1. Fu san ede a kownu fu Siria nanga a kownu fu Israel no ben man du san den ben abi na prakseri?

NA INI a di fu aiti yarihondro, na mindri den yari 762 nanga 759 Fosi Krestes, a kownu fu Israel nanga a kownu fu Siria bigin feti nanga a kownukondre Yuda. Fu san ede? Den ben wani teki Yerusalem abra, puru Akas leki kownu èn poti wan tra man na en presi, kande wan sma di no ben de fu a famiri fu Kownu David (Yes. 7:5, 6). Ma a kownu fu Israel ben musu sabi taki dati no ben o pasa fu di Yehovah ben taki dati wan bakapikin fu David ben o tron kownu fu têgo, èn san Gado taki e kon tru ala ten.—Yos. 23:14; 2 Sam. 7:16.

2-4. Tyari kon na krin fa Yesaya 7:14, 16 kon tru (a) na ini a di fu aiti yarihondro Fosi Krestes èn (b) na ini a fosi yarihondro.

² Na a bigin, a ben gersi leki a legre fu Siria nanga Israel ben o wini a legre fu Kownu Akas. Na ini wán feti nomo, Akas lasi 120.000 srudati. Den kiri Maseya, „a manpikin fu Kownu” (2 Kron. 28:6, 7). Ma Yehovah si san pasa. Fu di a memre san a pramisi David, meki a seni a profeiti Yesaya fu tyari wan boskopu gi a pipel fu gi den deki-ati.

³ Yesaya taki: „Wan yongu uma o kon de nanga bere aladi a no sribi nanga wan man ete èn a o kisi wan manpikin di a o kari Imanuwel. . . . Fosi a boi sabi taki a musu wai pasi gi ogri èn du bun, den kondre fu den tu kownu [fu Siria nanga Israel] di unu e frede srefisrefi, o tron brokopresi” (Yes. 7:14, 16). Nofo tron a fosi pisi fu a profeititori abi fu du nanga a ten di a Mesias gebore (Mat. 1:23). Ma fu di den „tu kownu” fu Siria nanga Israel no feti nanga Yuda na ini fosi yarihondro, meki disi e sori taki a profeititori fu Imanuwel kon tru a fosi leisi na a ten fu Yesaya, na ini a di fu aiti yarihondro Fosi Krestes.

 ⁴ Syatu baka di Yesaya meki a prenspari sani disi bekènti, en wefi kon de nanga bere èn a kisi wan manpikin di nen Maher-syalal-kas-bas. A kan taki a pikin disi ben de na „Imanuwel” di Yesaya ben taki fu en. * Na ini Bijbel ten a ben e pasa son leisi taki te wan beibi gebore, sma ben e gi en wan nen, kande fu memre wan spesrutu sani, aladi en papa, mama nanga famiriman ben e kari en na wan tra nen (2 Sam. 12:24, 25). Buweisi no de taki sma kari Yesus Imanuwel.—Leisi Yesaya 7:14; 8:3, 4.

5. Sortu don bosroiti Kownu Akas teki?

⁵ Aladi Israel nanga Siria ben e suku fu teki heri Yuda abra, wan tra kondre di ben abi wan bigi legre ben wani du dati tu. A kondre dati ben de Asiria, wan kownukondre di ben kisi makti moro nanga moro. Yesaya 8:3, 4 e taki dati Asiria ben o teki „den gudu fu Damaskus nanga Samaria” èn a ben o tyari den gowe fosi a go feti nanga a zuidsei kownukondre Yuda. Na presi taki Akas poti frutrow na ini den sani di Gado meki Yesaya taigi en, a trangayesi kownu disi meki wan frubontu nanga den Asiriasma èn te fu kaba den pina den sma fu Yuda (2 Kow. 16:7-10). Akas no ben de wan bun skapuman gi Yuda kwetikweti. A bun fu aksi wisrefi: ’Te mi musu teki prenspari bosroiti, mi e poti frutrow na ini Gado noso na ini libisma?’—Odo 3:5, 6.

6. Fa a tiri fu Akas ben de tra fasi leki a di fu Heskia?

⁶ Akas dede na ini 746 Fosi Krestes èn en manpikin Heskia tron kownu fu a kownukondre Yuda. A pipel ben kon pôti srefisrefi èn den no ben e dini Yehovah moro. San na a fosi sani di Heskia du di a tron kownu? A pruberi fu meki a pipel kon gudu baka? Nôno. Heskia ben lobi Yehovah èn a ben de wan bun skapuman gi a pipel. A fosi sani di a du na taki a seti a tru anbegi baka èn a yepi a trangayesi pipel fu kisi wan bun matifasi nanga Yehovah baka. Di Heskia kon frustan san Gado ben wani taki a du, a du dati wantewante. Iya, Heskia na wan bun eksempre gi wi.—2 Kron. 29:1-19.

7. Fu san ede a ben de prenspari gi den Leifisma taki a nyun kownu taigi den taki a ben o tan horibaka gi den?

⁷ Den Leifisma ben o de prenspari na ini a bigi wroko disi fu seti a tru anbegi baka. Dati meki Heskia ben abi wan konmakandra nanga den pe a taigi den taki a ben o tan horibaka gi den. Prakseri fa den reti-ati Leifisma ben e firi di den ben de na a konmakandra dati. Kande den ben e krei fu prisiri di den yere san a kownu fu den taki: „Unu na den wan di Yehovah poti fu wroko gi en” (2 Kron. 29:11). Iya, den Leifisma ben kisi a komando fu seti a tru anbegi baka.

8. San Heskia du moro fu yepi a pipel anbegi Yehovah baka èn san ben de a bakapisi?

⁸ Heskia kari heri Yuda nanga Israel kon fu hori wan bigi Paskafesa. Baka dati den hori a Fesa fu brede sondro srudeki. A pipel ben e prisiri so te nanga a fesa taki den hori en ete seibi dei. Bijbel e taki: „Bigi prisiri ben de na ini Yerusalem. Sensi a ten fu Salomo, a manpikin fu Kownu David fu Israel, sma no ben meki so furu prisiri na ini Yerusalem leki na a ten dati” (2 Kron. 30:25, 26). A fesa gi a heri pipel deki-ati fu dini Gado fayafaya. Na ini 2 Kroniki 31:1 wi e leisi: „Di a fesa kaba, . . . den broko den santa pilari pisipisi, den koti den santa postu trowe, den broko den hei presi puru pe sma ben e anbegi falsi gado nanga ala den altari.” Na so Yuda bigin drai kon baka na Yehovah. Disi yepi den fu sreka densrefi gi den problema di ben o miti den.

9. (a) Fa a du kon taki Israel no ben man du san den abi na prakseri? (b) Fa Sanherib ben man du san a ben abi na prakseri na a bigin?

⁹ Soleki fa Yesaya taki, dan den Asiriasma kon feti nanga a noordsei kownukondre Israel, den wini den èn den teki a pipel tyari gowe leki katiboman. Disi ben tapu Israel fu poti wan sma di no ben de fu a famiri fu David leki kownu fu Yuda. Ma san den Asiriasma srefi ben abi na prakseri? Now den ben wani go feti nanga Yuda. Bijbel e taki: „Na ini a di fu tinafo yari di Heskia ben e tiri leki kownu, Kownu Sanherib fu Asiria hari go feti nanga den sma fu Yuda di ben e libi na den foto di abi bigi skotu. Na so a teki ala den foto disi abra.” Soleki fa sma taki, dan Sanherib wini 46 foto fu Yuda. Prakseri fa yu ben o firi efu yu ben e libi na Yerusalem na a ten dati. Wan-fru-wan a legre fu Asiria teki den foto fu Yuda abra.—2 Kow. 18:13.

10. Fu san ede wi kan taki dati Mika 5:5, 6 ben gi Heskia deki-ati?

¹⁰ A no de fu taki dati Heskia ben sabi sortu problema ben o miti en nanga a pipel. Ma a no bruya èn a no go suku yepi na wan tra pipel di ben e anbegi falsi gado, leki fa en papa Akas du di a drai baka gi Yehovah. Na presi fu dati a poti frutrow na ini Yehovah (2 Kron. 28:20, 21). Na ini a ten fu Heskia yu ben abi a profeiti Mika di ben taki fu Asiria: „Te den Asiriasma kon . . . wi o seni seibi skapuman gi den. Iya, wi o seni aiti libisma di o tiri leki granman. Nanga feti-owru den o tiri den sma fu Asiria” (Mika 5:5, 6). A kan taki Heskia ben sabi a profeititori fu Mika. A no de fu taki dati a boskopu disi ben gi Heskia deki-ati, fu di dati ben sori taki wan tra sortu legre ben o opo go feti nanga den Asiriasma èn taki te fu kaba a legre disi ben o wini na ogri-ati feanti dati.

11. O ten a profeititori fu den seibi skapuman nanga den aiti granman o kon tru na wan moro prenspari fasi?

¹¹ A profeititori fu den seibi skapuman nanga den aiti granman ben o kon tru na wan moro prenspari fasi. A ben o kon tru wan heri pisi ten baka te Yesus, a „tiriman fu Israel” gebore. A tiriman disi ben „de bun langa kaba, sensi owruten”. (Leisi Mika 5:1, 2.) Fu taki en leti, a profeititori disi o kon tru na ini a ten di e kon te wan  feanti di yu kan teki gersi nanga „den Asiriasma”, o wani du den futuboi fu Yehovah ogri. Ma Yehovah o gebroiki wan legre fu feti nanga den feanti fu en pipel èn en Manpikin o tiri a legre dati. Sortu legre a o gebroiki? Na ini a tra artikel wi o taki fu a tori disi. Ma meki wi go luku fosi san wi kan leri fu den sani di Heskia du di den Asiriasma ben wani kon feti nanga Yuda.

12. San Heskia nanga den sma di ben de nanga en, du fu kibri a pipel fu Gado?

¹² Ala ten Yehovah de klariklari fu du sani gi wi di wi no man du gi wisrefi. Ma a wani taki wi srefi meki muiti tu fu du ala san wi man. Heskia go taki „nanga den granman èn nanga den tranga man fu en” èn a bosroiti fu „tapu den watra-olo di ben de dorosei fu a foto. . . . Boiti den sani disi, Heskia teki deki-ati, dan a bow ala den pisi fu a skotu di ben broko èn a meki toren na tapu a skotu. A meki ete wan skotu lontu a skotu disi. . . . A meki bun furu lansri tu nanga skelt” (2 Kron. 32:3-5). Na a ten dati Yehovah gebroiki deki-ati man soleki Heskia, den granman fu en nanga den profeiti di ben abi tranga bribi, fu kibri en pipel èn fu yepi den.

13. San ben de a moro prenspari sani di Heskia du fu sreka a pipel di den Asiriasma ben wani kon feti nanga den? Tyari disi kon na krin.

¹³ A sani di Heskia du baka dati ben prenspari moro leki san a du di a tapu den peti èn di a meki ete wan skotu lontu a foto. Fu di Heskia ben de wan skapuman di ben broko en ede nanga a pipel fu en, meki a kari a pipel kon na wán, dan a gi den deki-ati nanga den wortu: „No beifi èn no meki a kownu fu Asiria . . . tapu skreki gi unu, bika den wan di de nanga wi, furu moro den wan di de nanga en. En e frutrow na tapu a krakti fu libisma, ma wi sabi taki Yehovah wi Gado o yepi wi. Na en o feti den feti fu wi.” A sani disi ben tranga a pipel fu Yehovah fu di den ben sabi taki a ben o feti gi den. Di den Dyu „yere den sani di Kownu Heskia fu Yuda taki, den kisi deki-ati”. Luku taki na ’den sani di Kownu Heskia taki’, meki a pipel kisi deki-ati. En nanga den granman, den tranga man, sosrefi a profeiti Mika nanga Yesaya ben de bun skapuman, soleki fa a profeititori fu Yehovah ben sori kaba.—2 Kron. 32:7, 8; leisi Mika 5:5, 6.

14. San Rabsakei taki èn san a pipel du?

¹⁴ A kownu fu Asiria ben seti a legre fu en na Lakis, sowan 44 kilometer fu Yerusalem. Dan a seni dri boskopuman fu taigi den sma fu a foto taki den musu gi densrefi abra na den Asiriasma. A moro prenspari boskopuman, di den ben kari Rabsakei, kon nanga difrenti sani fu kisi a pipel. Fosi, a taki Hebrewtongo fu kori a pipel so taki den drai baka gi a kownu èn so taki den saka densrefi na ondro den Asiriasma. A lei gi den taki efu den ben o du dati, a ben o tyari den go na wan tra kondre pe den ben o libi wan moro bun libi. (Leisi 2 Kownu 18:31, 32.) Baka dati Rabsakei taigi den taki neleki fa den gado fu den tra pipel no ben man yepi den anbegiman fu den, na so Yehovah no ben o man puru den Dyu na ini na anu fu den Asiriasma. Ma a pipel teki a koni bosroiti fu no arki den lei fu Rabsakei. Na ini a ten disi den futuboi fu Yehovah e teki na eksempre fu a pipel fu Yuda.—Leisi 2 Kownu 18:35, 36.

15. San den sma fu Yerusalem ben musu du èn fa Yehovah frulusu a foto?

¹⁵ Wi kan frustan taki Heskia skreki di a yere a sani disi. Ma na presi fu go suku yepi na wan tra kondre, a seni kari Profeiti Yesaya. Yesaya taigi Heskia: „[Sanherib] no o kon na ini a foto disi èn a no o sutu nowan peiri na ini tu” (2 Kow. 19:32).  A wan-enkri sani di den sma fu Yerusalem ben musu du na taki den ben musu sori deki-ati èn den no ben musu frede. Yehovah ben o feti gi Yuda. Na dati a du tu. „A srefi neti dati na engel fu Yehovah pasa go na ini a legrekampu fu den Asiriasma, dan a kiri wán hondro aititenti na feifi dusun srudati” (2 Kow. 19:35). A no fu di Heskia tapu den peti fu a foto noso fu di a bow ete wan skotu lontu a foto, meki Yuda kisi frulusu, ma na fu di Gado yepi den.

16. Suma na ini a ten disi na (a) den sma fu Yerusalem (b) „den Asiriasma” (c) den seibi skapuman nanga den aiti granman?

¹⁶ A profeititori fu den seibi skapuman nanga den aiti granman e kon tru na wan moro prenspari fasi na ini a ten disi. Na ini owruten den Asiriasma go feti nanga den sma fu Yerusalem. Na ini a ten di e kon, den disiten „Asiriasma” o wani pori a pipel fu Gado tu. Bijbel e taki dati disi ben o pasa, ma a e taki sosrefi dati ’Gok fu Magok’, „a kownu fu noordsei” nanga „den kownu fu grontapu” ben o feti nanga Gado pipel (Esek. 38:2, 10-13; Dan. 11:40, 44, 45; Openb. 17:14; 19:19). Ma den sani disi abi fu du nanga difrenti feti? Dati no abi fu de so. Kande Bijbel e taki fu a srefi feti, ma a e kari en na difrenti fasi. Soleki fa a profeititori fu Mika e sori, dan sortu legre Yehovah o gebroiki te den Asiriasma di de ogri-ati feanti o wani feti nanga en pipel? A legre disi na wan tumusi aparti wan. A abi ’seibi skapuman, iya, aiti granman’ (Mika 5:5). Den skapuman nanga den granman fu a spesrutu legre disi na den gemeente owruman (1 Petr. 5:2). Na ini a ten disi Yehovah sorgu taki furu lepi man tron skapuman di musu luku den skapu fu en di warti srefisrefi. Den man disi e gi a pipel fu en deki-ati so taki den de srekasreka te den disiten „Asiriasma” o kon feti nanga den. * A profeititori fu Mika e taki dati ’den o tiri den sma fu Asiria nanga feti-owru’ (Mika 5:6). Iya, wan fu „den fetisani di wi e gebroiki fu feti” o de „a feti-owru fu a yeye, dati na Gado Wortu”.—2 Kor. 10:4; Ef. 6:17.

17. Sortu fo sani owruman kan leri fu a tori di wi luku didyonsro?

¹⁷ Owruman di e leisi na artikel disi kan leri furu fu a tori di wi luku didyonsro: (1) A moro bun sani di wi kan du fu de srekasreka te „den Asiriasma” o kon feti nanga wi, na taki wi musu tranga wi bribi na ini Gado èn wi musu yepi wi brada nanga sisa fu du a srefi tu. (2) Te „den Asiriasma” o kon feti nanga wi, den owruman musu de seiker taki Yehovah o frulusu wi. (3) Na a ten dati Yehovah en organisâsi o taigi wi san wi musu du fu kibri wi libi. Kande a o gersi leki a rai disi no bun fu di wi e denki leki fa libisma e denki. Ma wi alamala musu de klariklari fu gi yesi na ala den rai di wi e kisi, awinsi wi e agri nanga dati noso wi no e agri. (4) Iniwan sma di e poti en frutrow na tapu skoroleri, gudu, noso libisma organisâsi musu kenki en denki now. Den owruman musu de srekasreka fu yepi iniwan sma di no e poti frutrow na ini Yehovah.

18. Te wi e prakseri den tori di wi luku, dan fa dati o yepi wi na ini a ten di e kon?

¹⁸ Wan ten o kon te a o gersi leki wi no o man yepi wisrefi neleki fa a ben de nanga den Dyu na ini Yerusalem na a ten fu Heskia. Te dati pasa, dan meki wi alamala teki deki-ati fu den wortu fu Heskia. Meki wi hori na prakseri taki den feanti fu wi „e frutrow na tapu a krakti fu libisma, ma wi sabi taki Yehovah wi Gado o yepi wi. Na en o feti den feti fu wi.”—2 Kron. 32:8.