Disi na wan prenspari aksi, spesrutu gi sma di lasi wan lobi patna na ini dede. Kande den sma disi e angri fu trow baka nanga a patna fu den te a kisi wan opobaka na ini a nyun grontapu. Wan brada di lasi en wefi na ini dede, taki: „A no de so taki mi nanga mi wefi bosroiti fu no de trowpatna moro. Nanga wi heri ati, wi ben wani tan dini Gado fu têgo leki masra nanga wefi. Te now ete mi e denki so fu a tori.” Ma a de so taki wan sma kan howpu taki den wan di kisi wan opobaka o man trow? We, wi no man taki dati.

Furu yari kaba, den buku fu wi taki dati den sani di Yesus taki fu na opobaka èn fu trow, kande ben abi fu du nanga na opobaka na grontapu èn taki den sma di o kon na libi baka na ini a nyun grontapu no ben o trow (Mat. 22:29, 30; Mark. 12:24, 25; Luk. 20:34-36). * Wi no kan de nomonomo taki disi de so. Ma a kan de so taki Yesus wortu abi fu du nanga na opobaka fu go na hemel? Meki wi ondrosuku moro fini san Yesus ben taki.

Hori na prakseri nanga suma Yesus ben e taki. (Leisi Lukas 20:27-33.) Den Saduseiman no ben e bribi na ini na opobaka. Dati meki den poti wan aksi gi Yesus fu di den ben wani kisi en. A sani di den aksi en, ben abi fu du nanga na opobaka èn nanga a swagritrow. * Yesus piki den Saduseiman: „Den man nanga uma na ini a grontapu disi e trow. Ma den man nanga uma di warti fu libi na ini a grontapu * di o kon èn di o kisi wan opobaka, no o trow. Fu taki en leti, den no o man dede moro, bika den o de leki engel èn den o de Gado pikin, fu di den kisi wan opobaka.”—Luk. 20:34-36.

Fu san ede den buku fu wi taki dati Yesus ben e taki kande fu na opobaka na grontapu? Tu prenspari sani de di meki taki den buku taki disi. A fosi sani na taki a kan taki den Saduseiman ben denki fu na opobaka na grontapu. Sobun, sma ben sa kan denki taki a piki fu Yesus ben abi fu du nanga a tori dati tu. A di fu tu sani na taki na ini a lasti pisi fu en piki, Yesus e taki fu Abraham, Isak nanga Yakob, famiri-edeman di o kisi wan opobaka na grontapu.—Luk. 20:37, 38.

Ma kande Yesus ben e denki fu na opobaka fu go na hemel. Fu san ede wi kan taki dati? Meki wi go luku tu prenspari sani di a taki.

„Den man nanga uma di warti fu . . . kisi wan opobaka.” Den salfu Kresten di tan gi yesi na Gado, na den wan di „warti fu go na ini a Kownukondre fu Gado” (2 Tes. 1:5, 11). Fu di Krestes pai a lusu-paiman, meki Gado e si den salfuwan leki reti-ati sma. Sobun, te den dede, dan na ini Gado ai den no o abi sondu moro (Rom. 5:1, 18; 8:1). Bijbel e taki dati den sma disi ’de koloku èn taki den de  santa’. Den warti fu kisi wan opobaka fu go na hemel (Openb. 20:5, 6). Na a tra sei, „den sma di no du san reti”, o kisi na okasi tu fu libi na grontapu (Tori 24:15). Ma wi kan taki dati den „warti fu kisi” wan opobaka?

„Den no o man dede moro.” Yesus no ben taki: „Den no o dede moro.” Na presi fu dati, a taki: „Den no o man dede moro.” Wan tra Bijbel e taki: „Dem no kan dede moro.” Salfu Kresten di tan gi yesi na Gado te na dede, e kisi libi na hemel èn den no o dede noiti moro. Sobun, den no man dede (1 Kor. 15:53, 54). Dede no abi makti moro na tapu den sma di o kisi wan opobaka fu go na hemel. *

Sobun, san wi kan taki now? A kan taki den sani di Yesus taki fu na opobaka èn fu trow abi fu du nanga sma di kisi wan opobaka fu go na hemel. Efu dati de so, dan den wortu fu en e sori wi difrenti sani: Sma di e go na hemel no e trow, den no man dede èn yu kan taki dati den de leki engel. Dati na yeye libisani di e libi na hemel. Ma so wan denki e meki difrenti aksi opo kon.

A fosi aksi na: Fu san ede Yesus ben o taki nanga den Saduseiman fu na opobaka fu go na hemel, efu den ben e denki na opobaka na grontapu? A no ala ten den piki fu Yesus ben de san den gensman fu en ben e fruwakti. Fu eksempre, di den Dyu aksi en fu sori den wan marki, a taigi den: „Broko a tempel disi puru, dan mi o bow en baka na ini dri dei.” Kande Yesus ben sabi taki den ben e denki fu a tempel na ini Yerusalem, „ma a tempel di a ben taki fu en, ben de en skin” (Yoh. 2:18-21). A kan taki Yesus no ben feni en fanowdu fu piki den Saduseiman di ben e hoigri èn di no ben e bribi na ini na opobaka noso na ini engel (Odo 23:9; Mat. 7:6; Tori 23:8). Na presi fu dati, Yesus ben wani taigi den bakaman fu en san a wani taki fu kisi wan opobaka fu go na hemel. Den bakaman disi ben de reti-ati sma di ben abi a howpu fu libi na hemel.

A di fu tu aksi na: Fu san ede Yesus taki leki lasti fu Abraham, Isak, nanga Yakob di o kisi wan opobaka na grontapu? (Leisi Mateyus 22:31, 32.) Na ini a pisi disi Yesus e taki fu den famiri-edeman. Ma fosi a e bigin taki fu den man disi, a e poti na aksi: „Unu no leisi san Gado ben taigi unu fu na opobaka fu den dede sma?” A fasi fa a poti na aksi, gi en na okasi fu bigin taki fu na opobaka na grontapu, na presi fu na opobaka na hemel. Yesus ben sabi taki den Saduseiman ben e bribi den sani di Moses skrifi. Dati meki a kari wan sani di Yehovah taigi Moses na a makabusi di ben e bron. Na so a ben wani sori taki Gado o gi sma wan opobaka na grontapu trutru.—Eks. 3:1-6.

A di fu dri aksi na: Efu a sani di Yesus taki fu na opobaka èn fu trow ben abi fu du nanga na opobaka na hemel, dan disi wani taki dati den sma di kisi wan opobaka na grontapu o man trow baka? Gado Wortu no e taki krin fu a tori disi. Efu Yesus ben e taki fu na opobaka fu go na hemel, dan den wortu disi no e sori efu sma di kisi wan opobaka na grontapu o man trow baka.

Ma wi sabi taki Gado Wortu e taki krin taki te wan sma dede, dan a no trow moro. Fu dati ede wan sma di lasi en trowpatna na ini dede no abi fu denki taki a e meki wan bigi fowtu te a bosroiti fu trow baka. Na ensrefi musu bosroiti dati èn nowan sma musu krutu en efu a wani suku wan trowpatna baka.—Rom. 7:2, 3; 1 Kor. 7:39.

Wi kan frustan taki sma abi furu aksi di abi fu du nanga a libi na ini a nyun grontapu. Ma na presi taki wi e pruberi fu feni wi eigi piki tapu den aksi disi, wi musu wakti fu si san o pasa. Wán sani de seiker: Sma di gi yesi na Yehovah, o de koloku fu di a o gi den ala san den e angri fu kisi èn san den abi fanowdu.—Ps. 145:16.