Tyari yusrefi leki wan borgu fu a kownukondre!

’Tyari unsrefi na wan fasi di fiti a bun nyunsu.’​—FIL. 1:27.

SAN YU BEN O PIKI?

Suma kan de wan borgu fu Gado Kownukondre?

San wi musu du efu wi wani sabi a tongo, a historia, nanga den wèt fu a Kownukondre?

Fa den borgu fu Gado Kownukondre e sori taki den lobi den wèt fu Gado?

1, 2. Fu san ede a deki-ati di Paulus ben gi a gemeente na ini Filipi ben wani taki wan spesrutu sani?

NA APOSTEL Paulus ben gi a gemeente na ini Filipi a deki-ati fu ’tyari densrefi na wan fasi di fiti a bun nyunsu’. (Leisi Filipisma 1:27.) A Griki wortu di Paulus gebroiki na ini a tekst disi gi den wortu „tyari unsrefi”, wani taki ’tyari unsrefi leki wan borgu fu wan kondre’, noso leki wan sma di lanti e si leki wan kondreman. Den wortu disi ben wani taki wan spesrutu sani gi a gemeente na ini Filipi. Fu san ede? Soleki fa a sori, dan a tirimakti fu Rome ben e si den Filipisma leki Romesma. Den Filipisma ben e meki bigi fu a sani disi ede, fu di den wèt fu Rome ben gi den son reti di furu sma ondro a tiri fu Rome no ben abi.

² Ma moro prenspari sani ben de fu san ede a gemeente na ini Filipi ben kan meki bigi. Paulus ben taigi den salfu Kresten dati taki den ben o tan „na hemel” (Fil. 3:20). Den no ben de borgu fu wan libisma kownukondre nomo, ma den ben de borgu fu Gado Kownukondre tu. Den ben kisi reti nanga blesi di nowan libisma kownukondre ben o man gi den.​—Ef. 2:19-22.

3. (a) Suma kan de wan borgu fu Gado Kownukondre? (b) San wi o luku na ini na artikel disi?

³ Di Paulus gi sma deki-ati fu tyari densrefi leki borgu fu Gado Kownukondre, dan a ben taki nanga den sma di ben o tiri makandra nanga Krestes na ini hemel (Fil. 3:20). Ma a tekst disi abi fu du tu nanga den sma di o libi na grontapu ondro a tiri fu Gado Kownukondre. Fu san ede wi kan taki dati? We, ala dopu Kresten e saka densrefi ondro a srefi Kownu Yehovah èn a e aksi den srefi sani fu den alamala (Ef. 4:4-6). Na ini a ten disi furu sma e du muiti fu tron wan borgu fu wan gudu kondre. Ma a e tyari moro wini kon gi wan sma te a de wan borgu fu Gado Kownukondre. Fu meki wi  frustan fu san ede disi de so, wi o luku san wan sma musu du fu tron wan borgu fu wan kondre, èn san a musu du fu tron wan borgu fu Gado Kownukondre. Baka dati, wi o luku dri sani di wi musu du efu wi wani tan wan borgu fu Gado Kownukondre.

SAN WAN SMA MUSU DU FU TRON WAN BORGU FU WAN KONDRE

4. San na a „soifri tongo” èn o ten wi kan taki dati wi e taki a tongo dati?

⁴ Leri a tongo fu a kondre. Na ini son kondre a de so taki wan sma di wani tron wan borgu musu man taki a tongo fu a kondre. Son leisi a e teki omeni yari fosi wan sma man taki a tongo fu a kondre èn srefi te a de wan borgu fu a kondre kaba, a kan muilek gi en. Kande a e leri esi-esi fa fu skrifi na ini a tongo dati noso fa fu gebroiki den wortu fu a tongo, ma fu man taki a tongo bun kan teki ten. Na so a de tu taki Gado Kownukondre wani taki den borgu fu en e taki a tongo di Bijbel e kari a „soifri tongo”. (Leisi Sefanya 3:9.) San na a „soifri tongo”? Dati na den tru tori di abi fu du nanga Gado èn nanga den sani di a abi na prakseri fu du soleki fa Bijbel e taki. Te wi e gi yesi na den wèt fu Gado èn te wi e libi soleki fa a wani, dan yu kan taki dati wi e taki a soifri tongo. A kan taki son sma no abi furu ten fanowdu fu studeri Bijbel èn teki dopu fu tron wan borgu fu Gado Kownukondre. Ma srefi baka te den dopu, den musu tan du muiti fu taki a „soifri tongo” moro bun. Fa den kan du dati? Ibriwan fu den musu tan meki muiti fu du den sani di den leri na ini Bijbel.

5. Fu san ede wi musu du muiti fu sabi a historia fu Yehovah en organisâsi?

⁵ Sabi a historia fu a kondre. Son leisi wan sma musu sabi a historia fu wan kondre efu a wani tron wan borgu fu a kondre dati. Na so a de tu taki den sma di wani tron borgu fu Gado Kownukondre musu wani sabi ala sani fu a Kownukondre dati. Luku na eksempre fu den manpikin fu Korak di ben e dini na a presi pe sma ben e anbegi Gado na ini owruten Israel. Den ben lobi Yerusalem nanga a presi pe sma ben e anbegi Gado èn den ben lobi fu taki fu a historia fu a foto. Ma a no a moi fu a foto meki den ben lobi en so. Den ben lobi en fu di a ben de „a foto fu a Gran Kownu”, Yehovah. A presi pe sma ben e anbegi Gado na ini Yerusalem ben de a presi pe den ben leri a Wèt fu Yehovah. Den sma di a Kownu fu Yerusalem ben e tiri ben de den sma di Yehovah ben feni bun èn di a ben lobi. (Leisi Psalm 48:1, 2, 9, 12, 13.) Na ini a ten fu wi, Yehovah abi wan organisâsi tu na grontapu. Neleki den manpikin fu Korak, wi musu wani sabi a historia fu Gado pipel èn wi musu fruteri trawan fu dati tu. O moro yu e kon sabi fu na organisâsi fu  Yehovah èn fu a fasi fa a e yepi en pipel, o moro a Kownukondre fu Gado o de wan trutru sani gi yu. Disi o meki taki yu o wani preiki a bun nyunsu fu a Kownukondre nanga moro faya.​—Yer. 9:24; Luk. 4:43.

6. Fu san ede wi kan fruwakti taki Yehovah wani taki wi sabi den wèt fu en èn taki wi e libi soleki fa a wani?

⁶ Sabi den wèt. Den tiriman fu wan kondre e fruwakti taki den borgu sabi den wèt fu a kondre èn taki den e gi yesi na den. Dati meki wi kan frustan taki Yehovah e fruwakti taki ala borgu fu en Kownukondre sabi den wèt fu en èn taki den e libi soleki fa a wani (Yes. 2:3; Yoh. 15:10; 1 Yoh. 5:3). Nofo tron fowtu de na ini den wèt fu libisma èn a no ala ten ala sma e kisi wini fu den. Ma „a wèt fu Yehovah bun dorodoro” (Ps. 19:7). Wi lobi den wèt fu Gado èn wi e leisi a Wortu fu en ibri dei? (Ps. 1:1, 2) A wan-enkri fasi fa wi kan sabi Gado wèt, na te wi srefi e du muiti fu leri en. Nowan tra sma man du disi gi wi.

BORGU FU GADO KOWNUKONDRE LOBI DEN WÈT FU GADO

7. Fu san ede den borgu fu Gado Kownukondre e gi yesi na den wèt fu Gado?

⁷ Efu wi wani tan borgu fu Gado Kownukondre, wi no musu sabi den wèt fu Gado nomo, ma wi musu lobi den tu. Furu borgu e taki dati den e agri nanga den wèt fu a kondre pe den e tan. Ma te den no lobi wan fu den wèt èn te den e denki taki nowan sma e si den, dan den e trangayesi a wèt dati. Nofo tron den sma disi „e suku nomo fu plisi trawan” (Kol. 3:22). Ma den borgu fu Gado Kownukondre no de so. Nanga prisiri den e gi yesi na den wèt fu Gado, srefi te nowan sma e si den. Fu san ede? Fu di den lobi Yehovah, a sma di gi den wèt.​—Yes. 33:22; leisi Lukas 10:27.

8, 9. Fa yu kan sabi efu yu lobi den wèt fu Gado trutru?

⁸ Fa yu kan sabi efu yu lobi den wèt fu Gado trutru? A o de fu si na a fasi fa yu e denki èn na den sani di yu e du. Fu eksempre, prakseri san yu e du te yu e kisi rai. Kande wan sma gi yu rai di abi fu du nanga den krosi fu yu, ma yu feni taki nowan sma kan taigi yu sortu krosi yu musu weri. A kan taki fosi yu kon na ini a tru anbegi, yu ben e weri krosi leki yu no e span nanga noti noso krosi di e poti yu skin na doro. Ma fu di yu kon lobi Gado moro nanga moro, yu leri fu weri krosi di e gi en grani (1 Tim. 2:9, 10; 1 Petr. 3:3, 4). Kande yu feni taki now yu e weri krosi di fiti wan Kresten. Ma efu wan owruman kon taigi yu taki furu sma na ini a gemeente feni taki den krosi di yu e weri no fiti kwetikweti, dan san yu o du? Yu ben o haritaki nanga en? Yu ati ben o bron, noso yu ben o weigri fu kenki? Wan fu den moro prenspari wèt di den borgu fu Gado Kownukondre musu hori, na taki den musu teki na eksempre fu Krestes (1 Petr. 2:21). Paulus ben taki dati „srefi Krestes no ben plisi ensrefi”. Dati meki ibriwan fu wi musu „plisi tra sma nanga bun sani di e gi den deki-ati” (Rom. 15:2, 3). Wan lepi Kresten no o wani du sani di e trobi a konsensi fu trawan, fu di a no wani taki dyugudyugu kon na ini a gemeente.​—Rom. 14:19-21.

⁹ Prakseri tu fa yu e denki fu seks nanga a trowlibi. Den sma di no de borgu fu Gado Kownukondre kan denki taki sani soleki homo-sekslibi, seksbuku noso seksfelem, sutadu nanga brokotrow no fowtu. Ma den borgu fu Gado Kownukondre leri fu prakseri den bakapisi fu den sani di den e du èn sortu krakti dati abi tapu tra sma. Furu fu den ben e du hurudu fosi. Ma now den sabi taki seks nanga a trowlibi na presenti fu Gado. Den kon lobi den wèt fu Yehovah. Den sabi taki den sma di no e gi yesi na den wèt fu Gado di abi fu du nanga seks èn nanga a trowlibi, no kan de borgu fu Gado Kownukondre (1 Kor. 6:9-11). Den sabi tu  taki na ati kan bedrigi sma èn a kan meki sma du sani di no bun (Yer. 17:9). Dati meki den de nanga tangi taki den e kisi krin warskow di kan yepi den fu tan gi yesi na den wèt fu Gado.

BORGU FU GADO KOWNUKONDRE DE NANGA TANGI TAKI DEN E KISI WARSKOW

10, 11. Sortu prenspari warskow Gado Kownukondre e gi wi? Fa yu e si den warskow disi?

¹⁰ Son leisi lanti kan gi warskow taki son nyanyan nanga dresi no bun. A no de fu taki dati a no ala nyanyan noso dresi no bun. Ma efu wan sani no bun, lanti e warskow den sma fu a kondre so taki den no kon siki. Lanti abi a frantwortu fu gi den sortu warskow disi. Na so Gado Kownukondre e gi warskow tu na den borgu fu en. A e warskow wi gi sani di kan meki taki wi trangayesi Gado wèt èn di kan meki taki wi no de mati fu Gado moro. Fu eksempre, furu sma e gebroiki Internet fu taki nanga trawan, fu leri wan sani, noso fu du wan sani di den lobi. Gado organisâsi e gebroiki Internet tu fu du furu bun sani. Ma furu website tapu Internet no bun kwetikweti gi den sma di wani du san reti. Wi alamala sabi taki porno website noso website di e sori seks fowtow noso seksfelem no bun kwetikweti. Furu yari kaba Gado organisâsi warskow wi fu no go na den sortu website disi. Wi de nanga tangi trutru taki wi e kisi den sortu warskow disi!

¹¹ Na ini a ten disi, furu sma lobi go na website soleki Facebook pe den kan taki nanga makandra noso pe den kan poti sani soleki fowtow fu ala sma kan si. Den website disi no fowtu. Ma toku wi musu luku bun nanga den fu di den kan tyari takru bakapisi gi wi. Na den website disi yu kan miti ala sortu sma èn sonwan fu den sma dati no de bun mati kwetikweti (1 Kor. 15:33). Dati meki Gado organisâsi gi warskow di kan yepi wi fu abi a yoisti denki fu den sortu website disi. Yu leisi ala den nyun sani di Gado organisâsi skrifi fu a fasi fa wi kan gebroiki den sortu website disi? Wan cellulair kan de wan bun sani. Ma yu leisi san Gado organisâsi skrifi fu a fasi fa wi kan gebroiki den? A no ben o de wan koni sani fu no leisi den sani disi! * A ben o de neleki yu e dringi wan hebi dresi sondro fu leisi fa yu musu gebroiki en.

12. Fu san ede a de wan don sani fu no poti prakseri na warskow?

¹² Den sma di no e poti prakseri na den warskow fu Gado organisâsi e tyari takru bakapisi kon gi densrefi èn gi den lobiwan fu den. Son sma di kon abi a gwenti fu luku seksbuku noso seksfelem èn son sma di du hurudu, e kori densrefi fu di den e denki taki Yehovah no e si san den e du. Ma a de wan don sani fu denki taki wi kan kibri sani gi Yehovah! (Odo 15:3; leisi Hebrewsma 4:13.) Den tiriman fu wan kondre no o meki wan sma tan wan borgu efu a sma du son ogri. Na so a de tu taki Yehovah no o gi pasi taki wan sma tan wan borgu fu en Kownukondre efu a sma tan trangayesi den wèt fu en (1 Kor. 5:11-13). * Ma toku Yehovah abi sari-ati èn a e gebroiki den owruman fu yepi den sortu sma disi (Gal. 6:1). Den sma di abi berow èn di e tapu nanga a sondu di den e du, kan tron mati fu Yehovah baka èn den kan tan borgu fu en Kownukondre  (2 Kor. 2:5-8). A de wan bigi grani fu dini so wan lobi-ati Kownu!

BORGU FU GADO KOWNUKONDRE LOBI TEKI LERI

13. Fa den borgu fu a Kownukondre e sori taki den lobi teki leri?

¹³ Furu kondre e du furu muiti fu gi den borgu leri. Den e meki skoro pe den sma kan kisi leri. Borgu fu a Kownukondre breiti taki den skoro disi de. Dati meki den e du muiti fu leri leisi nanga skrifi èn fu leri tra sani di den abi fanowdu fu feni wroko bakaten. Ma a leri di Yehovah e gi, de moro prenspari gi den. Fu eksempre, Yehovah en organisâsi e gi wi deki-ati fu leri leisi. Papa nanga mama e kisi a deki-ati fu leisi nanga den yongu pikin fu den. Ibri mun na organisâsi e tyari A Waktitoren nanga na Ontwaakt! kon na doro di e taki fu Bijbel tori. Na ini Sranantongo wi e kisi tu sortu Waktitoren èn efu yu e leisi wan tu bladzijde ibri dei, dan yu o man leisi den ala tu na ini wán mun. Na so yu kan kisi leri fu Yehovah doronomo.

14. (a) Sortu leri wi e kisi? (b) Sortu rai di abi fu du nanga na Osofamiri Anbegi yu gebroiki kaba?

¹⁴ Ibri wiki den borgu fu a Kownukondre e kisi leri na den gemeente konmakandra. Fu eksempre, moro leki 60 yari kaba sma e kisi leri na a Theokrasia Diniwroko-skoro. Den wan di de na a skoro e leri fu de bun preikiman fu Gado Wortu. Yu de na a skoro disi? No so langa pasa Gado organisâsi sori wi o prenspari a de fu hori na Osofamiri Anbegi ibri wiki. A seti disi e yepi den osofamiri fu lobi makandra moro. Wi kisi furu rai di abi fu du nanga na Osofamiri Anbegi. Yu gebroiki den rai dati kaba? *

15. San na wan fu den moro bigi grani di wi abi?

¹⁵ Furu borgu e pruberi fu meki sma tron wan memre fu wan politiek partij. Sonwan fu den e go na sma oso srefi fu taki nanga den fu a tori disi. Na heri grontapu den borgu fu Gado Kownukondre e sori tu taki den e horibaka gi a Kownukondre disi, fu di den e preiki gi sma na strati èn den e go na den oso fu taki nanga den. Fu eksempre, A Waktitoren skrifi fu meki sma sabi moro fu Yehovah Kownukondre. Soleki fa wi ben taki kaba na ini a fosi studie-artikel, A Waktitoren e prati moro leki iniwan tra tijdschrift na grontapu now! Wan fu den moro bigi grani di wi abi, na fu fruteri sma fu Gado Kownukondre. Yu na wan fayafaya preikiman fu Gado Kownukondre?​—Mat. 28:19, 20.

16. Fa yu kan sori taki yu na wan bun borgu fu Gado Kownukondre?

¹⁶ Heri esi, na Gado Kownukondre wawan o tiri heri grontapu. Libisma o abi fu hori densrefi soso na den wèt fu a Kownukondre dati. Yu o de wan bun borgu fu Gado Kownukondre na a ten dati? Now na a ten fu sori taki yu wani de so wan sma. Na ini ala den bosroiti di yu e teki ibri dei, yu musu sori taki yu e du ala sani fu gi Yehovah glori. Na so yu o sori taki yu e tyari yusrefi leki wan bun borgu fu Gado Kownukondre.​—1 Kor. 10:31.

[Futuwortu]

[Aksi fu a tori disi]

[Prenspari pisi na tapu bladzijde 14]

Yu e poti prakseri na den warskow di Gado organisâsi gi fu Internet?

[Prenki na tapu bladzijde 12]

Yu de leki den manpikin fu Korak di ben lobi a tru anbegi nanga a historia fu a pipel fu Yehovah?

[Prenki na tapu bladzijde 15]

Na Osofamiri Anbegi kan yepi yu nanga yu osofamiri fu tron bun borgu fu Gado Kownukondre