Yehovah e tyari en famiri kon na wán

’Mi e begi unu fu tan abi a wánfasi di unu kisi nanga yepi fu a santa yeye.’​—EF. 4:1, 3.

FA YU BEN O PIKI DEN AKSI DISI?

Sortu sani Gado seti èn fu san ede a du dati?

San wi musu du fu ’tan abi a wánfasi di wi kisi nanga yepi fu a santa yeye’?

San o yepi wi fu „sori switifasi gi makandra”?

1, 2. Fa Yehovah ben wani taki grontapu nanga libisma ben musu de?

TE YU e yere a wortu osofamiri, san yu e prakseri? Yu e prakseri fu lobi nanga prisiri? Yu e prakseri fa yu e wroko makandra nanga yu osofamiri fu du wan sani? Noso yu e prakseri fu wan switi presi pe yu kan gro kon bigi sondro fu frede, pe yu kan leri sani èn pe yu kan taki san yu e denki? A no de fu taki dati na den sani disi yu o prakseri efu yu abi wan lobi-ati osofamiri. Yehovah na a sma di meki na osofamiri (Ef. 3:14, 15). Gado ben wani taki ala sma na hemel nanga grontapu ben o libi leki wán famiri. Den no ben o frede noti, den ben o frutrow makandra èn den ben o de wán.

² Baka di Adam nanga Eva sondu, libisma no ben de na ini a bigi famiri fu Gado moro, ma toku Yehovah wani dati ete. A o sorgu taki a paradijs na grontapu furu nanga den bakapikin fu Adam nanga Eva (Gen. 1:28; Yes. 45:18). A seti ala sani, so taki disi o pasa trutru. Wan tu fu den sani di a seti skrifi na ini a Bijbel buku Efeisesma di e taki fu wánfasi. Meki wi luku wan tu fu den vers na ini a buku disi. Wi o luku tu fa wi kan horibaka gi den sani di Yehovah seti fu meki den futuboi fu en na hemel èn na grontapu de wán.

SAN A SETI ÈN FU SAN EDE?

3. (a) San Gado bigin seti „na a kaba fu a ten di a poti”? (b) O ten a fosi sani di a seti bigin?

³ Ala sani di Yehovah e du, na fu meki den sani di a abi na prakseri kon tru. Dati meki a bigin seti sani „na a kaba fu a ten di a poti” fu meki den futuboi fu en na hemel èn na grontapu de leki wán famiri. (Leisi Efeisesma 1:8-10.) A seti tu sani, so taki disi kan pasa. A fosi sani di a seti, na taki a e sreka den salfuwan fu libi na ini hemel pe den o tan wroko ondro a tiri fu Yesus. A sani  disi bigin na a Pinksterfesa fu a yari 33 di Yehovah bigin tyari den sma kon na wán di ben o tiri makandra nanga Krestes na ini hemel (Tori 2:1-4). A frulusu-ofrandi fu Krestes meki taki Gado e si den salfuwan disi leki reti-ati sma di warti fu kisi libi. Den sabi taki Gado teki den leki pikin fu en.​—Rom. 3:23, 24; 5:1; 8:15-17.

4, 5. San na a di fu tu sani di Gado seti?

⁴ A di fu tu sani di Gado seti, na taki a e sreka sma fu libi na ini wan paradijs na grontapu ondro a tiri fu a Mesias Kownukondre fu Krestes. A „bigi ipi” o de den fosiwan di o libi na ini Paradijs (Openb. 7:9, 13-17; 21:1-5). Na ini den dusun yari te Krestes o tiri, milyardmilyard sma o kisi wan opobaka fu libi na grontapu makandra nanga a bigi ipi (Openb. 20:12, 13). Prakseri nomo fa sani o de na a ten dati! Wi o abi moro okasi fu sori sma taki wi de wán trutru. Na a kaba fu den dusun yari wan lasti tesi o de. A bigi ipi nanga den sma di o kisi wan opobaka, sobun „den sani di de na grontapu”, o kisi a tesi disi. Ala den sma na grontapu di tan gi yesi na Gado o tron „pikin fu Gado” tu.​—Rom. 8:21; Openb. 20:7, 8.

⁵ Na ini a ten disi, Yehovah e sreka den salfuwan fu libi na ini hemel èn a e sreka den tra skapu fu libi na ini wan paradijs na grontapu. Ma fa ibriwan fu wi kan horibaka gi den sani di Gado seti?

„TAN ABI A WÁNFASI DI UNU KISI NANGA YEPI FU A SANTA YEYE”

6. Sortu Bijbeltekst e sori taki Kresten musu kon makandra?

⁶ Bijbel e taki dati Kresten musu kon makandra (1 Kor. 14:23; Hebr. 10:24, 25). Ma wi no musu kon makandra nomo na wan presi, neleki sma di e go na wowoyo noso na wan stadion fu go luku wan plèi. Efu wi wani abi wánfasi trutru, dan wi musu du san Yehovah e leri wi èn wi musu meki Gado en santa yeye yepi wi fu tron moro bun sma.

7. San a wani taki fu „tan abi a wánfasi di wi kisi nanga yepi fu a santa yeye”?

⁷ Fu di wi e bribi na ini a frulusu-ofrandi fu Krestes, meki Yehovah e si wi leki reti-ati sma. A e si den salfuwan leki en pikin èn den tra skapu leki mati fu en. Ma fu di wi e libi na ini na ogri grontapu disi, meki ten na ten wi o kisi problema nanga tra sma (Rom. 5:9; Yak. 2:23). Fu dati ede Bijbel e taigi wi fu „abi pasensi” nanga makandra. Ma san wi musu du fu abi wánfasi nanga wi Kresten brada nanga sisa? Wi musu leri fu abi „sakafasi nanga safri-ati”. Boiti dati, Paulus e taigi wi taki wi musu du ala san wi man fu ’libi bun nanga makandra èn wi musu du ala muiti fu tan abi a wánfasi di wi kisi nanga yepi fu a santa yeye’. (Leisi Efeisesma 4:1-3.) Wan fasi fa wi kan du san a tekst disi e taki, na te wi e meki a yeye fu Gado kenki a fasi fa wi e tyari wisrefi. Dan wi o kisi den fasi di a yeye e meki sma kisi. Boiti dati, wi no musu du den sani di a sondu skin e du, bika den sani dati e tyari pratifasi kon ala ten. Ma den fasi di a yeye e meki wi kisi, e meki wi de wán.

8. Fa den sani di a sondu skin e du e prati sma?

⁸ Fa „den sani di a sondu skin e du”, e prati sma? (Leisi Galasiasma 5:19-21.) Hurudu e prati wan sma fu Yehovah èn fu a gemeente. Sutadu e tyari furu sari nanga pen na ini wan osofamiri. A kan prati pikin fu den papa noso mama èn a kan prati trowpatna fu makandra. Te wan sma e libi na wan fasi di no krin, a o muilek gi en fu abi wánfasi nanga Gado èn nanga sma di lobi en. Wan sma di wani plak tu sani na makandra sabi taki efu wan fu den sani no krin, den tu sani no o plak na makandra. Sobun, efu wi libi no krin, wi no man de wán nanga Gado. Wan sma di e du ogri sondro fu syen e trangayesi den wèt fu Gado èn a e lespeki den kwetikweti. Den tra sani di  a sondu skin e du, e prati sma fu makandra èn fu Gado. Yehovah e tegu trutru gi den sani disi.

9. San wi musu aksi wisrefi efu wi wani kon sabi efu wi e libi bun nanga wi Kresten brada nanga sisa èn efu wi de wán nanga den?

⁹ Sobun, ibriwan fu wi musu aksi ensrefi: ’Omeni muiti mi e meki fu libi bun nanga mi Kresten brada nanga sisa èn fu de wán nanga den? San mi e du te mi abi wan problema nanga wan tra sma? Mi e go fruteri ala den mati fu mi fu disi, soso fu di mi wani meki den teki mi sei? Mi e fruwakti taki den owruman o lusu a problema gi mi, so taki mi srefi no abi fu taki nanga a sma fu meki en bun nanga en? Efu mi sabi taki wan tra sma abi wan problema nanga mi, dan mi e wai pasi gi en fu di mi no wani taki nanga en fu a problema?’ Wi sabi taki Yehovah seti sani fu meki ala sma tron leki wán famiri di Krestes e tiri. Ma efu wi ben o du iniwan fu den sani di wi kari didyonsro, dan yu denki taki wi ben o horibaka gi a seti disi?

10, 11. (a) O prenspari a de fu libi bun nanga wi Kresten brada nanga sisa? (b) San wi kan du fu tan libi bun nanga makandra èn fu kisi blesi fu Yehovah?

¹⁰ Yesus taki: „Fu dati ede, te yu e tyari yu ofrandi go na a altari èn drape yu e memre taki yu brada abi wan sani nanga yu, dan libi yu ofrandi drape na fesi na altari èn go meki en bun nanga yu brada fosi. Baka dati yu kan gi yu ofrandi te yu drai kon baka. . . . Yu no musu draidrai fu lusu a problema di yu abi nanga en” (Mat. 5:23-25). Yakobus skrifi taki „den wan di e libi bun nanga trawan, e sai na ini bun ten èn a froktu di den e koti na retidu” (Yak. 3:17, 18). Sobun, efu wi no e libi bun nanga trawan, wi no o man tan du san reti.

¹¹ Na ini son kondre pe feti ben de, sma no man du noti nanga furu fu den gron, fu di furu bom beri na ondro a doti. Te wan fu den bom disi sutu, dan den gronman no wani prani drape moro èn den e lasi den wroko. Disi e meki tu taki den sma na den foto no e kisi nofo nyanyan moro. Sobun, den bom e tyari soso problema kon. Efu wi abi son maniri di e meki taki wi no man libi bun nanga wi Kresten brada nanga sisa, dan wi kan de leki den bom dati. Wi no o man go na fesi èn sani no o go bun na ini a gemeente. Ma te wi no e draidrai fu gi trawan pardon èn te wi e du bun sani gi den, dan wi alamala o libi bun nanga makandra èn Yehovah o blesi wi.

12. Fa owruman e yepi wi fu abi wánfasi?

¹² „Mansma di abi spesrutu koni” kan yepi wi tu fu „kon de wán na ini a bribi” (Ef. 4:8, 13). Den mansma disi na owruman di e yepi a gemeente fu tan abi wánfasi. Den e wroko makandra nanga wi na ini a diniwroko fu Yehovah èn den e gi wi rai fu Bijbel te dati de fanowdu. Na so den e yepi wi fu  tron moro bun Kresten (Ef. 4:22-24). Te den owruman e gi yu rai, dan yu musu hori na prakseri taki Yehovah e gebroiki den fu sreka yu fu libi na ini a nyun grontapu. Owruman, te unu e gi trawan rai, unu e du dati na wan fasi di e sori taki unu wani yepi den trutru?​—Gal. 6:1.

„SORI SWITIFASI GI MAKANDRA”

13. San ben o pasa efu wi no e du san Efeisesma 4:25-32 e taki?

¹³ Efeisesma 4:25-29 e taki fu wan tu sani di wi no musu du. Wi no musu lei, wi no musu kisi bigi atibron, wi no musu lesi èn wi no musu taki sani di no bun. Ma na presi fu dati wi musu taki sani di bun èn di e gi sma deki-ati. Iniwan sma di no e gi yesi na a rai disi e tyari pratifasi kon. So wan sma ben o „meki Gado en santa yeye sari” èn na a santa yeye e tyari wánfasi kon (Ef. 4:30). Efu wi wani tan libi bun nanga trawan èn efu wi wani tan abi wánfasi, dan wi musu du san Paulus e taki na ini Efeisesma 4:31, 32: „Puru ala takru bita-ati nanga faya-ati nanga atibron nanga babari nanga kosikosi na un mindri, sosrefi ala takrudu. Ma sori switifasi gi makandra èn abi sari-ati nanga makandra. Un musu gi makandra pardon nanga un heri ati neleki fa Gado e gi unu pardon nanga en heri ati tu nanga yepi fu Krestes.”

14. (a) Fu san ede Paulus gi wi a rai fu „sori switifasi gi makandra”? (b) San o yepi wi fu sori switifasi gi trawan?

¹⁴ Paulus gi wi a rai fu „sori switifasi gi makandra”, bika son leisi wi no e sori switifasi èn kande wi musu du moro muiti fu sori dati. Wi musu leri fu poti moro prakseri na den firi fu trawan leki na den di fu wi (Fil. 2:4). Kande wi wani taki wan sani fu meki sma lafu noso fu sori taki wi koni. Ma efu a sani di wi wani taki, e sori taki wi no abi switifasi, dan wi no musu taki en. Efu wi e prakseri bun fosi wi taki wan sani, dan dati o yepi wi fu sori switifasi gi trawan.

LERI FU SORI LOBI NANGA LESPEKI NA INI NA OSOFAMIRI

15. Fa Efeisesma 5:28 e yepi masra fu frustan fa den musu de leki Krestes?

¹⁵ Bijbel e sori taki Krestes nanga a gemeente, de leki wan masra nanga en wefi. Na eksempre fu Krestes e yepi wan masra fu frustan fa a musu tiri en wefi, fa a musu sori lobi gi en, èn fa a musu sorgu gi en. Na eksempre fu Krestes e yepi wan wefi tu fu frustan fa a musu saka ensrefi na en masra ondro (Ef. 5:22-33). Paulus ben skrifi: „Na a srefi fasi den masra musu lobi den wefi leki den eigi skin.” San a ben wani taki nanga den wortu „na a srefi fasi”? (Ef. 5:28) Den sani di Paulus taki fu Krestes nanga a gemeente e yepi wi fu piki na aksi disi. A taki dati Krestes ben lobi a gemeente, a dede gi en, èn „a wasi en kon krin nanga a watra fu Gado Wortu”. Sobun, wan masra abi a frantwortu fu yepi ibri sma na ini en osofamiri fu de mati fu Yehovah. Te a e du dati, dan a e horibaka gi den sani di Yehovah seti fu meki ala sma tron leki wán famiri di Krestes e tiri.

16. San o de a bakapisi te papa nanga mama e tyari a frantwortu di Yehovah gi den?

¹⁶ Papa nanga mama musu hori na prakseri taki Yehovah gi den a frantwortu fu sorgu gi den pikin fu den. A de wan sari sani trutru taki furu sma na ini a ten disi ’no lobi trawan’ (2 Tim. 3:1, 3). Furu papa no e du san den musu du. Disi no bun gi den pikin fu den èn a e meki den pikin sari. Ma Paulus gi Kresten papa a rai disi: „No tanteri den pikin fu unu, ma tan kweki den nanga a leri èn nanga den rai fu Yehovah” (Ef. 6:4). Na osofamiri na a fosi presi pe pikin e leri fa fu sori lobi nanga lespeki gi trawan. Papa nanga mama di e leri den pikin den sani disi e horibaka gi den sani di Yehovah seti fu meki ala den futuboi fu en de wán. Papa nanga mama musu meki den pikin firi taki den lobi den. Dati meki den musu dwengi  densrefi fu no kisi atibron gaw èn den no musu bari den pikin noso taigi den sani di e hati den. Na a fasi disi den e leri den pikin fu den o prenspari a de fu sori lobi èn fu lespeki trawan. Disi o sreka den pikin fu libi na ini a nyun grontapu fu Gado.

17. San wi abi fanowdu fu man kakafutu gi Didibri?

¹⁷ Wi musu frustan taki ala ten Didibri pruberi fu tapu sma fu dini Gado èn taki a o du ala san a man fu du dati nanga wi tu. Furu sma na ini a grontapu disi e broko trow, den e libi nanga makandra sondro fu trow, èn den feni en bun te tu mansma noso tu umasma e trow nanga makandra. Disi na soifri san Didibri wani den fu du. Ma wi no e luku san grontapusma feni bun èn san den no feni bun. Na presi fu dati wi e libi soleki fa Krestes wani taki wi musu libi (Ef. 4:17-21). Sobun, meki wi ’sorgu taki wi abi ala den sani di Gado gi wi fu feti’ so taki wi man feti nanga Didibri èn den ogri yeye fu en.​—Leisi Efeisesma 6:10-13.

„TAN LOBI MAKANDRA”

18. San na a moro prenspari sani di e meki taki Kresten de wán?

¹⁸ A moro prenspari sani di e meki taki Kresten de wán, na lobi. Wi ati furu nanga lobi gi Yesus Krestes, a „wán Masra” fu wi èn gi Yehovah, a „wán Gado” fu wi. Boiti dati, wi lobi makandra trutru. Dati meki wi wani du muiti ala ten fu ’libi bun nanga makandra èn fu tan abi a wánfasi di wi kisi nanga yepi fu a santa yeye’ (Ef. 4:3-6) Yesus ben taki fu a lobi disi di a ben begi: „Mi no e aksi disi gi den apostel wawan, ma sosrefi gi den wan di e bribi na ini mi fu den sani ede di den apostel taki. Dan den alamala kan de wán, neleki fa yu, mi Tata, de wán nanga mi èn mi de wán nanga yu. Na so den kan de wán nanga wi tu.” A ben taki tu: „Mi meki den kon sabi yu nen èn mi o tan fruteri den fu yu nen, so taki den kan abi a srefi lobi di yu abi gi mi èn mi kan de wán nanga den.”​—Yoh. 17:20, 21, 26.

19. San yu wani du ala ten?

¹⁹ Kande a muilek gi wi fu kenki son maniri di wi abi, ma lobi musu meki taki wi abi a srefi denki leki a psalm skrifiman di ben begi: „Meki mi sori lespeki gi yu nen nanga mi heri ati” (Ps. 86:11). Meki wi du muiti ala ten fu kakafutu gi Didibri te a e pruberi fu prati wi fu wi lobi-ati Papa èn fu wi Kresten brada nanga sisa. Boiti dati, wi wani meki tranga muiti fu ’teki na eksempre fu Gado leki lobi pikin èn fu tan sori lobi gi makandra’ na ini wi osofamiri, na ini wi diniwroko èn na ini a gemeente.​—Ef. 5:1, 2.

[Aksi fu a tori disi]

[Prenki na tapu bladzijde 29]

A e libi en ofrandi na a altari, dan a e go fu meki en bun nanga en brada

[Prenki na tapu bladzijde 31]

Papa nanga mama, leri yu pikin fu sori lespeki gi trawan