NOITI ete a ten ben muilek so gi libisma leki na ini a ten disi (2 Tim. 3:1-5). Ibri dei wi e feti fu tan sori lobi gi Yehovah èn fu sori taki wi no o meki noti tapu wi fu libi soleki fa en wani. Yesus ben sabi taki a ten disi ben o muilek. Dati meki a taigi den bakaman fu en taki a ben o gi den a deki-ati di den ben o abi fanowdu fu horidoro te na a kaba (Mat. 24:3, 13; 28:20). A poti wan srafu di de fu frutrow fu tranga a bribi fu den. A srafu disi ben o gi den „nyanyan na a reti ten”.—Mat. 24:45, 46.

Na ini 1919, Gado poti a srafu disi fu luku a wroko fu en. Sensi a ten dati, a srafu e sorgu taki milyunmilyun tra „futuboi” fu Gado di e taki difrenti tongo e kon na ini en organisâsi èn den e kisi nyanyan na a reti ten. A nyanyan disi na den tru tori na ini Gado Wortu (Mat. 24:14; Openb. 22:17). Ma wan tu fu den buku fu wi di yu kan leisi soso nanga computer, tablet nanga den sortu sani dati no de na ini ala tongo. Dati meki a no ala sma man leisi den. Fu eksempre, furu sma no abi den felem nanga den artikel di de fu feni tapu jw.org wawan. Ma disi wani taki dati son sma no e kisi a nyanyan di den abi fanowdu fu tranga a bribi fu den? Fu man feni a yoisti piki, meki wi go luku fo prenspari aksi.

Di Satan ben wani kori Yesus fu meki ston kon tron brede, Yesus piki en: „Sma no musu libi fu brede wawan, ma fu ibri wortu di Yehovah mofo taki” (Mat. 4:3, 4). Den wortu fu Yehovah skrifi na ini Bijbel (2 Petr. 1:20, 21). Dati meki a moro prenspari sani di Yehovah e gebroiki fu gi wi leri, na Bijbel.—2 Tim. 3:16, 17.

Yehovah en organisâsi vertaal a heri Nyun-Grontapuvertaling noso pisi fu en na ini moro leki 120 tongo èn ibri yari a e kon na doro na ini moro tongo. Boiti a Nyun-Grontapuvertaling, yu abi milyardmilyard sma di abi tra Bijbel noso pisi fu Bijbel na ini dusundusun tongo. Na disi Yehovah ben abi na prakseri di a taki dati „ala sortu sma musu kisi frulusu èn taki den musu kon sabi a tru leri finifini” (1 Tim. 2:3, 4). Yehovah sabi san de na ini sma ati. Dati meki wi kan de seiker taki a o hari den sma kon „di sabi taki den abi Gado fanowdu”, so taki den kon na ini en organisâsi.—Mat. 5:3, 6; Yoh. 6:44; 10:14; Hebr. 4:13.

Efu wan sma wani abi wan tranga bribi, dan a no musu leisi Bijbel nomo. A musu frustan tu san a e leisi èn a musu du san a e leri (Yak. 1:22-25). Disi na san wan Etiopia man fu a fosi yarihondro ben musu du. A ben e leisi Gado Wortu di a preikiman Filipus aksi en: „Yu sabi san yu e leisi?” Na Etiopia man piki en: „We, fa mi ben sa sabi dati dan, efu nowan sma e leri mi?” (Tori 8:26-31) Baka dati Filipus yepi a man fu kon sabi Gado Wortu finifini. Di na Etiopia man yere den sani di Filipus leri en, a ben lobi dati so te taki a teki dopu (Tori 8:32-38). Na so a de tu taki den buku fu wi di e taki fu Bijbel, yepi wi fu kon sabi den tru tori fu Gado finifini. Den naki wi ati so te taki wi ben wani du san wi leri.—Kol. 1:9, 10.

Den buku fu wi e yepi wi leki futuboi fu Yehovah fu „nyan” èn „dringi” den bun sani di Gado e gi wi bogobogo (Yes. 65:13). Fu eksempre, A Waktitoren di de fu kisi na ini moro leki 210 tongo e tyari Bijbel profeititori kon na krin. A e yepi wi fu kon frustan den tru tori fu Bijbel moro bun èn a e gi wi deki-ati fu libi soleki fa Bijbel e taki. Ontwaakt! e kon na doro na ini sowan 100 tongo. A tijdschrift disi e leri wi moro fu den sani di Yehovah meki èn a e sori wi fa fu fiti Bijbel rai moro bun (Odo 3:21-23; Rom. 1:20). A srafu di de fu frutrow e tyari buku nanga tra sani di e taki fu Bijbel, kon na doro na ini moro leki 680 tongo! Yu e poti ten na wan sei fu leisi Bijbel? Yu e leisi ibri nyun tijdschrift nanga ala den nyun buku di e kon na doro ibri yari na ini yu tongo?

Boiti buku, tijdschrift nanga brochure, Yehovah en organisâsi e sreka lezing gi wi tu di e taki fu Bijbel. Wi kan yere den lezing disi na ini den gemeente fu wi èn na den bigi konmakandra. Yu lobi den lezing, den drama, den demonstrâsi nanga den interview di den e hori na den konmakandra disi? Te wi e luku ala den leri di wi e kisi, dan wi e si taki Yehovah e gi wi bun furu nyanyan na a reti ten.—Yes. 25:6.

Kwetikweti. A no musu fruwondru te wi e si son leisi taki son futuboi fu Yehovah e kisi moro leri leki trawan fu di den abi moro buku. Fu san ede? Luku den apostel fu eksempre. Den kisi moro leri leki furu tra bakaman fu Yesus na ini a fosi yarihondro (Mark. 4:10; 9:35-37). Toku den tra bakaman fu Yesus kisi a leri di den ben abi fanowdu.—Ef. 4:20-24; 1 Petr. 1:8.

Wi musu hori na prakseri tu taki furu sani di Yesus taki èn du di a ben de na grontapu, no skrifi na ini den Bijbel buku di e taki fu Yesus libi. Na apostel Yohanes ben skrifi: „Fu taki en leti, Yesus du furu sani tu. Ma efu sma ben o skrifi den finifini, mi denki taki presi no ben o de fu man hori ala den bukulolo disi” (Yoh. 21:25). Aladi den fosi bakaman fu Yesus ben sabi moro fu en leki wi, toku wi no e misi noti. Yehovah sorgu taki wi sabi nofo fu Yesus so taki wi kan waka soifri na en baka.—1 Petr. 2:21.

Prakseri den brifi tu di den apostel skrifi gi den gemeente fu a fosi yarihondro. Wán fu den brifi di Paulus skrifi noso moro kande, no de na ini Bijbel (Kol. 4:16). Ma disi wani taki dati wi no e kisi nofo leri fu Gado? Nôno. Yehovah sabi san wi abi fanowdu èn a gi wi nofo sani fu tan abi wan tranga bribi.—Mat. 6:8.

Na ini a ten disi, a moro makriki gi son futuboi fu Yehovah leki trawan fu kisi den buku fu wi di e taki fu Bijbel. Ma kande wan tu buku nomo de fu feni na ini a tongo di yu e taki. Efu dati de so, dan sabi taki Yehovah e broko en ede nanga yu. Tan studeri den buku di yu abi èn efu a kan, go na den konmakandra na ini wan tongo di yu man frustan. Yu kan de seiker taki Yehovah o yepi yu fu tan abi wan tranga bribi.—Ps. 1:2; Hebr. 10:24, 25.

Tapu a website fu wi, yu kan feni tijdschrift, buku nanga tra sani di e taki fu Bijbel. Yu kan feni artikel tu di kan yepi trowpaar, yongusma nanga sma di abi yongu pikin. Osofamiri kan kisi furu wini te den e luku den artikel disi na a Osofamiri Anbegi. Tra sani di yu kan feni tapu a website fu wi na artikel di e taki fu spesrutu sani soleki konmakandra di den e hori te studenti klari a Gileadskoro èn na alayari konmakandra fu a Watch Tower Bible and Tract Society of Pennsylvania. Te wan rampu pasa noso te den brada nanga sisa fu wi musu go na fesi krutu, dan wi kan leisi tu fa sani waka gi a pipel fu Yehovah (1 Petr. 5:8, 9). Wi e gebroiki a website bun tu fu preiki gi sma. Na so ala sma kan yere a bun nyunsu, srefi te den e libi na ini wan kondre pe a wroko fu wi tapu noso pe wi no man preiki so fri.

Ma awinsi yu man go tapu a website fu wi, noso yu no man go, toku yu kan tan abi wan tranga bribi. A srafu du ala san a man fu meki nofo buku nanga tijdschrift, so taki ala Kresten man kisi a nyanyan di den abi fanowdu. Sobun, no denki taki nomonomo yu musu bai wan computer, wan tablet noso wan fu den sortu sani disi, soso fu kan go tapu jw.org. Kande son brada nanga sisa wani print wan tu artikel fu a website fu wi, fu gi dati na wan sma di no abi Internet. Aladi den gemeente srefi kan du dati tu, toku den no abi fu du en.

Wi breiti taki Yesus e du san a pramisi di a taki dati a ben o gi wi san wi abi fanowdu fu tan abi wan tranga bribi. Wi kan de seiker taki Yehovah o tan gi wi „nyanyan na a reti ten”, teleki a kaba fu na ogri grontapu disi.