi èn di e meki sma kon fri” abi krakti tapu yu ati èn yu frustan ala ten. Studeri Bijbel bun èn du dati doronomo. Meki a de krin fu si na ini yu heri libi taki yu e gi yesi na den tru leri fu Bijbel. Begi fu kisi santa yeye. Meki a Kresten gemeente nanga den leri fu Yehovah yepi yu fu tron wan moro bun Kresten. No meki Satan kori yu, neleki fa a ben kori Eva. No meki a gi yu a denki taki den wèt fu Gado hebi tumusi. A tru taki Didibri koni trutru. Ma a tra artikel o sori wi taki a no abi fu kisi wi, „bika wi sabi san a abi na prakseri”.​—2 Kor. 2:11.

[Aksi fu a tori disi]

[Prenki na tapu bladzijde 9]

Mi wani du son sani ete di grontapusma e du?

[Prenki na tapu bladzijde 9]

A de krin fu si na ini mi heri libi taki mi e gi yesi na den tru leri fu Bijbel?