1. Fa furu sma e denki fu den sani di den abi?

FURU sma e taki a sani disi: „Yu no sabi san yu abi, teleki yu lasi en.” So wan sani pasa nanga yu kaba? Te wan sma gro kon nanga son sani, dan furu leisi a e pasa taki a no e warderi den. Fu eksempre, te wan sma gro kon na ini wan gudu osofamiri, dan a kan taki a no abi warderi gi ala den sani di a abi. A sani disi kan pasa nanga yongusma. Fu di den no abi ondrofeni, meki den no e frustan san prenspari trutru na ini a libi.

2, 3. (a) Nanga sortu sani yongu Kresten musu luku bun? (b) San kan yepi wi fu abi warderi gi den sani di wi abi?

² Efu yu na wan yongu sma, dan san de prenspari gi yu? Furu sma na grontapu e feni taki gudu na a moro prenspari sani. Kande den wani abi wan bun wroko, wan moi oso, den moro nyun telefon noso computer. Ma efu yu e broko yu ede soso nanga den sani disi, dan yu e misi wan moro prenspari sani. Dati na taki wi alamala musu abi wan matifasi nanga Gado. A sari fu si taki milyunmilyun sma no e meki muiti fu abi dati. Un yonguwan di abi papa nanga mama di kweki unu na ini a tru bribi musu luku bun taki unu no lasi warderi gi  den sani di den leri unu fu Yehovah (Mat. 5:3). Efu unu no abi warderi gi den sani dati, dan unu kan kisi problema di o pori un heri libi.

³ Ma a sani dati no abi fu miti yu. San o yepi yu fu abi warderi gi den sani di yu leri fu Yehovah? Meki wi go luku wan tu eksempre fu Bijbel di o yepi wi fu si fu san ede a de wan koni sani fu abi warderi gi den sani di wi leri fu Yehovah. Den eksempre di wi o luku now no o yepi yongusma wawan, ma den o yepi ala Kresten fu abi warderi gi den sani di Yehovah gi wi.

4. San 1 Samuel 8:1-5 e taki fu den manpikin fu Samuel?

⁴ Na ini Bijbel wi kan leisi fu sma di ben kisi furu fu Yehovah, ma di no ben abi warderi gi dati. Na dati ben pasa na ini na osofamiri fu a profeiti Samuel. A profeiti disi dini Yehovah sensi di a ben de wan pikin boi èn a tan du dati teleki a kon owru (1 Sam. 12:1-5). Samuel ben de wan moi eksempre gi den manpikin fu en di ben nen Yoèl nanga Abia. Ma den no ben warderi dati èn den du ogri sani. Bijbel e taigi wi taki den no ben de leki den papa, ma den ben e „krutu sani na wan kruktu fasi”.—Leisi 1 Samuel 8:1-5.

5, 6. Fa sani waka nanga den manpikin nanga a granpikin fu Yosia?

⁵ Na so a ben de tu nanga den manpikin fu Kownu Yosia. Yosia ben gi den wan heri moi eksempre fu di a ben e anbegi Yehovah fayafaya. Di sma feni a wetbuku fu Gado èn den leisi en gi Yosia, dan a meki tranga muiti fu du san Yehovah taki na ini a wet. A puru ala afkodrei nanga bonuman na ini a kondre èn a gi a pipel deki-ati fu gi yesi na Yehovah (2 Kow. 22:8; 23:2, 3, 12-15, 24, 25). Dati na wan moi eksempre di a gi den manpikin fu en. Dri manpikin fu en nanga wan granpikin tron kownu baka en. Ma nowan fu den ben abi warderi gi den sani di den leri fu en.

⁶ Di Yoahas, wan fu den manpikin fu Yosia, tron kownu a „du sani di Yehovah no feni bun”. A tiri dri mun nomo èn baka dati wan kownu fu Egepte poti en na strafu-oso èn na drape a dede (2 Kow. 23:31-34). Baka dati en brada Yoyakim tiri 11 yari. Ma en srefi no ben abi warderi gi den bun sani di a leri fu en papa. Fu di Yoyakim ben trangayesi Yehovah, meki Yeremia ben skrifi: „Den o beri en leki wan manburiki” (Yer. 22:17-19). Sedekia, a tra manpikin fu Yosia, nanga en granpikin Yoyakin no ben de moro betre. Nowan fu den no teki a bun eksempre fu Yosia.—2 Kow. 24:8, 9, 18, 19.

7, 8. (a) Na sortu fasi Salomo lasi warderi gi den bun sani di a leri? (b) San wi kan leri fu den yongusma na ini Bijbel di no ben teki a bun eksempre di den kisi?

⁷ Salomo ben de wan kownu di leri furu fu en papa David. Na a bigin, sani ben e go bun nanga Salomo. Ma bakaten a no ben abi warderi moro gi den sani di a ben leri fu Gado. „Na ini en owru dei, Salomo ben e anbegi tra gado, fu di den wefi fu en gi en deki-ati fu du disi. A no ben e dini Yehovah en Gado nanga en heri ati moro. A no du leki fa en papa David ben du” (1 Kow. 11:4). Dati meki Yehovah no ben feni Salomo bun moro.

⁸ Ala den man disi ben abi na okasi fu kon sabi Yehovah èn fu du san reti. A sari fu si taki den no du disi. Ma a no ala yongusma na ini Bijbel ten ben tyari densrefi na so wan fasi èn na so a de tu na ini a ten disi. Meki wi go luku wan tu bun eksempre di kan yepi yongu Kresten na ini a ten disi.

9. Fa den manpikin fu Noa de wan moi eksempre? (Luku a prenki na a bigin fu na artikel.)

⁹ Den manpikin fu Noa ben de wan bun eksempre. Den papa kisi a wroko fu bow wan ark èn fu tyari en osofamiri go na ini. Den manpikin fu Noa ben frustan taki a prenspari fu gi yesi na Yehovah. A ben musu de so taki den wroko makandra nanga den papa. Bakaten den yepi en fu bow na ark èn den go na ini tu (Gen. 7:1, 7). San ben de a bakapisi? Na ini Genesis 7:3 wi e leisi taki den tyari den meti go na ini na ark ’so taki ala den sortu meti disi ben kan tan na libi èn den ben kan meki furu pikin na grontapu’. Libisma ben tan na libi tu. Fu di den manpikin fu Noa ben warderi san den leri fu den papa, meki den ben abi a grani fu meki pikin so taki libisma ben kan tan na grontapu. Boiti dati, den ben abi a grani fu seti a tru anbegi baka na tapu wan krin grontapu.—Gen. 8:20; 9:18, 19.

10. Fa fo yongu Hebrew man na ini Babilon sori warderi gi den sani di den ben leri fu den papa nanga mama?

¹⁰ Hondrohondro yari baka dati, fo yongu Hebrew man sori taki den ben leri san prenspari trutru na ini a libi. Na ini 617 Fosi Krestes, sma ben teki Hananya, Misael, Asaria nanga Danièl tyari go na Babilon. Den boi disi ben moi èn den ben koni. A ben o makriki gi den fu teki den fasi fu den Babilonsma abra. Ma den no du dati. Den sani di den du sori taki den no frigiti san den leri fu den papa nanga mama. Den fo man disi kisi furu blesi fu di den tan du san den leri di den ben yongu.—Leisi Danièl 1:8, 11-15, 20.

11. Fa trawan kisi wini fu den sani di Yesus ben leri fu en Tata?

¹¹ Te wi e taki fu bun eksempre, dan wi no kan frigiti Yesus, a Manpikin fu Gado. A kisi furu leri fu en Papa èn a ben warderi dati trutru. A sori dati di a taki: „Mi e taki den sani disi soleki fa a Tata leri mi” (Yoh. 8:28). Yesus ben wani meki tra sma kisi wini fu den sani di a ben leri. A ben taki: „Mi musu go fruteri a bun nyunsu fu Gado Kownukondre na tra foto tu, bika na fu disi Gado ben seni mi kon” (Luk. 4:18, 43). A yepi den arkiman fu en fu frustan fu san ede den ’no ben musu de wan pisi fu grontapu’ di no e warderi den tru leri fu Gado.—Yoh. 15:19.

12. (a) Fa a situwâsi fu furu yonguwan de a srefi leki san skrifi na 2 Timoteyus 3:14-17? (b) Sortu aksi yongu Kresten musu poti gi densrefi?

¹² Kande yu abi papa nanga mama di e dini Yehovah Gado fayafaya, neleki den yonguman di wi ben taki fu den kaba. Efu dati de so, dan kande a situwâsi fu yu de a srefi leki san Bijbel e taki fu Timoteyus. (Leisi 2 Timoteyus 3:14-17.) Na yu papa nanga mama gi „yu leri” fu a tru Gado èn na den leri yu fa fu gi yesi na en. Kande yu papa nanga mama bigin du dati sensi di yu ben de wan beibi. A no de fu taki dati disi meki yu „kon koni, so taki yu kan kisi frulusu fu di yu e bribi na ini Krestes Yesus”. Èn a yepi yu tu fu de „srekasreka fu du” a diniwroko fu Gado. Wan prenspari aksi di e opo kon now na: Yu o sori warderi gi den sani di yu leri? Kande yu o abi fu ondrosuku yusrefi fu feni a piki. Yu kan aksi yusrefi: ’Fa mi e denki fu ala den kotoigi di libi fosi mi èn di tan gi yesi na Yehovah? Mi breiti taki mi de wan Kotoigi fu Yehovah? Fa mi e feni en fu de wán fu den sma na grontapu di de wan mati fu Gado? Mi e frustan taki disi na wan tumusi aparti èn moi grani?’

13, 14. San son yongu Kresten di gro kon bigi na ini a tru anbegi wani go du? Ma fu san ede a no ben o de wan koni sani fu du dati? Gi wan eksempre.

 ¹³ Kande son yonguwan di abi Kresten papa nanga mama no e frustan o moi a tru anbegi de èn o ogri a grontapu fu Satan de. Dati meki sonwan fu den ben wani go na ini a grontapu disi. Ma yu denki taki dati na wan koni sani fu du? Yu ben o lon go na strati fu meki wan wagi naki yu soso fu kon sabi efu a e hati trutru? Nôno, kwetikweti. Boiti taki yu kan kisi mankeri, yu kan dede tu. Sobun, a no de fanowdu fu libi wan „fisti yayolibi” na ini a grontapu disi soso fu kon sabi bakaten taki a e tyari furu problema kon.—1 Petr. 4:4.

¹⁴ Gener, di e libi na ini Asia, gro kon bigi na ini a tru anbegi. Di a ben de wan boi fu 12 yari, a teki dopu. Ma di a kon moro bigi, a grontapu libi ben hari en. A e taki: „Mi ben wani de fri fu du san mi wani neleki sma na grontapu.” Kibrikibri, Gener bigin du sani di no bun èn a ben e lei gi en famiri. Di a ben abi 15 yari, a ben e du den srefi takru sani di den mati fu en ben e du. A ben e dringi sopi èn a ben e kosi neleki den. Gener ben gwenti kon lati na oso, fu di a ben go plèi biljartbal nanga den mati fu en èn a ben lobi plèi computer game di lai feti nanga kiri. Ma baka wan pisi ten a ben kon si taki den sani di a ben e du no ben meki a de koloku trutru. A ben firi leki wan sani ben e misi na ini en libi. Now a de baka na ini a tru anbegi. A e taki dati son leisi a wani go du den sani fu a grontapu disi ete, ma a matifasi di a abi nanga Yehovah moro prenspari gi en.

15. Sortu sani yonguwan musu prakseri srefi efu den no kweki na ini a tru anbegi?

¹⁵ A no de fu taki dati tra yonguwan de tu na ini a gemeente di no abi papa nanga mama di kweki den na ini a tru anbegi. Efu yu na wan fu den yonguwan dati, dan prakseri taki yu abi wan bigi grani fu di yu kon sabi yu Mekiman èn yu e dini en. Milyunmilyun sma de na grontapu. Sobun, na wan bigi blesi fu de wan fu den sma di Yehovah hari kon na en èn di a leri den tru tori fu Bijbel (Yoh. 6:44, 45). Soso 1 fu ibri 1000 sma na ini a ten disi sabi den tru tori fu Bijbel. Yu na wan fu den. A no de fu taki dati disi e gi ibriwan fu wi prisiri awansi fa wi kon sabi den tru tori  dati. (Leisi 1 Korentesma 2:12.) Gener e taki: „A e gi mi groskin te mi e denki a tori disi. Suma na mi, taki Yehovah a Mekiman fu hemel nanga grontapu, e prakseri mi?” (Ps. 8:4) Wan sisa fu a srefi kontren e taki: „Studenti breiti srefisrefi efu den leriman sabi den ete. A de wan moro bigi grani taki Yehovah, a Moro Bigi Leriman, sabi mi!”

16. Sortu koni bosroiti yongu Kresten musu teki?

¹⁶ Prakseri a moi grani di yu abi taki yu kon leri sabi Yehovah. Du ala san yu man fu tan dini en. Teki a bun eksempre fu den futuboi fu en fu owruten. Dati na a moro koni sani fu du. No waka baka den yonguwan fu a grontapu disi, di e pori den libi èn di no o abi wan bun tamara.—2 Kor. 4:3, 4.

17-19. Fu san ede a de wan koni sani fu de tra fasi leki a grontapu disi?

¹⁷ A no de fu taki dati a o muilek son leisi fu de tra fasi leki den yonguwan fu a grontapu disi. Ma efu yu e prakseri a tori disi, dan yu o si taki a de wan koni sani fu du. Luku wan eksempre: Prakseri wan sportman di o go na den Olympis Prei. A ben musu libi tra fasi leki den speri fu en fu man tron wan bun sportman. Fu man oefen bun, a ben musu libi furu sani na baka di ben o nyan en ten èn di ben o puru en prakseri na san a ben e du. Fu di a ben de klariklari fu de tra fasi, meki a ben man oefen moro èn a ben man go na den Olympis Prei.

¹⁸ Furu sma na ini a grontapu disi no e denki sortu takru bakapisi den sani di den e du kan abi. Ma den futuboi fu Yehovah de tra fasi. Efu wi no de leki a grontapu disi, dan wi o wai pasi gi sani soleki hurudu, fu di dati kan pori a matifasi di wi abi nanga Yehovah. Na so wi o „grabu a trutru libi hori bun steifi” (1 Tim. 6:19). A sisa di wi ben kari kaba, e taki: „Efu yu no e frede fu taki san yu e bribi, dan dati o meki yu firi bun. Disi o sori taki yu abi a krakti fu no meki a grontapu fu Satan hari yu. San moro prenspari, na taki a o de neleki yu kan si fa Yehovah Gado e lafu fu di a breiti nanga yu! Dan yu o firi bun taki yu de tra fasi!”

¹⁹ A libi no warti notinoti efu wan sma e prakseri nomo san a kan kisi now (Preik. 9:2, 10). Efu yu na wan yonguwan, dan go denki seryusu fu san ede yu de na grontapu èn o langa yu man libi na ini a ten di e kon. Efu yu wani abi wan warti libi, dan a de wan koni sani fu no libi leki den grontapusma.—Ef. 4:17; Mal. 3:18.

20, 21. (a) Efu wi e teki yoisti bosroiti, dan sortu blesi wi o kisi na ini a ten di e kon? (b) San Yehovah e aksi fu wi?

²⁰ Efu wi teki yoisti bosroiti, dan wi o abi wan bun libi now èn wi o „kisi grontapu” pe wi o libi fu têgo. Wi o kisi someni moi blesi na ini a ten di e kon (Mat. 5:5; 19:29; 25:34). Ma Gado no e gi wi den sani disi somarso. A e aksi wan sani fu wi. (Leisi 1 Yohanes 5:3, 4.) Hori na prakseri taki a no o de fu soso te wi e du muiti now fu dini Yehovah awansi san e pasa.

²¹ A de wan bigi grani taki wi kisi so furu fu Gado! Wi kon sabi den tru tori di skrifi na ini en Wortu. Wi sabi den tru tori tu di abi fu du nanga en èn nanga den sani di a abi na prakseri fu du. Wi breiti srefisrefi taki wi abi a grani fu tyari en nen èn fu de wan Kotoigi fu en. Gado e pramisi wi taki a de na wi sei fu yepi wi (Ps. 118:7). Meki wi alamala, awinsi wi yongu noso owru, sori warderi gi ala den sani di wi kisi. Meki wi libi na wan fasi tu di e sori taki wi wani gi Yehovah „glori fu têgo”.—Rom. 11:33-36; Ps. 33:12.