„A WORTU fu Gado de na libi. A abi krakti” (Hebr. 4:12). Nanga den wortu disi na apostel Paulus sori taki Gado wortu man naki sma ati èn taki a abi a krakti fu kenki sma libi.

Baka di den apostel dede, furu sma fadon komoto na bribi. A sani disi meki taki sma bigin bribi taki Bijbel abi tra sortu krakti tu (2 Petr. 2:1-3). Bakaten kerki fesiman bigin taki dati sma kan gebroiki Bijbel fu du wondru. Professor Harry Y. Gamble skrifi taki baka a yari 200 a Kerki Tata Origenes ben taki dati na yere sma ben musu yere den santa wortu fu Bijbel nomo, dan den ben kan kisi yepi kaba. Origenes ben feni taki efu den sani di sma e taki te den e bonu abi krakti, dan wortu di e kon fu Gado musu abi moro krakti srefi. John Chrysostom di ben e libi sowan 400 yari baka di Krestes gebore, ben skrifi taki Didibri no ben o kon kwetikweti na wan oso pe wan Bijbel de. A taki tu dati son sma ben abi a gwenti fu skrifi Bijbel vers di e taki fu Yesus na tapu wan pisi papira, dan ben e anga dati na den neki leki wan tapu. Professor Gamble taki dati a Lomsu kerki leriman Augustinus ben e leri sma di abi ede-ati taki te den ben go sribi, den ben kan poti a Bijbel buku Yohanes na ondro den kunsu. Disi ben o puru na ede-ati fu den. Fu di den man disi ben kon nanga den sortu leri disi, meki furu sma bigin gebroiki Bijbel leki wan buku fu du wondru. Fa a de nanga yu? Yu e gebroiki Bijbel fu tyari koloku kon gi yusrefi èn fu kibri yusrefi gi ogri?

Furu sma e gebroiki Bijbel na wan tra fasi di no bun. Den sma disi e bribi taki te den opo Bijbel na iniwan presi, dan a fosi tekst di den si o sori den san den musu du. Fu eksempre, Professor Gamble taki dati wan leisi Augustinus yere wan pikin di ben de na ini wan oso krosibei fu en, e taki: „Teki en, dan yu leisi. Teki en, dan yu leisi.” Augustinus ben bribi taki na a fasi disi Gado ben wani sori en taki a ben musu opo en Bijbel èn leisi a fosi tekst di a si.

Kande yu yere kaba taki sma e begi Gado fu yepi den nanga wan problema èn taki den opo Bijbel fu di den bribi taki a vers di den opo, o yepi den. A no de fu taki dati a bun te sma wani suku yepi na ini Bijbel. Ma disi a no a fasi fa wan Kresten musu du dati.

Yesus ben taigi den disipel fu en taki a ben o seni „a yepiman, sobun a santa yeye” gi den. A ben taki tu dati a santa yeye ben ’o leri den ala sani èn a ben o meki den memre ala den sani di a taigi den’ (Yoh. 14:26). Sobun, a no te wi opo iniwan tekst wi kan kisi yepi fu Bijbel. Wi kan kisi yepi te wi e du san wi leri fu Bijbel.

Furu sma e gebroiki Bijbel fu bonu. Den e gebroiki en fu kibri densrefi gi ogri, fu lusu den problema fu den, noso fu yepi den fu sabi san o pasa na ini a ten di e kon. Ma Bijbel e taki dati bonu no bun srefisrefi (Lef. 19:26; Deut. 18:9-12; Tori 19:19). A tru taki a Wortu fu Gado de na libi èn taki a abi krakti, ma wi musu gebroiki en na a yoisti fasi. Bijbel no o yepi wi na wan wondru fasi. Wi o man kisi wan moro bun libi, soso te wi e studeri Bijbel. Soifri sabi fu Bijbel yepi furu sma fu sabi san bun èn san no bun. A yepi den tu fu tapu nanga takru gwenti, fu abi wan koloku osofamiri-libi èn fu tron wan mati fu a Skrifiman fu Bijbel.