1, 2. (a) Na sortu tra fasi sma kan kon breni? (b) San wi sabi fu Gado Kownukondre?

KANDE yu si kaba taki te wan sani pasa, dan nofo tron ibriwan fu den sma e memre a tori na wan tra fasi. Na so a de tu taki son leisi te datra taigi wan sma sortu siki a abi, dan a no man memre ala sani di a datra taigi en baka dati. Son tron a e pasa tu taki wan sma no man feni en sroto noso en bril, aladi a sani dati de leti na en fesi. Fu san ede disi e pasa? Ondrosukuman e taki dati te wi e pruberi fu du moro leki wán sani na a srefi ten, dan a gersi leki wi e kon breni na wan sortu fasi. Soleki fa a sori, dan wi edetonton no man poti prakseri na difrenti sani na a srefi momenti.

² Na so a de taki te a abi fu du nanga den sani di e pasa na grontapu na ini a ten disi, dan a gersi leki furu sma breni na wan sortu fasi tu. Kande den e agri taki sensi 1914 furu sani kenki na grontapu. Ma den no e si san den sani disi wani taki trutru. Wi leki Bijbelstudenti sabi taki Gado Kownukondre kon na ini 1914 di Yesus tron Kownu na hemel. Ma te wi e  luku a begi „Meki yu Kownukondre kon. Meki yu wani pasa na grontapu soleki fa a e pasa na hemel”, dan wi e si taki a no ala sani fu a begi disi kon tru ete (Mat. 6:10). A begi disi o kon tru dorodoro te na ogri grontapu disi kisi pori. Dan fosi a wani fu Gado o pasa na grontapu soleki fa a pasa kaba na hemel.

3. Sortu wini wi o kisi te wi e studeri Gado Wortu?

³ Fu di wi gwenti studeri Gado Wortu, meki wi kan si taki profeititori e kon tru nownowde. Ma furu sma no e si disi. Den no e si den krin buweisi di e sori taki Krestes e tiri sensi 1914 èn taki dyonsro a o tyari a krutu fu Gado kon. Awinsi yu e dini Gado someni yari kaba, a bun fu aksi yusrefi: ’Mi e bribi ete taki wi e libi na ini wan prenspari ten?’ Srefi te yu no de wan Kotoigi so langa ete, yu kan aksi yusrefi: ’Na sortu sani mi e poti prakseri moro furu?’ Awinsi san na a piki fu yu, meki wi go luku now sortu dri prenspari sani e sori taki a wani fu Gado o pasa na grontapu heri esi.

4, 5. (a) San Yesus du sensi 1914? (Luku a prenki na a bigin fu na artikel.) (b) San den dri man di e rèi den asi e prenki èn fa a profeititori disi kon tru?

⁴ Na ini 1914 Yesus Krestes tron Kownu fu Gado Kownukondre na hemel. A profeititori di skrifi na ini Openbaring kapitel 6 e taki dati Yesus e rèi na tapu wan weti asi. Di a tron Kownu, dan wantewante a hari go feti nanga na ogri grontapu fu Satan èn te fu kaba a o wini den alamala. (Leisi Openbaring 6:1, 2.) A profeititori disi e sori wi finifini san ben o pasa baka di Gado Kownukondre seti. A situwâsi na grontapu ben o go na baka esi-esi. Feti, angriten, takru siki nanga tra sani ben o kiri ipi-ipi sma. Soleki fa a profeititori e sori, dan den dri man di e rèi na tapu den asi leti na baka Yesus Krestes, e prenki den sani disi.—Openb. 6:3-8.

⁵ Soleki fa Bijbel taki, dan ’feti ben kon na grontapu’, aladi furu kondre ben pramisi fu wroko makandra fu tyari freide kon. A Fosi Grontapufeti ben de a fosiwan fu den bigi feti di ben o puru freide na grontapu. Angriten e meki tu taki furu kondre e feti nanga makandra, aladi na ekonomia e go na fesi èn sabiman e kon nanga ala sortu nyun sani. Boiti dati, ala sma sabi taki ’takru siki’ nanga rampu e kiri milyunmilyun sma ibri yari. Ala den sani disi e kon moro ogri, den e pasa baka makandra èn den e kiri moro sma. Noiti ete sani ben de so ogri leki now. Yu e frustan san disi wani taki?

6. Suma si fa Bijbel profeititori kon tru èn san den du baka dati?

⁶ Na ini 1914 èn den yari baka dati, sma ben poti ala den prakseri na a Fosi Grontapufeti nanga a Spanyoro griep. Ma den salfu Kresten ben sabi taki na ini 1914 wan kaba ben o kon na a ten fu sma di no de Dyu, noso na „a reti ten fu den trakondre sma” (Luk. 21:24). Aladi den no ben sabi finifini san ben o pasa, toku den ben sabi taki wan prenspari sani ben o pasa na ini 1914 na ini Gado Kownukondre. Di den kon si fa Bijbel profeititori kon tru, den meki bekènti wantewante taki Gado Kownukondre bigin tiri. A muiti di den meki fu preiki a Kownukondre ben abi leki bakapisi taki sma bigin frufolgu den hebi. A sani disi srefi ben de a kontru fu Bijbel profeititori. Na ini den yari di ben kon baka dati, den feanti fu a Kownukondre „meki wèt fu kan du ogri”. Den du ogri-ati sani tu nanga den futuboi  fu Gado, den poti den na strafu-oso èn den kiri den srefi fu di den anga den, den sutu den nanga gon noso den koti den ede puru.—Ps. 94:20; Openb. 12:15.

7. Fu san ede furu sma no e si o prenspari den sani de di e pasa na grontapu na ini a ten disi?

⁷ Aladi someni buweisi de taki Gado Kownukondre seti kaba na hemel, toku furu sma no e si disi. Fu san ede? San meki den no man si taki den sani di e pasa na grontapu na wan kontru fu Bijbel profeititori èn taki Gado pipel e preiki fu disi furu yari kaba? A de so taki furu sma e poti prakseri nomo na san ai e si? (2 Kor. 5:7) A kan taki den e poti someni prakseri na den eigi libi nomo taki den no e si san Gado e du? (Mat. 24:37-39) A de so taki a denki nanga den tra sani fu Satan grontapu e breni den? (2 Kor. 4:4) Fu frustan san Gado Kownukondre e du nownowde, wi musu abi bribi èn wi musu man si san e pasa. Wi musu breiti taki wi no breni èn taki wi e frustan ala sani di e pasa na grontapu.

8-10. (a) Fa 2 Timoteyus 3:1-5 kon tru? (b) Fu san ede wi kan taki dati sma e du ogri moro nanga moro?

⁸ Wan di fu tu sani di e sori taki heri esi Gado Kownukondre o tiri grontapu, na taki dei fu dei grontapu e kon ogri moro nanga moro. Sowan wán hondro yari kaba wi kan si den sani di skrifi na ini 2 Timoteyus 3:1-5. Den tekst disi e sori na sortu fasi sma ben o tyari densrefi èn na heri grontapu wi e si disi e pasa. Yu e si en tu? Meki wi go luku wan tu eksempre di e sori disi krin.—Leisi 2 Timoteyus 3:1, 13.

⁹ Fu eksempre, den sani di e pasa now na skoro, na wrokope, na telefisi, radio, sport, noso a fasi fa sma e meki modo, ben o seki den sma fu den yari na mindri 1940 nanga 1960. Ma na ini a ten fu wi furu sma no e skreki fu den ogri di trawan e du noso fu a morsu fasi fa den e libi. Sma e du ogri, den e libi wan morsu libi, noso den e du ala sortu ogri-ati sani soso  fu hari sma prakseri. Telefisi programa di furu sma na ini den yari baka 1950 no ben feni bun, sma na ini a ten disi e sidon luku nanga a heri osofamiri fu di den no abi problema nanga den sortu programa dati. Furu sma e si tu taki homo e panya a denki fu den na tapu telefisi, tapu Internet noso na ini poku èn den abi krakti tu tapu sani di de na modo. Boiti dati, na ala sei den e gi sma deki-ati fu libi leki fa den e libi. Wi kan breiti trutru taki wi sabi fa Gado e denki fu den sortu tori disi.—Leisi Yudas 14, 15.

¹⁰ Noso luku fa sma na ini den yari baka 1950 ben e si den ogri di yongusma fu a ten dati ben e du. Furu papa nanga mama fu a ten dati ben broko den ede te den pikin fu den ben e smoko, te den ben e dringi sopi noso ten den ben e dansi na wan morsu fasi. Ma fa yonguwan e tyari densrefi na ini a ten disi? Nofo tron wi e yere na ini nyunsu sortu ogri den e du èn den sani disi e seki wi. Fu eksempre, wan boi fu 15 yari sutu na tapu den pikin fu en klas. Tu fu den dede èn 13 trawan kisi mankeri. Wan grupu yonguwan di drungu, kiri wan meisje fu neigi yari èn den fon a papa fu a meisje nanga wan tra famiriman fu en. Nyunsu na ini wan kondre na Asia e taki dati na ini den tin yari di pasa, afu fu den ogri na ini a kondre na sani di yonguwan du. Wan sma kan taki dan taki sani no kon moro ogri?

11. Fu san ede furu sma no e si taki sani e kon ogri moro nanga moro?

¹¹ Na apostel Petrus ben taki krin: „Na ini den lasti dei spotuman o kon di o teki sani meki spotu. Den o du san den eigi takru lostu meki den du. Den o taki: ’A ben pramisi wi taki a ben o kon. Ma pe a de? We, sensi a dei di den afo fu wi dede, ala sani tan soifri soleki fa den ben de sensi di Gado bigin meki sani’” (2 Petr. 3:3, 4). Fu san ede son sma e taki disi? Soleki fa a sori, dan o moro sma e kon gwenti wan sani, o moro den no e poti prakseri na a sani dati. Efu wan mati fu wi e kenki wantronso èn a e bigin tyari ensrefi na wan fasi di no fiti, dan disi e seki wi kande. Ma efu a e pasa taki safrisafri sma na wi lontu e bigin tyari densrefi na wan fasi di no fiti, dan a kan taki wi no e si disi fu di wi kon gwenti en. Ma toku a sani disi na wan seryusu sani èn wi musu luku bun.

12, 13. (a) Fu san ede wi no musu lasi-ati te wi e si san e pasa na grontapu? (b) San wi musu frustan fu man horidoro na ini a ten disi di „tranga fu pasa”?

¹² Na apostel Paulus ben warskow wi taki „na ini den lasti dei” a ten ben o „tranga fu pasa” (2 Tim. 3:1). Ma toku wi man pasa den muilek ten disi. Sobun, a no de fanowdu fu go kibri gi grontapu. Te sani no e go leki fa wi wani noso te wi e frede, dan Yehovah, a yeye fu en nanga a gemeente kan yepi wi. Wi man tai hori na Gado. „A krakti di bigi pasa marki” no e kon fu wisrefi, ma a e kon fu Gado.—2 Kor. 4:7-10.

¹³ A bun fu hori na prakseri taki Paulus e bigin a profeititori fu den lasti dei nanga den wortu „sabi taki”. Den wortu disi e gi wi a dyaranti taki san Paulus taki baka dati o pasa trutru. Wi sabi taki grontapu o kon ogri moro nanga moro teleki Yehovah tyari wan kaba kon na en. A historia e sori taki heriheri libimakandra noso kondre pori fu di sma no ben hori densrefi moro na san bun èn san ogri. Noiti ete a pasa taki someni sma na grontapu no e hori densrefi na san bun èn san ogri. A kan taki furu sma e weigri fu si san disi wani taki. Ma den sani di e pasa sensi 1914, e sori wi krin taki dyonsro Gado Kownukondre o tyari wan kaba kon na ala ogri.

14-16. San na wan di fu dri sani di e meki wi bribi taki Gado Kownukondre o „kon” heri esi?

¹⁴ A historia fu Gado pipel na wan di fu dri sani di e sori wi taki a kaba de krosibei. Fu eksempre, syatu fosi Gado Kownukondre seti na hemel, wan grupu salfu Kresten ben e dini Gado fayafaya. Wan tu fu den sani di den ben fruwakti na ini 1914 no kon tru. Ma san den du? Furu fu den tan dini Yehovah di den kisi tesi èn di sma frufolgu den. Na ini ala den yari di pasa furu fu den salfu Kresten noso den alamala tan horidoro teleki a kaba fu a libi fu den na grontapu.

¹⁵ Na ini a profeititori fu a kaba fu a grontapu disi, Yesus ben taki: „Den sma fu a ten disi no o dede kwetikweti, fosi ala den sani disi pasa.” (Leisi Mateyus 24:33-35.) Wi kon frustan taki di Yesus taki fu „den sma fu a ten disi”, a ben e taki fu tu grupu salfu Kresten. A fosi grupu ben de kaba na ini a yari 1914 èn den si krin taki Krestes bigin tiri na ini a yari dati. Den wan di ben de fu a grupu dati no ben de na libi wawan na ini 1914, ma den ben salfu tu leki manpikin fu Gado na ini a yari dati noso fosi a yari dati.—Rom. 8:14-17.

¹⁶ Ma yu abi ete wan grupu salfu Kresten. Den srefi na „den sma fu a ten disi”. Den ben salfu nanga santa yeye na a ten di sonwan fu den salfu Kresten fu a fosi grupu ben de na libi ete na grontapu. Sobun, a no ala salfu Kresten na ini a ten fu wi na fu a grupu di Yesus ben kari „den sma fu a ten disi”. Den sma fu a di fu tu grupu kon owru kaba. Ma toku Yesus wortu na ini Mateyus 24:34 e gi wi a dyaranti taki sonwan fu „den sma fu a ten disi no o dede kwetikweti” fosi den si a bigin fu a bigi banawtu. Disi e sori wi krin taki pikinso ten de ete fosi a Kownu fu Gado Kownukondre kiri ala ogri sma èn tyari wan nyun grontapu kon pe soso retidu o de.—2 Petr. 3:13.

17. San wi kon frustan fu den dri buweisi di wi luku?

¹⁷ San wi kon frustan fu den dri buweisi di wi luku? Yesus ben warskow taki wi no ben o sabi soifri na sortu dei noso yuru den sani disi ben o pasa (Mat. 24:36; 25:13). Ma wi sabi ’taki a yuru doro kaba taki wi musu wiki’, soleki fa Paulus ben taki. (Leisi Romesma 13:11.) Wi e libi na ini den lasti dei. Te wi e poti ala wi prakseri na Bijbel profeititori èn wi e du san Yehovah Gado nanga Yesus Krestes e du, dan wi o man si den krin buweisi di e sori taki wi e libi trutru na a kaba fu a grontapu disi.

18. San o pasa nanga den wan di e weigri fu teki a tiri fu Gado Kownukondre?

¹⁸ Now sma e weigri fu teki a tiri fu Yesus Krestes di e rèi na tapu a weti asi èn di o wini a feti. Heri esi den sma disi o si krin taki den meki wan bigi fowtu. Yepi no o de gi den. Na a ten dati furu sma o frede èn den o bari taki: „Suma o man tan na libi?” (Openb. 6:15-17) Ma kapitel 7 fu Openbaring e gi wi a piki. Na a ten dati Gado o feni den salfu Kresten nanga a „bigi ipi” tra skapu bun. Baka dati den tra skapu o pasa a bigi banawtu libilibi èn den o go na ini Gado en nyun grontapu.—Openb. 7:9, 13-15.

19. Te yu e luku den krin buweisi di e sori taki a kaba fu den lasti dei de krosibei, dan san yu e fruwakti?

¹⁹ Te wi e poti prakseri na den Bijbel profeititori di e kon tru na ini a ten disi, dan a grontapu fu Satan no o puru wi prakseri. A no o breni wi, ma wi o man si krin o prenspari den sani de di e pasa na grontapu. Heri esi Krestes o wini a strei èn a o pori na ogri grontapu disi na ini Armagedon, a lasti feti di o feti na wan reti fasi (Openb. 19:11, 19-21). Baka dati wi o de koloku trutru!—Openb. 20:1-3, 6; 21:3, 4.