Yu e memre disi ete?

Yu man memre san yu leisi na ini den Waktitoren di kon na doro no so langa pasa? Luku efu yu kan gi piki tapu den aksi di e kon now:

A tru taki a wiwiri fu Simson meki taki a ben tranga so?

A no a wiwiri fu Simson meki taki a ben tranga so. A langa wiwiri fu en ben e sori taki a ben de wan Nasireisma di ben e dini Yehovah na wan spesrutu fasi. Di Delaila meki den koti en wiwiri puru, dan disi ben abi krakti tapu a fasi fa a ben e dini Gado.​—15/4, bladzijde 9.

San na dri prenspari sani di kan meki na agersi ati fu wi tan gosontu?

(1) Nyanyan. Efu wi wani hori wi trutru ati gosontu, dan wi musu nyan gosontu nyanyan. Na so a de tu taki wi agersi ati gosontu te wi e du sani di e tranga a bribi fu wi. (2) Oefen a skin. Efu wi wani tan abi wan gosontu ati, dan wi musu oefen a skin. Na so a de tu taki wi agersi ati o tan gosontu te wi e preiki fayafaya. (3) Sma na wi lontu. Te wi de nanga wi Kresten brada nanga sisa di e broko den ede nanga wi trutru, dan wi o firi korostu èn dati bun gi wi agersi ati tu.​—15/4, bladzijde 16.

Efu wan trowpatna du sutadu, dan san a trowpaar kan du fu frutrow makandra baka?

Den musu (1) taki krin nanga makandra; (2) wroko makandra; (3) libi owru gwenti èn teki nyunwan; (4) du muiti fu no hori makandra na ati èn pruberi fu kon bun baka nanga makandra.​—1/5, bladzijde 12-15.

Fu san ede a no fiti fu taki na ini wan beri-lezing dati Psalm 116:15 abi fu du nanga a sma di dede?

A tekst disi e taki: „Yehovah e si a dede fu den sma di tai hori na en, leki wan seryusu sani.” A heri grupu fu sma di e tai hori na Yehovah, prenspari gi en. Sobun, a tekst disi e sori taki Gado e si a dede fu a heri grupu disi leki wan seryusu sani. A no o gi pasi taki sma figi ala den tru anbegiman fu en puru na grontapu.​—15/5, bladzijde 22.

Suma ben de den kolporteur?

Fosi 1931, den ben e gebroiki a nen „kolporteur” gi den sma di wi e kari „pionier” na ini a ten disi.​—15/5, bladzijde 31.

San e sori taki Bijbel no de leki iniwan tra buku di libisma skrifi?

Bijbel abi bun furu profeititori di kon tru. A no e taki fu anansitori, ma fu tori di pasa trutru na ini owruten. Den buku fu Bijbel e kruderi soifri nanga sabidensi èn nanga makandra. A e gi bun rai di wi kan gebroiki na ini a ten disi.​—1/6, bladzijde 4-8.

Suma na „ala den kownukondre disi” di Danièl 2:44 e taki fu den?

A profeititori disi e taki fu den difrenti kownukondre di de wan pisi fu a bun bigi popki di Danièl e taki fu en.​—15/6, bladzijde 17.

O ten na Anglo-Amerkan grontapumakti kon de a di fu seibi grontapumakti di Bijbel e taki fu en?

Di Ingrisikondre nanga Amerkankondre bigin wroko skinskin nanga makandra na ini a Fosi Grontapufeti, den tron a di fu seibi grontapumakti.​—15/6, bladzijde 19.

Te sma abi berow fu den sondu fu den, dan Gado e gi den pardon èn a e frigiti den sondu fu den. Fa so?

Yehovah e pramisi den wan di a lobi: „Mi no o memre den sondu fu den moro” (Yer. 31:34). A lusu-paiman e meki taki Gado kan gi wi pardon. Te a e gi wi pardon, dan a e frigiti den sondu fu wi. Dati wani taki dati a no e poti prakseri moro na den sondu fu wi èn a no o krutu wi, noso strafu wi fu den sondu disi moro.​—1/7, bladzijde 18.

Fu san ede wi kan bribi den wondru di skrifi na ini Bijbel?

Furu wondru pasa na presi pe furu sma ben de. Den no pasa kibrikibri. Den sma di ben du wondru, no ben abi spesrutu wrokosani èn den no ben kon nanga wan lo pranpran. Den no ben du wondru fu kisi biginen, ma den du dati fu meki Gado kisi glori. Sma du difrenti sortu wondru èn gensman di ben si den wondru no ben tweifri taki den pasa trutru. Dati meki wi kan bribi taki den wondru di skrifi na ini Bijbel pasa trutru.​—1/8, bladzijde 7, 8.