1. San furu sma de klariklari fu du èn fu san ede?

SMA de klariklari fu du ala san den man fu kan kisi wan sani di prenspari gi den. Papa nanga mama e gi den ten, moni nanga krakti fu yepi den pikin fu den. Yongusma di e du sport èn di wani teki prati na den Olempis Prei e wroko tranga èn den e oefen ibri dei omeni yuru langa. Den no kan go prei èn abi prisiri leki den speri fu den. Yesus srefi ben de klariklari fu gi ensrefi fu man du san ben de prenspari gi en. A no ben suku fu kon gudu èn a no ben kisi pikin. Na presi fu dati a ben wani gi ala en krakti fu horibaka gi Gado Kownukondre (Mat. 4:17; Luk. 9:58). Den bakaman fu en sosrefi ben e du ala san den man fu horibaka gi a Kownukondre dati. A Kownukondre ben de a moro prenspari sani gi den èn fu dati ede den ben de klariklari fu gi densrefi (Mat. 4:18-22; 19:27). Dati meki a bun fu aksi wisrefi: ’San na a moro prenspari sani na ini mi libi?’

2. (a) Sortu prenspari sani ala tru Kresten musu du? (b) Fa son Kresten du ala san den man gi a Kownukondre?

² Wan tu prenspari sani de di ala tru Kresten musu du fu kan abi wan bun matifasi nanga Yehovah. Fu eksempre, den musu gi den ten nanga den krakti fu begi, den musu leisi Bijbel, hori na osofamiri anbegi, go na den konmakandra èn du a preikiwroko (Yos. 1:8; Mat. 28:19, 20; Hebr. 10:24, 25). * Fu di wi e du muiti èn fu di Yehovah e blesi wi, meki a preikiwroko e go na fesi èn furu sma e tan go na „a bergi fu na oso fu Yehovah” (Yes. 2:2). Fu horibaka gi a Kownukondre, yu abi furu Kresten di e du ala san den man fu kan dini na Betel, fu yepi bow Kownukondre zaal nanga kongreshal, fu orga kongres noso fu yepi te wan rampu pasa. Aladi wi  no de fruplekti fu du den sani disi fu kan kisi têgo libi, toku den sani disi musu du fu meki a Kownukondre wroko na ini a ten disi go na fesi.

3. (a) Sortu wini wi o kisi te wi e du ala san wi man gi a Kownukondre? (b) Sortu aksi wi musu go luku?

³ Noiti ete a ben de so prenspari leki na ini a ten disi fu du ala san wi man gi a Kownukondre. A moi fu si taki furu sma de klariklari fu gi densrefi. (Leisi Psalm 54:6.) Te wi e du disi, dan wi o de koloku aladi wi e wakti Gado Kownukondre (Deut. 16:15; Tori 20:35). Ma wi alamala musu ondrosuku wisrefi finifini. Fa wi kan du moro gi a Kownukondre? Fa wi e gebroiki wi ten, wi moni, wi krakti nanga a koni di wi abi fu du wan sani bun? Nanga sortu sani wi musu luku bun? Meki wi go luku wan tu eksempre di abi fu du nanga ofrandi di sma ben tyari fu di den ben firi fu du dati. Den eksempre disi o yepi wi fu abi moro prisiri.

4. Sortu wini den Israelsma ben o kisi te den ben e tyari ofrandi?

⁴ Efu wan sma na ini Israel ben wani kisi pardon fu sondu, a ben musu tyari ofrandi. Den ofrandi dati ben de fanowdu efu a pipel ben wani taki Yehovah feni den bun. Den ben de fruplekti fu tyari son ofrandi fu di Gado Wèt ben taki so. Ma tra ofrandi den ben kan tyari fu di den ben firi fu du dati (Lef. 23:37, 38). Den bron-ofrandi fu den ben kan de leki wan presenti gi Yehovah. Wan okasi pe sma ben e tyari furu ofrandi gi Yehovah ben de na a ten di den gi a tempel fu Salomo abra na Gado.—2 Kron. 7:4-6.

5. San Yehovah ben seti gi sma di no ben man gi so furu?

⁵ Fu di Yehovah na wan lobi-ati Gado, meki a ben sabi taki a no ala sma ben kan gi a srefi sani leki ofrandi. Dati meki a ben wani taki sma gi soso san den ben man. A wèt fu Yehovah ben taki dati a brudu fu wan meti ben musu kanti trowe. Disi ben o de ’wan skaduw fu den bun sani di ben musu kon ete’ nanga yepi fu en Manpikin Yesus (Hebr. 10:1-4). Ma Yehovah no ben de nomonomo taki na wán spesrutu sortu meti den ben musu tyari leki ofrandi. Fu eksempre, efu wan sma no ben man tyari wan skapu noso wan bokoboko leki ofrandi, dan a ben kan gi doifi èn Gado no ben o mandi nanga dati. Na so fasi srefi pôtisma  ben kan prisiri fu tyari ofrandi gi Yehovah (Lef. 1:3, 10, 14; 5:7). Aladi Yehovah ben feni en bun taki sma ben e tyari difrenti meti leki ofrandi, toku tu sani ben de di ibri sma ben musu du te a ben e firi fu tyari wan ofrandi leki presenti.

6. (a) San na tu sani di ibri sma ben musu du te a ben e tyari ofrandi? (b) O prenspari a ben de fu du den tu sani disi?

⁶ A fosi sani na taki a sma ben musu gi a moro bun sani di a abi. Yehovah taigi a pipel taki ala meti di den ben tyari leki ofrandi ben musu de gosontu efu den ben wani taki Gado feni den bun (Lef. 22:18-20). Efu wan meti ben siki noso a ben abi wan mankeri, dan Yehovah no ben o teki na ofrandi dati. A di fu tu sani na taki a sma di ben tyari na ofrandi ben musu krin fu di a Wèt ben taki so. Te wan sma no ben krin, a ben musu tyari wan sondu-ofrandi noso wan pardon-ofrandi fu kon bun baka nanga Yehovah. Dan fosi a ben kan tyari wan ofrandi leki presenti (Lef. 5:5, 6, 15). Disi ben de wan seryusu tori. Yehovah ben taki dati efu wan sma di no krin ben o nyan fu wan freide-ofrandi, di a ben tyari leki presenti, dan a sma dati ben musu dede (Lef. 7:20, 21). Ma te wan sma di krin na ini Yehovah ai ben o tyari wan ofrandi di no ben mankeri noti, dan a sma disi ben o abi bigi prisiri nanga wan bun konsensi.—Leisi 1 Kroniki 29:9.

7, 8. (a) Fa furu sma e prisiri fu du moro gi a Kownukondre? (b) San wi kan gebroiki fu du moro gi Yehovah?

⁷ Na ini a ten disi furu sma de klariklari tu fu du moro gi Yehovah èn a breiti nanga dati. Wi e kisi furu prisiri te wi e gi wisrefi fu yepi den brada nanga sisa fu wi. Wan brada di e yepi bow Kownukondre zaal èn di e yepi brada nanga sisa te wan rampu pasa, e taki dati a no man fruteri o furu prisiri a e gi en fu yepi sma na a fasi disi. A e taki: „Te mi e si fa den brada nanga sisa e prisiri èn fa den breiti nanga a nyun Kownukondre zaal fu den noso nanga a yepi di den e kisi baka wan rampu, dan mi sabi taki a wroko nanga a muiti di mi du no ben de fu soso.”

⁸ Ala ten Yehovah en organisâsi na ini a ten disi suku okasi fu horibaka gi a wroko fu en. Na ini 1904 Brada C. T. Russell taki dati ibriwan fu wi musu du ala san wi man fu gebroiki wi ten, wi krakti, wi moni nanga tra sani fu meki Yehovah kisi glori.  Aladi wi musu meki muiti fu du sani gi Yehovah, toku wi e kisi furu blesi (2 Sam. 24:21-24). Wi kan gebroiki den sani di wi abi na wan moro bun fasi?

9. San wi e leri fu Lukas 10:2-4 te a abi fu du nanga a fasi fa wi musu gebroiki wi ten?

⁹ Wi ten. A e teki furu ten nanga muiti fu vertaal èn druk den buku fu wi, fu bow konmakandra presi, fu orga bigi konmakandra, fu yepi brada nanga sisa te wan rampu pasa èn fu du furu tra prenspari sani. Ma wi abi soso wan tu yuru wan dei fu du ala den sani disi. Yesus gi wi bun rai fu yepi wi na ini a tori disi. Di a seni den disipel fu en go preiki, a taigi den fu no „brasa nowan sma fu gi en odi” (Luk. 10:2-4). Fu san ede a gi a rai disi? Wan Bijbel sabiman e taki: „Te wi e taki sma odi, dan a kan taki wi e boigi wi ede pikinso, noso taki wi e seki anu nanga a sma. Ma den sma fu den kondre fu owstusei no ben taki odi na a fasi dati. Den ben gwenti fu brasa sma wan lo leisi, fu boigi den ede èn srefi fu boigi nanga den fesi go na gron. Fu du ala den sani disi, ben teki furu ten.” Yesus no taigi den bakaman fu en fu no gi sma odi. Ma a yepi den fu si taki den no ben abi furu ten. Dati meki den ben musu du muiti fu gebroiki a ten dati gi den moro prenspari sani (Ef. 5:16). Wi kan fiti a rai fu Yesus? Te wi e du dati, dan wi o abi moro ten fu horibaka gi a Kownukondre wroko.

10, 11. (a) Fa den brada e gebroiki a moni di wi e gi leki bijdrage, fu horibaka gi a wroko di e du na heri grontapu? (b) Fa a rai na 1 Korentesma 16:1, 2 kan yepi wi?

¹⁰ Wi moni. Furu moni de fanowdu fu horibaka gi a Kownukondre wroko. Ibri yari den brada e gebroiki milyunmilyun Amerkan dala fu pai gi den kostu fu kring-opziener, distrikt-opziener, spesrutu pionier nanga zendeling. Sensi 1999, moro leki 24.500 Kownukondre zaal bow na ini pôti kondre. Toku sowan 6400 Kownukondre zaal de fanowdu ete. Ibri mun den brada e druk sowan 100 milyun Waktitoren nanga Ontwaakt! Ala den sani disi den man du fu di yu e gi moni fu horibaka gi a wroko.

¹¹ Na apostel Paulus ben gi wi rai di e sori san wi kan du te wi wani gi bijdrage. (Leisi 1 Korentesma 16:1, 2.) Paulus ben gi den Kresten brada fu Korente deki-ati fu no wakti teleki a kaba fu a wiki, ma fu bosroiti na a bigin fu a wiki omeni moni den ben kan gi. Na so fasi den no ben o gi san tan abra fu a moni fu den. Neleki fa a ben de na ini a fosi yarihondro, na so brada nanga sisa na ini a ten disi e sreka sani na fesi, so taki den sabi san den man gi na a kaba fu a mun (Luk. 21:1-4; Tori 4:32-35). Yehovah breiti te sma e gi nanga den heri ati.

12, 13. Fu san ede son sma denki taki den no man gi Yehovah moro fu a krakti nanga a koni fu den, ma fa Yehovah kan yepi den sma disi?

¹² Wi krakti nanga a koni di wi abi fu du wan sani bun. Yehovah e yepi wi te wi e meki muiti fu gebroiki wi krakti nanga a koni fu wi fu horibaka gi a Kownukondre. A pramisi wi taki a o yepi wi te wi kon weri (Yes. 40:29-31). Yu abi a firi taki a koni di yu abi no bun nofo fu yepi nanga a wroko? Yu denki taki trawan de di betre moro yu fu du a wroko dati? Hori na prakseri taki Yehovah kan gi wi a koni fu du sani moro bun, neleki fa a ben du dati nanga Besaleyel nanga Oholiab.—Eks. 31:1-6; luku a prenki na a bigin fu na artikel.

¹³ Yehovah e gi wi deki-ati fu du ala san wi man nanga wi heri ati (Odo 3:27). Di a pipel ben e bow a tempel baka, dan Yehovah taigi den Dyu na Yerusalem fu aksi densrefi san den ben e du fu horibaka gi a bow-wroko (Hag. 1:2-5). Den ben meki tra sani puru den prakseri èn dati meki a wroko fu Yehovah no ben de na a fosi presi moro na ini den libi. A ben o bun fu aksi yusrefi: A wani fu Yehovah na a moro prenspari  sani gi mi? Kande yu musu go prakseri fa a de nanga yu libi. Aksi yusrefi: Fa mi kan du moro fu horibaka gi Gado Kownukondre na ini den lasti dei disi?

14, 15. (a) Fa na eksempre fu den pôti brada fu wi e gi wi deki-ati? (b) San wi musu angri fu du?

¹⁴ Furu sma e libi na ini kontren pe a libi muilek srefisrefi noso pe sma pôti. Te den brada nanga sisa fu wi di e libi na ini den kondre dati e mankeri wan sani, dan na organisâsi fu wi e pruberi fu „yepi” den (2 Kor. 8:14). Ma srefi te brada no abi furu, den e feni en wan bigi grani fu gi san den man. Yehovah breiti te pôti brada nanga sisa e gi sani nanga den heri ati.—2 Kor. 9:7.

¹⁵ Na ini wan kondre fu Afrika di pôti srefisrefi, son brada nanga sisa e gebroiki wan pikin pisi fu den dyari fu prani sani di den e seri bakaten èn nanga a moni dati den e horibaka gi a Kownukondre wroko. Na ini a srefi kondre dati, den brada ben seti sani fu bow wan Kownukondre zaal di den ben abi tranga fanowdu. Den brada nanga sisa fu a kontren dati ben wani yepi nanga a wroko. Ma a bow-wroko ben o du na a ten te den ben musu prani gron. Toku den ben wani yepi bow a Kownukondre zaal. Dati meki den du a bow-wroko na deiten èn na mofoneti den go prani gron. Iya, a moi fu si fa den brada nanga sisa disi gi ala san den man. Disi e meki wi denki den brada fu Masedonia na ini a fosi yarihondro. „Den ben pôti srefisrefi”, ma toku den begi den brada fu yepi nanga a wroko di ben musu du (2 Kor. 8:1-4). Meki wi srefi gi san wi man fu sori taki wi de nanga tangi gi den blesi di Yehovah e gi wi.—Leisi Deuteronomium 16:17.

16. Fa wi kan sorgu taki den sani di wi e du gi Yehovah, na sani di a feni bun?

¹⁶ Ma te wi e du moro gi Yehovah, wi musu luku bun taki wi no e frigiti den moro prenspari sani, soleki wi osofamiri. Neleki fa den Israelsma ben musu sorgu taki Gado feni den ofrandi bun di den ben tyari leki presenti, na so wi srefi musu sorgu taki den sani di wi e du gi Gado, na sani di a feni bun. Wi musu hori na prakseri taki wi osofamiri nanga na anbegi fu wi na a moro bigi frantwortu di wi abi. Te wi e gebroiki wi ten nanga den sani di wi abi fu yepi trawan, dan disi no musu meki taki wi no man yepi wi osofamiri fu abi wan bun matifasi nanga Yehovah èn taki wi no man sorgu den. Efu wi ben o du dati, dan yu kan taki dati wi e gi Gado san wi no abi. (Leisi 2 Korentesma 8:12.) Boiti dati, wi musu tan tranga a matifasi di wi srefi abi nanga Yehovah (1 Kor. 9:26, 27). Ma wi kan de seiker taki te wi e du san Bijbel taki, dan den sani di wi e du gi Yehovah o gi wi furu prisiri èn a o feni den bun.

17, 18. Fa wi e si den sma di de klariklari fu du ala san den man gi a Kownukondre èn san wi alamala musu go luku?

¹⁷ Furu brada nanga sisa fu wi e ’gi densrefi leki wan dringi-ofrandi di kanti trowe’ fu di den e horibaka gi a Kownukondre wroko (Fil. 2:17). Wi abi furu warderi gi den sma di sori taki den de klariklari fu gi densrefi. Den wefi nanga den pikin fu den brada di e teki fesi na ini a Kownukondre wroko, e sori taki den de klariklari fu gi densrefi nanga den heri ati. Wi wani prèise den gi dati.

¹⁸ Wi musu wroko tranga fu horibaka gi a Kownukondre. Meki wi alamala begi Gado fu yepi wi fu go luku san wi kan du moro fu horibaka gi a wroko. Yu kan de seiker taki wi o kisi bigi blesi now èn moro bigi blesi „na ini a ten di e kon”.—Mark. 10:28-30.