1, 2. Fa Gado wani taki sma anbegi en, awinsi den yongu noso den owru?

YU NA wan yongu sma? Efu dati de so, dan yu kan de seiker taki yu leki yonguwan de prenspari na ini na organisâsi fu Yehovah. Na ini furu kondre furu fu den sma di e teki dopu na yongusma. A e gi wi deki-ati fu si taki furu yongusma e bosroiti fu anbegi Yehovah.

² Yu lobi fu de nanga tra yonguwan leki yusrefi? A no de fu taki dati yu lobi fu de nanga den speri fu yu. Ma awinsi wi yongu noso wi owru èn awinsi fa wi kweki noso fu sortu kulturu wi de, Gado wani taki wi anbegi en makandra nanga ala den brada nanga sisa fu wi. Na apostel Paulus ben skrifi taki Gado wani taki „ala sortu sma musu kisi frulusu èn taki den musu kon sabi a tru leri finifini” (1 Tim. 2:3, 4). Na Openbaring 7:9, wi e leisi taki den sma di e anbegi Gado komoto na „ala kondre, lo, pipel, nanga tongo”.

3, 4. (a) Sortu denki furu yongusma abi na ini a ten disi? (b) Soleki fa Efeisesma 4:25 e taki, dan nanga san Paulus agersi a gemeente?

³ Den yonguwan di e anbegi Yehovah de heri tra fasi leki den yonguwan fu a grontapu disi. Furu sma di no e dini Yehovah e denki densrefi nomo èn den e du nomo san den wani. Son ondrosukuman  taki dati den yongusma fu a ten disi e prakseri densrefi moro leki den wan fu fositen. A fasi fa den e taki èn den krosi di den e weri e sori taki den no abi lespeki gi bigisma. Den feni taki den bigisma no de fu a ten disi.

⁴ A fowtu denki disi de na ala sei fu grontapu. Dati meki yonguwan di e dini Yehovah musu du tranga muiti fu no teki a denki disi abra èn fu si sani soleki fa Gado e si sani. Srefi na ini a fosi yarihondro, na apostel Paulus ben feni en fanowdu fu taigi den Kresten brada nanga sisa fu luku bun nanga ’a yeye di de na ini den sma di e trangayesi Gado’. (Leisi Efeisesma 2:1-3.) A e gi wi deki-ati fu si taki den yonguwan na ini a gemeente no de leki den sma dati. Den yonguwan disi wani dini Yehovah makandra nanga den brada nanga sisa fu den. Den e frustan taki a gemeente de leki wan skin di abi furu pisi, ma ala den pisi dati e wroko makandra. Dati meki Paulus ben taki dati „wi na pisi fu a srefi skin èn wi de fu makandra” (Ef. 4:25). O moro wi e kon krosibei fu a kaba fu a grontapu fu Satan, o moro wi musu wroko makandra leki brada nanga sisa. Meki wi go luku wan tu Bijbel eksempre di o yepi wi fu frustan o prenspari a de fu tan horibaka gi makandra èn fu tan de wán.

5, 6. San wi e leri fu Lot nanga den umapikin fu en?

⁵ Na ini owruten, Yehovah en pipel ben pasa muilek situwâsi. Te den ben bondru kon na wán èn te den ben yepi makandra, dan Yehovah ben kibri den. Na ini a ten disi, futuboi fu Gado kan leri wan sani fu den eksempre na ini Bijbel, awinsi den yongu noso owru. Meki wi go luku na eksempre fu Lot.

⁶ Lot nanga en osofamiri ben kan lasi den libi fu di Sodom, a foto pe den ben e tan, ben o kisi pori. Den engel fu Gado taigi Lot fu gowe libi a foto èn fu go kibri na den bergi. Den taigi en: „Lon efu yu wani tan na libi!” (Gen. 19:12-22) Lot gi yesi èn den tu umapikin fu en gi yesi tu fu di den lowe gowe makandra nanga den papa. Na wan sari sani taki tra famiriman fu den no du dati. Den yonguman di ben o trow nanga den umapikin fu Lot, „ben denki taki a ben e hori den na spotu”. Dati meki den lasi den libi (Gen. 19:14). Soso Lot nanga den umapikin fu en tan na libi fu di den gi yesi èn fu di den lowe gowe makandra.

7. Fa Yehovah yepi den sma di wroko makandra leki wán pipel di den gowe libi Egepte?

⁷ Luku wan tra eksempre. Di den Israelsma gowe libi Egepte, dan den no prati na ini difrenti grupu di suku den eigi pasi. Na presi fu dati den gowe leki wán grupu. Di Moses „langa en anu go na a se” èn Yehovah prati a se na tu, dan Moses no waka pasa en wawan, noso nanga wan tu Israelsma nomo. Ma na a heri pipel waka go na a tra sei fu a se èn Yehovah kibri den alamala (Eks. 14:21, 22, 29, 30). Iya, den alamala ben wroko makandra èn „furu sma fu tra kondre” go nanga den tu (Eks. 12:38). A ben o de wan don sani efu wan pikin grupu sma, kande wan tu yonguwan, ben o gowe libi a pipel èn teki wan tra pasi di den feni moro bun. Iniwan sma di ben o du dati no ben o kisi kibri fu Yehovah.—1 Kor. 10:1.

8. Fa Gado pipel ben sori taki den de wán na ini a ten fu Yosafat?

⁸ Na ini a ten fu Kownu Yosafat, a pipel fu Gado ben kisi fu du nanga wan tranga feanti di ben abi „wan bigi legre” èn di ben de fu den kontren na ini a birti drape (2 Kron. 20:1, 2). A moi fu si taki den futuboi fu Gado no pruberi fu wini den feanti den srefi. Na presi fu dati den go suku yepi  na Yehovah. (Leisi 2 Kroniki 20:3, 4.) A no de so taki ibri sma suku yepi na en eigi fasi. Bijbel e taki: „Ala den tra sma fu Yuda ben e tanapu drape na fesi Yehovah. Iya, den wefi nanga den pikin fu den ben de drape tu, srefi den moro pikinwan” (2 Kron. 20:13). A heri pipel, yonguwan nanga owruwan, frutrow na tapu Yehovah èn den du san a taki. Dati meki Yehovah kibri den (2 Kron. 20:20-27). Disi na wan moi eksempre di e sori fa wi leki a pipel fu Gado kan de srekasreka te wi e kisi gens.

9. San wi kan leri fu den Kresten fu a fosi yarihondro?

⁹ Den Kresten fu a fosi yarihondro ben anbegi Yehovah makandra tu. Fu eksempre, baka di furu Dyu nanga sma di teki a Dyu bribi tron Kresten, den poti prakseri „na den leri fu den apostel èn den ben e prati sani nanga makandra. Den ben e nyan èn den ben e begi tu nanga makandra” (Tori 2:42). A ben de krin fu si taki den ben de wán, spesrutu na a ten di sma frufolgu den. Na a ten dati den ben abi makandra tranga fanowdu (Tori 4:23, 24). Te sma e frufolgu wi, dan wi srefi musu de wán èn wi musu horibaka gi makandra.

10. O ten a o de tranga fanowdu fu horibaka gi makandra?

¹⁰ Heri esi, a moro muilek ten na ini a historia fu libisma o doro. A profeiti Yoèl e taki dati a ten dati o de leki „wan dungru dei” (Yoèl 2:1, 2; Sef. 1:14). Gi Gado pipel, a o de wan ten fu horibaka gi makandra. Memre den wortu disi fu Yesus: „Ibri kownukondre di prati o fadon.”—Mat. 12:25.

11. Fa Gado pipel kan du a srefi sani di skrifi na ini Psalm 122:3, 4? (Luku a prenki na a bigin fu na artikel.)

¹¹ Na ini a muilek ten di e kon, wi o abi fu horibaka gi makandra trutru èn wi o abi fu de wán. Na wan agersi fasi wi o abi fu de so krosibei fu makandra, neleki den oso na ini owruten Yerusalem. Den oso dati ben bow so krosibei fu makandra taki a psalm skrifiman taki dati a foto ben „kon de wán”. Dati meki den sma di ben e libi drape ben man yepi makandra èn den ben man kibri makandra. Boiti dati, den oso dati ben memre a psalm skrifiman kande na de lo fu Israel, di ben kon makandra leki wán pipel fu anbegi Yehovah. (Leisi Psalm 122:3, 4.) Na ini a ten disi èn na ini a muilek ten di e kon, a de prenspari tu taki wi tan „de wán”.

12. San wi musu du efu wi wani kisi frulusu te Satan o kon feti nanga Gado pipel?

¹² Fu san ede a o de so prenspari taki wi „de wán” na ini a ten di e kon? A profeititori na Esekièl kapitel 38 e taki dati „Gok fu a kondre Magok” o kon feti nanga Gado en pipel. Na a ten dati wi no musu meki noti prati wi èn wi no musu go suku yepi na a grontapu disi. Na presi fu dati wi musu tai hori na wi brada nanga sisa. A no fu di wi de makandra nanga wi brada nanga sisa, dan dati o kibri wi libi. Na a muilek ten dati, Yehovah nanga en Manpikin o frulusu ibri sma di e kari a nen fu Yehovah (Yoèl 2:32; Mat. 28:20). Ma fa a de nanga den wan di gowe libi a pipel fu Gado èn di go suku den eigi pasi? Yu denki taki Gado o frulusu den?—Mika 2:12.

13. San yonguwan kan leri fu den eksempre di wi kari?

¹³ A de krin taki a de wan don sani fu du neleki den yonguwan fu a grontapu disi, di wani moksi soso nanga den speri èn di wani du den eigi sani nomo. A ten e doro taki wi alamala, yonguwan nanga owruwan, o abi makandra tranga fanowdu. Nownow kaba wi musu leri fu wroko makandra leki wán man. Na dati o kibri wi libi na ini a ten di e kon.

14, 15. (a) Fu san ede Yehovah e gi yonguwan nanga owruwan leri now? (b) Sortu rai fu Yehovah o yepi wi fu dini en makandra leki wán man?

¹⁴ Yehovah e yepi wi fu „dini en makandra leki wán man” (Sef. 3:8, 9). A e gi wi leri so taki wi de srekasreka gi a ten te „ala sani o kon makandra baka na ondro Krestes”. (Leisi Efeisesma 1:9, 10.) Gado wani taki ala den wan na hemel nanga grontapu musu anbegi en leki wán man èn a sani disi o pasa trutru. Un yonguwan, unu e frustan o prenspari a de fu wroko makandra nanga Yehovah en organisâsi?

¹⁵ Yehovah e leri wi fu dini en makandra leki wán man now so taki wi kan libi na ini freide nanga makandra na ini a nyun grontapu. Bijbel e leri wi taki wi „musu sorgu bun gi makandra”, taki wi musu „lobi makandra trutru”, taki wi musu „tan trowstu makandra” èn taki wi musu „tan yepi makandra” (1 Kor. 12:25; Rom. 12:10; 1 Tes. 4:18; 5:11). Yehovah sabi taki wi na sondu sma èn taki disi kan meki en muilek gi wi fu wroko makandra. Dati meki wi musu leri fu ’gi makandra pardon nanga wi heri ati’.—Ef. 4:32.

16, 17. (a) Fu san ede wi e hori den konmakandra fu wi? (b) San yonguwan kan leri fu na eksempre fu Yesus?

¹⁶ Yehovah sorgu taki wi abi Kresten konmakandra di e yepi wi fu de wán. Furu tron wi leisi a rai di skrifi na Hebrewsma 10:24, 25. Wan fu den sani di wi e du na den konmakandra na taki wi e ’poti prakseri na makandra, so taki wi kan gi makandra deki-ati fu abi lobi èn fu du bun wroko’. Ma san prenspari tu, na taki den konmakandra e gi wi na okasi fu ’gi makandra deki-ati o moro wi e si a dei e kon krosibei’.

¹⁷ Yesus ben de wan bun eksempre gi wi fu di a ben lobi fu kon makandra nanga Gado pipel. Di a ben abi 12 yari, a ben go nanga en papa nanga mama na wan bigi konmakandra na a tempel. Ma bakaten den no ben man feni en. Pe Yesus ben de? A ben gowe libi en papa nanga mama fu go na tra yonguwan? Nôno. Di Yosef nanga Maria feni en, a ben de nanga den leriman na ini a tempel èn a ben taki nanga den fu Bijbel.—Luk. 2:45-47.

18. Fa begi kan yepi wi fu tron moro bun mati fu makandra?

 ¹⁸ Wi e meki muiti fu sori lobi gi wi brada nanga sisa èn wi e go na den konmakandra fu tron moro bun mati fu den. Boiti dati wi kan begi gi den tu. Te wi e begi gi wi brada nanga sisa èn wi e taki fu spesrutu sani di den abi fanowdu, dan wi e sori taki wi e broko wi ede nanga den. A no den bigisma na ini a gemeente wawan musu du disi. Efu yu na wan yonguwan, dan du den sani disi so taki yu tron moro bun mati fu den brada nanga sisa na ini a gemeente. Yu pruberi fu du dati kaba? Te yu e du disi, dan dati o yepi yu fu tan na libi te a grontapu disi kisi pori.

19-21. (a) Na sortu moi fasi wi e sori taki wi na „pisi fu a srefi skin èn taki wi de fu makandra”? Gi wan tu eksempre. (b) San wi e leri fu a fasi fa den brada yepi makandra di rampu ben de?

¹⁹ Furu eksempre e sori taki Yehovah en pipel de leki ’pisi fu wán skin di abi makandra fanowdu’ (Rom. 12:5). Wi kan si disi krin te wan rampu pasa. Na ini december 2011, wan bigi winti tyari wan frudu kon na Mindanao, wan fu den èilanti fu den Filippijnen. Na ini wán neti nomo, moro leki 40.000 oso ben sungu, sosrefi furu fu den oso fu wi brada nanga sisa. A bijkantoro skrifi: „Fosi lanti ben man yepi den sma fu na èilanti, dan brada nanga sisa fu tra kontren ben seni sani kaba go drape.”

²⁰ Na so a ben de tu di wan bigi gronseki nanga wan tsunami ben de na owstusei fu Yapan. Furu brada nanga sisa drape ben lasi furu sani. Sonwan fu den no ben abi noti moro. Yoshiko, wan sisa di e libi sowan 40 kilometer fu wan Kownukondre zaal, lasi en heri oso. A e taki: „Wi ben fruwondru fu sabi taki a dei baka a gronseki a kring-opziener nanga wan tra brada ben kon suku wi.” A e taki moro fara: „Wi ben warderi en taki a gemeente du ala san den man fu gi wi deki-ati. Boiti dati wi kisi dyakti, susu, tas nanga sribikrosi.” Wan brada fu a komte di e gi yepi te rampu pasa, e taki: „Brada nanga sisa fu ala sei fu Yapan ben wroko makandra leki wán man èn den ben meki muiti fu yepi makandra. Sonwan fu den ben komoto srefi te na Amerkankondre fu kon yepi. Di sma aksi den fu san ede den kon fu so fara, den piki: ’Wi lobi wi brada nanga sisa fu Yapan èn den abi yepi fanowdu.’” Yu no breiti fu de na ini wan organisâsi di abi sma di lobi makandra so? Yu kan de seiker taki Yehovah breiti te a e si taki wi e yepi makandra na so wan fasi.

²¹ Efu wi leri fu yepi makandra now, dan disi o yepi wi fu de srekasreka te muilek situwâsi o miti wi na ini a ten di e kon. Srefi efu wi no sabi fa a e go nanga wi brada nanga sisa na son presi fu grontapu, toku wi o tan de wán nanga den brada nanga sisa na ini wi kontren. Baka di wan bigi winti wai na Yapan, wan sisa di nen Fumiko taki: „A kaba de krosibei. Wi musu go doro fu yepi wi brada nanga sisa aladi wi e fruwakti taki wan ten o kon te rampu no o de moro.”

22. Sortu blesi wi o kisi na ini a ten di e kon te wi e wroko skinskin nanga makandra?

²² Yonguwan nanga owruwan musu du ala san den man nownow fu wroko skinskin nanga den Kresten brada nanga sisa. Te na ogri grontapu fu Satan o kisi pori, dan Yehovah o kibri en pipel neleki fa a ben du dati fosi (Yes. 52:9, 10). Hori na prakseri taki yu o kisi frulusu efu yu e tan wroko makandra nanga a pipel fu Gado. Wan tra sani di o yepi wi na te wi de nanga tangi gi den sani di wi kisi kaba. Na artikel di e kon e taki fu a tori dati.