1, 2. (a) Fa den kerki fu a Kresten bribi e si a nen fu Gado? (b) Ma fa Yehovah Kotoigi e si a nen fu Gado?

FURU kerki fu Krestenhèit no wani gebroiki a nen fu Gado. Fu eksempre, na fesisei fu wan Bijbel skrifi taki „a no fiti srefisrefi” taki den kerki fu a Kresten bribi gebroiki wan nen gi Gado (Revised Standard Version).

² Ma Yehovah Kotoigi e si en leki wan grani fu tyari Gado nen èn fu gi a nen fu en glori. (Leisi Psalm 86:12; Yesaya 43:10.) Boiti dati, wi e si en leki wan grani fu frustan san a nen dati wani taki èn fu sabi o prenspari a de taki en nen musu de santa (Mat. 6:9). Ma wi no musu si a grani disi leki wan pikin sani. Sobun, meki wi luku den dri prenspari aksi disi: San a wani taki fu sabi a nen fu Gado? Fa Yehovah sori taki a warti fu tyari a bigi nen di a abi? Fa wi kan tyari wisrefi na wan fasi di e gi Yehovah glori?

3. San a wani taki fu sabi a nen fu Gado?

³ Fu sabi Gado nen wani taki moro leki fu sabi nomo taki en nen na Yehovah. A wani taki tu dati wi sabi sortu Gado Yehovah de. Sobun, wi musu sabi den fasi fu en, wi musu sabi san a abi na prakseri fu du èn a fasi fa a e du sani, spesrutu den sani di a du gi en pipel. Na ini a pisi ten di Yehovah du san a ben abi na prakseri, a tyari kon na krin safrisafri sortu Gado a de (Odo 4:18). Wi sabi taki Yehovah ben taigi Adam nanga Eva fa a nen, bika Eva ben kari en nen di a meki Kain (Gen. 4:1). Gado en futuboi Noa, Abraham, Isak, nanga Yakob ben sabi en nen tu. Boiti dati, den ben kon sabi Gado moro bun di a ben e blesi den, di a ben e sorgu gi den èn di a sori den san a ben o du. Bakaten Gado sori Moses wan prenspari sani di abi fu du nanga a nen fu en.

4. (a) Fu san ede Moses aksi Gado fa a nen? (b) Fu san ede a ben wani sori den Israelsma taki Gado ben o man frulusu den trutru?

 ⁴ Leisi Eksodes 3:10-15. Di Moses ben abi 80 yari, Gado taigi en fu du wan prenspari sani: „Yu musu tyari mi pipel, den Israelsma, komoto fu Egepte.” Na wan lespeki fasi Moses aksi en a prenspari sani disi: ’Efu den Israelsma aksi mi san na yu nen, dan san mi musu taigi den?’ Langa ten kaba, Gado pipel ben sabi en nen. Sobun, fu san ede Moses aksi a sani disi? A ben wani sabi moro bun sortu Gado Yehovah de. Moses ben wani sori den Israelsma krin taki Gado ben o frulusu den trutru. Wi kan frustan fu san ede a ben wani du dati. Den Israelsma ben de srafu furu yari langa kaba èn kande den ben e tweifri efu Yehovah ben o man yepi den. Son Israelsma ben e anbegi den gado fu Egepte srefi!—Esek. 20:7, 8.

5. San Yehovah fruteri Moses fu en nen?

⁵ San Yehovah piki Moses? A taigi Moses fu taigi den Israelsma: „Disi na san yu musu taigi den Israelsma: ’MI SA TRON SAN MI WANI TRON seni mi kon na unu.’” * A ben musu taki tu: „Yehovah, a Gado fu den afo fu unu . . . seni mi kon na unu.” Nanga den wortu disi Gado ben taki wan prenspari sani fu ensrefi. A ben sori taki a o tron iniwan sani di a musu tron èn a o du iniwan sani fu meki den pramisi fu en kon tru. Sosrefi, a de wan Gado di e du ala ten san a pramisi. Fu dati ede Yehovah srefi taki na ini vers 15: „Disi na mi nen fu ala ten, èn disi na fa sma o memre mi fu têgo.” A musu de so taki den wortu disi ben abi furu krakti tapu Moses, èn dati ben tranga a bribi fu en!

6, 7. Fa Yehovah du san a pramisi?

⁶ Syatu baka di Yehovah ben taki nanga Moses, a du san a pramisi èn a fri den Israelsma. A ben strafu den Egeptesma nanga tin rampu èn a sori taki Farao nanga den gado fu Egepte no abi nowan makti (Eks. 12:12). Baka dati Yehovah prati a Redi Se na tu so taki den Israelsma ben kan waka pasa, èn a kiri Farao nanga den srudati fu en na ini a Redi Se (Ps. 136:13-15). Na ini a sabana, Yehovah ben sorgu gi den milyunmilyun Israelsma fu di a ben e gi den nyanyan nanga watra. Srefi den krosi nanga den susu fu den no ben e broko (Deut. 1:19; 29:5). Iya, noti no  kan tapu Yehovah fu du san a pramisi. Baka ten a taigi Yesaya: „Mi, iya, mi na Yehovah. Boiti mi, nowan frulusuman de.”—Yes. 43:11.

⁷ Yosua, di tron fesiman fu Israel baka Moses, ben si den bigi wondru di Yehovah du na ini Egepte èn na ini a gran sabana. Dati meki na a kaba fu a libi fu en, Yosua ben kan taigi den Israelsma: „Unu sabi heri bun taki Yehovah un Gado du ala den bun sani di a ben pramisi unu. Ala den sani disi kon tru, soleki fa unu srefi si. Iya, a du ala den sani di a pramisi” (Yos. 23:14). Yehovah du soifri san a pramisi.

8. Fa Yehovah sori na ini a ten disi taki a e du san a pramisi?

⁸ Na ini a ten disi, Yehovah e du tu san a pramisi. Nanga yepi fu en Manpikin a sori taki na ini den lasti dei a Kownukondre boskopu ben o preiki gi „sma na heri grontapu” (Mat. 24:14). Na Yehovah wawan ben kan sabi taki a preikiwroko ben o du na heri grontapu, èn na en wawan abi a makti fu sorgu taki a wroko disi du! (Tori 4:13) Sobun, te wi e du a wroko disi, dan wi e yepi fu meki Bijbel profeititori kon tru. Wi e gi wi Tata glori èn wi e agri nanga a begi disi: „Meki yu nen de santa. Meki yu Kownukondre kon. Meki yu wani pasa na grontapu soleki fa a e pasa na hemel.”—Mat. 6:9, 10.

9, 10. Sortu tra sani wi e leri fu Yehovah te wi e luku san a du gi den Israelsma?

⁹ Syatu baka di den Israelsma komoto na ini Egepte, Yehovah meki a pipel fu en kon sabi en moro bun. Di a meki a Wèt frubontu nanga den, dan a kon de leki wan „masra” gi den. Sobun, a ben teki a frantwortu fu sorgu gi a pipel (Yer. 3:14). Den Israelsma, ben tron leki a wefi fu en, èn den tron a pipel di ben e tyari en nen (Yes. 54:5, 6). Efu den ben o saka densrefi na en ondro èn ben o gi yesi na den wèt fu en, dan a ben o tron a tumusi bun ’Masra’ fu den. A ben o blesi den, a ben o kibri den èn a ben o meki den abi freide (Num. 6:22-27). Ala den tra pipel ben o sabi taki nowan tra Gado de leki Yehovah. (Leisi Deuteronomium 4:5-8; Psalm 86:7-10.) Na ini ala den hondrohondro yari di Israel ben de Gado pipel, furu trakondre sma tron anbegiman fu Yehovah. Den ben du a srefi leki a Moab uma Rut, di ben taigi Naomi: „Yu pipel o de mi pipel èn yu Gado o de mi Gado.”—Rut 1:16.

¹⁰ Sowan 1500 yari langa, Yehovah du furu sani fu meki den Israelsma kon sabi moro fini sortu Gado a de. Aladi den ben e trangayesi en furu tron, toku a ben sori  ibri leisi baka taki a de „wan Gado di abi sari-ati” èn di „ati no e bron esi”. A ben abi furu pasensi nanga den (Eks. 34:5-7). Ma Yehovah no sori pasensi fu ala ten. Di a pipel Israel kiri Yesus fu di den no ben wani bribi taki en na Krestes, dan den no ben de a pipel fu Gado moro (Mat. 23:37, 38). A pipel Israel no ben tyari a nen fu Gado moro. Gi Yehovah den ben de leki wan dede bon (Luk. 23:31). Fa den Israelsma ben e denki fu a nen fu Gado bakaten?

11. Fu san ede den Israelsma tapu fu gebroiki a nen fu Gado?

¹¹ Baka wan pisi ten, den Israelsma ben kon abi wan fowtu denki fu a nen fu Gado. Den ben feni taki Gado nen santa so te, taki a no ben fiti fu kari a nen dati (Eks. 20:7). Safrisafri den Israelsma no ben e gebroiki a nen fu Gado moro. A no de fu taki dati a hati Yehovah di a si fa den ben e wisiwasi a nen fu en (Ps. 78:40, 41). Ma Gado „nen na Dyarusu”. A no ben o gi pasi taki den Israelsma tyari a nen fu en moro, fu di den no ben e lespeki en (Eks. 34:14). Disi e leri wi taki a prenspari trutru fu sori bigi lespeki gi a nen fu wi Mekiman.

12. Suma tron a nyun pipel di e tyari Gado nen?

¹² Yehovah ben taigi Yeremia taki a ben o meki „wan nyun frubontu” nanga wan nyun pipel. Ala den sma fu a pipel disi ben o „sabi Yehovah”. „A moro pikinwan èn a moro bigiwan o sabi mi”, na so Yehovah taki (Yer. 31:31, 33, 34). A profeititori dati bigin kon tru na a Pinksterfesa fu a yari 33. Na a ten dati Gado seti a nyun frubontu. A nyun pipel disi abi Dyu nanga sma di no de Dyu. Bijbel e kari a pipel disi „na Israel fu Gado”. Yehovah taki dati den na wan pipel ’di e tyari en nen’.—Gal. 6:16; leisi Tori 15:14-17; Mat. 21:43.

13. (a) Fa wi du sabi taki den fosi Kresten ben e gebroiki Gado nen? (b) Fa yu feni en fu gebroiki Gado nen na ini a preikiwroko?

¹³ Den Kresten fu a fosi yarihondro, di ben de memre fu a nyun pipel, ben e gebroiki Gado nen. Fu eksempre, te den ben e taki fu den Hebrew Buku fu Bijbel, den ben e gebroiki Gado nen. * Di na apostel Petrus ben e taki nanga wan bigi grupu Dyu èn nanga sma di teki a Dyu bribi na a Pinksterfesa fu a yari 33, a gebroiki Gado nen wan tu leisi (Tori 2:14, 20, 21, 25, 34). Den fosi Kresten ben e gi Yehovah glori èn dati meki Yehovah blesi a preikiwroko fu den. Na so a de tu na ini a ten disi. Yehovah e blesi a wroko fu wi te wi e fruteri sma fu a nen fu en èn te wi e sori den a nen dati na ini den eigi Bijbel. Na so wi e yepi sma fu kon sabi a tru Gado. Disi na wan bigi grani gi wi èn gi den sma dati! Disi na a fosi sani di kan yepi den fu tron wan mati fu Yehovah. Te den tan gebroiki a nen fu en, dan den o tron moro bun mati fu en, kande fu têgo srefi.

14, 15. Fa Yehovah sorgu taki sma sabi en nen te now ete?

¹⁴ Baka di den apostel dede, son sma bigin pori a Kresten gemeente nanga falsi leri (2 Tes. 2:3-7). Neleki den Dyu, den falsi leriman tapu fu gebroiki a nen fu Gado. Ma Yehovah ben o gi pasi taki sma frigiti a bigi nen fu en? Kwetikweti! A tru taki wi no sabi fa sma ben e taki Gado nen fosi, ma te na a dei fu tide sma sabi a nen dati. Na ini a ten di  pasa a nen fu Gado ben de na ini difrenti Bijbel èn na ini buku fu sabiman fu Bijbel. Fu eksempre, na ini 1757 Charles Peters ben skrifi taki te wi e luku san a nen „Yehovah” wani taki, dan wi e si taki a nen disi e fiti Gado moro leki iniwan tra nen di sma e kari en. Na ini 1797, Hopton Haynes skrifi wan buku pe a taki fu na anbegi fu Gado. Na a bigin fu kapitel 7 fu a buku, a skrifi: „Den Dyu ben e kari Gado, YEHOVAH. Na en wawan den ben e anbegi. Na dati Krestes nanga den Apostel fu en ben e du tu.” Henry Grew (1781-1862) ben e gebroiki Gado nen tu. Boiti dati, a ben frustan taki sma pori a nen fu Gado èn taki a nen dati ben musu kon santa. George Storrs (1796-1879) ben de wan bun mati fu Charles T. Russell, èn neleki Russell a ben e gebroiki Gado nen tu.

¹⁵ A yari 1931 ben de wan prenspari yari gi a pipel fu Gado. Ala ten sma ben sabi den leki den Internationaal Bijbel Ondrosukuman. Ma na ini a yari dati, den teki a nen Yehovah Kotoigi (Yes. 43:10-12). Na so den sori heri grontapu taki den e si en leki wan grani fu dini a wan-enkri tru Gado, fu prèise en nen èn fu de a pipel di e „tyari en nen” (Tori 15:14). Te wi e luku fa Yehovah sorgu taki sma sabi en nen te now ete, dan dati e meki wi prakseri san skrifi na Maleaki 1:11: „Fu a presi pe son e opo te na a presi pe son e dongo, sma o abi bigi lespeki gi mi nen.”

16. Fa yu feni en taki yu e tyari a nen fu Yehovah?

¹⁶ A profeiti Mika skrifi: „Ibri pipel o tyari a nen fu en gado, èn den o du san a gado fu den wani. Ma fu ala ten wi o tyari a nen fu Yehovah wi Gado èn wi o du san a wani. Iya, fu têgo wi o du dati” (Mika 4:5). A de wan bigi grani taki Yehovah gi den Bijbel Ondrosukuman pasi fu tyari en nen. Ma disi e sori tu taki a feni den bun. (Leisi Maleaki 3:16-18.) Ma fa a de nanga yu? Yu e du muiti fu tyari a nen fu Yehovah na wan lespeki fasi? Yu e frustan san disi wani taki?

17. Efu wi wani tyari a nen fu Yehovah na wan lespeki fasi, dan san wi musu du?

¹⁷ Efu wi wani tyari a nen fu Yehovah na wan lespeki fasi, dan wi musu du dri sani. A fosi sani, na taki wi musu fruteri sma fu a nen fu en. Wi musu sori den taki na soso den sma di „e kari a nen fu Yehovah o kisi frulusu” (Rom. 10:13). A di fu tu sani, na taki wi musu du muiti fu abi den fasi fu Yehovah. Wi musu meki spesrutu muiti fu sori lobi neleki en (1 Yoh. 4:8). A di fu dri sani, na taki wi musu gi yesi na den wèt fu en nanga wi heri ati, bika na so wi e gi wi Papa nen glori (1 Yoh. 5:3). Yu o tyari a nen fu Yehovah na wan lespeki fasi ala ten?

18. Fu san ede den sma di e gi glori na a bigi nen fu Yehovah no e frede san o pasa na ini a ten di e kon?

¹⁸ Heri esi den sma di no wani sabi Yehovah èn den sma di e trangayesi en o sabi suma na en (Esek. 38:23). Den sma disi de leki Farao di ben taki: „Suma na Yehovah taki mi musu gi yesi na en?” Ma a no langa baka dati Farao kon si taki Yehovah na wan bigi Gado trutru! (Eks. 5:1, 2; 9:16; 12:29) Wi breiti taki wi kon sabi Yehovah. Wi e si en leki wan grani fu de en pipel di e gi yesi na en èn di e tyari en nen. Wi no e frede san o pasa na ini a ten di e kon, fu di wi de seiker taki Yehovah o du san a pramisi na ini Psalm 9:10: „Den sma di sabi yu nen o frutrow yu, bika yu no o gowe libi den wan di e suku yu, Yehovah.”