1, 2. Sortu wroko Yehovah gi Moses fu du èn san a pramisi en?

FA YU denki taki yu ben o firi efu yu ben musu tanapu na fesi a moro bigi tiriman fu grontapu èn yu ben musu taki gi a pipel fu Yehovah? Kande yu ben o bruya, kande yu ben o frede, noso yu no ben o man taki. Fa yu ben o sreka yusrefi fu taki nanga a tiriman disi? Yu leki boskopuman fu Gado, ben o man taki nanga en sondro fu frede?

² Na disi pasa nanga Moses. A ben de „a moro safri-ati sma fu ala libisma di ben de na grontapu”. Yehovah taigi en taki a ben o seni en go na Farao fu frulusu Gado pipel fu den Egeptesma di ben e pina den leki srafu (Num. 12:3). Soleki fa wi sabi, dan Farao no ben sori lespeki èn a ben abi bigimemre (Eks. 5:1, 2). Toku Yehovah ben wani taki Moses taigi Farao fu seni sowan dri milyun srafu fu en gowe. Wi kan frustan fu san ede Moses aksi Yehovah: „Suma na mi fu go na a kownu èn fu tyari den Israelsma komoto fu Egepte?” Kande Moses ben denki taki a no ben o man taki nanga Farao. Ma Yehovah taigi en taki a no ben o de en wawan. A pramisi en: „Mi o de nanga yu.”—Eks. 3:9-12.

3, 4. (a) Fu san ede Moses ben frede? (b) Fa a sani di miti Moses, kan miti yu tu?

³ Fu san ede Moses ben frede? Soleki fa a sori, dan a ben  frede taki Farao no ben o meki wan boskopuman fu Yehovah Gado kon na en, noso taki a no ben o wani arki en. Moses ben frede tu taki en eigi pipel no ben o bribi taki Yehovah gi en a wroko fu tyari den komoto na Egepte. Dati meki a taigi Yehovah: „Kon meki wi taki dati den no e bribi mi èn den no e arki mi. Efu den e taki: ’Yehovah no kon na yu’, dan san mi musu du?”—Eks. 3:15-18; 4:1.

⁴ A piki di Yehovah gi Moses èn den sani di pasa baka dati, kan leri ibriwan fu wi wan prenspari sani. Kande noiti yu o abi fu go na fesi wan heihei tiriman. Ma a pasa wan leisi kaba taki di yu miti wan sma na ini a preikiwroko, yu ben frede fu taki fu Gado nanga en Kownukondre? Efu dati de so, dan luku san wi kan leri fu Moses.

5. San Yehovah poti na ini Moses anu èn fa dati yepi en fu no frede moro? (Luku a prenki na a bigin fu na artikel.)

⁵ Di Moses taigi Yehovah taki a ben frede taki sma no ben o bribi en, dan Gado yepi en fu sreka ensrefi gi san ben o miti en. A tori na ini Eksodes e taki: „Yehovah taigi en: ’San yu abi na ini yu anu?’ Moses taki: ’Wan tiki.’ Baka dati Gado taki: ’Trowe en na gron.’ Sobun, Moses trowe a tiki na gron, èn a tiki tron wan sneki. Ne Moses lon gi a sneki. Dan Yehovah taigi Moses: ’Langa yu anu grabu en na en tere.’ Ne a langa en anu grabu a sneki, dan a tron wan tiki na ini en anu. Ne Gado taki: ’Disi na fu meki den bribi taki Yehovah, . . . kon na yu’” (Eks. 4:2-5). Na so Gado gebroiki en krakti fu meki a tiki na ini Moses anu, tron wan sneki. A wondru disi ben o sori taki Moses ben de a boskopuman fu Yehovah trutru èn taki na en ben poti Moses fu taki gi en. Dati meki Yehovah taigi en: „Yu musu teki a tiki disi fu du den wondru” (Eks. 4:17). Nanga a buweisi disi, Moses ben kan go na fesi Farao èn na fesi en eigi pipel fu taki gi a tru Gado sondro fu frede.—Eks. 4:29-31; 7:8-13.

6. (a) San wi musu abi na ini wi anu te wi e preiki èn fu san ede? (b) Fruteri fa „a wortu fu Gado de na libi” èn fa „a abi krakti”.

⁶ „San yu abi na ini yu anu” te yu e preiki a Bijbel boskopu gi trawan? Nofo tron na Bijbel yu abi na ini yu anu fu di yu wani gebroiki en na ibri okasi di yu kisi. Aladi son sma e si Gado Wortu leki wan gewoon buku, toku na a buku dati Yehovah e gebroiki fu taki nanga wi (2 Petr. 1:21). Bijbel e taki fu den pramisi fu Yehovah di abi fu du nanga san o pasa te Gado Kownukondre o tiri grontapu. Dati meki na apostel Paulus skrifi: „A wortu fu Gado de na libi. A abi krakti.” (Leisi Hebrewsma 4:12.) Fa a wortu fu Gado de na libi? Ala den sani di Yehovah pramisi, e kon tru safrisafri èn te fu kaba den alamala o kon tru (Yes. 46:10; 55:11). Te wan sma e kon frustan disi fu Yehovah en Wortu, dan den sani di a e leisi na ini Bijbel kan abi krakti na tapu en libi.

7. Fa wi kan „gebroiki a tru leri na ini Gado wortu na wan yoisti fasi”?

⁷ Iya, Yehovah poti en Wortu di de na libi na ini wi anu. Nanga dati wi kan buweisi sma taki den kan frutrow san wi e fruteri den èn taki dati e kon fu Gado. Dati meki a no musu fruwondru wi taki di Paulus gi Timoteyus leri, a gi en deki-ati ’fu du ala muiti fu gebroiki a tru leri na ini Gado wortu na wan yoisti fasi’ (2 Tim. 2:15). Fa wi kan du san Paulus taki? Wi musu du muiti fu leisi moi tekst di kan naki sma ati na ini a preikiwroko. Den traktaat di wi kisi na ini 2013 meki spesrutu fu kan du dati.

8. San wan dienst-opziener taki fu den traktaat?

⁸ Ala den nyun traktaat meki na a srefi  fasi. Sobun, te wi leri kaba fa fu gebroiki wan fu den, dan wi o sabi fa fu gebroiki den alamala. A makriki fu gebroiki den? Wan dienst-opziener na ini Hawai, na Amerkankondre, skrifi: „Wi no ben sabi o bun den nyun traktaat disi ben o de te wi ben o preiki oso fu oso èn na den presi pe furu sma de.” A brada disi taki dati a fasi fa den traktaat skrifi e meki taki sma wani gi piki wantewante èn nofo tron disi e meki den abi moi takimakandra. A feni taki disi de so fu di den aksi nanga den dri piki di sma kan gi, skrifi na fesisei fu a traktaat. Na ososma no abi fu frede taki a o gi wan piki di no bun.

9, 10. (a) Fa den traktaat e yepi wi fu gebroiki Bijbel? (b) Sortuwan fu den traktaat yu ben man gebroiki bun na ini a preikiwroko èn fu san ede?

⁹ Ibriwan fu den traktaat e gi wi na okasi fu leisi wan moi tekst gi na ososma di o naki en ati. Fu eksempre, luku a traktaat di nen Pina o kaba wan dei? Awinsi na ososma e piki na aksi disi nanga „iya”, „no”, noso „kande”, toku yu kan opo a traktaat èn sondro fu taki wan tra sani, yu kan taigi en: „Luku san Bijbel e taki.” Baka dati yu kan leisi Openbaring 21:3, 4.

¹⁰ Te yu e gebroiki a traktaat Fa yu e si a Bijbel?, dan a no abi trobi sortuwan fu den dri piki na fesisei fu a traktaat na ososma e gi. Te a gi piki kaba, dan yu kan opo a traktaat èn taki: „Bijbel e taki dati ’na Gado srefi ben meki sma skrifi ala den sani di de na ini Gado Buku.’” Baka dati yu kan taki: „Ma a no dati wawan a tekst disi e taki.” Dan opo yu Bijbel èn leisi 2 Timoteyus 3:16, 17.

11, 12. (a) Fa a preikiwroko e gi yu prisiri? (b) Fa den traktaat kan yepi yu fu sreka yusrefi te yu musu tyari gobaka?

¹¹ Efu a sma wani sabi moro, dan yu kan bosroiti fu leisi den tra pisi fu a traktaat èn taki nanga en fu san yu leisi. Ma awinsi fa a no fa, te yu gi sma wan traktaat, dan dati o gi yu prisiri fu di yu kisi na okasi fu leisi wan pisi fu Gado Wortu gi den. Srefi efu na wán noso tu tekst nomo yu leisi gi a sma a fosi tron di yu taki nanga en, toku dati kaba o gi yu prisiri. Bakaten yu kan go doro nanga san unu ben taki a fosi leisi.

¹² Na bakasei fu ibri traktaat, na a pisi di nen „Prakseri fu a sani disi”, yu abi wan aksi nanga Bijbeltekst di yu kan gebroiki te yu e go baka na a sma. Fu eksempre, a  traktaat Fa a libi na grontapu o de? abi na aksi: „Fa Gado o meki a grontapu kon moro bun?” Yu kan gebroiki na aksi disi te yu e go baka na a sma. Na ondro na aksi yu abi den tekst Mateyus 6:9, 10 nanga Danièl 2:44. A traktaat di nen Sma di dede o man libi baka trutru? abi na aksi: „Fu san ede wi e kon owru èn e dede?” Na ondro na aksi disi yu abi den tekst Genesis 3:17-19 nanga Romesma 5:12.

13. Fruteri fa wi kan gebroiki den traktaat fu bigin wan Bijbelstudie.

¹³ Gebroiki den traktaat fu bigin wan Bijbelstudie. Te wan sma e scan a code na bakasei fu wan traktaat, dan dati o tyari en go na a website fu wi pe a kan feni sani di kan gi en deki-ati fu studeri Bijbel. Den traktaat e poti prakseri tu na tapu a brochure Gado abi bun nyunsu gi wi! Ibriwan fu den e sori go na wan spesrutu les na ini a brochure disi. Fu eksempre, a traktaat Suma e tiri grontapu trutru? e sori go na les 5 fu a brochure disi. A traktaat Fa wan osofamiri kan de koloku? e sori go na les 9. Den traktaat disi meki fu yepi wi gebroiki Bijbel a fosi leisi te wi e miti wan sma èn fu tyari gobaka. Na so wi kan bigin moro Bijbelstudie. San moro yu kan du fu gebroiki Gado Wortu bun na ini a preikiwroko?

14, 15. Fa yu kan de leki Paulus te yu e preiki gi sma?

¹⁴ Fu di Paulus ben wani yepi „moro sma” na ini a preikiwroko, meki a ben e du muiti fu frustan fa den ben prakseri fu sani. (Leisi 1 Korentesma 9:19-23.) Dyaso wi kan si taki Paulus ben wani ’yepi den Dyu, den sma di ben e gi yesi na a Wèt, den sma di no ben abi wèt nanga den swakiwan’. A ben wani preiki gi ’ala sortu sma, fu kan du ala san de fanowdu fu frulusu sma, awinsi na wan tu nomo’ (Tori 20:21). Fa wi kan de leki Paulus te wi e sreka wisrefi fu preiki gi „ala sortu sma”?—1 Tim. 2:3, 4.

¹⁵ Ibri mun Wi Kownukondre diniwroko abi eksempre di e sori wi fa fu taki nanga sma na ini a preikiwroko. Pruberi fu gebroiki den. Ma efu tra tori de na a prakseri fu den sma na ini yu kontren, dan bigin a takimakandra na wan fasi di o hari den prakseri. Denki a birti pe yu e libi èn den sma drape. Denki sosrefi nanga sortu sani den e broko den ede moro furu. Dan yu kan luku sortu tekst kan yepi den. Luku san wan kring-opziener e taki fu a fasi fa en nanga en wefi e gebroiki Bijbel fu hari sma prakseri: „Efu wi e sori na ososma wantewante san wi kon du èn efu wi no e taki tumusi langa, dan nofo tron a o gi wi na okasi fu leisi wán tekst. Wi e taki a sma odi, aladi a Bijbel fu wi opo èn baka dati wi e leisi a tekst gi en.” Luku wan tu moi eksempre di e sori sortu tori, aksi nanga tekst yu kan gebroiki na ini a kontren pe yu e preiki.

16. Fruteri fa yu kan gebroiki Yesaya 14:7 na ini a preikiwroko.

¹⁶ Efu yu e libi na wan presi pe furu ogri nanga feti de, dan yu kan aksi a sma: „Kon meki taki dati wan dei yu e leisi na ini koranti taki freide de na heri grontapu, taki nowan feti no de moro èn taki sma e bari fu prisiri. Fa yu ben o feni so wan sani? Na dati Bijbel e taki na Yesaya 14:7. Fu taki en leti, na ini Bijbel wi e feni furu tekst di e sori taki Gado pramisi taki na ini a ten di e kon nowan ogri noso feti no o de moro.” Baka dati yu kan aksi a sma efu yu mag leisi wan fu den pramisi dati na ini Bijbel.

17. Fa yu kan gebroiki Mateyus 5:3 na ini wan takimakandra?

¹⁷ A hebi gi furu mansma na ini yu kontren  fu sorgu gi na osofamiri fu den? Efu dati de so, dan yu kan bigin a takimakandra nanga na aksi disi: „Omeni moni yu denki wan man musu meki so taki en osofamiri kan de koloku?” Baka te a sma gi wan piki, yu kan taki: „Furu man e wroko moro moni leki san yu taki, ma toku na osofamiri fu den no de koloku. Sobun, san den abi fanowdu trutru?” Baka dati yu kan leisi Mateyus 5:3 èn yu kan aksi en efu a wani wan Bijbelstudie.

18. Fa yu kan gebroiki Yeremia 29:11 fu trowstu sma?

¹⁸ Den sma na ini yu birti e firi den takru bakapisi fu wan ogri sani noso wan rampu di miti den? Yu kan bigin a takimakandra na a fasi disi: „Mi kon dya tide spesrutu fu trowstu den sma na ini a birti. (Leisi Yeremia 29:11.) Te wi e leisi a tekst disi, dan wi e si taki Gado wani taki wi abi howpu, taki wi abi wan bun libi now èn taki sani waka bun gi wi na ini a ten di e kon. Ma disi o pasa trutru?” Baka dati yu kan poti prakseri na wan les na ini a Bun nyunsu-brochure di e taki fu a tori disi.

19. Fruteri fa wi kan gebroiki Openbaring 14:6, 7 te wi e taki nanga sma di lobi go na kerki.

¹⁹ Yu e libi na ini wan birti pe sma lobi go na kerki? Efu dati de so, yu kan bigin a takimakandra na a fasi disi: „Efu wan engel ben o taki nanga yu wan dei, yu ben o arki en? (Leisi Openbaring 14:6, 7.) Na engel disi e taki dati wi musu ’frede Gado’. A no prenspari dan fu kon sabi suma na a Gado di a e taki fu en? Na engel e sori wi suma na a Gado disi te a e taki dati en na ’a sma di meki hemel nanga grontapu’. Suma na a sma dati?” Baka dati yu kan leisi Psalm 124:8 di e taki: „Wi e kisi yepi fu a sma di nen Yehovah, a Mekiman fu hemel nanga grontapu.” Dan yu kan aksi a sma efu yu kan kon baka na en fu fruteri en moro fu Yehovah Gado.

20. (a) Fa wi kan gebroiki Preikiman 12:1 fu leri wan yongusma suma na wi Mekiman? (b) Wan tekst de di yu leisi furu gi sma èn di naki sma ati?

²⁰ Te yu e taki nanga wan yongusma, dan yu kan bigin a takimakandra na a fasi disi: „Mi wani leisi wan tekst gi yu di prenspari spesrutu gi yongusma. (Leisi Preikiman 12:1.) A tekst disi e gi yongusma deki-ati fu memre den Mekiman. Yu no e agri taki efu wi wani memre wi Mekiman, wi musu sabi en fosi? Ma fa wi kan kon sabi en? Efu yu wani, mi kan sori yu san Bijbel e taki fu disi.”

21, 22. (a) Te wi e leisi wan moi tekst di kan naki sma ati, dan fa dati kan kenki a libi fu den? (b) San yu o tan du te yu de na ini a preikiwroko?

²¹ Yu no sabi na fesi san sma o du te yu e leisi wan tekst gi den di kan naki den ati. Fu eksempre, tu Kotoigi na Australia naki na a doro fu wan yongu uma. Wan fu den Kotoigi aksi en: „Yu sabi Gado nen?” Baka dati a leisi wán tekst gi na uma èn dati ben de Psalm 83:18. Na uma e taki: „Mi no ben man bribi! Baka di den Kotoigi gowe, mi rèi 56 kilometer go na wan bukuwenkri fu luku san tra Bijbel e taki èn baka dati mi suku a nen na ini wan wortubuku. Di mi si taki Gado nen na Yehovah, mi aksi misrefi san moro mi no ben sabi.” Syatu baka dati en nanga a man di ben o trow nanga en, bigin studeri Bijbel èn bakaten den teki dopu.

²² Gado Wortu e kenki a libi fu den sma di e leisi en èn a e yepi den fu poti bribi na ini den sani di Yehovah pramisi. (Leisi 1 Tesalonikasma 2:13.) A boskopu fu Bijbel abi moro krakti leki iniwan sani di wisrefi ben o taki. Dati meki wi musu gebroiki Gado Wortu na ibri okasi. Iya, Gado Wortu de na libi!