1, 2. (a) Fruteri wan ondrofenitori di e sori o prenspari a de fu poti bun aksi. (Luku a prenki na a bigin fu na artikel.) (b) Fu san ede wi no e frede te wi musu taki fu wan muilek tori?

WAN TU yari pasa wan Kresten sisa ben e taki fu Bijbel nanga en masra di no de na bribi. Fosi, a masra fu en ben de fu wan Kresten kerki. Di den ben e taki nanga makandra, a masra taigi en taki a ben e bribi na ini a leri di e taki dati Gado na dri sma na ini wán. A sisa disi si taki en masra no ben frustan san na a leri dati trutru. Dati meki a aksi en masra na wan lespeki fasi: „Yu e bribi taki Gado na Gado, taki Yesus na Gado èn taki a santa yeye na Gado, ma taki den dri disi na wán Gado?” A masra fruwondru di a sisa taki a sani disi èn a piki en: „No, mi no e bribi dati!” Baka dati den taki suma na Gado trutru èn a ben kon tron wan heri moi takimakandra.

² Na ondrofenitori disi e sori o prenspari a de fu poti bun aksi na wan lespeki fasi. Boiti dati, a e sori wi ete wan prenspari sani: Wi no abi fu frede te wi musu taki fu muilek tori soleki a leri di e taki dati wan Mekiman no de, a leri di e taki dati Gado na dri sma na ini wán noso a leri di e taki fu hel. Efu wi  e frutrow na tapu Yehovah èn na tapu a leri di a e gi wi, dan nofo tron wi o man gi wan bun piki di kan doro na ati fu sma (Kol. 4:6). Meki wi go luku now fa wi kan gi leri na wan moro bun fasi te wi musu taki fu den sortu tori disi. Wi o luku (1) fa fu poti aksi fu meki a sma taki fa a e denki fu wan tori (2) fa fu gebroiki Bijbel fu meki a sma frustan wan tori moro bun èn (3) fa fu gebroiki agersitori fu tyari wan sani kon na krin.

3, 4. Fu san ede a prenspari fu gebroiki aksi di kan yepi wi fu kon sabi san wan sma e bribi? Gi wan eksempre.

³ Aksi kan yepi wi fu kon sabi san wan sma e bribi. Fu san ede disi de prenspari? Odo 18:13 e taki: „Te wan sma e gi piki fosi a yere wan tori, dan dati na wan don sani fu du. A o kisi syen.” Iya, fosi wi dyompo go na ini wan takimakandra di abi fu du nanga Bijbel, wi musu pruberi fu kon sabi san a sma e bribi. Noso wi o gebroiki so furu ten fu taki fu wan tori di a sma no e bribi srefi.—1 Kor. 9:26.

⁴ Fu eksempre, efu wi e taki fu hel, dan a bun fu sabi taki a no ala sma e bribi taki hel na wan trutru presi pe sma e pina na ini faya. Dati meki wi kan taki: „Sma e bribi difrenti sani fu hel. Mi mag sabi fa yu e si a tori disi?” Baka te yu arki a piki fu a sma, dan yu kan yepi en moro bun fu frustan san Bijbel e taki fu a tori.

5. Fa aksi kan yepi wi fu kon sabi fu san ede wan sma e bribi wan sani?

⁵ Te wi e poti aksi na wan lespeki fasi, dan dati kan yepi wi tu fu kon sabi fu san ede wan sma e bribi wan sani. Fu eksempre, efu wan sma di yu miti na ini a preikiwroko e taki dati a no e bribi na ini Gado, dan san yu kan du? A ben o bun fu denki taki yu sabi kaba fu san ede a sma e piki so? Nôno (Ps. 10:4). Son sma lasi bribi na ini Gado fu di den si fa trawan nyan pina, noso fu di densrefi ondrofeni wan sani di hati den trutru. Kande den no man frustan fa wan lobi-ati Mekiman kan meki taki libisma e pina so. Dati meki te wan ososma e tweifri taki wan Gado de, dan wi kan aksi en: „Na so yu ben denki ala ten?” Efu a sma e taki dati a no de so, dan yu kan aksi en efu wan sani pasa di meki taki a go tweifri taki wan Gado de. A piki fu en kan yepi yu fu kon sabi san na a moro bun fasi fu taki nanga en.—Leisi Odo 20:5.

6. San wi musu du baka te wi poti wan aksi?

⁶ Baka te wi poti wan aksi, wi musu arki a sma èn wi musu hori den firi fu en na prakseri. Fu eksempre, kande wan sma e taigi yu taki wan sari sani pasa di meki taki a go tweifri taki wan lobi-ati Gado de. Fosi yu kon nanga buweisi taki wan Gado de, a bun fu sori en taki yu e firi gi en èn taki a no wan fowtu sani te wan sma e aksi ensrefi fu san ede wi e pina (Hab. 1:2, 3). Te wi de nanga pasensi èn wi e sori lobi, dan dati kan meki taki a sma wani leri moro. *

7. San wi musu du fu abi bun bakapisi na ini a preikiwroko?

⁷ Meki wi go luku now fa fu sori wan sma san Bijbel e taki fu wan tori. A no de fu taki dati Bijbel na a moro prenspari sani di wi e gebroiki na ini a preikiwroko. A e yepi wi fu ’kon bun dorodoro èn fu kan de srekasreka fu du ibri bun wroko’ (2 Tim. 3:16, 17). A no te wi e leisi wan lo tekst gi sma, wi o abi bun bakapisi na ini a preikiwroko. Ma na a fasi fa wi e taki fu den tekst di wi leisi èn den sani di wi e tyari  kon na krin o yepi sma. (Leisi Tori fu den apostel 17:2, 3.) Luku den dri eksempre di e kon now.

8, 9. (a) San na wan fasi fa wi kan taki nanga sma di e bribi taki Yesus na a srefi leki Gado? (b) Fa yu yepi sma fu frustan san Bijbel e taki fu a tori disi?

⁸ Eksempre 1: Wi e miti wan sma na ini a preikiwroko di e bribi taki Yesus na a srefi leki Gado. Sortu tekst wi kan gebroiki fu taki nanga a sma fu a tori disi? Kande wi kan aksi en fu leisi Yohanes 6:38 pe Yesus srefi e taki: „Mi no saka komoto fu hemel fu du mi wani, ma fu du a wani fu en di seni mi kon.” Baka te yu leisi a tekst, yu kan aksi a sma: „Efu Yesus na Gado, dan suma seni en kon na grontapu? A no wan sma di bigi moro Yesus? Te yu luku en bun, dan a sma di e seni wan trawan go du wan sani, abi moro makti leki a wan di musu go du a sani.”

⁹ Wi kan leisi Filipisma 2:9 sosrefi pe na apostel Paulus e taki san Gado du baka di Yesus dede èn kisi wan opobaka. A vers e taki: „Gado poti en [Yesus] moro hei tu leki fa a ben de kaba èn a gi en wan nen di bigi moro ibri tra nen.” Fu yepi a sma fu frustan a tekst disi, wi kan aksi en: „Efu Yesus ben de a srefi leki Gado fosi a dede èn Gado gi en wan moro hei posisi baka di a kisi wan opobaka, dan disi wani taki dati Yesus bigi moro Gado. Ma fa wan sma kan bigi moro Gado?” Efu a sma e lespeki Gado Wortu èn a de wan reti-ati sma, dan a fasi fa yu e taki nanga en fu den tekst kan meki taki a o wani ondrosuku a tori moro fini.—Tori 17:11.

10. (a) Fa wi kan taki nanga wan sma di e bribi na ini hel? (b) Fa yu yepi sma fu frustan san Bijbel e taki fu a tori disi?

¹⁰ Eksempre 2: Wan sma di e bribi na ini Gado fayafaya, e sori yu taki a no man frustan taki takru sma no o nyan pina fu têgo na ini hel. Kande a e bribi na ini hel fu di a wani taki ogrisma musu kisi strafu fu den takru sani di den du. San wi kan taki te wan sma e denki so? A fosi sani di wi kan du na taki wi musu sori taki ogrisma o kisi strafu seiker (2 Tes. 1:9). Baka dati wi kan aksi en fu leisi Genesis 2:16, 17, di e sori taki a strafu fu sondu na dede. Wi kan taigi a sma taki na fu di Adam sondu meki ala libisma gebore leki sondusma (Rom. 5:12). Ma wi kan sori en taki Gado no taki dati a o strafu ogrisma na ini wan hel. Wi kan aksi en: „Yu no denki taki Gado ben o warskow Adam nanga Eva taki den ben o pina fu têgo efu den trangayesi en?” Baka dati wi kan leisi Genesis 3:19 pe skrifi taki Gado strafu libisma baka di den sondu. Yu kan sori en taki a  tekst no e taki fu wan hel, ma taki Gado taigi Adam taki a ben o drai go baka na a gron. Wi kan aksi a sma: „Yu denki taki Gado ben o taigi Adam taki a ben o tron doti efu a ben sabi taki Adam ben o bron na ini wan hel?” Efu a sma na wan reti-ati sma, dan so wan aksi kan meki a go denki moro dipi fu a tori disi.

11. (a) San na wan fasi fa wi kan taki nanga wan sma di e bribi taki ala bun sma e go na hemel? (b) Fa yu yepi sma fu frustan san Bijbel e taki fu a tori disi?

¹¹ Eksempre 3: Na ini a preikiwroko wi e miti wan ososma di e bribi taki ala bun sma e go na hemel. A sani disi di na ososma e bribi kan abi krakti na tapu a fasi fa a e frustan Bijbel. Fu eksempre, kon meki wi taki dati yu o luku Openbaring 21:4 nanga a sma. (Leisi en.) Kande a sma denki taki wi o kisi den blesi di kari na ini a tekst disi na ini hemel. Fa yu kan sori en san Bijbel e taki fu a tori? Na presi fu kari tra tekst leki buweisi, yu kan luku wan pisi na ini a tekst disi di yu leisi gi en. A pisi disi e taki dati „dede no o de moro”. Yu kan aksi a sma: „Yu kan taki dati wan sani no o de moro efu a sani noiti no ben de?” Kande a sma o agri nanga yu. Baka dati yu kan sori en taki noiti dede ben de na hemel. Na grontapu wawan sma e dede. Sobun, wi kan frustan taki Openbaring 21:4 musu fu taki fu den blesi di wi o kisi dyaso na grontapu na ini a ten di e kon.—Ps. 37:29.

12. Fu san ede Yesus gebroiki agersitori?

¹² Boiti taki Yesus ben e poti aksi gi sma, a ben e gebroiki agersitori tu te a ben e preiki. (Leisi Mateyus 13:34, 35.) Den agersitori di Yesus gebroiki, ben e tyari kon na krin san ben de na ini na ati fu den sma di ben e arki en (Mat. 13:10-15). Yesus gebroiki agersitori tu so taki sma ben kan memre den sani di a ben e leri den èn so taki den ben kan arki en nanga prisiri. Fa wi srefi kan gebroiki agersitori te wi e gi leri?

13. Sortu eksempre yu kan gebroiki fu sori sma taki Gado bigi moro Yesus?

¹³ A moro bun fu gebroiki agersitori di no muilek fu frustan. Fu eksempre, te yu wani sori sma taki Gado bigi moro Yesus, dan kande yu kan pruberi disi: Sori a sma taki Gado nanga Yesus ben gebroiki wortu fu sori taki den na famiri fu makandra. Gado ben kari Yesus en Manpikin èn Yesus ben kari Gado en Papa (Luk. 3:21, 22; Yoh. 14:28). Baka dati wi kan aksi a sma: „Efu yu wani sori mi taki tu sma na speri, dan fa yu ben o agersi den nanga makandra? Yu ben o taki dati den na papa nanga manpikin?” Kande a sma o taki dati den tu sma na brada, noso taki den na twelengi. Dan yu kan taki: „Dati na wan heri bun fasi fu agersi den. Sobun, efu a de so makriki gi wi fu kon nanga na eksempre disi, dan yu no denki taki Yesus, a Bigi Leriman, ben o man gebroiki a srefi eksempre tu? Ma a no du dati. A taki dati Gado na en Papa. Na so Yesus ben wani sori wi taki Gado owru moro en èn taki a abi moro makti leki en.”

14. Sortu agersitori e sori taki Gado no ben o meki Didibri pina sma na ini hel?

¹⁴ Luku wan tra eksempre. Son sma e bribi taki Satan na basi fu hel. Efu yu e taki nanga wan papa noso mama, dan kande yu kan gebroiki wan agersitori fu yepi en fu si fu san ede a no kan de so kwetikweti taki Gado poti Didibri fu pina sma na ini hel. Yu kan taki disi: „Kon meki wi taki dati yu pikin trangayesi srefisrefi èn taki a e du wan lo ogri. San yu ben o du?” Kande a sma ben o taigi yu taki a ben o warskow a pikin. Kande a ben o pruberi ibri leisi baka  fu yepi a pikin so taki a no du ogri moro (Odo 22:15). Now yu kan aksi en san a ben o du efu a pikin no wani arki kwetikweti, awinsi san a e du. Furu papa noso mama ben o taki dati te fu kaba den ben o abi fu strafu a pikin. Dan yu kan aksi en: „Ma efu yu kon sabi taki na wan takru sma meki yu pikin kon ogri so, dan san yu o du?” A no de fu taki dati a papa noso mama en ati ben o bron nanga so wan sma. Fu tyari a tori kon na krin, yu kan aksi a sma: „Efu yu sabi taki wan takru sma meki yu pikin go du ogri, dan yu ben o aksi a sma dati fu strafu a pikin gi yu?” A no de fu taki dati a papa noso mama no ben o du dati. Sobun, a de krin taki Gado no ben o meki Satan Didibri strafu den sma di a kori fu go du ogri.

15, 16. (a) Fu san ede wi no musu fruwakti taki ala sma o arki a Kownukondre boskopu? (b) A de so taki wi musu de bun leriman fu man abi bun bakapisi na ini a preikiwroko? Tyari disi kon na krin. (Luku a faki di nen „ Wan sani di kan yepi wi fu gi piki”.)

¹⁵ Wi sabi taki a no ala sma di wi e miti na ini a preikiwroko o arki a Kownukondre boskopu (Mat. 10:11-14). Srefi te wi e poti den yoisti aksi, te wi e gebroiki Bijbel na a moro bun fasi èn te wi e gebroiki den moro bun agersitori, toku sma o de di no o arki. Te yu luku en bun, dan wan tu sma nomo gi yesi na a leri fu Yesus, aladi a ben de a moro bigi Leriman di oiti libi na grontapu.—Yoh. 6:66; 7:45-48.

¹⁶ Na a tra sei, awinsi wi feni taki wi no man gi leri na wan bun fasi, toku wi kan abi bun bakapisi na ini a preikiwroko. (Leisi Tori fu den apostel 4:13.) Gado Wortu e sori wi krin taki ’ala den wan di abi a yoisti denki fu man kisi têgo libi’, o arki a bun nyunsu (Tori 13:48). Sobun, meki wi tan si sani na a yoisti fasi. Pruberi fu gi leri na wan moro bun fasi, ma no lasi-ati te sma no wani arki a bun nyunsu fu a Kownukondre. Efu wi e frutrow na tapu Yehovah èn na tapu a leri di a e gi wi, dan wi o tron moro bun leriman. Disi o meki taki wi nanga den sma di e arki wi, kisi wini (1 Tim. 4:16). Yehovah kan yepi wi fu si fa wi musu „piki ibriwan sma”. Na ini a tra artikel wi o si fa wi kan abi bun bakapisi na ini a preikiwroko te wi e du bun gi sma.