1, 2. (a) Yu lobi fu teki bosroiti? (b) Fa yu e prakseri fu son bosroiti di yu teki?

IBRI dei wi musu teki furu bosroiti. Fa yu feni en fu teki bosroiti? Son sma wani bosroiti ala sani gi densrefi. Den e taki dati den abi a reti fu teki den eigi bosroiti èn den ati e bron srefi te den e si taki tra sma wani du dati gi den. Ma yu abi sma tu di frede fu teki prenspari bosroiti. Trawan e go suku rai na ini buku, noso den e go suku yepi na sma di e gi rai. Kande den e pai den sma dati bun furu moni fu kan kisi a rai di den denki taki den abi fanowdu.

² Furu fu wi sabi taki son bosroiti de di wi no abi reti fu teki, ma toku furu sani de pe wi kan teki wi eigi bosroiti (Gal. 6:5). Ma kande wi e agri taki a no ala bosroiti di wi teki na bun bosroiti noso taki a no alamala e tyari wini kon gi wi.

3. San kan yepi wi fu teki bosroiti, ma fu san ede a no makriki ala ten?

³ Leki futuboi fu Yehovah wi kan breiti taki a sori wi krin san wi kan du nofo tron te wi musu teki prenspari bosroiti na ini wi libi. Wi sabi taki efu wi du san Yehovah taki, dan wi kan teki bosroiti di o plisi en èn di o tyari wini kon gi wi. Ma toku sani kan miti wi noso wi kan kon de na ini situwâsi di Gado Wortu no e taki fu en. Dan fa wi o sabi san fu du te den sortu sani dati miti wi? Fu eksempre, wi sabi taki wi no musu fufuru (Ef. 4:28). Ma o ten wi e taki dati wan sma e fufuru? Son sma e taki dati a no ala ten a fowtu fu teki wan sani di no de fu yu efu a sani no warti furu noso te yu abi en fanowdu trutru. San yu o bosroiti fu du te sma e taki dati Bijbel no e sori krin san yu musu du na ini son situwâsi? Pe wi kan feni yepi?

4. Sortu rai brada nanga sisa kan gi wi son leisi te wi o teki wan bosroiti?

⁴ Te wi e taigi wan Kresten brada noso sisa taki wi  de fu teki wan prenspari bosroiti, dan kande a e sori wi taki wi musu de nanga krin frustan te wi o du dati. Disi na wan bun rai. Bijbel e warskow wi taki wi no musu de esi fu teki bosroiti: „Ibri sma di e du sani tumusi esi o pina” (Odo 21:5). Ma san a wani taki fu de nanga krin frustan te wi musu teki wan bosroiti? Fosi wi teki wan bosroiti a prenspari fu teki wi ten fu denki a tori bun, fu no fruwakti tumusi furu fu wisrefi noso fu trawan èn fu luku ala sei fu a tori. Ma na dati wawan wi musu du fu de nanga krin frustan? Aladi den sani disi kan yepi wi fu teki bun bosroiti, toku wi musu du moro efu wi wani de nanga krin frustan.—Rom. 12:3; 1 Petr. 4:7.

5. Fu san ede wi no gebore nanga wan krin frustan di bun dorodoro?

⁵ Wi sabi taki nowan fu wi gebore nanga wan krin frustan di bun dorodoro. Fu san ede disi de so? Wi alamala na sondu sma èn dati meki wi no man de gosontu dorodoro noso wi no man de nanga wan krin frustan trutru (Ps. 51:5; Rom. 3:23). Boiti dati, Satan ben breni a frustan fu furu fu wi, fu di wi no ben sabi Yehovah nanga den markitiki fu en (2 Kor. 4:4; Tit. 3:3). Sobun, efu wi teki wan bosroiti soso fu di wi feni taki a bun èn taki a no fowtu fu du san wi abi na prakseri, dan wi kan kori wisrefi, awinsi o langa wi teki fu prakseri a tori.—Odo 14:12.

6. San kan yepi wi fu de nanga krin frustan?

⁶ Aladi wi na sondu sma, toku wi hemel Tata Yehovah bun dorodoro (Deut. 32:4). Wi kan breiti taki a gi wi ala san wi abi fanowdu fu kenki wi denki èn fu meki wi de nanga krin frustan. (Leisi 2 Timoteyus 1:7.) Wi leki Kresten wani si èn du sani na a yoisti fasi. Wi musu leri fu basi a denki nanga den firi fu wi. Boiti dati, wi musu du muiti fu denki, fu firi èn fu du sani leki Yehovah.

7, 8. Fruteri wan ondrofenitori di e sori fa sma kan teki koni bosroiti te trawan e dwengi den noso te den de na ini muilek situwâsi.

⁷ Luku wan eksempre. Son sma di froisi go tan na wan tra kondre abi a gwenti fu seni a beibi fu den go libi nanga den famiri na a kondre pe den komoto. Disi e meki taki a papa nanga mama kan tan wroko fu meki moni. * Na so yu ben abi wan uma di ben froisi go na wan tra kondre. Na uma disi ben kisi wan moi beibi. Na a ten dati a bigin studeri Bijbel èn a ben e go na fesi. Mati nanga famiriman bigin dwengi en nanga en masra fu seni a beibi go na en granpapa nanga granmama na ini a kondre pe na uma ben e libi fosi. Ma a studie yepi na uma fu kon si taki Gado gi en leki mama a frantwortu fu kweki a pikin fu en (Ps. 127:3; Ef. 6:4). A ben musu du san furu sma gwenti du? Noso a ben musu du san Bijbel leri en, aladi a no ben o meki so furu moni moro èn son sma ben kan krutu en? Efu na yu, dan san yu ben o du?

⁸ Fu di na uma ben abi a firi taki sma ben e dwengi en, meki a suku yepi na Yehovah èn a begi en nanga heri ati. A taki fu a tori nanga a sma di ben e studeri Bijbel nanga en èn nanga trawan na ini a gemeente. Dati yepi en fu kon si fa Yehovah e denki fu a tori. A prakseri tu san kan pasa nanga pikin efu den no e gro kon bigi nanga wan papa nanga mama di kan leri den prenspari sani fu a libi. Baka di a luku san Bijbel e taki fu a tori, a si taki a no ben o de wan bun sani fu seni a beibi gowe. En masra si fa brada nanga sisa fu a gemeente yepi den èn fa a beibi ben e gro kon bigi leki wan koloku èn gosontu pikin. A masra bigin studeri Bijbel èn a bigin go na den konmakandra nanga a wefi fu en.

9, 10. (a) San a wani taki fu de nanga krin frustan? (b) Fa wi kan kon de nanga krin frustan?

 ⁹ Disi na wán eksempre nomo. Ma a e sori taki fu de nanga krin frustan, no wani taki nomo dati wi e du san wi noso trawan feni bun noso san makriki gi wi. A sondu ati nanga frustan fu wi de leki wan oloisi di no e wroko bun. Kande a e waka tumusi safri noso tumusi gaw. Efu wi tan wroko nanga na oloisi dati, wi kan kisi bigi problema (Yer. 17:9). Sobun, te wi no wani abi problema, wi no musu wroko nanga wi sondu frustan nomo. Na presi fu dati wi musu sorgu taki den gronprakseri fu Gado tiri a fasi fa wi e denki nanga den firi fu wi.—Leisi Yesaya 55:8, 9.

¹⁰ A no fu soso Bijbel e taki: „Frutrow na tapu Yehovah nanga yu heri ati. No frutrow na tapu yu eigi frustan. Poti prakseri na en, awinsi sortu pasi yu e waka, dan na en o meki yu pasi kon reti” (Odo 3:5, 6). Luku den wortu „no frutrow na tapu yu eigi frustan”. Baka dati a tekst e taki: „Poti prakseri na [Yehovah].” En na a sma di de nanga krin frustan trutru. Sobun, ibri leisi te wi musu teki wan bosroiti, wi musu luku san Bijbel e taki so taki wi kan sabi fa Gado e si a tori. Na so wi kan teki wan koni bosroiti. Efu wi wani de nanga krin frustan, wi musu denki leki fa Yehovah e denki.

11. San wan sma musu du fu man teki koni bosroiti?

¹¹ A no makriki fu teki koni bosroiti èn fu du san yu bosroiti. Spesrutu den wan di no dopu so langa ete noso den wan di e bigin go na fesi na ini a tru anbegi kan abi problema nanga a sani disi. Toku den man go na fesi. Bijbel e agersi den nanga „yongu pikin” fu di den de leki beibi di musu leri waka. Wan beibi no man leri waka sondro fu fadon. A e leri waka, fu di a e teki pikinpikin stap ibri tron baka. Den sma di e leri fa fu teki koni bosroiti e du a srefi sani. Memre taki na apostel Paulus ben taki dati lepi sma na „sma di leri fa fu gebroiki den frustan fu man si sani krin, so taki den kan sabi san bun èn san no bun”. Den wortu „leri fa fu gebroiki”  e sori taki wan sma musu tan meki muiti doronomo. Sobun, sma di no de na bribi so langa ete musu tan meki muiti fu leri teki koni bosroiti.—Leisi Hebrewsma 5:13, 14.

12. Fa wi kan leri fu teki koni bosroiti?

¹² Soleki fa wi ben taki kaba, dan ibri dei wi musu teki furu bosroiti, awinsi den pikin noso bigi. Wan ondrosuku di sma du fu kon sabi fa sma e teki bosroiti, sori taki na pikinmoro afu fu ala den bosroiti di wi e teki, wi no e denki srefi, ma wi e du nomo san wi gwenti du. Fu eksempre, ibri mamanten yu musu teki a bosroiti san yu o weri. Kande yu e si en leki wan pikin sani èn yu e teki wan bosroiti sondro fu prakseri langa fu a tori, spesrutu te yu e hasti yusrefi. Toku a prenspari fu luku efu a krosi di yu weri fiti wan futuboi fu Yehovah (2 Kor. 6:3, 4). Te yu e go bai krosi, dan kande yu e prakseri san de na modo. Ma yu e luku tu omeni yu o pai fu en èn efu a fiti gi wan Kresten fu weri a krosi dati? Efu yu e teki bun bosroiti na ini den pikinpikin sani disi, dan yu o leri fa fu gebroiki yu frustan moro bun so taki yu o man teki koni bosroiti tu na ini moro seryusu situwâsi.—Luk. 16:10; 1 Kor. 10:31.

13. San kan yepi wi fu du san wi bosroiti?

¹³ Wi alamala sabi taki a prenspari fu teki bun bosroiti, ma a no makriki fu du dati. Fu eksempre, son leisi wan sma wani tapu nanga smoko, ma a firi di a abi fu du dati no tranga nofo fu meki a tapu trutru. Na ini wi ati kaba wi musu abi a fasti bosroiti fu du san wi abi na prakseri èn wi musu meki tranga muiti fu hori wisrefi na a bosroiti di wi teki. Ma san kan yepi wi fu kon abi a fasti bosroiti dati èn fu du san wi abi na prakseri? Efu wi suku yepi na Yehovah, dan a o yepi wi.—Leisi Filipisma 2:13.

14. Pe Paulus feni a krakti fu du den sani di a ben sabi taki a musu du?

¹⁴ Paulus srefi ben sabi heri bun taki a muilek fu du san bun. Wan leisi a kragi: „Mi wani du san bun, ma mi no man du en.” A ben sabi san a ben wani du noso san a ben musu du, ma son leisi wan sani ben tapu en fu du san a ben abi na prakseri. A taki: „Na ini mi ati mi e prisiri trutru nanga a wèt fu Gado, ma mi e si taki wan tra wèt de na ini mi skin, èn a e feti nanga a wèt fu mi frustan. A wèt dati na a sondu di de na ini mi skin, èn a e basi mi.” Yepi no ben de gi en? Iya, yepi ben de. A taki: „Mi e taki Gado tangi taki a frulusu mi nanga yepi fu wi Masra Yesus Krestes!” (Rom. 7:18, 22-25) Na ini wan tra Bijbel buku a skrifi: „Mi man du ala sani nanga yepi fu a sma di e gi mi krakti.”—Fil. 4:13.

15. Fu san ede wi musu abi a fasti bosroiti fu du san bun?

¹⁵ A de krin taki efu wi wani plisi Gado, dan wi musu bosroiti fu du san bun èn wi musu hori wisrefi na a bosroiti dati. Memre a ten di Elia ben de na Karmel-bergi pe a ben taigi den Bâal anbegiman nanga den Israelsma di ben drai baka gi Yehovah: „O langa unu o draidrai fu teki wan bosroiti? Efu Yehovah na a tru Gado, go dini en. Ma efu na Bâal, go dini en” (1 Kow. 18:21). Den Israelsma ben sabi san den ben musu du, ma toku den ben e „draidrai fu teki wan bosroiti”. Ma nanga Yosua a ben de heri tra fasi. Wan tu yari na fesi a gi den Israelsma wan moi eksempre di a taigi den: „Efu unu no wani dini Yehovah, dan unu srefi musu bosroiti tide suma unu wani dini. . . . Ma mi nanga mi osofamiri, wi o dini Yehovah” (Yos. 24:15).  Sortu blesi Yosua nanga den wan di ben de nanga en kisi? Den kisi na okasi fu go na ini a Pramisi Kondre, „wan kondre di lai merki nanga oni”.—Yos. 5:6.

16, 17. Gi wan eksempre di e sori sortu wini wi kan kisi te wi e teki bosroiti di Gado feni bun.

¹⁶ Luku na eksempre fu wan brada di no dopu so langa ete. A brada disi trow èn a abi dri yongu pikin. Wan dei wan sma na en wrokope aksi en efu a no wani go nanga en fu go wroko na wan tra bedrijf di e pai moro moni èn di e sorgu moro bun gi den wrokoman. A brada go prakseri a tori èn a begi fu en. Ne a memre taki aladi a wroko di a abi now no e pai so furu, a ben teki en fu di a no abi fu wroko tapu satra nanga sonde. Na a fasi dati a ben man go na den konmakandra èn na ini a preikiwroko makandra en osofamiri. Sobun, di a luku a heri tori, a kon si taki a no ben o abi so furu ten fu du den sani dati efu a ben o teki a tra wroko. San yu ben o du?

¹⁷ A brada kon si taki efu a ben o teki a tra wroko, a ben kan pori a matifasi di a abi nanga Yehovah. Dati meki a no teki a wroko, aladi a ben kan meki moro moni. Yu denki taki a bosroiti di a teki hati en te fu kaba? Kwetikweti. A ben kon si taki wan bun matifasi nanga Gado ben o gi en nanga en osofamiri moro wini leki wan wroko di ben o pai moro moni. En nanga en wefi ben breiti srefisrefi di a moro bigi meisje fu den di ben abi tin yari, taigi den taki a lobi den, den Kresten brada nanga sisa fu en, nanga Yehovah. A taigi den taki a wani gi en libi abra na Yehovah èn taki a wani teki dopu. A musu fu de so taki a meisje luku a bun eksempre fu en papa di poti na anbegi fu Yehovah na a fosi presi na ini en libi.

18. Fu san ede a de prenspari fu teki koni bosroiti ibri dei?

¹⁸ Neleki fa Moses tyari den Israelsma pasa na ini a bigi sabana, na so Yesus Krestes e tyari den tru anbegiman fu Yehovah pasa na ini a grontapu fu Satan furu yari kaba. Yesus, a Moro Bigi Yosua, o pori a kruktu grontapu disi èn a o tyari den bakaman fu en na ini wan nyun grontapu pe retidu o de (2 Petr. 3:13). Sobun, now a no a ten fu go baka na den owru sani fu wi soleki a fasi wi ben e denki, den gwenti fu wi, nanga den sani di wi ben wani du na ini wi libi. A no a ten tu fu hori wisrefi na den markitiki di wi ben poti gi wisrefi fosi. Now na a ten fu kon frustan moro krin san na a wani fu Gado (Rom. 12:2; 2 Kor. 13:5). Meki den bosroiti di wi e teki ibri dei, sori taki wi na sma di kan kisi a têgo blesi fu Gado.—Leisi Hebrewsma 10:38, 39.