1. (a) Sortu tori a pipel fu Gado e taki ibri tron baka? (b) Te wi e luku den tori disi baka, dan fa wi e kisi wini fu dati?

DI YU ben e sreka yusrefi gi wan Waktitoren-studie, oiti yu aksi yusrefi: ’Wi no ben luku a tori disi wan leisi kaba?’ Efu yu e kon na den Kresten konmakandra wan pisi ten kaba, dan kande yu si taki wi e taki fu son tori ibri tron baka. Nofo tron wi e taki fu Gado Kownukondre, a lusu-paiman, a preikiwroko èn fu sani soleki lobi nanga bribi. Te wi e luku den tori disi baka, dan wi kan tan abi wan tranga bribi èn wi kan „tron sma di e du san a wortu fu Gado e taki”.—Yak. 1:22.

2. (a) Nanga san den warskow fu Gado abi fu du nofo tron? (b) Fa den wèt fu Yehovah de tra fasi leki den di fu libisma?

² A wortu di vertaal na ini Bijbel nanga „warskow” nofo tron abi fu du nanga den wèt, den komando nanga den markitiki di Gado e gi en pipel. Den wèt fu Yehovah de tra fasi leki libisma wèt di no bun dorodoro èn fu dati ede den musu kenki ibri leisi baka. Den wèt fu Gado bun dorodoro èn wi kan de seiker taki te wi gi yesi na den wi o kisi wini ala ten. Aladi sonwan fu den wèt fu en ben de gi wan spesrutu ten noso situwâsi nomo, toku dati no e sori taki den wèt dati no ben bun. A psalm skrifiman ben taki: „Den wèt [noso warskow] fu yu reti ala ten.”—Ps. 119:144.

3, 4. (a) Sortu deki-ati Yehovah ben gi en pipel son leisi? (b) Sortu wini den Israelsma ben o kisi efu den ben o poti prakseri na den deki-ati dati?

³ Kande yusrefi kon si taki furu leisi Yehovah warskow a pipel Israel èn taki a gebroiki den profeiti fu en fu go warskow den. Fu eksempre, syatu fosi den Israelsma go na ini a Pramisi Kondre, Moses warskow den: „Luku bun taki sma no kori unu, so taki unu drai baka gi Gado èn boigi gi tra gado fu anbegi den. Efu unu e du dati, dan Yehovah en ati o bron nanga unu” (Deut. 11:16, 17). Bijbel e sori taki Gado gi en pipel  furu warskow fu meki sani waka bun gi den.

⁴ Furu tron Yehovah gi den Israelsma deki-ati fu sori lespeki gi en, fu gi yesi na en èn fu meki en nen kon santa (Deut. 4:29-31; 5:28, 29). Efu den ben poti prakseri na den deki-ati dati di a ben gi den, dan Gado ben o gi den furu blesi.—Lef. 26:3-6; Deut. 28:1-4.

5. Fu san ede Yehovah feti gi Kownu Heskia?

⁵ Na ini a heri historia fu den Israelsma, Gado du san a ben pramisi den. Fu eksempre, di Kownu Sanherib fu Asiria go feti nanga Yuda èn a taigi Kownu Heskia taki a ben o puru en leki kownu, dan Yehovah seni wan engel go yepi En pipel. Na ini wán neti nomo na engel fu Gado kiri „ala den tranga, deki-ati man” na ini a legre fu Asiria so taki Sanherib ben abi fu drai go baka na en kondre nanga bigi syen (2 Kron. 32:21; 2 Kow. 19:35). Fu san ede Gado feti gi Kownu Heskia? Fu di ’Heskia no gowe libi Yehovah. Ala ten Heskia gi yesi na en èn a gi yesi na den komando fu Yehovah.’—2 Kow. 18:1, 5, 6.

6. Fa Kownu Yosia sori taki a ben e frutrow na tapu Yehovah?

⁶ Wan tra sma di ben gi yesi na den wèt fu Yehovah na Kownu Yosia. Di Yosia ben abi aiti yari nomo, a bigin „du san Yehovah feni bun. . . . Noiti a drai baka gi Gado” (2 Kron. 34:1, 2). Yosia ben e frutrow na tapu Yehovah èn fu dati ede a bigin puru den falsi gado so taki a kondre kon krin èn a yepi a pipel fu anbegi Yehovah baka. Di Yosia du disi, a no tyari blesi kon gi ensrefi nomo, ma sosrefi gi a heri pipel.—Leisi 2 Kroniki 34:31-33.

7. San ben e pasa nanga den Israelsma te den no ben e gi yesi na Yehovah?

⁷ Ma a sari fu taki dati a pipel fu Yehovah no tan gi yesi na den warskow fu en fu di den no ben e frutrow na en tapu dorodoro. Na ini den hondrohondro yari di den ben de Gado pipel, den ben gi yesi son leisi èn tra leisi baka den no ben gi yesi. Te a bribi fu a pipel ben kon swaki, trawan ben kan kori den makriki fu go anbegi falsi gado (Ef. 4:13, 14). Èn soleki fa Gado warskow den na fesi, problema ben e miti den te den no ben e frutrow na en tapu.—Lef. 26:23-25; Yer. 5:23-25.

8. San wi kan leri fu na eksempre fu Israel?

⁸ Fa wi kan kisi wini te wi e luku na eksempre fu Israel? Neleki fa Gado gi Israel rai nanga leri, na so a e gi en futuboi na ini a ten disi rai nanga leri (2 Petr. 1:12). Ibri  tron te wi e leisi Bijbel, a e memre wi na den wèt fu Gado. Yehovah e gi wi na okasi fu bosroiti efu wi wani gi yesi na den wèt fu en noso efu wi wani du nomo san wi feni bun (Odo 14:12). Meki wi go luku fu san ede wi musu poti prakseri na den wèt fu Yehovah èn fa wi kan kisi wini te wi gi yesi na den.

9. Fa Yehovah sori den Israelsma taki na en ben e yepi den di den ben de na ini a bigi sabana?

⁹ Den Israelsma waka 40 yari langa na ini wan ’sabana di ben bigi srefisrefi èn di ben meki sma frede’. Na a bigin Yehovah no taigi den finifini fa a ben o tyari den na ini a sabana, fa a ben o kibri den noso fa a ben o sorgu den. Ma toku a ben sori den ibri tron baka taki den ben kan frutrow na en tapu èn na tapu den rai fu en. Na deiten Yehovah tyari den nanga wan wolku di gersi wan pilari èn na neti nanga wan bigi faya. Na so a memre den Israelsma taki na en ben e yepi den fu pasa na ini a bigi sabana dati pe sani no ben de so makriki (Deut. 1:19; Eks. 40:36-38). Boiti dati, a gi den san den ben abi fanowdu fu tan na libi. „Den krosi fu den no ben e broko èn den futu fu den no ben e sweri.” Iya, „den no ben e mankeri noti”.—Neh. 9:19-21.

10. Fa Yehovah e yepi en pipel na ini a ten disi?

¹⁰ Na ini a ten disi den futuboi fu Gado de fu go na ini wan nyun grontapu pe retidu o de. Wi e bribi taki Yehovah o gi wi san wi abi fanowdu fu kan tan na libi na ini a „bigi banawtu” di de na pasi e kon? (Mat. 24:21, 22; Ps. 119:40, 41) A tru taki Yehovah no e gebroiki wan wolku di gersi wan pilari noso wan bigi faya fu tyari wi go na ini a nyun grontapu. Ma a e gebroiki en organisâsi fu yepi wi tan na ai. Fu eksempre, ibri tron baka wi e kisi deki-ati fu leisi Bijbel, fu hori wi Osofamiri Anbegi, fu tan go na den konmakandra èn na a preikiwroko, so taki wi kan tron moro bun mati nanga Yehovah. San wi du fu sori taki wi teki a rai disi? Te wi e du disi, dan dati o yepi fu abi a bribi di o meki wi pasa go na ini a nyun grontapu libilibi.

11. Fa Gado e sori taki a e broko en ede nanga wi?

¹¹ Na organisâsi fu Gado e sori wi tu fa fu teki bun bosroiti na ini wi aladei libi. Fu eksempre, den e leri wi fa wi musu si gudu èn fa wi kan libi na so wan fasi taki wi no abi tumusi furu broko-ede. Den gi wi rai tu di abi fu du nanga krosi di wi e weri, a fasi fa wi musu sorgu wi skin, fa wi kan sabi sortu fasi fu meki prisiri bun èn o furu skoroleri wi o teki. Prakseri den warskow di wi kisi taki wi musu sorgu taki ala sani na wi oso, wi wagi, noso wi Kownukondre zaal bun èn taki wi musu sabi san wi musu du te wan rampu kon. Den sortu rai dati e sori taki Gado e broko en ede nanga wi èn taki a wani taki sani go bun nanga wi.

12. (a) San Yesus taigi den disipel fu en ibri tron baka? (b) Sortu sani di Petrus ben leri, a no frigiti noiti? (c) San wi musu leri fu Yesus eksempre?

¹² Na ini a fosi yarihondro, Yehovah warskow en pipel ibri tron baka. Na difrenti okasi Yesus taki nanga den disipel fu en taki den ben musu abi sakafasi. Ma a no taigi den nomo san a wani taki fu abi sakafasi, a sori den tu fa den ben musu du dati. Na a lasti dei di Yesus ben de na grontapu, a tyari den apostel kon na wán fu hori a Paskafesa. Di den apostel ben e nyan, Yesus opo go wasi den futu fu den, aladi na srafu ben gwenti du a wroko dati (Yoh. 13:1-17). A sani di Yesus du a neti dati leri den apostel wan sani di den no ben o frigiti. Sowan 30 yari baka dati, na apostel Petrus, di ben de na a Paskafesa dati, leri den Kresten brada fu en fa den musu sori  sakafasi (1 Petr. 5:5). Na eksempre fu Yesus musu leri wi alamala fu abi sakafasi te wi de nanga trawan.—Fil. 2:5-8.

13. San den disipel fu Yesus ben musu abi, soleki fa a ben taigi den?

¹³ Wan tra sani di Yesus sori den disipel fu en na taki den ben musu abi wan tranga bribi. Wán leisi den disipel no ben man dresi wan boi di ben abi wan ogri yeye na en tapu. Den aksi Yesus: „Fu san ede wi no ben man yagi a yeye puru na a boi tapu?” Yesus piki den: „Fu di unu no abi nofo bribi. Bika fu tru mi e taigi unu: Efu a bribi fu unu pikin leki wan mosterd-siri, dan . . . noti sa de di unu no man du” (Mat. 17:14-20). A heri pisi ten di Yesus ben de na grontapu a leri den disipel fu en taki bribi na wan prenspari sani. (Leisi Mateyus 21:18-22.) Wi e du ala san wi man fu meki a bribi fu wi kon moro tranga? Wi e meki a leri di wi e kisi na den bigi konmakandra èn na den Kresten konmakandra yepi wi fu du dati? Den konmakandra disi a no prisiri okasi nomo, ma den e yepi wi tu fu sori taki wi e frutrow na tapu Yehovah.

14. Fu san ede a prenspari na ini a ten disi fu abi a srefi sortu lobi di Krestes ben e sori?

¹⁴ Den Kresten Griki Buku fu Bijbel abi furu tekst di e memre wi taki wi musu sori lobi gi makandra. Yesus taki dati a di fu tu bigi komando na fu „lobi tra sma leki fa yu lobi yusrefi” (Mat. 22:39). Yesus en afubrada Yakobus ben taki dati lobi na „a moro hei wèt” (Yak. 2:8). Na apostel Yohanes ben skrifi: „Lobiwan, mi no e skrifi unu fu wan nyun komando, ma fu wan owru komando di unu ben kisi sensi a bigin” (1 Yoh. 2:7, 8). San Yohanes ben abi na prakseri di a taki fu na „owru komando”? A ben e taki fu a komando di Yesus ben gi den disipel fu en fu sori lobi. Yu kan taki dati a komando dati ben owru fu di na wan sani di Yesus ben taki someni yari na fesi, „sensi a bigin”. Ma a komando ben „nyun” tu fu di a fasi fa den disipel ben o abi fu sori lobi bakaten, ben o difrenti fu a fasi fa den ben gwenti sori lobi na a ten dati. Na ini a ten disi wi breiti taki wi e kisi warskow di e yepi fu no prakseri wisrefi nomo soleki fa furu sma na ini a grontapu disi e du. Na presi fu dati wi e sori trutru lobi.

15. San na a moro prenspari wroko di Yesus ben kon du na grontapu?

¹⁵ Yesus ben e broko en ede nanga sma trutru. A sori disi di a dresi sikisma èn di a meki dedewan kon na libi baka. Ma a moro prenspari wroko di Yesus ben kon du na grontapu no ben de fu meki sikisma kon betre. A preikiwroko fu en èn a leri di a ben e gi sma, ben abi moro krakti na tapu a libi fu den sma disi. Fa so? Wi sabi taki den  sma di Yesus dresi èn den wan di a ben gi wan opobaka na ini a fosi yarihondro, kon owru te fu kaba èn den dede. Ma den wan di arki a boskopu fu en èn di du san a taki, ben o kisi na okasi fu libi fu têgo.—Yoh. 11:25, 26.

16. Fa Yehovah Kotoigi na ini a ten disi e gi yesi na Yesus komando fu meki disipel?

¹⁶ Yesus taigi den disipel fu en: „Fu dati ede, go na sma fu ala kondre èn meki den tron disipel” (Mat. 28:19). Yesus bigin nanga a wroko dati na ini a fosi yarihondro èn na ini a ten disi den futuboi fu en e go doro nanga a wroko dati. Ma noiti ete Kresten preiki gi someni sma èn na someni presi leki now. Moro leki seibi milyun Kotoigi fu Yehovah e meki muiti fayafaya fu preiki a bun nyunsu fu Gado Kownukondre na ini moro leki 230 kondre èn ibri wiki den Kotoigi disi e studeri Bijbel nanga milyunmilyun sma. A preikiwroko disi e sori taki wi e libi na ini den lasti dei.

17. Sortu rai Paulus nanga Petrus gi Kresten na ini a fosi yarihondro?

¹⁷ A de krin taki den warskow fu Yehovah yepi Kresten na ini a fosi yarihondro fu tan abi wan tranga bribi. Fu eksempre, di Paulus ben de na Rome, a taigi Timoteyus: „Mi ben taigi yu san na a soifri leri. Tan waka baka na eksempre di e sori yu fa a leri disi musu de” (2 Tim. 1:13). A musu fu de so taki a sani disi gi Timoteyus deki-ati. Baka di na apostel Petrus gi den Kresten brada fu en deki-ati fu horidoro, fu sori lobi gi makandra èn fu dwengi densrefi, a taki: „Ala ten mi o de klariklari fu memre unu na den sani disi, aladi unu sabi den èn unu e tai hori na den tru tori.”—2 Petr. 1:5-8, 12.

18. Fa den Kresten na ini a fosi yarihondro ben e denki fu den rai di den kisi?

¹⁸ Iya, den brifi di Paulus nanga Petrus skrifi, ben taki fu „den sani di den santa profeiti ben taki fositen” (2 Petr. 3:2). Den fosi-yarihondro Kresten brada fu wi ben mandi di den kisi a rai disi? Nôno, fu di Gado ben sori den taki a lobi den èn dati ben o yepi den ’fu sorgu taki den Masra nanga Frulusuman Yesus Krestes tan sori den bun-ati moro nanga moro èn taki den ben o tan kisi moro nanga moro sabi fu en’.—2 Petr. 3:18.

19, 20. Fu san ede wi musu poti frutrow na ini den warskow fu Yehovah èn fa wi e kisi wini fu den?

¹⁹ Na ini a ten disi wi srefi kan abi a frutrow taki sani o waka bun gi wi efu wi e du san Yehovah e taigi wi na ini Bijbel. A rai na ini en Wortu bun ala ten. (Leisi Yosua 23:14.) Na ini Bijbel wi kan leisi san Gado du gi sondu libisma na ini den dusundusun yari di pasa. Ala den tori dati skrifi fu leri wi wan sani (Rom. 15:4; 1 Kor. 10:11). Wi si fa den Bijbel profeititori kon tru. Profeititori de leki warskow di Gado e gi wi furu yari na fesi. Soleki fa den profeititori e taki, dan na ini „den lasti dei” milyunmilyun sma ben o tron anbegiman fu Yehovah (Yes. 2:2, 3). Dei fu dei grontapu e kon moro ogri. Den sani disi na Bijbel profeititori sosrefi di e kon tru. Soleki fa wi si, dan a bigi wroko di e du now fu preiki a bun nyunsu na heri grontapu e sori taki den wortu fu Yesus e kon tru.—Mat. 24:14.

²⁰ Na ini ala den hondrohondro yari di pasa, wi Mekiman sori krin taki wi kan frutrow na en tapu. A de so taki wi e kisi wini fu den warskow fu en? Iya, wi e kisi wini efu wi poti bribi na ini den warskow dati. Na dati Rosellen du. A sisa disi e fruteri: „Di mi bigin poti frutrow na ini Yehovah, mi bigin si moro krin taki a e horibaka gi mi èn taki a e gi mi krakti fu di a lobi mi.” Meki a de so taki wi srefi e tan kisi wini fu den warskow fu Yehovah.