„Suma o man tapu skreki gi mi?”
„Suma o man tapu skreki gi mi?”
„Awinsi furu sma kon feti nanga mi, toku mi o tan frutrow tapu Gado.”—PS. 27:3.
FA DEN TEKST DISI E YEPI YU FU ABI DEKI-ATI?
1. Sortu aksi o kisi piki na ini Psalm 27?
FU SAN EDE wi e du moro na ini a preikiwroko aladi sani e kon moro ogri na grontapu? Fu san ede wi de klariklari fu gebroiki so furu ten nanga krakti na ini a preikiwroko aladi heri grontapu abi moni problema? Fa wi kan abi deki-ati ala ten aladi so furu sma e frede san o pasa na ini a ten di e kon? Wi kan feni den piki tapu den aksi disi na ini wan singi di Kownu David skrifi na ini Psalm 27.
2. San frede kan du nanga wan sma, ma san wi sabi seiker?
2 David e bigin a psalm nanga den wortu disi: „Yehovah na a leti fu mi èn na en e frulusu mi. Sobun, suma kan meki mi frede? Yehovah na wan fortresi pe mi kan lon go fu tan na libi. Sobun, suma o man tapu skreki gi mi?” (Ps. 27:1) Te wan sma e tapu skreki gi wan trawan, a trawan kan frede so te taki a no man du notinoti. Ma wan sma di e frutrow tapu Yehovah abi deki-ati èn a no e frede (1 Petr. 3:14). Te wi e meki Yehovah de leki wan fortresi gi wi, dan ’sani o waka bun gi wi èn wi no o frede taki ogri o miti wi’ (Odo 1:33; 3:25). Fu san ede?
„YEHOVAH NA A LETI FU MI ÈN NA EN E FRULUSU MI”
3. Fu san ede wi kan taki dati Yehovah na wi leti, ma san wi musu du?
3 Te David e taki „Yehovah na a leti fu mi”, dan disi e sori taki Yehovah e puru wi na ini dungru fu di a e leri wi san tru (Ps. 27:1). Te wi de na pasi, dan wan leti kan sori wi sortu problema de na wi fesi. Ma a leti no o puru den problema gi wi. Sobun, te wi e si den problema, dan wi musu luku fa wi o wai pasi gi den. Na so Yehovah e sori wi fu san ede son sani e pasa na grontapu. A e sori wi sortu ogri kan miti wi na ini a grontapu disi. Na ini Bijbel a gi wi rai di kan yepi wi ala ten, ma a de na wi fu teki den rai èn fu du san wi leri. Te wi e du disi, dan wi o koni neleki a psalm skrifiman di ben ’koni moro den feanti fu en’ èn di ben ’frustan sani moro krin leki ala den leriman fu en’.—Ps. 119:98, 99, 130.
4. (a) Fu san ede David taki dati Yehovah frulusu en? (b) O ten Yehovah o frulusu den futuboi fu en?
4 Den sani di David taki na Psalm 27:1 e sori taki a no frigiti fa Yehovah yepi en na ini a ten di pasa. Fu eksempre, Yehovah ben puru en „na ini na anu fu a lew èn na ini na anu fu a beer”. Yehovah ben meki a wini a bun bigi man Goliat tu. Bakaten Kownu Saul pruberi fu kiri David nanga wan lansri wan tu leisi, ma ibri tron Yehovah frulusu en (1 Sam. 17:37, 49, 50; 18:11, 12; 19:10). Sobun, wi kan frustan fu san ede David taki: „Yehovah . . . frulusu mi.” Neleki fa Yehovah frulusu David, na so a o frulusu den futuboi fu en na ini a ten disi. O ten a o du dati? A o du dati te „a bigi banawtu” kon.—Openb. 7:14; 2 Petr. 2:9.
MEMRE DEN TEN DI YEHOVAH YEPI YU
5, 6. (a) Fu san ede wi kan kisi moro deki-ati te wi e memre fa Yehovah yepi wi? (b) Fu san ede a bun fu prakseri fa Yehovah yepi en pipel na ini a ten di pasa?
5 Wan prenspari sani di o meki wi kisi deki-ati, skrifi na Psalm 27:2, 3. (Leisi en.) David ben memre den ten di Yehovah ben frulusu en (1 Sam. 17:34-37). Disi ben gi en deki-ati fu horidoro na ini den moro muilek situwâsi. Yu e memre fa Yehovah yepi yu na ini a ten di pasa? Disi e gi yu deki-ati tu? A pasa nanga yu wan leisi taki yu begi furu fu wan sani di ben e moro yu? Yu si bakaten fa Yehovah gi yu koni nanga krakti fu horidoro? Yu kan memre fa Yehovah yepi yu fu lusu son problema di ben tapu yu fu dini en nanga prisiri? Noso yu e memre fa a yepi yu fu du moro na ini a diniwroko fu en? (1 Kor. 16:9) Fa yu e firi te yu e prakseri den ten dati? Te yu e prakseri den sani disi, dan dati o gi yu moro frutrow taki Yehovah kan yepi yu fu lusu den problema fu yu noso taki a kan yepi yu fu horidoro na ini den moro muilek situwâsi.—Rom. 5:3-5.
6 San wi ben o du efu wan makti tiriman ben o wani figi na organisâsi fu Yehovah Kotoigi puru? Furu sma na ini a ten disi pruberi fu du dati, ma den no ben man. Te wi e hori na prakseri fa Yehovah yepi en pipel na ini a ten di pasa, wi e kisi deki-ati fu horidoro awinsi san e pasa na ini a ten di e kon.—Dan. 3:28.
A LOBI DI WI ABI GI A TRU ANBEGI
7, 8. (a) San David aksi Yehovah na ini Psalm 27:4? (b) San na a bigi agersi tempel fu Yehovah, èn fa wi e anbegi drape?
7 Wan tra prenspari sani di o meki wi kisi deki-ati, na a lobi di wi abi gi a tru anbegi. (Leisi Psalm 27:4.) Na ini a ten fu David „na oso fu Yehovah” ben de a tabernakel. David seti ala sani so taki en manpikin Salomo ben kan bow wan moi tempel gi Yehovah. Hondrohondro yari baka dati, Yesus sori taki wan ten ben o kon te sma no ben o abi fu go na a tempel fu anbegi Yehovah (Yoh. 4:21-23). Yehovah seti sani, so taki wi kan dini en na wan fasi di a feni bun. Te wi abi bribi na ini a frulusu-ofrandi fu Yesus, dan a o feni na anbegi fu wi bun. Na ini Hebrewsma kapitel 8 te go miti kapitel 10 na apostel Paulus e tyari kon na krin taki a sani disi di Yehovah seti de leki wan bigi agersi tempel pe wi kan anbegi en. A ben sori taki a tempel disi kon di Yesus dopu na ini a yari 29 fu sori taki a de klariklari fu du a wani fu Yehovah (Hebr. 10:10). Fa wi e anbegi Yehovah na ini tempel disi? Wi e du disi te wi e begi en ’nanga wan krin ati èn nanga tranga bribi’. Wi e anbegi en na ini en agersi tempel tu te wi e preiki fu en nanga deki-ati, te wi e go na den konmakandra èn te wi e hori na Osofamiri Anbegi (Hebr. 10:22-25). A lobi di wi abi gi a tru anbegi o meki wi du den sani disi doronomo na ini den muilek lasti dei disi.
8 Na heri grontapu den fayafaya futuboi fu Yehovah e gebroiki moro ten na ini a preikiwroko, den e leri nyun tongo èn den e froisi go na presi pe moro Kownukondre preikiman de fanowdu. Den e sori taki den de leki a psalm skrifiman di aksi Yehovah wán sani nomo. A taki: „Wán sani mi aksi Yehovah èn dati na san mi wani trutru: . . . Fu mi kan si taki Yehovah e du bun èn fu mi kan luku a tempel fu en nanga prisiri.” Den futuboi fu Yehovah na ini a ten disi wani taki a musu blesi den èn den wani dini en awinsi san e pasa.—Leisi Psalm 27:6.
BRIBI TAKI GADO O YEPI YU
9, 10. Sortu dyaranti Psalm 27:10 e gi wi?
9 Den sani di David taki e sori taki a ben bribi trutru taki Yehovah ben o yepi en. A taki: „Awinsi mi eigi papa, noso mi eigi mama ben o gowe libi mi, toku Yehovah srefi ben o sorgu gi mi” (Ps. 27:10). Den sani di skrifi na ini 1 Samuel kapitel 22 e sori taki David en papa nanga en mama no gowe libi en. Ma na ini a ten disi den osofamiri fu furu sma no wani sabi notinoti fu den. Furu fu den sma disi e firi korostu na ini a Kresten gemeente èn den e kisi yepi fu den lobi-ati brada nanga sisa drape.
10 Yehovah de klariklari fu yepi den futuboi fu en awinsi trawan gowe libi den. Sobun, wi kan de seiker taki a o yepi den te den e kisi tra tesi. Efu wi e broko wi ede fu di wi no sabi fa wi o sorgu gi wi osofamiri, dan wi musu hori na prakseri taki Yehovah o yepi wi ala ten (Hebr. 13:5, 6). A e frustan na ini sortu situwâsi wi de èn a sabi san wi abi fanowdu.
11. Te sma si taki wi e frutrow tapu Yehovah ala ten, dan sortu krakti dati kan abi na den tapu? Gi wan eksempre.
11 Luku san pasa nanga Victoria, wan Bijbelstudie na ini Liberia. Di a ben o dopu, a man fu en gowe libi en nanga den dri pikin fu en. A no ben abi wroko èn a no ben abi wan oso fu tan. Ma toku a go doro fu studeri Bijbel èn te fu kaba a dopu. Wan dei, en umapikin fu 13 yari feni wan portmoni di ben furu nanga moni. Victoria nanga en umapikin no teri a moni, fu di den no ben wani a moni tron wan tesi gi den. Sobun, wantewante den go suku a srudati di ben lasi a portmoni. Di den feni a srudati, a taigi den taki grontapu ben o de wan moro switi presi fu libi efu ala sma ben de reti-ati sma leki Yehovah Kotoigi. Victoria gebroiki en Bijbel fu sori a srudati taki Yehovah pramisi wan moi grontapu na ini a ten di e kon. A bribi di Victoria sori naki na ati fu a srudati trutru. Dati meki a gi Victoria furu fu a moni di ben de na ini a portmoni. Sma na heri grontapu sabi taki Yehovah Kotoigi lobi du san reti. Fu di den e bribi trutru taki Yehovah man sorgu gi den, meki den lobi du san reti.
12. Fu san ede wi e tan dini Yehovah awinsi wi lasi wi wroko noso wi moni? Gi wan eksempre.
12 Wan tra eksempre na a di fu Thomas, wan preikiman di no dopu ete èn di e tan na Sierra Leone. A bigin wroko leki wan leriman na wan skoro, ma wan heri yari den no pai en. Fu man kisi a moni di den ben musu pai en, a ben musu abi wan takimakandra nanga a driktoro fu a skoro. Ma a driktoro fu a skoro ben de wan priester. A taigi Thomas taki den leri fu Yehovah Kotoigi no e kruderi nanga den leri fu a skoro. A taigi Thomas taki efu a ben wani tan wroko na a skoro, a ben musu drai baka gi a bribi fu en. Dati meki Thomas libi a wroko fu en sondro fu kisi a moni di den ben musu pai en. Yu kan frustan taki disi no ben switi gi Thomas. Toku a feni wan tra wroko bakaten. A ben e meki broko radio nanga cel. Na eksempre disi nanga furu tra eksempre e sori taki efu wi e frutrow tapu Yehovah, wi no abi fu frede taki wi no o kisi den sani di wi abi fanowdu na ini a libi. Wi kan de seiker taki Yehovah o sorgu gi wi fu di a meki ala sani èn a kibri en pipel ala ten.
13. Fu san ede den brada nanga sisa na ini kondre pe furu sma pôti, e preiki fayafaya?
13 Na ini furu fu den kondre pe sani no e go so bun èn pe furu sma pôti, den brada nanga sisa e preiki fayafaya. Fu san ede? Wan bijkantoro skrifi: „Fu di furu Bijbelstudie no abi wan wroko, meki den abi moro ten fu studeri. Den brada nanga sisa abi moro ten fu preiki tu. Nowan sma abi fu taigi den ososma taki wi e libi na ini den lasti dei fu di den srefi e si fa a libi kon hebi. O moro problema den abi, o moro makriki den brada nanga sisa kan preiki gi den.” Wan zendeling di e dini moro leki 12 yari na ini wan kondre pe ibri preikiman abi moro leki dri Bijbelstudie, skrifi: „Fu di furu fu den preikiman no gudu, meki den no abi furu sani di e puru den prakseri na a diniwroko. Dati meki nofo tron den abi moro ten fu preiki èn fu hori Bijbelstudie.”
14. Na sortu fasi Yehovah o kibri a bigi ipi?
14 Yehovah pramisi taki a o yepi en pipel, a o kibri den, èn a o frulusu den. Wi sabi taki a o du san a pramisi (Ps. 37:28; 91:1-3). Wan bigi ipi sma o pasa „a bigi banawtu” libilibi (Openb. 7:9, 14). Sobun, Gado no o gi pasi taki sma kiri den alamala na ini den lasti dei fu a grontapu disi. Boiti dati, Yehovah o gi den ala san den abi fanowdu fu tan wan mati fu en èn fu horidoro te tesi miti den. Te fu kaba, Yehovah o kibri en pipel na ini Armagedon.
„YEHOVAH, MI E BEGI YU, SORI MI A PASI FU YU”
15, 16. Sortu wini wi e kisi te wi e du san Gado leri wi? Gi wan eksempre.
15 Efu wi wani abi deki-ati ala ten, wi musu kisi leri fu Gado doronomo. Disi de krin fu si te wi e luku san David taki: „Yehovah, mi e begi yu, sori mi a pasi fu yu. Yepi mi fu waka a reti pasi, so taki mi feanti no man du mi ogri” (Ps. 27:11). Efu wi wani du san a tekst disi e taki, dan wi musu poti ala wi prakseri na den Bijbel rai di Yehovah en organisâsi e gi wi èn wi musu gi yesi wantewante. Fu eksempre, wi kisi a rai taki wi musu pruberi fu libi soso nanga den sani di wi abi fanowdu trutru. Furu sma gi yesi na a koni rai disi fu di den pai den paiman fu den èn den seri den sani di den no ben abi fanowdu. Sobun, di bigi moni problema kon na grontapu, den no ben abi tumusi furu broko-ede. Now den no abi fu wroko so tranga fu pai gi sani di den no abi fanowdu trutru. Boiti dati, den man du moro na ini a diniwroko. Dati meki ibriwan fu wi musu aksi ensrefi: ’Mi e du ala san mi e leisi na ini Bijbel noso na ini den buku di a koni srafu di de fu frutrow, e gi mi? Mi e du dati wantewante, srefi efu a muilek gi mi?’—Mat. 24:45.
16 Te wi e meki Yehovah gi wi leri èn sori wi fa wi musu libi, dan wi no abi fu frede noti. Wan gewoon pionier na ini Amerkankondre ben wani du wan tra wroko na en wrokope, fu di dati ben o yepi en nanga en osofamiri fu tan pionier. Ma en basi taigi en taki a no ben o feni a wroko dati noiti, fu di a no ben go na heiskoro. Efu disi ben pasa nanga yu, a ben o hati yu taki yu bigin pionier na presi fu go na heiskoro? Baka tu wiki, a basi lasi en wroko èn a nyun basi aksi a brada sortu sani a ben wani du na ini en libi. A brada taigi en taki en nanga en wefi na Yehovah Kotoigi. A fruteri en tu taki den ben e pionier èn taki den ben sa wani du dati go doro. Fosi a brada ben kan taki wan tra sani, a basi taigi en: „Mi ben sabi taki yu de tra fasi! Di mi papa ben de fu dede, tu sma fu a kerki fu yu kon leisi Bijbel gi en ibri dei. Mi taigi misrefi taki mi ben o yepi wan Yehovah Kotoigi, efu mi ben o kisi na okasi fu du dati wan leisi.” A tra mamanten a brada kisi a wroko di a fosi basi no ben wani gi en. Te wi e poti Gado Kownukondre na a fosi presi na ini wi libi, dan Yehovah o gi wi ala san wi abi fanowdu soleki fa a pramisi.—Mat. 6:33.
WI MUSU ABI BRIBI NANGA HOWPU
17. San o yepi wi fu no frede san o pasa na ini a ten di e kon?
17 David sori o prenspari a de fu abi bribi nanga howpu. A taki: „San ben o pasa nanga mi, efu mi no ben bribi taki mi ben o ondrofeni den bun di Yehovah e du, aladi mi de na mindri den wan di de na libi?” (Ps. 27:13) Iya, fa wi libi ben o de efu Gado no ben gi wi howpu èn efu wi no ben sabi den sani di skrifi na ini Psalm 27? Fu dati ede, meki wi tan begi Yehovah fu gi wi krakti fu pasa den lasti dei disi èn fu kibri wi te Armagedon doro.—Leisi Psalm 27:14.
[Aksi fu a tori disi]
[Prenki na tapu bladzijde 23]
David ben kisi deki-ati di a memre fa Yehovah frulusu en
[Prenki na tapu bladzijde 25]
Yu e si den moni problema na grontapu leki wan okasi fu du moro na ini a diniwroko?
