1, 2. (a) A trow fu suma o meki sma prisiri na hemel? (b) Na sortu aksi wi o poti prakseri?

A E TEKI furu ten fu sreka gi wan trowdei. Ma na ini na artikel disi wi o poti prakseri na wan spesrutu trowdei, a trowdei fu wan kownu. A teki sowan 2000 yari langa fu sreka gi a trow disi! Heri esi a trowmasra o de makandra nanga en trowmisi. Prisiri poku o prei na ini a kownu-oso èn na hemel furu sma o singi: „Un prèise Yah, bika Yehovah wi Gado, na Almaktiwan, bigin tiri leki kownu. Meki wi breiti èn prisiri pasa marki. Meki wi gi en glori, bika a trowdei fu a Pikin Skapu doro èn a trowmisi fu en sreka ensrefi kaba.”—Openb. 19:6, 7.

² „A Pikin Skapu” di o trow na Yesus Krestes (Yoh. 1:29). Sortu krosi a e weri na en trowdei? Suma na en trowmisi? Fa a trowmisi disi sreka ensrefi gi a trow? O ten den o trow? Na a trowdei, prisiri o de na hemel. Ma fa a de nanga den sma di abi a howpu fu libi fu têgo na grontapu? Den o prisiri tu? Wi e angri fu sabi a piki fu den aksi disi. Sobun, meki wi poti prakseri na den tra pisi fu Psalm 45.

3, 4. (a) San a psalm skrifiman taki fu den krosi fu a Trowmasra èn san e meki a prisiri moro? (b) Suma na „den umapikin fu den kownu” èn „a moro prenspari uma” di e prisiri nanga en?

³ Leisi Psalm 45:8, 9. A Trowmasra Yesus Krestes e weri den moi krosi fu wan kownu di o trow. En krosi e smeri switi leki „den moro bun switismeri sani” soleki mirre-oli nanga kasia. Disi na wan tu fu den sani di den ben poti na ini a santa oli di den ben e gebroiki fu salfu sma na ini Israel.—Eks. 30:23-25.

⁴ A Trowmasra e prisiri fu di a trowdei fu en e doro èn a moi poku di e prei na ini en kownu-oso na hemel e meki a prisiri moro. Bijbel e kari a grupu sma di e prisiri makandra nanga a Kownu, ’a moro prenspari uma di e tanapu na en reti-anusei’. Disi na a pisi fu Gado en organisâsi di de na hemel. „Den umapikin fu den kownu” na den santa engel èn den na memre tu fu a pisi fu Gado en organisâsi di de na hemel. Den engel na hemel e taki: „Meki wi breiti èn prisiri pasa marki . . . bika a trowdei fu a Pikin Skapu doro.”

5. Suma na a trowmisi?

⁵ Leisi Psalm 45:10, 11. Wi sabi kaba suma na a Trowmasra, ma suma na a trowmisi? A no de wan trutru uma. Na presi fu dati, a trowmisi na a heri grupu fu 144.000 salfu Kresten. Yesus na a ede fu a gemeente fu salfuwan. (Leisi Efeisesma 5:23, 24.) Den salfuwan disi o tiri nanga Krestes na ini a Mesias Kownukondre na hemel (Luk. 12:32). Den „e tan waka na baka a Pikin Skapu awansi pe a e go” (Openb. 14:1-4). Den e tron „a wefi fu a Pikin Skapu” èn den e tan nanga en na ini en tanpresi na hemel.—Openb. 21:9; Yoh. 14:2, 3.

6. (a) Fu san ede Bijbel e kari den salfu Kresten „na umapikin fu Kownu”? (b) Fu san ede den musu ’frigiti den sma fu den’?

⁶ Bijbel e kari a trowmisi „mi umapikin” èn „na umapikin fu Kownu” (Ps. 45:13). Suma na a tra „Kownu” disi di kari na ini Psalm 45:13? Dati na Yehovah. A teki den salfu Kresten leki en „pikin” (Rom. 8:15-17). Fu di den salfuwan o tron a trowmisi fu Krestes di de na hemel, meki den kisi a rai disi: „Frigiti den sma fu yu nanga a famiri fu yu papa” (Ps. 45:10, 11). Sobun, den musu ’tan poti prakseri na den sani di de na hemel, no na den sani fu grontapu’.—Kol. 3:1-4.

7. (a) Fa Krestes sreka en trowmisi? (b) Fa a trowmisi e si Krestes?

⁷ Hondrohondro yari langa Krestes sreka en trowmisi fu kan trow nanga en na hemel. Na apostel Paulus taki dati Krestes „lobi a gemeente. A gi en libi gi a gemeente èn na so a meki a gemeente kon santa. A wasi en kon krin nanga a watra fu Gado Wortu. A du disi fu di a ben wani teki a gemeente nanga bigi glori, sondro flaka, sondro ploiploi, èn sondro iniwan fu den sani disi. Iya, a wani taki a gemeente musu de santa èn sondro fowtu” (Ef. 5:25-27). Paulus ben taigi den Kresten fu owruten Korente: „Mi e dyarusu gi unu soleki fa Gado e dyarusu gi unu. Mi srefi pramisi taki unu o trow nanga wán masra. Mi wani gi unu na Krestes leki wan uma di krin en di no sribi nanga wan man ete” (2 Kor. 11:2). Fu di a trowmisi e dini Gado na wan krin fasi èn fu di Gado feni en bun, meki Kownu Yesus Krestes feni taki a „moi”. A Trowmisi e si Krestes leki en „masra” èn dati meki a e „saka kindi” gi en.

8. Fu san ede a psalm skrifiman taki dati a trowmisi „moi srefisrefi”?

⁸ Leisi Psalm 45:13, 14a. Te a trowmisi o trow nanga a Kownu, „a moi srefisrefi”. Openbaring 21:2 e taki dati a trowmisi „meki ensrefi moi gi a man di ben o tron en masra”. A tekst dati e agersi a trowmisi nanga wan foto, a Nyun Yerusalem. A foto disi di de na hemel „abi a glori fu Gado” èn a e brenki ’leki wan diriston di warti trutru, leki wan yaspis-ston di krin leki dyamanti’ (Openb. 21:10, 11). Na wan moi fasi a buku Openbaring e fruteri fu a glori fu a Nyun Yerusalem (Openb. 21:18-21). Iya, a trowmisi „moi srefisrefi”. Na dati wi kan fruwakti fu wan uma di o trow nanga wan kownu na hemel, a no so?

9. Na suma den e tyari a trowmisi go èn sortu krosi a trowmisi weri?

⁹ Den e tyari a trowmisi go na en Trowmasra, a Mesias Kownu. A Kownu sreka en èn a ’krin en nanga a watra fu Gado Wortu’. A trowmisi ’santa èn a de sondro fowtu’ (Ef. 5:26, 27). A musu weri krosi di fiti gi a trowdei. Na dati a e du tu! „Nanga gowtu titei den nai moimoi sani na tapu en krosi”. „Te den o tyari en go na fesi Kownu, a o weri moi krosi di brei.” Fu di a o trow nanga a Pikin Skapu, meki „a trowmisi kisi primisi fu weri krosi fu fini linnen di krin èn di e brenki, bika a krosi fu fini linnen e prenki den bun sani di den santawan du”.—Openb. 19:8.

10. San o pasa fosi a trowdei fu a Pikin Skapu doro?

¹⁰ Leisi Openbaring 19:7. O ten a trowdei fu a Pikin Skapu o doro? Aladi Openbaring 19:7 e taki dati „a trowmisi fu en sreka ensrefi kaba” gi a trowdei, den tra vers no e taki fu a trowdei. Na presi fu dati, den e taki krin fa a o de na a lasti pisi fu a bigi banawtu (Openb. 19:11-21). Ma disi wani taki dati a Kownu o trow fosi a wini ala den feanti fu en? Nôno. Den tori na ini Openbaring no skrifi soleki fa den o pasa baka makandra. Na ini Psalm 45, Kownu Yesus Krestes o fasi en feti-owru na en seibere èn a o go wini den feanti fu en. Baka dati a o trow.—Ps. 45:3, 4.

11. San Krestes o du fosi a trowdei fu en doro?

¹¹ Sobun, Bijbel e sori taki na so sani o waka: A fosi sani di o pasa, na taki den o pori „a bigi huru-uma” Babilon a Bigiwan, dati na ala falsi kerki na grontapu (Openb. 17:1, 5, 16, 17; 19:1, 2). Baka dati Krestes o pori den tra pisi fu na ogri grontapu fu Satan na ini Armagedon, „a feti na a bigi dei fu Gado na Almaktiwan” (Openb. 16:14-16; 19:19-21). Te fu kaba, a Kownu o trowe Satan nanga den ogri yeye fu en na ini a dipi peti, so taki den no man abi krakti na tapu libisma moro. A o de neleki den dede.—Openb. 20:1-3.

12, 13. (a) O ten a Pikin Skapu o trow? (b) Suma na hemel o prisiri te a Pikin Skapu o trow?

¹² Na ini den lasti dei, den salfu Kresten di tan dini Gado te na dede o kisi wan opobaka fu libi na hemel. Na ini a pisi ten baka te Babilon a Bigiwan kisi pori, ma fosi Armagedon doro, Krestes o tyari ala den 144.000 salfu Kresten kon na wán na hemel so taki den kan de nanga en (1 Tes. 4:16, 17). Baka Armagedon a Pikin Skapu o trow. A trow dati o de wan prisiri okasi trutru! Openbaring 19:9 e taki: „Koloku fu den wan di kisi wan kari fu kon nyan na a trowfesa fu a Pikin Skapu.” Iya, a trowmisi o breiti srefisrefi. A Kownu o prisiri tu taki ala den salfuwan de na hemel  makandra nanga en (Luk. 22:18, 28-30). Ma a no a trowmisi nanga a Trowmasra wawan o prisiri.

¹³ Soleki fa wi ben si kaba, den engel na hemel o singi: „Meki wi breiti èn prisiri pasa marki. Meki wi gi en glori, bika a trowdei fu a Pikin Skapu doro èn a trowmisi fu en sreka ensrefi kaba” (Openb. 19:6, 7). Ma fa a de nanga den futuboi fu Yehovah di de na grontapu? Den o prisiri tu?

14. Suma na „den nyunwenke” di kari na Psalm 45 èn di e waka na a trowmisi baka?

¹⁴ Leisi Psalm 45:12, 14b, 15. A profeiti Sakaria ben taki dati na ini den lasti dei, sma na ala sei fu grontapu ben o breiti fu dini Yehovah makandra nanga den salfuwan di de na grontapu ete. A ben skrifi: „Na a ten dati a o pasa so trutru, taki tin man o komoto na mindri ala den pipel di e taki difrenti tongo èn den o grabu wan Dyu hori na en krosi, dan den o taki: ’Wi wani go nanga unu, bika wi yere taki Gado de nanga unu’” (Sak. 8:23). Psalm 45:12 e kari den „tin man” disi „den gudu sma di e libi na mindri a pipel” èn „na umapikin fu Tirus”. Den e kon na den salfuwan fu di den wani horibaka gi den èn fu di den wani taki den yepi den fu dini Yehovah. Sensi 1935, den salfuwan di de na grontapu ete yepi milyunmilyun sma fu tron „reti-ati sma” noso sma di kisi leri fu Yehovah (Dan. 12:3). Den „tin man” disi tapu fu dini falsi gado èn den e wroko skinskin makandra nanga den salfuwan. Fu dati ede a psalm skrifiman e taki dati den  na „nyunwenke” di e waka na a trowmisi baka. Den gi den libi abra na Yehovah èn den sori taki den e gi yesi na Kownu Yesus Krestes nanga den heri ati.

15. Fa „den nyunwenke” e wroko makandra nanga den salfuwan di de na grontapu ete?

¹⁵ Den salfuwan di de na grontapu ete breiti srefisrefi taki den „nyunwenke” de fayafaya fu yepi den preiki „a bun nyunsu disi fu a Kownukondre” na heri grontapu (Mat. 24:14). „A santa yeye nanga a trowmisi e tan taki: ’Kon!’” Ma den sma di e yere a boskopu disi, e taki tu: „Kon!” (Openb. 22:17) Iya, den „tra skapu” yere di den salfuwan taki „Kon!” èn now den srefi e taigi sma na heri grontapu „Kon!”—Yoh. 10:16.

16. Sortu grani Yehovah gi den tra skapu?

¹⁶ Den salfuwan lobi den tra skapu èn den breiti taki Yehovah, a Papa fu a Trowmasra, gi den tra skapu di de na grontapu a grani fu prisiri tu nanga a trow fu a Pikin Skapu na hemel. „Ala sma o breiti èn den o de nanga bigi prisiri te den e tyari den nyunwenke kon.” Iya, te a Pikin Skapu o trow na ini hemel, den tra skapu di abi a howpu fu libi fu têgo na grontapu o prisiri makandra nanga den trawan na hemel. Dati meki a buku Openbaring e taki dati a „bigi ipi” e „tanapu na fesi a kownusturu èn na fesi a Pikin Skapu”. Den e dini Yehovah na grontapu, na ini a fesidyari fu na agersi tempel fu en.—Openb. 7:9, 15.

17, 18. (a) Fa a trow fu a Pikin Skapu o tyari wini kon gi den sma na ini a nyun grontapu? (b) Fu suma Krestes o tron papa te o tiri dusun yari?

¹⁷ Leisi Psalm 45:16. „Den nyunwenke” di e waka na baka Krestes en trowmisi di de na hemel o prisiri tu te den si den blesi di a trow o tyari kon gi grontapu. Kownu Yesus Krestes o gi den „afo” fu en na grontapu wan opobaka. Fu di Krestes o gi den „afo” disi libi baka, meki den o tron en „manpikin” (Yoh. 5:25-29; Hebr. 11:35). Wan tu fu den a o poti leki „tiriman fu heri grontapu”. A no de fu taki dati Krestes o gi sonwan fu den brada di e dini leki owruman now a frantwortu fu teki fesi na ini a nyun grontapu.—Yes. 32:1.

¹⁸ Te Krestes o tiri dusun yari a o tron papa fu tra sma tu. Fu taki en leti, ala sma di o libi fu têgo o kisi libi fu di den e bribi na ini a lusu-paiman fu Yesus (Yoh. 3:16). Na so a e tron den „Têgo Papa”.—Yes. 9:6, 7.

19, 20. San den span tori fu Psalm 45 abi fu du nanga ala tru Kresten na ini a ten disi?

¹⁹ Leisi Psalm 45:1, 17. Ala Kresten musu poti prakseri na den sani di skrifi na ini Psalm 45. Den salfuwan di de na grontapu ete breiti fu di heri esi den o de makandra nanga den brada èn a Trowmasra Yesus Krestes na hemel. Den tra skapu e kisi deki-ati fu tan saka densrefi na ondro a bigi Kownu fu den. Den breiti tu taki den abi a grani fu yepi den salfuwan di de na grontapu ete. Baka a trow, Krestes nanga den tra sma di o tiri makandra nanga en na ini a Kownukondre o tyari bigi blesi kon gi den sma di de na grontapu.—Openb. 7:17; 21:1-4.

²⁰ Wi e angri fu si fa a „tumusi moi tori” disi fu a Kownu o kon tru. Dati meki wi wani fruteri ala sma fu en, a no so? Sobun, meki wi ’prèise a Kownu fu ala ten, iya, fu têgo’.