1, 2. Sortu profeititori di abi fu du nanga den lasti dei ben musu fu hari a prakseri fu den disipel fu Yesus, èn fu san ede?

A NO langa na fesi, Yesus ben taigi den disipel fu en taki a tempel ben o kisi pori. A sani dati ben meki taki Petrus, Yakobus, Yohanes nanga Andreas ben e broko den ede (Mark. 13:1-4). Dati meki di den wawan ben de nanga Yesus, den aksi en: „Taigi wi: O ten den sani disi o pasa, san o de a marki taki yu kon èn taki a kaba fu a grontapu disi de krosibei?” (Mat. 24:1-3) Yesus no taigi den nomo fu sani di ben o pasa fosi Yerusalem kisi pori, ma a ben taigi den san ben o pasa na ini den lasti dei fu a grontapu fu Satan. Wan fu den sani ben musu fu hari a prakseri fu den disipel fu Yesus. Baka di a taigi den fu den sani di e gi furu broko-ede soleki orloku, angriten, nanga a du di moro nanga moro sma ben o du ogri, dan Yesus ben fruteri den fu wan bun sani di ben o pasa tu. A ben taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”—Mat. 24:7-14.

² Den disipel fu Yesus ben e prisiri fu preiki a bun nyunsu fu a Kownukondre makandra nanga Krestes (Luk. 8:1; 9:1, 2). A kan taki den ben memre ete di a ben taki: „Fu tru, a kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman go du a kotiwroko fu en” (Luk. 10:2). Ma fa den ben o man preiki „gi sma na heri grontapu”, so taki „sma fu ala kondre kan yere dati”? Pe den wrokoman ben o komoto? Efu den ben man sabi na fesi san ben o pasa na ini a ten disi, dan den ben o fruwondru trutru fu si fa a profeititori fu Mateyus 24:14 e kon tru.

3. Fa Lukas 21:34 e kon tru na ini a ten disi, èn san wi musu aksi wisrefi?

 ³ A profeititori fu Yesus e kon tru na ini a ten fu wi. Milyunmilyun sma e preiki a bun nyunsu fu a Kownukondre na heri grontapu (Yes. 60:22). Yesus ben sori tu taki a ben o muilek gi son sma fu si a preikiwroko leki a moro prenspari wroko di musu du. Tra sani ben o hari den prakseri èn den ben o abi furu broko-ede. (Leisi Lukas 21:34.) Wi e si krin tu taki a sani disi e kon tru. Tra sani e hari a prakseri fu son anbegiman fu Yehovah. Wi e si disi te den e teki bosroiti di abi fu du nanga wroko èn nanga skoroleri. Boiti dati, den e feti baka gudu èn den e gebroiki furu ten fu du sport èn fu meki prisiri. Trawan no e du so furu moro na ini a diniwroko fu di den e broko den ede nanga den sorgu fu a libi. Aksi yusrefi: ’Fa a de nanga mi? Den bosroiti di mi e teki e sori taki mi e poti a wani fu Gado na a fosi presi na ini mi libi?’

4. (a) San Paulus ben begi gi den Kresten na ini Filipi èn fu san ede? (b) San wi o luku na ini na artikel disi èn na ini a trawan? (c) Fa den artikel disi o yepi wi?

⁴ Den Kresten na ini a fosi yarihondro ben musu du tranga muiti fu poti a diniwroko na a fosi presi na ini den libi. Dati meki na apostel Paulus ben begi fu a tori disi. A ben wani taki den Kresten na ini Filipi ben musu „kon sabi san na den moro prenspari sani”. (Leisi Filipisma 1:9-11.) Neleki na apostel Paulus, furu fu den Kresten dati ben „kon abi moro deki-ati fu taki fu a wortu fu Gado sondro frede” (Fil. 1:12-14). Na so a de tu taki furu fu wi na ini a ten disi e preiki a Wortu fu Gado nanga deki-ati. Toku wi o kisi moro deki-ati te wi o luku na ini na artikel disi fa Yehovah e gebroiki en organisâsi fu meki Mateyus 24:14 kon tru na ini a ten disi. Disi o yepi wi fu du a preikiwroko nanga moro faya. San na organisâsi fu Yehovah e du èn fa disi kan gi wi nanga wi osofamiri deki-ati? Na ini a tra artikel wi o luku san kan yepi wi fu tan du a preikiwroko èn fu tan wroko skinskin nanga Yehovah organisâsi.

5, 6. (a) Fu san ede Yehovah meki den futuboi fu en kisi fisyun pe den si fa a pisi fu en organisâsi na hemel e wroko? (b) San Esekièl ben si na ini wan fisyun?

⁵ Furu sani de di Yehovah no meki sma skrifi na ini a Wortu fu en. Fu eksempre, a no meki den skrifi finifini fa na edetonton e wroko noso fa a meki hemel nanga grontapu. Na presi fu dati, Yehovah meki wi kon sabi sani di e yepi wi fu frustan san a o du na ini a ten di e kon èn fa wi kan gi yesi na en (2 Tim. 3:16, 17). A moi fu si taki Bijbel abi tori na ini di e meki wi kon frustan wan tu sani fu a pisi fu Yehovah organisâsi di de na hemel. Wi e prisiri fu leisi fu den tori disi na ini den Bijbel buku Yesaya, Esekièl, Danièl, nanga Openbaring (Yes. 6:1-4; Esek. 1:4-14, 22-24; Dan. 7:9-14; Openb. 4:1-11). A de neleki Yehovah puru wan garden so taki wi kan si go na ini hemel. Fu san ede Yehovah meki wi kon sabi den sani disi?

⁶ Yehovah no wani taki wi frigiti taki wi na memre fu wan organisâsi di de na hemel èn na grontapu. A pisi fu Yehovah organisâsi di de na hemel e wroko tranga fu du a wani fu Yehovah. Fu eksempre, Esekièl kisi wan fisyun pe a si wan bigi hemel wagi di e prenki a pisi fu Yehovah organisâsi di de na hemel. A wagi disi e rèi bun esi èn a man drai go  na wan tra sei esi-esi (Esek. 1:15-21). Te den wiel fu a wagi drai wán leisi nomo, dan a wagi de bun fara kaba. Esekièl ben si a sma tu di e rèi a wagi. A taki: „Mi si wan sani di ben gersi en dyonku. Fu en dyonku go na loktu a ben gersi brenki gowtu di moksi nanga solfru, èn faya ben de na en lontu. . . . A ben gersi a glori fu Yehovah” (Esek. 1:25-28). A no de fu taki dati Esekièl ben e fruwondru fu san a si. A si fa Yehovah srefi e tiri a heri organisâsi fu en nanga yepi fu en santa yeye. A wagi na ini a fisyun e sori na wan heri moi fasi fa a pisi fu Yehovah organisâsi na hemel e wroko!

7. Fa a fisyun di Danièl kisi e meki wi abi moro frutrow na ini Yehovah nanga Yesus?

⁷ Danièl ben kisi wan fisyun tu di e tranga wi bribi. A si fa Yehovah, „a Graniwan di de sensi owruten”, e sidon na tapu wan kownusturu di meki fu faya èn di abi wiel (Dan. 7:9). Yehovah ben wani taki Danièl si taki En organisâsi e go na fesi fu du a wani fu En. Boiti dati, Danièl si wan sma di „ben gersi wan manpikin fu libisma”. A sma disi na Yesus di kisi a makti fu tiri a pisi fu Yehovah organisâsi di de na grontapu. Yesus no o tiri libisma fu wan tu yari nomo. Na presi fu dati, „a tirimakti fu en o tan fu têgo. Noiti a o kon na wan kaba. A kownukondre fu en na wan kownukondre di no o kisi pori” (Dan. 7:13, 14). A fisyun disi e tranga wi bribi taki Yehovah o du san a taki èn a e yepi wi fu si san a e du. Yehovah gi en Manpikin Yesus ’makti fu tiri, a gi en glori nanga wan kownukondre’. Yehovah e frutrow en Manpikin di sori taki  a bun nofo fu tyari den frantwortu disi. Sobun, wi srefi kan abi a frutrow taki Yesus na wan bun Tiriman.

8. (a) San Esekièl nanga Yesaya du baka di den kisi wan fisyun pe den si fa Yehovah organisâsi e wroko? (b) Sortu krakti den fisyun dati musu abi na wi tapu?

⁸ Sortu krakti den fisyun disi musu abi na wi tapu? Neleki Esekièl, a e naki wi ati trutru fu sabi san Yehovah e du (Esek. 1:28). Te wi e prakseri fu na organisâsi fu Yehovah, dan dati kan meki wi du san Yesaya ben du. Di a profeiti Yesaya ben kisi na okasi fu fruteri tra sma san Yehovah e du, dan a no ben draidrai fu du dati. (Leisi Yesaya 6:5, 8.) Fu di Yehovah ben e yepi Yesaya, meki a ben sabi taki noti no ben o man tapu en fu du a wroko fu en leki profeiti. Neleki Yesaya wi e kisi a deki-ati tu fu du moro na ini a diniwroko fu Gado. Na so wan fasi wi e sori taki wi e horibaka gi Yehovah organisâsi. A moi fu sabi taki wi na memre fu wan organisâsi di e wroko tranga fu du a wani fu Yehovah!

9, 10. Fu san ede a ben de fanowdu taki Yehovah orga den futuboi fu en na grontapu?

⁹ Nanga yepi fu en Manpikin, Yehovah orga den futuboi fu en na grontapu so taki den kan wroko makandra nanga a pisi fu en organisâsi di de na ini hemel. A sani disi ben de fanowdu fu kan du a wroko di Mateyus 24:14 e taki fu en. Fu san ede? Meki wi luku dri sani.

¹⁰ A fosi sani, na taki Yesus ben taki dati den disipel fu en ben o preiki „te na den moro farawe presi fu grontapu” (Tori. 1:8). A di fu tu sani, na taki den sma di ben o du a preikiwroko, ben o abi deki-ati fanowdu èn den ben o abi fu kisi leri fu Bijbel (Yoh. 21:15-17). A di fu dri, na taki sani ben musu seti so taki den sma di ben o du a preikiwroko ben kan kon makandra fu anbegi Yehovah èn fu leri fa fu du a preikiwroko (Hebr. 10:24, 25). Fu man du ala den sani disi, den disipel fu Yesus ben musu orga bun.

11. Fa wi kan sori taki wi e horibaka gi Yehovah organisâsi?

¹¹ Fa wi kan sori taki wi e horibaka gi Yehovah en organisâsi? Wan prenspari fasi fa wi kan du dati, na fu frutrow ala ten tapu den brada di e teki fesi na ini a preikiwroko. Yehovah nanga Yesus e frutrow den brada disi èn wi musu du a srefi tu. Den brada disi ben kan gebroiki den ten nanga den krakti fu pruberi fu lusu den problema na grontapu. Ma den no e du dati. Meki wi go luku san na a moro prenspari sani gi a pisi fu Yehovah organisâsi di de na grontapu.

12, 13. (a) Fa owruman e tyari a frantwortu fu den? (b) Fu san ede dati e gi wi deki-ati?

¹² Na heri grontapu, lepi owruman kisi a frantwortu fu orga èn teki fesi na ini a preikiwroko na ini a kondre fu den. Te den e teki bosroiti, den e meki Bijbel tiri den. Na so Gado Wortu de ’wan lampu gi den futu èn wan leti na tapu den pasi’. Boiti dati, den brada disi e begi Yehovah fu yepi den.—Ps. 119:105; Mat. 7:7, 8.

¹³ Neleki den brada di ben e teki fesi na ini a fosi yarihondro, na so owruman di e teki fesi na ini a preikiwroko na ini a ten disi e „preiki a wortu” fayafaya (Tori. 6:4). Den e prisiri srefisrefi fu si fa a preikiwroko e go na fesi na ini den eigi kondre èn na heri grontapu (Tori. 21:19, 20).  Den no e poti wan lo wèt gi a pipel fu Gado. Na presi fu dati, den e meki Bijbel nanga a santa yeye fu Gado tiri den te den e seti sani fu meki a preikiwroko go na fesi. (Leisi Tori fu den apostel 15:28.) Na a fasi disi, den brada disi de wan bun eksempre gi ala sma na ini a gemeente fu den.—Ef. 4:11, 12.

14, 15. (a) Sortu sani sreka so taki wi kan du a preikiwroko na heri grontapu? (b) Fa yu feni en taki yu abi a grani fu teki prati na a Kownukondre preikiwroko?

¹⁴ Furu sma no e si a tranga wroko di e du fu sreka buku nanga lezing gi den konmakandra èn gi den kongres. Dusundusun friwani wrokoman e wroko tranga fu vertaal den publikâsi na ini sowan 600 tongo so taki furu sma kan kon sabi „den bigi sani di Gado du” na ini den eigi tongo (Tori. 2:7-11). Yongu brada nanga sisa e wroko tranga na ini drukkerij fu meki publikâsi nanga yepi fu masyin di e druk buku gaw. Baka dati den e tyari den publikasi disi go na den gemeente di de srefi na den moro farawe presi fu grontapu.

¹⁵ Furu sani sreka so taki wi kan tan preiki a bun nyunsu nanga a gemeente fu wi. Fu eksempre, dusundusun friwani wrokoman e yepi fu bow Kownukondre zaal nanga kongres hal. Den e yepi den wan di kisi fu du nanga rampu noso di abi datra yepi fanowdu. Den e orga kring konmakandra nanga kongres, èn trawan e gi leri na den skoro di na organisâsi e hori. Disi na wan tu sani nomo di e du èn di furu sma no e si. Fu san ede den e du ala den wroko disi? Na fu yepi wi fu preiki a bun nyunsu, fu tranga a bribi fu wi, èn fu yepi moro sma fu kon na a tru anbegi. Wi kan taki dati a pisi fu Yehovah organisâsi na grontapu e tan poti prakseri na den moro prenspari sani? Iya, fu tru!

16. Sortu bun sani yu noso yu osofamiri ben kan studeri?

¹⁶ Wi e teki ten fu prakseri fu den sani di Yehovah organisâsi e du? Son sma bosroiti fu go ondrosuku èn prakseri fu den sani disi te den e hori den osofamiri anbegi noso te den e studeri. A ben o moi fu studeri den fisyun fu Yesaya, Esekièl, Danièl nanga Yohanes. A brochure Suma e du a wani fu Yehovah na ini a ten disi nanga tra publikâsi noso DVD di de na ini yu tongo, kan leri yu furu moi sani fu na organisâsi disi.

17, 18. (a) Fa na artikel disi yepi yu? (b) Sortu aksi wi musu poti gi wisrefi?

¹⁷ A bun gi wi fu denki dipi fu den sani di Yehovah e du nanga yepi fu en organisâsi. Meki wi makandra nanga a moi organisâsi disi abi a fasti bosroiti fu tan poti prakseri na den moro prenspari sani. Te wi e du dati, dan wi o kisi deki-ati fu wani du a srefi sani leki na apostel Paulus di ben skrifi: „Wi abi a wroko disi, fu di Gado sori wi sari-ati. Dati meki wi no e gi abra” (2 Kor. 4:1). A ben gi den brada nanga sisa fu en deki-ati tu: „Wi no musu tapu fu du san bun, bika na a reti ten wi sa koti den froktu efu wi no kon weri.”—Gal. 6:9.

¹⁸ A de so taki yu noso yu osofamiri musu tyari wan tu kenki kon fu kan poti den moro prenspari sani na a fosi presi na ini un libi? Yu kan libi soso nanga den moro prenspari sani so taki yu kan du moro na ini a preikiwroko? Na ini a tra artikel wi o taki fu feifi sani di o yepi wi fu teki na eksempre fu Yehovah organisâsi èn fu tan du a diniwroko fu Gado fayafaya.