1, 2. San o tranga a bribi fu wi taki a Kownukondre o du san Gado abi na prakseri gi libisma èn fu san ede? (Luku a prenki na a bigin fu na artikel.)

NOFO TRON wi leki Yehovah Kotoigi e taki dati Gado Kownukondre na a wan-enkri lusu gi ala den problema fu wi èn dati meki wi e fruteri sma fayafaya san Bijbel e taki fu a prenspari tori disi. A Kownukondre howpu e gi wi furu trowstu tu. Ma o tranga wi e bribi taki a Kownukondre de trutru èn taki a o du san Gado abi na prakseri? Fu san ede wi kan abi wan tranga bribi na ini a Kownukondre?—Hebr. 11:1.

² Na Almaktiwan srefi seti a Mesias Kownukondre fu meki den sani di a abi na prakseri gi libisma kon tru. Gado ben man seti a Kownukondre disi fu di na en wawan abi a reti fu tiri. Dati meki a Kownukondre disi no man seki. Suma na a Kownu fu a Kownukondre? Suma o tiri makandra nanga en? Suma noso san den o tiri? Yehovah seti ala den prenspari sani disi fu a Kownukondre nanga yepi fu frubontu. Den frubontu dati de leki kontrakti noso kruderi di Yehovah noso en Manpikin Yesus Krestes meki. Te wi o luku den  frubontu disi moro fini, dan wi o frustan moro bun fu san ede wi kan de seiker taki Gado o du trutru san a abi na prakseri èn dati o yepi wi fu si taki a Kownukondre no man seki.—Leisi Efeisesma 2:12.

3. San wi o luku na ini na artikel disi èn na ini a wan di e kon?

³ Bijbel e taki fu siksi prenspari frubontu di abi fu du nanga a Mesias Kownukondre di Krestes Yesus e tiri. Den frubontu dati na (1) a frubontu nanga Abraham, (2) a Wetfrubontu, (3) a frubontu nanga David, (4) a frubontu fu de wan priester leki Melkiseidek, (5) a nyun frubontu nanga (6) a Kownukondre frubontu. Meki wi go luku san ibriwan fu den frubontu abi fu du nanga a Kownukondre èn fa den e sori taki a prakseri fu Gado o kon tru gi grontapu èn gi libisma.—Luku a faki „ Fa Gado o meki en prakseri kon tru”.

4. Soleki fa skrifi na ini Genesis, dan sortu prenspari sani di abi fu du nanga libisma, Yehovah ben taki?

⁴ Yehovah sreka a moi grontapu fu wi fu meki sma libi na tapu. Baka dati a taki den dri prenspari sani disi di abi fu du nanga libisma: (1) A ben o meki libisma èn den ben o de leki en. (2) Libisma ben musu meki grontapu tron wan paradijs èn den ben musu kisi pikin so taki grontapu ben o kon furu nanga reti-ati sma. (3) Libisma no ben mag nyan fu a bon di nen „Sabi san bun èn san ogri” (Gen. 1:26, 28; 2:16, 17). Den dri prenspari sani disi ben e tyari kon na krin san Gado abi na prakseri gi libisma èn gi grontapu. Ma dan fu san ede Gado ben abi fu meki frubontu?

5, 6. (a) Fa Satan pruberi fu du sani fu no meki a prakseri fu Gado kon tru? (b) San Yehovah du di Satan opo ensrefi teige en na ini Eden?

⁵ Satan ben de a fosiwan di opo ensrefi teige Gado èn di bigin du sani fu no meki a prakseri fu Gado kon tru. A pruberi fu meki libisma trangayesi Gado. Dati meki a kori Eva fu nyan a froktu fu a bon di nen „Sabi san bun èn san ogri” (Gen. 3:1-5; Openb. 12:9). Na so Satan ben wani meki sma denki taki Gado no abi a reti fu tiri. Bakaten Satan taki tu dati libisma e anbegi Gado soso fu kisi wini gi densrefi.—Yob 1:9-11; 2:4, 5.

⁶ San Yehovah ben o du now? Efu a ben o kiri den sma di opo densrefi teige en, dan grontapu no ben o kon furu nanga den bakapikin fu Adam nanga Eva, soleki fa a ben abi na prakseri. Dati meki a koni Mekiman no kiri den trangayesi sma disi wantewante. Na presi fu dati, a kon nanga a pramisi fu Eden. A prenspari profeititori disi ben musu sorgu taki ala sani di a taki kon tru.—Leisi Genesis 3:15.

7. San o pasa nanga a sneki èn nanga den pikin fu en, soleki fa a pramisi fu Eden e sori?

⁷ Nanga a pramisi fu Eden, Gado sori taki a sneki nanga den pikin fu en ben o kisi dedestrafu. Sobun, a ben o kiri Satan Didibri nanga den sma di ben o teki en sei fu di den no wani Gado leki den tiriman. A tru Gado gi a pikin fu na uma fu en na ini hemel a makti fu kiri Satan. Na so a pramisi fu Eden tyari kon na krin taki wan ten ben o kon taki Satan no ben o de moro èn taki Gado ben o puru den bakapisi fu den ogri di Satan du. A pramisi sori tu fa disi ben o pasa.

8. Fa Gado sori suma na a uma èn suma na a pikin fu na uma?

⁸ Suma ben o de a pikin fu na uma? A pikin disi ben o abi fu de wan yeye. Fu san ede disi de so? Fu di a pikin disi o sorgu  taki Satan, di de wan yeye di sma no man si, „kon tron noti” (Hebr. 2:14). Fu dati ede na uma di ben o kisi a pikin, no ben o de wan trutru uma di sma man si. Den pikin fu a sneki ben e kon lai na grontapu. Ma baka di Yehovah meki a pramisi fu Eden, a ben o teki sowan 4000 yari fosi sma ben o kon sabi suma na a uma nanga a pikin fu en. Na ini a pisi ten dati, Yehovah meki difrenti frubontu fu sori suma na a pikin dati. Den frubontu disi ben o sori den futuboi fu en fu san ede den ben kan de seiker taki na a pikin disi Gado ben o gebroiki fu puru den ogri di Satan du nanga libisma.

9. San na a frubontu nanga Abraham èn o ten a bigin wroko?

⁹ Sowan 2000 yari baka a pramisi fu Eden, Yehovah taigi a famiri-edeman Abraham fu gowe libi en oso na Ur na ini Mesopotamia èn fu go na a kondre Kanan (Tori 7:2, 3). Yehovah taigi en: „Gowe libi yu kondre, yu famiri nanga na osofamiri fu yu papa, dan go na a kondre di mi o sori yu. Mi o meki yu tron na afo fu wan bigi pipel, mi o blesi yu èn mi o meki yu nen kon bigi. Yu o de wan blesi gi trawan. Mi o blesi den wan di e blesi yu. Efu wan sma e winsi ogri gi yu, dan mi o fluku a sma dati. Na yu o meki taki ala den famiri fu grontapu man kisi blesi trutru” (Gen. 12:1-3). Disi na a fosi tron taki wi e leisi taki Yehovah Gado meki wan frubontu nanga Abraham. Wi no sabi soifri o ten na a fosi leisi di Yehovah taki nanga Abraham fu a frubontu disi. Ma a frubontu bigin wroko na ini 1943 Fosi Krestes, di Abraham abra Eufraat-liba, baka di a gowe libi Haran. Na a pisi ten dati Abraham ben abi 75 yari.

10. (a) Fa Abraham sori tranga bribi na ini den pramisi fu Gado? (b) Sortu sani di abi fu du nanga a pikin fu na uma, Yehovah bigin tyari kon na krin safrisafri?

 ¹⁰ Wan tu leisi Yehovah taki nanga Abraham fu a pramisi disi èn ibri leisi a ben e fruteri moro fini san a ben o du (Gen. 13:15-17; 17:1-8, 16). Fu di Abraham ben abi wan tranga bribi na ini den pramisi fu Gado, meki a ben de klariklari fu tyari en wan-enkri manpikin leki ofrandi. Fu dati ede Yehovah sori Abraham taki a no ben abi fu tweifri taki a ben o hori ensrefi na a frubontu di a meki nanga en. (Leisi Genesis 22:15-18; Hebrewsma 11:17, 18.) Baka di a frubontu nanga Abraham bigin wroko, dan safrisafri Yehovah bigin tyari prenspari sani kon na krin di abi fu du nanga a pikin fu na uma. A pikin ben o komoto na ini a famiri fu Abraham. A no ben o de wán sma nomo, ma wan heri grupu sma di ben o tiri leki kownu. Den ben o kiri ala feanti fu Gado èn den ben o meki furu sma kisi blesi.

11, 12. (a) Fa Bijbel e sori taki a frubontu nanga Abraham ben o kon tru na wan fasi di ben o tyari moro wini kon gi libisma? (b) San disi wani taki gi wi?

¹¹ A fosi leisi di a frubontu nanga Abraham kon tru, na di den bakapikin fu en go na ini a Pramisi Kondre. Ma Bijbel e sori taki a frubontu disi ben o tyari moro wini kon gi libisma (Gal. 4:22-25). Na apostel Paulus ben sori taki a moro prenspari bakapikin fu Abraham na Yesus Krestes. Boiti dati, den 144.000 salfu Kresten na bakapikin tu (Gal. 3:16, 29; Openb. 5:9, 10; 14:1, 4). Na uma di kari na ini a pramisi fu Eden, na a pisi fu Gado en organisâsi di de na hemel. Bijbel e kari na uma disi, „a Yerusalem di de na tapusei”. Dati na ala den yeye di tan gi yesi na Gado (Gal. 4:26, 31). Sobun, a frubontu nanga Abraham ben sori taki a pikin fu na uma o tyari blesi kon gi libisma.

¹² A frubontu nanga Abraham na wan dyaranti taki a Kownukondre na hemel o kon trutru èn taki a Kownu nanga den sma di o tiri makandra nanga en, o kisi a Kownukondre dati (Hebr. 6:13-18). O langa a frubontu disi o wroko? Soleki fa Genesis 17:7 e taki, dan a de „wan têgo frubontu”. A o tan wroko teleki a Mesias Kownukondre kiri den feanti fu Gado èn teleki ala sma na grontapu kisi blesi (1 Kor. 15:23-26). Fu taki en leti, den sma di o libi na grontapu na a ten dati, o kisi wini fu têgo. A frubontu di Gado meki nanga Abraham e sori taki Yehovah o du nomonomo san a abi na prakseri: A o meki taki soso reti-ati libisma „kon lai na grontapu”.—Gen. 1:28.

13, 14. Sortu dyaranti a frubontu nanga David e gi wi?

¹³ A pramisi fu Eden èn a frubontu nanga Abraham e leri wi taki Yehovah e tiri na wan reti fasi ala ten. Sobun, a seti a Mesias Kownukondre na wan reti fasi tu (Ps. 89:14). Yu denki taki a Mesias Kownukondre o kon kruka? Yu denki taki Gado o abi fu puru a Kownukondre disi? Wan tra frubontu di Gado meki, e gi wi a dyaranti taki disi no o pasa noiti.

¹⁴ Yehovah ben pramisi Kownu David fu owruten Israel wan sani. A pramisi dati na a frubontu nanga David. (Leisi 2 Samuel 7:12, 16.) Yehovah meki a frubontu disi nanga David na a ten di a ben e tiri na ini Yerusalem èn a pramisi en taki a Mesias ben o de wan bakapikin fu en (Luk. 1:30-33). Na so Yehovah sori moro fini na ini sortu famiri a Mesias ben o gebore èn a sori taki a bakapikin disi fu David  ben o de a sma „di abi a reti fu kisi” a makti fu tiri a Mesias Kownukondre (Esek. 21:25-27). A tiri fu David o tan fu ala ten fu di Yesus, di de a bakapikin fu en, „o tiri fu ala ten. A kownusturu fu en o tan . . . neleki fa a son o tan” (Ps. 89:34-37). Iya, noiti a Mesias Kownukondre o kon de wan kruka tiri èn fu têgo wi o kisi wini fu den sani di a o du.

15-17. (a) Soleki fa a frubontu fu de wan priester leki Melkiseidek e sori, dan sortu tra wroko a pikin fu na uma ben o du? (b) Fu san ede den ben o du dati?

¹⁵ A frubontu nanga Abraham èn a frubontu nanga David sori taki a pikin fu na uma ben o de wan kownu. Ma disi no ben o sari fu meki ala libisma kisi blesi. Efu sma ben wani kisi blesi trutru, dan den no ben musu abi sondu moro èn den ben musu tron memre fu a bigi famiri fu Yehovah. Fu meki disi pasa, dan a pikin ben musu de wan priester tu. Fu sorgu taki a sani disi ben man pasa, a koni Mekiman seti wan tra sani. Dati na a frubontu fu de wan priester leki Melkiseidek.

¹⁶ Yehovah meki Kownu David tyari kon na krin taki ensrefi ben o meki wan frubontu nanga Yesus. A frubontu disi abi fu du nanga tu sani. A fosi sani na taki Yesus ben o „sidon na [Gado] reti-anusei” teleki a poti den feanti fu en na en ondro. A di fu tu sani na taki a ben o tron „wan priester fu têgo neleki Melkiseidek”. (Leisi Psalm 110:1, 2, 4.) Fu san ede a ben o de „neleki Melkiseidek”? We, langa ten fosi den bakapikin fu Abraham go na ini a Pramisi Kondre, Melkiseidek, a kownu fu Salem, ben de „priester fu a Moro Hei Gado” (Hebr. 7:1-3). Na Yehovah srefi ben poti en leki kownu èn leki priester. En na a wan-enkri sma na ini den Hebrew Buku fu Bijbel di ben de kownu nanga priester na a srefi ten èn na nowan presi a skrifi taki sma fosi en noso sma baka en ben de dati tu. Dati meki wi kan taki dati a ben de „wan priester fu ala ten” noso fu têgo.

¹⁷ Na Gado srefi poti Yesus leki priester nanga yepi fu a spesrutu frubontu disi di Yehovah meki nanga en èn a o tan „wan priester fu têgo, neleki Melkiseidek” (Hebr. 5:4-6). A frubontu disi e sori krin taki Yehovah e gi a dyaranti taki a o gebroiki a Mesias Kownukondre fu meki den sani kon tru di a abi na prakseri gi libisma èn gi grontapu.

18, 19. (a) San den frubontu di wi kari na ini na artikel disi e sori wi fu a Kownukondre? (b) San wi o luku na ini a tra artikel?

¹⁸ Te wi e luku den frubontu di kari na ini na artikel disi, dan wi kan si san den abi fu du nanga a Mesias Kownukondre èn fa a Kownukondre seti nanga yepi fu kontrakti di Gado srefi meki. A pramisi fu Eden e gi wi a dyaranti taki Yehovah o meki den sani di abi na prakseri gi grontapu èn gi libisma kon tru nanga yepi fu a pikin fu na uma. Suma ben o de a pikin disi èn san a ben o du? A frubontu nanga Abraham e tyari den tori disi kon na krin.

¹⁹ A frubontu nanga David e sori moro fini fu sortu famiri a Mesias ben o kon. A frubontu disi e gi a Mesias a reti tu fu tiri grontapu so taki wi o kisi wini fu têgo fu den sani di a Kownukondre o du. A frubontu fu de wan priester leki Melkiseidek na wan dyaranti taki a pikin o de wan priester tu. Ma a no Yesus wawan o meki libisma kon de sondro sondu. Tra sma salfu tu fu de kownu nanga priester. Pe den sma disi ben o komoto? Na ini a tra artikel wi o luku a tori disi.