„NOITI moro wi o frigiti a sani disi!” Dati na san furu sma taki, baka di den si a felem di nen „Scheppingsdrama”. A ben kon na a yoisti ten èn noiti moro den ben o man frigiti san den si. Fu tru, a felem ben gi Yehovah glori, fu di furu sma kon yere a boskopu fu en. Syatu baka dati a tirimakti fu Hitler bigin frufolgu a pipel fu Gado na ini Europa. Ma san na a „Scheppingsdrama”?

Na ini 1914 na edekantoro fu a pipel fu Yehovah na ini Brooklyn, New York, Amerkankondre, tyari wan felem kon na doro di den ben kari „Photo-Drama der Schepping”. A ben langa 8 yuru. Den ben meki en nanga prenki èn nanga wan lo syatu pisi felem. A ben de na ini kloru èn yu ben kan yere poku nanga sma sten. Milyunmilyun sma na heri grontapu si a „Photo-Drama” disi. Na ini 1914 den tyari wan moro syatuwan fu en kon na doro tu èn den kari en „Eureka Drama”. Ma na ini den yari baka 1920 den fowtow, den felem-lolo, nanga den sani di den ben e gebroiki fu drai a felem ben kon owru so te, taki den no ben e wroko so bun moro. Toku sma ben wani si a „Photo-Drama” ete wan leisi. Sma fu Ludwigsburg, na ini Doisrikondre, ben aksi: „O ten unu o sori a ’Photo-Drama’ baka?” San den brada ben kan du gi den?

Fu di so furu sma ben wani si a „Photo-Drama”, meki na ini den yari baka 1920, sma fu a Betelfamiri na Maagdenburg, Doisrikondre, go na wan kantoro na Parijs, Fransikondre, di e tyari nyunsu kon na doro. Drape den bai difrenti felem gi a „Photo-Drama”. Den go na Leipzig nanga Dresden tu fu bai prenki na den presi pe sma ben e meki den fu seri. Ne den poti ala den sani disi kon na wán, makandra nanga wan tu bun prenki fu na owru „Photo-Drama”.

Brada Erich Frost, wan kefalek bun pokuman, skrifi poku gi a felem disi. Wan fruteriman ben e tyari kon na krin gi den sma san den ben e si na ini a felem. Wan tu fu den sani di a ben e taki, ben teki puru fu a buku di nen Schepping (Sani di Gado meki). Fu dati ede den kari a nyun felem disi, „Scheppingsdrama”.

A ben langa 8 yuru neleki a „Photo-Drama”. Dati meki sma ben musu kon wan tu neti baka makandra fu kan si den difrenti pisi fu a felem. Na wan tumusi moi fasi a ben sori san na den difrenti sani di Gado du na den dei di a meki hemel nanga grontapu. A ben poti prakseri tu na a historia di skrifi na ini Bijbel èn na ini historia buku. Boiti dati, a ben e sori tu taki falsi bribi no ben man yepi libisma. Den sori a felem disi na Doisrikondre, Luxemburg, Oostenrijk, Switserland èn na tra presi pe sma ben e taki Doisritongo.

Erich Frost taki, dati te den ben e sori a felem, dan a ben e gi den sma di ben e wroko nanga en, spesrutu den tra pokuman, deki-ati  fu waka lontu na ini a pauze fu gi ala den sma drape den buku noso den brochure fu wi. A taki: „Na a fasi disi wi prati moro buku leki san wi ben o man prati te wi ben e go oso fu oso.” Johannes Rauthe, di ben e orga sani fu sori a felem na ini Polen èn na ini a kondre di sma e kari Tyekia Republiek now, e memre ete taki furu sma ben e taigi den Kotoigi pe den ben e tan, so taki den ben kan kon na den oso. Na so den ben man go baka na wan lo sma fu taki nanga den fu Bijbel tori.

Na ini den yari baka 1930, so furu sma ben e kon luku a felem taki ibri tron baka a presi ben span èn ala sma ben e taki fu Yehovah Kotoigi. Na ini 1933, pikinmoro wán milyun sma ben kon na den konmakandra di a bijkantoro fu Doisrikondre ben orga fu sori sma a felem disi. Käthe Krauss e taki: „Fu kan si a felem na ala den feifi dei, dan wi ben musu waka 10 kilometer go èn 10 kilometer kon. Wi ben e waka na ini busi, abra bergi èn na ini lagipresi.” Else Billharz e taki: „A ’Scheppingsdrama’ yepi mi fu kon lobi a tru leri fu Bijbel.”

Alfred Almendinger e taki dati baka di en mama si a felem a ben lobi en so te, taki a go bai wan Bijbel. Ne a go suku pe na ini Bijbel skrifi taki dedesma e go na wan presi pe wan faya e bron den fu krin den, fosi den go na hemel. Di en mama si taki Bijbel no e taki fu a sani dati kwetikweti, dan a gowe libi a kerki fu en èn a teki dopu leki wan Kotoigi. „Furu sma teki a tru leri di den si a ’Scheppingsdrama’”, na so Erich Frost taki.

Ma na a ten di bun furu sma ben si a „Scheppingsdrama” kaba, den sma fu a Nazi partèi ben kon abi furu bakaman na ini Europa. Dati meki den tapu a wroko fu den Kotoigi na Doisrikondre na ini 1933. Sensi a ten dati te go miti a kaba fu a Di Fu Tu Grontapufeti na ini 1945, den futuboi fu Yehovah na ini Europa kisi hebi frufolgu. Aiti yari langa den sroto Erich Frost. Ma a libi pasa a ten dati èn te fu kaba a go wroko na a Betel-oso na Wiesbaden, na ini Doisrikondre. A bun taki a felem disi di furu sma no ben man frigiti, kon na a yoisti ten. A gi furu Kresten deki-ati so taki den ben man pasa den tesi di ben o miti den na a ten fu a Di Fu Tu Grontapufeti.—Fu a historia fu wi na ini Doisrikondre.