WAN TU yari pasa, Rúbia (1), wan sisa di abi 30 yari now, ben go luku Sandra (2) di de wan pionier na ini wan pikin gemeente na a zuidsei fu Brasyonkondre. Di Rúbia ben de drape, wan sani pasa di ben abi so wan krakti na en tapu, taki a kenki en heri libi. San pasa? Meki Rúbia srefi fruteri san pasa.

„Sandra ben tyari mi go na wan uma di a ben e studeri Bijbel nanga en. Di wi ben e studeri, na uma taki: ’Sandra, dri uma na mi wrokope wani studeri Bijbel tu, ma mi taigi den taki den o abi fu wakti. Mi sabi taki a heri yari disi yu no man teki moro Bijbelstudie.’ Mi no ben man bribi! Sma di ben wani leri sabi Yehovah ben abi fu wakti fu di nofo sma no ben de fu studeri Bijbel nanga den.  Na ini a kontren pe mi gemeente e preiki, mi no ben man feni wán Bijbelstudie srefi. Na a srefi momenti dati, di mi ben de na ini na oso fu a Bijbelstudie, mi bigin angri fu yepi den sma na ini a pikin foto dati. A no langa baka dati, mi libi a bigi foto pe mi ben e tan, dan mi froisi go na a pikin foto pe Sandra ben e pionier.”

Fa sani de now nanga Rúbia? A e taki: „Tu mun baka di mi froisi, mi ben abi 15 Bijbelstudie. Èn yu no o wani bribi disi: A no teki langa fosi mi srefi ben abi fu meki sma wakti fu studeri Bijbel, neleki fa Sandra ben musu du dati!”

Diego (3), wan brada di abi sowan 22 yari now, ben go luku wan tu brada di ben e pionier na ini Prudentópolis, wan pikin foto na a zuidsei fu Brasyonkondre. Di a go drape, a bigin prakseri fa a ben e du a diniwroko fu en. A taki: „Na ini mi gemeente, mi ben gwenti wroko wan tu yuru nomo na ini a preikiwroko ibri mun. Ma di mi go luku den pionier dati èn mi ben e arki den ondrofenitori fu den, mi si krin taki den ben abi moro prisiri na ini a preikiwroko leki mi. Di mi si taki den ben de koloku èn taki den ben e prisiri so, mi ben e winsi taki mi ben abi so wan libi tu.” Di Diego gowe fu drape, en srefi bigin pionier.

Yu na wan yongu Kotoigi di e firi leki fa Diego ben e firi fosi? Kande yu e go na ini a preikiwroko èn yu e go na den konmakandra, ma na a srefi ten yu e firi leki yu no abi so furu prisiri na ini a preikiwroko. Efu dati de so, dan kande yu kan tyari kenki kon na ini yu libi, so taki yu srefi kan si o furu prisiri wan sma e kisi te a e go dini pe moro preikiman de fanowdu. A no de fu taki dati yu e frede kande fu go libi na wan presi pe yu no o abi so furu sani. Ma toku furu yonguwan bosroiti fu du dati. Den kenki den denki èn den ben abi a deki-ati fu kenki den libi, so taki den kan du moro na ini a diniwroko fu Yehovah. Luku na eksempre fu Bruno.

Wan tu yari pasa, Bruno (4) di abi 28 yari now, ben e studeri na wan pôpi skoro pe sma e leri prei poku. A ben wani tron wan sma di e tiri wan heri grupu pokuman.  Fu taki en leti, a ben leri so bun, taki den ben aksi en fu tiri wan bigi grupu pokuman na wan show. Soleki fa a sori, dan a ben o meki en leki pokuman. Ma Bruno taki: „Toku mi ben e firi leki mi ben e misi wan sani na ini mi libi. Mi gi misrefi abra na Yehovah, ma mi ben sabi taki mi no ben e du ala san mi ben man du gi en, èn a sani dati ben e trobi mi. Mi taigi Yehovah fa mi ben e firi, èn mi ben taki tu nanga lepi brada na ini a gemeente fu a tori disi. Baka di mi go denki seryusu fu a tori disi, mi bosroiti taki mi diniwroko musu de moro prenspari gi mi leki poku. Sobun, mi gowe libi a skoro pe mi ben e leri prei poku, èn mi go dini na wan presi pe Kownukondre preikiman ben de fanowdu trutru.” Fa sani waka gi Bruno?

Bruno froisi go na a foto Guapiara di de sowan 260 kilometer fu a foto São Paulo èn sowan 7000 sma e tan drape. Disi ben de wan bigi kenki gi en. A taki: „Mi go tan na ini wan pikin oso sondro ijskasi, telefisi, nanga Internet. Ma na oso ben abi tra sani di mi no ben abi noiti ete. A ben abi wan dyari pe gruntu nanga froktu ben e gro!” Na ini Guapiara, Bruno e dini na ini wan pikin gemeente. Wán leisi wan wiki a e poti nyanyan, watra, nanga wan tu buku na ini en tas, dan a e teki en bromfiets èn a e rèi go preiki na den boitipresi. Furu sma na ini a kontren dati no yere a bun nyunsu noiti ete. Bruno taki: „Mi ben abi 18 Bijbelstudie. Te mi e si fa den Bijbelstudie e tyari kenki kon na ini den libi, dan mi e prisiri srefisrefi!” A taki tu: „Now mi e si taki a sani di mi ben e misi na ini mi libi, na a trutru koloku firi di wan sma e kisi te a e poti Kownukondre afersi na a fosi presi na ini en libi. Noiti mi ben o firi so koloku efu mi ben tron wan bigi pokuman.” Sortu wroko Bruno e du na ini Guapiara fu man sorgu ensrefi? A lafu di a piki: „We, mi e leri sma fu prei gitara.” Sobun, yu kan taki dati te now ete a de wan pokuman.

A srefi sortu sani di pasa nanga Bruno, pasa nanga Mariana (5) di pasa 25 yari now. A ben e wroko leki wan afkati èn a ben e meki furu moni, ma toku a no ben de koloku trutru. A taki: „Mi ben e firi leki ’na winti mi ben e feti fu fanga’” (Preik. 1:17). Furu  brada nanga sisa ben gi en deki-ati fu tron pionier. Baka di Mariana prakseri fu a tori disi, a bosroiti fu go na wan gemeente di ben abi yepi fanowdu. Makandra nanga den mati fu en Bianca (6), Caroline (7), nanga Juliana (8), a go na wan gemeente na ini a foto Barra do Bugres, krosibei fu Bolifia. A foto disi de dusundusun kilometer moro fara fu a presi pe den ben e tan èn tra foto no de na ini a birti. San pasa di den doro drape?

Mariana taki: „Mi ben abi na prakseri fu tan drape dri mun. Ma di a ten doro fu drai go baka, mi ben abi 15 Bijbelstudie! A no de fu taki dati den Bijbelstudie dati ben abi yepi fanowdu ete fu go na fesi na ini a tru anbegi. Mi no ben abi na ati fu taigi den taki mi ben o gowe, sobun mi ben musu fu tan.” Na dati ala den fo sisa du. Now Mariana feni taki a e du wan moro bun sani nanga en libi. A taki: „Mi e firi prisiri taki Yehovah e gebroiki mi fu yepi sma, so taki den kan kisi wan moro bun libi. Mi e si en leki wan blesi taki mi kan gebroiki mi ten nanga krakti fu du wan sani di prenspari trutru.” Caroline taki wan sani di e sori fa ala den fo sisa e firi. A taki: „Te mi e go didon na neti, mi e firi so koloku, fu di mi du ala san mi man fu horibaka gi a Kownukondre. A moro prenspari sani na ini mi libi now, na fu yepi den Bijbelstudie fu mi. A moi srefisrefi fu si fa den e go na fesi. Now mi srefi si taki den wortu disi tru: ’Tesi èn si taki Yehovah bun.’”​—Ps. 34:8.

Yehovah musu fu breiti trutru fu si fa moro nanga moro yongu brada nanga sisa na heri grontapu de „klariklari fu go” preiki a bun nyunsu fu en Kownukondre na farawe presi! (Ps. 110:3; Odo 27:11) Ala den preikiman disi e kisi furu blesi fu Yehovah.​—Odo 10:22.