Soleki fa Max Lloyd fruteri

Na ini 1955, mi nanga wan tra zendeling ben de na ini Paragwai, na Zuid-Amerika. Wan lati neti, wan grupu ogriman di ben atibron srefisrefi, lontu na oso pe wi ben de. Den ben e bari: „A gado fu wi lobi si brudu èn a wani a brudu fu den trakondre sma.” Na wi ben de den trakondre sma dati. Fa wi du kon na ini a situwâsi disi?

FURU yari pasa, Yehovah bigin leri mi fu du en wani yonguyongu kaba di mi ben e gro kon bigi na ini Australia. Na ini 1938, den Kotoigi gi mi papa a buku Enemies (Feanti). En nanga mi mama no ben e lobi san den kerki fesiman fu a presi drape ben e du. Den man disi ben taki dati son tori na ini Bijbel na anansitori. Pikinmoro wán yari baka dati, mi papa nanga mi mama gi densrefi abra na Yehovah èn den teki dopu. Sensi a ten dati, a wani fu Yehovah ben de a moro prenspari sani gi wi osofamiri. Mi sisa Lesley, di ben owru feifi yari moro mi, dopu baka mi papa nanga mama, èn mi dopu na ini 1940 di mi ben abi neigi yari.

Syatu baka di a Di Fu Tu Grontapufeti bigin, Yehovah Kotoigi no ben abi primisi moro fu druk èn prati den buku fu den na ini Australia. Sobun, yonguyongu kaba mi leri fu gebroiki Bijbel wawan fu sori sma san mi e bribi. Mi ben kon abi a gwenti fu tyari mi Bijbel go na skoro fu sori sma fu san ede mi no e gi a fraga odi noso fu san ede mi no e horibaka gi den sani di den kondre ben e du na ini a feti.​—Eks. 20:4, 5; Mat. 4:10; Yoh. 17:16; 1 Yoh. 5:21.

Furu pikin na skoro no ben wani bumui nanga mi fu di den ben e feni taki mi na „wan Doisri spion”. Na a ten dati den ben e drai felem na skoro. Fosi den bigin drai a felem, ala sma ben musu opo tanapu fu singi a singi fu a kondre. Ala leisi mi ben e tan sidon, ma dan tu noso dri boi ben e hari mi na mi wiwiri fu meki mi opo tanapu. Te fu kaba den yagi mi gowe fu skoro fu di mi ben e hori misrefi na den leri fu Bijbel. Toku mi ben man kisi skoroleri na oso.

MI DU SAN MI BEN WANI DU ALA TEN

Mi ben wani bigin nanga a pionierwroko te mi ben o tapu 14 yari. Sobun, mi ben e firi brokosaka srefisrefi di mi papa nanga mama taigi mi taki mi musu suku wan wroko fosi. Den ben de nomonomo taki mi ben musu pai den fu di mi ben tan na den oso. Ma den pramisi mi taki te mi tapu 18 yari, mi ben kan bigin pionier. Nofo tron wi ben e haritaki fu a moni di mi ben e wroko. Den ben e teki a moni, ma mi ben wani kibri en fu te mi ben o pionier.

Di a ten doro fu bigin pionier, mi papa nanga mama sidon nanga mi èn den fruteri mi taki den ben poti a moni na bangi. Dan den gi mi ala a moni baka so taki mi ben kan bai krosi nanga tra sani di mi ben abi fanowdu fu pionier. Na so den leri mi  fu sorgu gi misrefi èn fu no fruwakti taki tra sma ben musu du dati. Te mi e prakseri disi, dan mi e si taki den leri mi wan prenspari sani trutru.

A pisi ten di mi nanga Lesley ben e gro kon bigi, pionier ben kon tan na wi oso furu tron èn wi ben lobi fu wroko makandra nanga den na ini a preikiwroko. Satra nanga sonde wi ben gwenti preiki oso fu oso, wi ben e du stratiwroko, èn wi ben e studeri Bijbel nanga sma. Na a ten dati, wan gemeente preikiman ben pruberi fu preiki 60 yuru wan mun. Pikinmoro ala ten mi mama ben doro en yuru, èn disi ben de wan heri bun eksempre gi mi nanga Lesley.

MI E GO PIONIER NA TASMANIA

A fosi presi pe mi go dini leki pionier ben de Tasmania, wan èilanti fu Australia. Mi sisa nanga en masra ben e dini drape kaba. Ma syatu baka dati den ben musu go na a di fu 15 klas fu a Gileadskoro. Mi ben de wan sma di ben e syensyen furu èn noiti ete mi ben e libi mi wawan. Son sma ben taki dati mi no ben o tan dri mun drape srefi. Toku, na ini 1950, wán yari baka di mi doro drape, mi kisi a grani fu dini leki grupu-dinari. Now den e kari a grupu-dinari, a fesiman fu a skin fu owruman. Bakaten mi tron spesrutu pionier èn wan tra yongu brada tron mi pionier patna.

Wi ben musu go dini na wan farawe foto pe furu sma ben e suku kopro na ini mijn. Nowan Kotoigi ben e tan na ini a foto dati. Wi doro drape lati neti nanga bus. A fosi neti wi ben e tan na ini wan owru hotel. A tra dei, di wi ben e preiki oso fu oso, wi ben e aksi den sma efu den sabi wan presi pe wi ben kan tan. Na a kaba fu a dei, wan sma taigi wi taki na oso fu a kerki dinari na sei a Presbyter kerki leigi. A taki dati wi ben kan go aksi a fesiman fu a kerki efu wi kan tan drape. A fesiman sori wi switifasi èn a gi wi pasi fu tan drape. Prakseri nomo fa wi ben e firi fu komoto na ini na oso fu a kerki dinari fu go preiki ibri dei!

Furu sma ben e arki a boskopu di wi ben e preiki. Wi ben abi wan tu moi takimakandra èn furu Bijbelstudie. Di den kerki fesiman na a mamafoto kon sabi disi èn di den yere taki Yehovah Kotoigi ben e tan na ini na oso fu a kerki dinari, den taigi a kerki fesiman fu a presi drape fu puru wi wantewante na ini na oso. Na so wi ben de baka sondro tanpe.

A tra dei baka di wi preiki te 12 yuru bakadina, wi go suku wan sribipresi. A moro bun presi di wi ben man feni ben de na den sidonpresi na ini wan stadion. Wi kibri wi bagasi drape, dan wi preiki go doro. A ben kon dungru kaba, ma wi bosroiti fu preiki go doro teleki wi du ala den oso na ini a strati. Na wan fu den oso, wan man taigi wi taki wi kan tan na ini wan pikin oso di abi tu kamra èn di ben de na en bakadyari.

MI DU KRINGWROKO ÈN MI GO NA A GILEADSKORO

Baka di mi dini sowan aiti mun na a presi dati, a bijkantoro fu Australia aksi mi efu mi wani tron kring-opziener. Mi ben fruwondru srefisrefi fu di  mi ben abi 20 yari nomo. Wan tu wiki mi kisi leri fu du a wroko disi, èn baka dati mi bigin go na den gemeente fu gi den deki-ati. Pikinmoro ala sma ben owru moro mi, ma toku den ben e lespeki mi èn den ben e warderi a wroko di mi ben e du.

Mi ben e go na den gemeente na ala sortu fasi. A wan wiki mi go nanga bus, a tra wiki mi go nanga loko, dan mi go nanga wagi. Son leisi wan sma ben e tyari mi nanga wan bromfiets, dan mi ben e hori mi kofru na ini a wán anu èn mi preikiwroko tas na ini a trawan. A ben switi fu tan nanga den brada nanga sisa. Wan grupu-dinari ben de nomonomo taki mi ben musu tan nanga en aladi en oso no ben kaba bow. A wiki dati mi sribi na ini wan sortu langa tobo pe sma e wasi na ini, ma wi ben prisiri srefisrefi fu di wi ben man gi makandra deki-ati!

Na ini 1953 wan tra sani pasa di mi no ben fruwakti. Den seni kari mi fu go na a di fu 22 klas fu a Gileadskoro. Mi ben breiti, ma mi ben frede tu. Fu san ede? We, baka di mi sisa nanga en masra klari a Gileadskoro tapu 30 yuli 1950, den seni den go na Pakistan. Na ini a fosi yari di den ben de drape, Lesley kon siki èn bakaten a dede. Mi ben aksi misrefi fa mi papa nanga mama ben o firi efu den yere taki mi ben o go na wan tra kondre, so syatu baka di mi sisa dede. Ma den taki: „Go dini Yehovah awinsi pe a seni yu go.” Baka dati, mi no si mi papa noiti moro. A dede na ini 1957.

A no langa baka di den seni kari mi, mi ben de na ini wan sipi makandra nanga feifi tra brada nanga sisa fu Australia. A teki siksi wiki fu doro New York City. A heri pisi ten dati wi ben lobi fu leisi èn studeri Bijbel makandra, èn wi ben e preiki gi den tra sma na tapu a sipi. Fosi wi go na a skoro di ben de na South Lansing na ini New York, wi go na a internationaal kongres di ben e hori na Yankee Stadion na ini yuli 1953. Sowan 165.829 sma ben de drape!

A klas fu wi na a Gileadskoro ben abi 120 studenti di ben komoto fu difrenti kondre fu grontapu. Wi no ben sabi pe den ben o seni wi go. Na a lasti dei fu a skoro den fruteri wi disi. Esi-esi wi lon go na a bibliotheek fu a Gileadskoro fu leisi buku di ben e fruteri moro fu den kondre pe den ben seni wi go. Den taigi mi taki mi ben musu go na Paragwai. Na ini den yari di pasa, a pasa furu tron taki difrenti grupu teki a makti abra na ini a kondre dati. Wan neti, syatu baka di mi doro drape, mi yere furu babari. A tra mamanten mi aksi den tra zendeling san pasa. Den lafu, dan den taki: „We, disi na a fosi revo di yu kon miti. Luku go na dorosei.” Ne mi si srudati na tapu ala den uku fu den strati!

WAN SANI DI MI NO O FRIGITI NOITI

Wan leisi mi go nanga a kring-opziener na wan farawe gemeente pe wi ben o drai a felem De Nieuwe-Wereldmaatschappij in actie. Sowan aiti noso neigi yuru langa wi ben de na pasi. Wi go fosi nanga loko, dan wi rèi asi. Baka dati wi go nanga asiwagi èn te fu kaba wi go nanga wan wagi di wan  kaw ben hari. Wi ben tyari wan lichtmotor nanga wan projector fu sori a felem. A dei baka di wi doro, wi go na den burugron na ini a kontren fu gi den sma wan kari fu kon luku a felem a neti dati. Sowan 15 sma kon.

Baka di a felem drai sowan 20 miniti, den taigi wi meki wi go na ini na oso esi-esi. Wi grabu a projector, dan wi lon go na inisei. Ne wi yere wan grupu man e sutu gon aladi den e bari: „A gado fu wi lobi si brudu èn a wani a brudu fu den trakondre sma.” Soso tu trakondre sma ben de drape, èn mi ben de wan fu den! Den sma di ben luku a felem ben du muiti fu tapu den man disi meki den no kon na ini na oso. Ne den man gowe, ma sowan dri yuru musudei mamanten den drai kon baka. Den bigin sutu nanga den gon, èn den pramisi taki den o kisi wi bakaten te wi ben o drai go baka na a foto.

Ne den brada seni kari skowtu. Bakadina wan fu den kon nanga tu asi fu tyari wi go na foto. Di wi ben de na pasi, a skowtu ben e hari en gon ala leisi te wi ben musu pasa wan busibusi noso wan tu bon, dan a ben e rèi na wi fesi fu luku efu ogriman ben e kibri drape. Mi ben frustan taki a ben prenspari fu abi wan asi fu go na difrenti presi. Sobun, mi suku wan gi misrefi bakaten.

MORO ZENDELING KON NA INI A KONDRE

A preikiwroko ben tan go na fesi, aladi den kerki fesiman ben e gens wi doronomo. Na ini 1955 feifi nyun zendeling kon na ini a kondre. Wan fu den ben de wan yongu sisa di ben nen Elsie Swanson. A ben de fu Kanada èn a ben go na a di fu 25 klas fu a Gileadskoro. Wi ala tu ben de na a bijkantoro, ma baka wan pisi ten den seni en fu go preiki na wan tra foto. Ala ten a ben du furu na ini a diniwroko fu Yehovah, aladi a no ben kisi furu yepi fu en papa nanga mama di no teki a tru bribi noiti. Mi nanga Elsie trow tapu 31 december 1957. Wi wawan go tan na ini wan zendeling oso na zuidsei fu Paragwai.

Wi no ben abi watra na ini oso. Wi ben abi fu teki watra na ini wan peti na bakadyari. Dati meki wi no ben abi wan wasi-oso nanga wan toilet na ini na oso. Wi no ben abi wan wasmasyin noso wan ijskasi tu. Sobun, den nyanyan sani di no e tan langa, wi ben bai ibri dei. Wi no ben abi furu, ma wi ben breiti nanga san wi ben abi. Boiti dati, wi ben de bun nanga wi brada nanga sisa na ini a gemeente. Dati meki a pisi ten disi fu wi trowlibi ben switi trutru.

Na ini 1963, mi go luku mi mama na Australia. Syatu baka di wi doro drape, a kisi problema na en  ati. Kande disi pasa nanga en fu di a ben breiti so te fu si en manpikin baka tin yari. A dei di wi ben o drai go baka na Paragwai ben kon moro krosibei èn wi ben musu teki wan fu den moro muilek bosroiti na ini wi libi. Wi ben aksi wisrefi efu wi ben musu drai go baka na Paragwai fu du a zendelingwroko di wi ben lobi sote, èn libi mi mama na ini wan ati-oso aladi wi no ben de seiker efu wan sma ben o luku en. Mi nanga Elsie begi furu fu a tori disi èn te fu kaba wi bosroiti fu tan drape fu sorgu mi mama. Wi ben man tan du a furuten diniwroko aladi wi ben e sorgu mi mama teleki a dede na ini 1966.

A ben de wan bigi grani gi mi taki mi ben kan dini leki kring-opziener nanga distrikt-opziener wan tu yari langa èn taki mi ben kan gi leri na a Kownukondre Diniwroko-skoro gi owruman. Ne wan tra kenki kon na ini wi libi. Mi kisi wan kari fu tron wan memre fu a fosi Bijkantoro Komte fu Australia. Di wi ben o bow wan nyun bijkantoro, den poti mi leki fesiman fu a bow komte. Wi ben kisi yepi fu furu wrokoman di ben sabi bow èn wi ben e wroko bun nanga makandra. Na so wi ben man bow wan moi bijkantoro.

Baka dati den seni mi go wroko na a Dienst Afdeling di e luku a preikiwroko na ini a heri kondre. Mi kisi a grani tu fu go leki zone-opziener na den bijkantoro fu tra kondre fu gi den yepi nanga deki-ati. Na ini son kondre mi kisi deki-ati trutru di mi miti son brada nanga sisa di ben tan furu yari langa na strafu-oso èn na ini strafuman-kampu, fu di den tan gi yesi na Yehovah.

A WROKO DI WI E DU NOW

Na ini 2001 di mi drai kon baka fu den kondre pe mi ben go leki zone-opziener, mi ben weri. Ne mi si taki mi kisi wan brifi. Den brada seni kari mi fu go na Brooklyn, New York, fu tron wan memre fu a nyun Bijkantoro Komte fu Amerkankondre. Mi nanga Elsie begi fu a tori disi èn baka dati wi bosroiti fu go. Now moro leki 11 yari pasa èn wi de na ini Brooklyn ete.

Mi breiti taki mi abi wan wefi di de klariklari fu du iniwan sani di Yehovah wani. Now mi nanga Elsie pasa 80 yari kaba, ma wi gosontu ete. Wi e prisiri te wi e prakseri taki wi man kisi leri fu Yehovah fu têgo. Wi breiti tu nanga den blesi di Yehovah o gi den sma di e tan du a wani fu en.

[Prenspari pisi na tapu bladzijde 19]

A wan wiki mi go nanga bus, a tra wiki mi go nanga loko, dan mi go nanga wagi noso na bakasei fu wan bromfiets, nanga mi kofru na ini a wán anu èn mi preikiwroko tas na ini a trawan

[Prenspari pisi na tapu bladzijde 21]

We prisiri te wi e prakseri taki wi man kisi leri fu Yehovah fu têgo

[Prenki na tapu bladzijde 18]

Na kruktu-anusei: Di mi ben e du kringwroko na Australia

Na reti-anusei: Mi, mi papa nanga mi mama

[Prenki na tapu bladzijde 20]

Wi trowdei tapu 31 december 1957