1. Gi wan eksempre di e sori fa wan tu futuboi fu Gado ben kori densrefi. (Luku a prenki na a bigin fu na artikel.)

WAN mamanten, Granpriester Aron ben tanapu na fesi a tabernakel fu Yehovah. A ben e hori wan krofaya-pan na ini en anu fu bron switismeri leki ofrandi. Krosibei fu drape yu ben abi Korak makandra nanga 250 man di ben e bron switismeri gi Yehovah tu. Ibriwan fu den ben abi den eigi krofaya-pan (Num. 16:16-18). Te yu luku a tori disi frafra, dan a ben gersi leki ala den man dati ben e anbegi Yehovah nanga den heri ati. Ma Korak nanga den sma di ben e horibaka gi en, ben abi bigifasi èn den ben prakseri densrefi nomo. Dati meki den opo densrefi teige Gado èn den pruberi fu tron priester na presi fu Aron (Num. 16:1-11). Den ben denki taki Gado ben feni na anbegi fu den bun. Ma fu taki en leti, den ben kori densrefi èn den ben wisiwasi Yehovah. Den frigiti taki Yehovah ben kan si san de na ini den ati èn taki den ben e hoigri fu di den ben e suku grani gi densrefi.—Yer. 17:10.

2. San Moses ben taki dati ben o pasa èn fa disi kon tru?

² A dei na fesi, Moses taigi den: „Tamara mamanten Yehovah sa sori suma na fu en” (Num. 16:5). Na dati pasa tu. Yehovah sori taki a ben sabi suma na den tru anbegiman fu en èn suma  na hoigriman. A „seni faya [kon] èn a bron [Korak nanga] den tu hondro nanga feifitenti man di ben e tyari a switismeri leki ofrandi” (Num. 16:35; 26:10). Ma Yehovah no kiri Aron. Na so a sori ala sma taki a ben feni Aron bun leki priester èn taki a ben e si en leki wan tru anbegiman fu en.—Leisi 1 Korentesma 8:3.

3. (a) San pasa na ini a ten fu na apostel Paulus? (b) San wi kan leri fu den sani di Yehovah du nanga den man di opo densrefi teige en na ini a ten fu Moses?

³ Wan srefi sortu sani pasa tu sowan 1500 yari baka dati, na ini a ten fu na apostel Paulus. Wan tu Kresten ben e kon nanga falsi leri. Ma toku den ben de ete na ini a gemeente. A ben kan gersi leki den sma dati di drai baka gi a tru bribi no ben e difrenti fu den trawan na ini a gemeente. Ma fu taki en leti den ben de leki ogri busidagu èn den ben meki srefi taki „son sma lasi bribi” (2 Tim. 2:16-18). Ma Yehovah e si ala sani. Paulus ben frustan disi fu di a ben sabi san Yehovah du di Korak nanga den sma di ben e horibaka gi en, opo densrefi teige Gado wan tu hondro yari na fesi. Meki wi go luku wan span tori na ini Bijbel now di o leri wi wan prenspari sani.

4. San Paulus ben sabi seiker èn fa a sori Timoteyus taki a ben e bribi dati?

⁴ Paulus ben de seiker taki Yehovah sabi te sma no e dini En nanga wan krin ati èn taki a sabi suma na den sma di e gi yesi na En. A fasi fa Paulus taki fu a tori disi di a skrifi Timoteyus, e sori taki a ben bribi a sani disi trutru. Baka di Paulus taki fu den man di ben meki son sma na ini a gemeente lasi bribi, a skrifi: „Toku Gado seti wan steifi fondamenti di no man seki. Disi na den wortu di stampu na tapu a fondamenti: ’Yehovah sabi den sma di de fu en’, èn: ’Meki ala sma di e kari a nen fu Yehovah, drai baka gi kruktudu.’”—2 Tim. 2:18, 19.

5, 6. (a) San wi kan taki fu den wortu „Gado seti wan steifi fondamenti”? (b) Fa den wortu disi ben o gi Timoteyus deki-ati?

⁵ A wan-enkri presi na ini Bijbel pe skrifi taki „Gado seti wan steifi fondamenti”, de na ini 2 Timoteyus 2:19. San prenspari na den wortu disi di Paulus gebroiki dyaso? Na ini Bijbel a wortu „fondamenti” abi fu du nanga difrenti sani, soleki Yerusalem di ben de a mamafoto fu owruten Israel (Ps. 87:1, 2). Boiti dati, Bijbel e agersi a frantwortu di Yesus kisi fu meki den prakseri fu Yehovah kon tru, nanga wan fondamenti (1 Kor. 3:11; 1 Petr. 2:6). San Paulus ben abi na prakseri di a taki dati „Gado seti wan steifi fondamenti”?

⁶ Fosi Paulus skrifi taki „Gado seti wan steifi fondamenti”, a ben skrifi na ini a srefi pisi dati san Moses ben taki fu Korak nanga den sma di ben e horibaka gi en. (Luku Numeri 16:5.) Kande Paulus ben taki fu a ten fu Moses fu di a ben wani gi Timoteyus deki-ati. A ben wani memre en tu taki Yehovah sabi te sma de fu opo densrefi teige en èn taki a man strafu den sma disi. Neleki fa Yehovah no gi pasi taki Korak tapu en fu du san a abi na prakseri, na so a no ben o gi pasi tu taki sma di drai baka gi a tru bribi, tapu en fu du san a abi na prakseri. Paulus no taki finifini san den wortu „Gado seti wan steifi fondamenti” wani taki. Ma a sani di a taki yepi Timoteyus fu kisi moro frutrow na ini Yehovah.

7. Fu san ede wi kan de seiker taki ala ten Yehovah o du san reti èn taki a o du san a pramisi?

⁷ A fasi fa Yehovah e denki fu sani no e kenki. Psalm 33:11 e taki: „San Yehovah taki, na dati a e du ala ten. Ala ten a e du san a abi na prakseri.” Tra Bijbeltekst e taki dati Yehovah na Kownu, a abi bun-ati, a e du san a pramisi èn a e du san reti. Noiti den sani disi e kenki (Eks. 15:18; Ps. 100:5;  111:3). Maleaki 3:6 e taki: „Mi na Yehovah. Mi no [e] kenki.” Yakobus 1:17 e taki tu dati Yehovah „e tan wán fasi nomo. A no e kenki soleki fa skaduw e kenki.”

8, 9. San wi kan leri fu a pisi pe Paulus e taki fu a „stampu”?

⁸ Soleki fa wi si na 2 Timoteyus 2:19, dan Paulus e taki dati wan boskopu stampu na tapu a fondamenti. Na ini owruten, sma ben abi a gwenti fu skrifi wan sani na tapu a fondamenti fu wan oso, kande fu sori suma bow en noso suma ben abi en. Paulus ben de a fosi Bijbel skrifiman di gebroiki na agersitori disi. * Tu sani stampu na tapu a „steifi fondamenti” di Gado seti. A fosiwan na: „Yehovah sabi den sma di de fu en.” A di fu tu na: „Meki ala sma di e kari a nen fu Yehovah, drai baka gi kruktudu.” Disi e memre wi na san wi e leisi na Numeri 16:5.—Leisi en.

⁹ San den sma di de fu Gado kan leri fu a pisi pe Paulus e taki fu a „stampu”? Den kan leri tu prenspari sani fu a fasi fa Yehovah e denki: (1) Yehovah lobi den sma di e tai hori na en. (2) Yehovah no lobi kruktudu kwetikweti. Den tu sani disi e sori tu san Yehovah e aksi fu wi. San disi abi fu du nanga a situwâsi di ben opo kon na ini a gemeente di sma drai baka gi a bribi?

10. Fa son Kresten na ini a ten fu Paulus firi di den si san ben e pasa na ini a gemeente?

¹⁰ Timoteyus nanga tra sma di tan gi yesi na Gado ben broko den ede di den si san ben e pasa na ini a gemeente. A kan taki son Kresten ben aksi densrefi fu san ede den sma di drai baka gi a bribi ben de na den mindri ete. Kande den wan di ben e tai hori na Yehovah ben aksi densrefi: ’Gado e si taki wi no de leki den sma di drai baka gi a bribi èn di no e dini en nanga wan krin ati?’—Tori 20:29, 30.

11, 12. Fa wi sabi taki a brifi fu Paulus tranga a bribi fu Timoteyus?

¹¹ A musu de so taki a brifi fu Paulus tranga a bribi fu Timoteyus. A memre Timoteyus na a ten di Yehovah sori taki Korak nanga den sma di ben e horibaka gi en, ben de hoigriman. Yehovah no ben feni den sma disi bun èn dati meki a kiri den. Ma na a tra sei, a sori taki a ben lobi Aron. Na so Paulus ben taki dati aladi falsi Kresten ben de na ini a gemeente, toku Yehovah ben sabi suma na den sma di de fu en, neleki fa a ben de na ini a ten fu Moses.

 ¹² Yehovah noiti e kenki èn wi kan frutrow en ala ten. A no lobi kruktudu kwetikweti èn te fu kaba a o strafu den ogrisma di no abi berow. Timoteyus ben de wan sma ’di ben e kari a nen fu Yehovah’ èn dati meki a ben musu drai baka gi kruktudu. Fu dati ede Paulus ben memre en fu luku bun nanga falsi Kresten di ben wani pori a bribi fu sma na ini a gemeente. *

13. Fu san wi kan de seiker?

¹³ Wi srefi kan kisi deki-ati fu den sani di Paulus taigi Timoteyus. Fa so? Yehovah sabi heri bun taki wi e tai hori na en fu di wi lobi en. Ma a no disi nomo a sabi. Yehovah e broko en ede tu nanga den sma di de fu en. Bijbel e taki: „Den ai fu Yehovah e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati” (2 Kron. 16:9). Dati meki wi kan de seiker taki den sani di wi e du gi Yehovah „nanga wan krin ati”, no de fu soso.—1 Tim. 1:5; 1 Kor. 15:58.

14. Sortu fasi fu anbegi Yehovah no lobi kwetikweti?

¹⁴ Yehovah e tegu gi sma di no e dini en nanga wan krin ati. Fu di den ai fu Yehovah „e luku heri grontapu fu si san e pasa”, meki a kan si suma na den sma di no e dini en „nanga den heri ati”. Odo 3:32 e taki: „Yehovah e tegu gi sma di e bedrigi trawan.” A no lobi sma di e du leki den e gi yesi na en, aladi den e du sondu kibrikibri. A kan taki so wan sma e kori trawan wan pisi ten. Ma fu di Yehovah na a Almakti Gado di lobi retidu, meki wi kan de seiker taki „sani no o waka bun gi a sma di e kibri den sondu fu en”.—Odo 28:13; Leisi 1 Timoteyus 5:24; Hebrewsma 4:13.

15. Nanga san wi musu luku bun èn fu san ede?

¹⁵ A moro bigi pisi fu Yehovah en pipel, lobi en nanga den heri ati. A no e pasa furu taki wan sma na ini a gemeente e pruberi fu kori Yehovah, fu di a no e dini en nanga wan krin ati. Ma san pasa na ini a ten fu Moses èn na ini a ten fu a fosi Kresten gemeente, kan pasa tu na ini a ten disi (2 Tim. 3:1, 5). Ma disi wani taki dati wi musu denki takru fu wi brada nanga sisa? Wi musu aksi wisrefi efu den e dini Yehovah nanga wan krin ati? Kwetikweti! A no ben o bun fu denki takru fu den efu wi no abi buweisi. (Leisi Romesma 14:10-12; 1 Korentesma 13:7.) Efu wi no e frutrow wi brada nanga sisa, dan dati kan pori a matifasi di wi abi nanga Yehovah.

16. (a) San ibriwan fu wi musu du fu kon sabi efu wi e dini Gado nanga wi heri ati ete? (b) San wi kan leri fu a faki di nen „ Tan ondrosuku . . . Tan buweisi . . . ”?

¹⁶ Ibri Kresten musu „ondrosuku san na den sani di ensrefi e du” (Gal. 6:4). Sondro fu sabi, wi kan kon kisi fasi di e meki taki wi no e dini Yehovah nanga wan krin ati moro. Disi e pasa fu di wi na sondu libisma (Hebr. 3:12, 13). Sobun, wanwan leisi wi musu ondrosuku efu wi e dini Yehovah nanga wi heri ati ete. Wi kan aksi wisrefi: ’Fu san ede mi e dini Yehovah? Mi e dini en fu di mi lobi en èn fu di mi wani taki a de mi Tiriman? Noso mi e prakseri nomo sortu bun libi mi o kisi na ini a paradijs?’ (Openb. 4:11) Te wi e poti den sortu aksi disi, dan dati o yepi wi fu si efu wi e dini Gado nanga wi heri ati ete.

17, 18. Fu san ede wi musu tan dini Yehovah nanga wan krin ati?

¹⁷ Te wi e meki muiti fu tan dini Gado nanga wan krin ati, dan wi o kisi furu blesi. A psalm skrifiman e taki: „Koloku fu a  sma di Yehovah no krutu, baka di a meki fowtu. Koloku fu a sma di no e prakseri fu bedrigi trawan” (Ps. 32:2). Iya, den sma di e puru ala hoigrifasi na ini den ati, o de moro koloku èn den o kisi na okasi fu de koloku trutru te den de na ini Paradijs.

¹⁸ Heri esi Yehovah o sori krin suma na den sma di e du ogri noso suma e du sondu kibrikibri. Na so a o de krin „suma na wan reti-ati sma èn suma na wan ogri sma, suma e dini Gado èn suma no e dini en” (Mal. 3:18). Ma aladi dati no pasa ete, toku wi kan kisi deki-ati fu di wi sabi taki „den ai fu Yehovah e si den reti-ati sma èn den yesi fu en e yere den fayafaya begi fu den”.—1 Petr. 3:12.