„MI NO man preiki oso fu oso kwetikweti!” Furu Bijbelstudie taki a sani disi di den kon si taki den musu preiki gi sma di den no sabi. Ma na ini a pisi tori disi, a no wan Bijbelstudie taki a sani disi. A sma di taki a sani disi ben de wan sma di ben sabi hori lezing èn di ben man gi bun Bijbel leri. Den ben e kari den sortu sma disi pelgrim.

Furu sma di ben e leisi a tijdschrift Zion’s Watch Tower èn di ben gowe libi den kerki fu den, ben wani de makandra nanga den sma di ben e angri fu sabi san Bijbel e leri trutru. A tijdschrift disi ben e gi den leisiman deki-ati fu suku sma di ben lobi den tru tori fu Bijbel tu èn fu kon makandra doronomo fu studeri Bijbel. Na ini a yari 1894, a Watch Tower Society bigin seni brada go na difrenti kontren fu kon makandra nanga den grupu di ben seni aksi wan sma fu yepi den. Bakaten den ben kari den brada disi, pelgrim. Den ben e wroko tranga èn den ben abi furu ondrofeni. Den brada disi ben musu abi safri-ati, den ben musu sabi Bijbel bun, den ben musu de bun takiman nanga bun leriman, èn den ben musu bribi trutru na ini a lusu-paiman. Nofo tron te so wan brada ben go na wan fu den grupu, a ben e tan wán noso tu dei èn a ben du furu sani. Den Bijbel Ondrosukuman ben musu prati den papira fu gi sma wan kari fu kon arki wan publikitaki fu wan pelgrim. Gi furu fu den, disi ben de a fosi leisi di den go na ini a preikiwroko. Wan neti Hugo Riemer, di tron wan memre fu a Tiri Skin bakaten, ben hori wan lezing na ini wan skoro èn baka dati a gi piki tapu aksi di sma ben abi fu Bijbel. A du disi te mindrineti. Sobun, a ben weri, ma a ben breiti tu èn a taki dati a konmakandra ben „moi srefisrefi”.

A Watch Tower taki dati a moro prenspari sani fu san ede den pelgrim ben e go na den grupu, ben de fu tranga a bribi fu den sma di ben e kon makandra na ini den oso fu brada nanga sisa. Te wan pelgrim ben kon, dan den Bijbel Ondrosukuman di ben e tan na ini a birti ben kon makandra fu arki a lezing fu en èn fu poti aksi di a ben e piki. Den brada nanga sisa ben e sori en furu switifasi. Di Maude Abbott ben de wan meisje ete, a ben go wan mamanten na wan lezing fu wan pelgrim èn baka dati ala sma go sidon na wan langa tafra na ini a dyari. A taki: „Ala sortu switi nyanyan ben de. Yu ben abi bigi pisi agumeti, baka fowru, ala sortu brede nanga kuku! Ala sma ben e nyan so furu leki den man èn na wan ten fu tu yuru bakadina den ben e kon makandra baka fu arki wan tra lezing. Ma na a ten dati sribi ben e kiri ala sma.” Benjamin Barton di ben de wan pelgrim fu wan langa ten, taki: ’Efu mi ben nyan ala den switi nyanyan di den sma ben e gi mi, dan mi ben o dede langa ten kaba.’ Den sisa ben wani taki den pelgrim nyan bun, sobun den ben e gi den ala sortu switi nyanyan. Ma bakaten den brada fu na edekantoro na Brooklyn seni wan brifi pe den ben gi den sisa a rai taki a ben o moro bun gi ala sma efu den ben o gi den pelgrim „aladei-nyanyan” na presi fu gi den ala sortu kefalek nyanyan. A ben o bun tu efu den ben o meki den brada disi „sribi nofo”.

Den pelgrim ben sabi gi bun leri. Den ben lobi fu gebroiki ala sortu karta nanga tra sani fu meki den lezing fu den kon moro span. R. H. Barber ben „gwenti taki na wan fasi di ben e hari sma prakseri trutru”. W. J. Thorn di ben de leki wan papa gi sma, ben gwenti taki „leki den famiri-edeman fu owruten”. Wan dei di Shield Toutjian ben e rèi na ini wan Model A Ford wagi a bari wantronso: „Stop!” A dyompo komoto na ini a wagi,  a piki wan tu bromki na seipasi, dan a bigin fruteri den tra sma na ini a wagi san den kan leri fu den sani di Yehovah meki.

A pelgrim-wroko no ben makriki, spesrutu gi den wan di no ben de so yongu moro. Ma gi trawan a moro bigi problema ben de taki den ben musu du den wroko wan heri tra fasi now. Den ben musu teki fesi na ini na oso-fu-oso preikiwroko. A Watch Tower fu 15 maart 1924 taki dati „wan fu den moro prenspari wroko” fu tru Kresten „na fu preiki fu a kownukondre. Na a wroko disi den pelgrim ben musu go du.”

Soleki fa a sori, dan son pelgrim no ben lobi a kenki disi. Den tapu nanga a pelgrim-wroko. Trawan di ben e mandi trutru, ben seti den eigi kerkigrupu srefi. Robie D. Adkins e memre taki wan fu den pelgrim di ben de wan heri bun takiman, krutu: „Mi sabi preiki soso te mi de na tapu wan podium. Mi no man preiki oso fu oso kwetikweti!” Brada Adkins taki: „A tra leisi di mi si en, wi ben de na a kongres na ini Columbus, na Ohio, na ini 1924. Noiti mi si wan sma nanga so wan sari fesi. En wawan ben e tanapu na ondro wan bon nanga wan swa fesi na mindri den dusundusun brada nanga sisa di ben de nanga prisiri. Baka dati mi no si en noiti moro. A no langa baka dati a gowe libi na organisâsi.” Ma „furu tra brada nanga sisa ben de nanga prisiri aladi den ben e tyari den buku go na den oto”. A no de fu taki dati den ben de fayafaya fu go preiki oso fu oso.​—Tori 20:20, 21.

Furu fu den pelgrim ben senwe fu du a preikiwroko, neleki den sma di den ben musu leri fu preiki. Toku den ben e du a wroko fu den nanga den heri ati. Pelgrim Maxwell G. Friend (Freschel) di ben e taki Doisritongo, skrifi fu na oso-fu-oso preikiwroko: „Disi na wan fu den sani di e meki a pelgrim-wroko de wan prisiri sani trutru.” A pelgrim John A. Bohnet taki dati furu fu den brada nanga sisa ben breiti taki a Kownukondre preikiwroko ben kon de so wan prenspari sani. A taki dati a moro bigi pisi fu den ben e „teki fesi fayafaya na ini a preikiwroko”.

Na ini den yari di pasa, na organisâsi seni brada go na difrenti presi fu tranga den brada nanga sisa. Norman Larson di de wan Kotoigi bun langa kaba taki: „A no de fu taki dati den pelgrim ben e du furu bun èn den ben de prenspari. Srefi di mi ben de wan pikin boi, mi ben man si dati. Den du furu fu yepi mi fu tan na tapu a reti pasi.” Te na a dei fu tide, brada di lobi Yehovah èn di no e denki densrefi nomo e go na difrenti presi fu tranga den brada nanga sisa, so taki den srefi man taki: „Wi man preiki oso fu oso!”

[Prenspari pisi na tapu bladzijde 32]

A ben de wan prisiri sani te den pelgrim ben kon!

[Prenki na tapu bladzijde 31]

Benjamin Barton skrifi fu sowan 170 presi pe a ben musu go na ini 1905

[Prenki na tapu bladzijde 32]

Walter J. Thorn ben de wan pelgrim di sma ben e kari Pappie fu di den ben lobi en èn a ben de leki wan papa gi den

[Prenki na tapu bladzijde 32]

Den ben seni J. A. Browne leki wan pelgrim go na Yamaika na ini 1902 fu yepi èn tranga 14 pikin grupu

[Prenki na tapu bladzijde 32]

A pelgrim-wroko ben tranga a bribi fu den brada nanga sisa, a ben tyari wánfasi kon, èn den brada nanga sisa ben kan wroko skinskin makandra nanga na organisâsi