1, 2. Fa Yesus gi den bakaman fu en deki-ati na a dei di a kisi wan opobaka?

TU BAKAMAN fu Yesus e waka go na wan dorpu di de sowan 11 kilometer fu Yerusalem. Den e sari fu di Yesus dede èn den no sabi ete taki a kon na libi baka. Wantronso Yesus e sori ensrefi na den èn a e bigin waka nanga den. A e trowstu den bakaman disi. Fa a e du dati? We, „a [e] bigin taki fu den buku fu Moses èn fu ala den buku fu den Profeiti fu tyari kon na krin gi den san Gado Buku e taki fu en” (Luk. 24:13-15, 27). A e meki den „frustan finifini” san skrifi na ini Gado Buku èn a sani disi e naki den ati trutru.—Luk. 24:32.

² A srefi neti dati den tu bakaman disi e drai go baka na Yerusalem. Te den e miti den apostel, den e fruteri den san pasa. Den e taki ete te Yesus e sori ensrefi na den alamala. A sani disi meki taki den e skreki srefisrefi. Den e aksi densrefi efu a sma disi na Yesus trutru. Fa Yesus gi den deki-ati? Bijbel e taki: ’A opo den ai, so taki den kon frustan ala san Gado Buku taki.’—Luk. 24:45.

3. Fu san ede wi kan firi lasi-ati te wi e du a diniwroko fu Yehovah, ma fa wi kan tan abi prisiri?

³ Neleki den apostel disi, na so wi kan firi sari son leisi tu. Kande wi abi furu fu du na ini a wroko fu Masra, ma wi  lasi-ati fu di wi no e si taki wi abi bun bakapisi (1 Kor. 15:58). Noso kande den Bijbelstudie fu wi no e go na fesi so esi. A kan srefi taki sonwan fu den sma disi e drai baka gi Yehovah. Fa wi kan tan abi prisiri na ini wi diniwroko? Wan sani di kan yepi wi na te wi e frustan san den agersitori fu Yesus di skrifi na ini Bijbel wani taki. Meki wi go taki fu dri fu den agersitori disi èn luku san wi kan leri fu den.

4. San Yesus agersitori fu a saiman di e sribi wani taki?

⁴ Leisi Markus 4:26-29. San Yesus agersitori fu a saiman di e sribi wani taki? A man na ini na agersitori na ala Kownukondre preikiman. A siri na a Kownukondre boskopu di wi e preiki gi den reti-ati sma. Neleki fa sma gwenti du na ini na aladei libi, na so a saiman ’e sribi te neti èn na deiten a e opo’. A siri abi ten fanowdu fu gro. Dati e bigin na a dei di a siri prani èn a e go doro teleki a dei di den koti a nyanyan. Na ini a pisi ten dati „a siri e gro teleki a kon bigi”. A e gro „fu ensrefi”. Disi e pasa safrisafri teleki a kon lepi. Na so a de tu taki wan sma abi ten fanowdu fu go na fesi. Dati no e pasa wantronso. Te wan sma e go na fesi èn a bosroiti fu dini Gado, dan a o gi ensrefi abra na Yehovah èn a o teki dopu. Sobun, wi kan taki dati so wan sma e „gi nyanyan”.

5. Fu san ede Yesus fruteri na agersitori fu a saiman di e sribi?

⁵ Fu san ede Yesus fruteri na agersitori disi? Yesus e yepi wi fu frustan taki Yehovah na a sma di e meki den tru tori fu Bijbel gro na ini na ati fu ’den wan di abi a yoisti denki’ (Tori 13:48; 1 Kor. 3:7). Wi e prani a siri èn e gi en watra, ma wi no kan meki a gro. Wi no man dwengi en tu fu gro moro esi. Neleki a man na ini na agersitori, na so wi no sabi fa a siri e gro. Nofo tron wi no man si disi, fu di wi e du den aladei sani fu wi. Ma baka wan pisi ten a Kownukondre siri e gi nyanyan. Dan a nyun bakaman fu Yesus e kon wroko makandra nanga wi te wi e du a kotiwroko.—Yoh. 4:36-38.

6. San wi musu kon frustan fu den Bijbelstudenti fu wi?

⁶ San wi kan leri fu na agersitori disi? A fosi sani di wi musu kon frustan, na taki wi no man taki o esi wan Bijbelstudenti musu go na fesi. Te wi abi sakafasi, dan dati o yepi wi fu no dwengi en fu teki dopu. Wi e du ala san wi man fu yepi a sma èn fu horibaka gi en. Ma sakafasi o yepi wi tu fu kon si taki na a sma srefi musu teki a bosroiti fu gi ensrefi abra na Gado. Na a lobi di wan sma abi gi Gado, o meki taki a gi ensrefi abra na en. Efu dati no de so, dan Yehovah no o feni en bun.—Ps. 51:12; 54:6; 110:3.

7, 8. (a) San wi kan leri moro fu Yesus agersitori fu a saiman di e sribi? Gi wan eksempre. (b) San disi e leri wi fu Yehovah nanga Yesus?

⁷ A di fu tu sani di wi musu kon frustan, na taki na agersitori disi kan yepi wi fu no lasi-ati efu wi no e si wantewante taki a preikiwroko fu wi abi bun bakapisi. Wi musu abi pasensi (Yak. 5:7, 8). Efu wi du ala san wi man fu yepi a studenti ma a siri no e gi nyanyan, dan disi no wani taki dati wi no de wan bun leriman. Na Yehovah e meki a siri gro na ini na ati fu wan sma di abi sakafasi èn di wani tyari kenki kon na ini en libi (Mat. 13:23). Sobun, wi no musu luku omeni sma wi yepi fu teki dopu, neleki na dati e sori taki wi du wi diniwroko bun. Te sma no e arki wi, dan dati no wani taki dati Yehovah no  e feni wi diniwroko bun. Ma san prenspari gi en, na a muiti di wi e meki fu du a diniwroko fayafaya.—Leisi Lukas 10:17-20; 1 Korentesma 3:8.

⁸ A di fu dri sani di wi musu hori na prakseri, na taki wi no man si krin ala ten efu na ati fu wan sma e kenki. Fu eksempre, wan zendeling ben e studeri nanga wan trowpaar. Di den aksi en fu tron preikiman di no dopu ete, a memre den taki den musu tapu nanga smoko fosi. Ma a fruwondru di den taigi en taki wan tu mun kaba den ben tapu nanga smoko. Fu san ede den du dati? Den ben kon frustan taki Yehovah man si te den e smoko èn taki a no lobi sma di e hoigri. Dati meki den bosroiti na ini den ati taki den ben kan du tu sani: Smoko na fesi a zendeling noso tapu wantewante nanga a smoko. A lobi di den ben kon lobi Yehovah yepi den fu teki a yoisti bosroiti. Den sma disi kisi wan bun matifasi nanga Yehovah, aladi a zendeling no ben e si srefi taki den sma disi kon kenki.

9. San Yesus agersitori fu a fisinèt wani taki?

⁹ Leisi Mateyus 13:47-50. San Yesus agersitori fu a fisinèt wani taki? Yesus ben agersi a Kownukondre boskopu di wi e preiki gi ala libisma nanga a saka di sma e saka wan bigi fisinèt go na ini a se. Neleki fa a fisinèt e fanga bun furu fisi èn „ala sortu fisi”, na so a preikiwroko fu wi e hari milyunmilyun sma èn ala sortu sma (Yes. 60:5). Den someni sma di e kon na den kongres fu wi èn na a Memrefesa ibri yari e sori taki disi de so. Sonwan fu den agersi fisi disi na „bun” fisi èn den e tron memre fu a Kresten gemeente. Ma trawan de tu di ’no bun’ èn dati meki Yehovah no wani den.

10. Fu san ede Yesus fruteri na agersitori fu a fisinèt?

¹⁰ Fu san ede Yesus fruteri na agersitori disi? Na ini na agersitori den e prati den fisi fu makandra. A sani disi no abi fu du nanga a krutu na a ten fu a bigi banawtu. Ma a e sori san o pasa na ini den lasti dei fu na ogri grontapu disi. Yesus ben sori taki a no ala den sma di lobi a tru anbegi o teki Yehovah sei. Furu sma e kon wan heri pisi ten kaba na den konmakandra fu wi. Trawan studeri Bijbel nanga wi, ma den no wani gi den libi abra na Yehovah (1 Kow. 18:21). Tra sma baka no e kon moro na a Kresten gemeente. Son yonguwan kweki na ini a tru anbegi, ma den no kon lobi Yehovah. Awinsi san na a situwâsi, Yesus ben sori krin taki ala sma musu teki den eigi bosroiti. Den sma di e teki a bosroiti fu dini Yehovah, na sma di a e si leki „gudu”. A teki den puru na mindri „ala den pipel”.—Hag. 2:7.

11, 12. (a) San wi kan leri fu na agersitori fu a fisinèt? (b) San disi e leri wi fu Yehovah nanga Yesus?

¹¹ San wi kan leri fu na agersitori fu a fisinèt? Te wi e frustan na agersitori disi, dan dati o yepi wi fu no broko wi ede tumusi noso fu no lasi-ati tumusi te wan Bijbelstudenti noso wan pikin fu wi no e teki a bosroiti fu dini Yehovah. Disi kan pasa, awinsi omeni muiti wi e du. A no te wan sma e agri fu studeri Bijbel noso te a kweki na ini a tru anbegi, dan a sma dati o kisi wan bun matifasi nanga Yehovah. Te fu kaba, Yehovah o puru ala sma na mindri en pipel di no wani teki en leki den tiriman.

¹² Disi wani taki dati den sma di gowe libi a tru anbegi, noiti no o kisi na okasi fu drai kon baka na a Kresten gemeente? Noso disi wani taki dati howpu no de gi  wan sma di no gi en libi abra na Yehovah ete? Nôno. Wan okasi de ete gi den sortu sma disi fosi a bigi banawtu bigin. A de neleki Yehovah e bari kari den: „Drai kon baka na mi, dan mi o drai kon baka na unu” (Mal. 3:7). Disi wi e si na wan tra agersitori di Yesus fruteri. Dati na a agersitori fu a lasi manpikin.—Leisi Lukas 15:11-32.

13. San na a agersitori fu a lasi manpikin wani taki?

¹³ San Yesus agersitori fu a lasi manpikin wani taki? A sari-ati papa na ini na agersitori disi na wi lobi-ati hemel Papa, Yehovah. A manpikin di aksi a gudu fu en èn di frumorsu en bakaten, na den wan di gowe libi a gemeente. Te den sma disi e gowe libi a gemeente, dan a de neleki den e go na „wan farawe kondre”. Dati na a grontapu fu Satan di no sabi Yehovah kwetikweti (Ef. 4:18; Kol. 1:21). Ma bakaten wan tu fu den e kisi densrefi baka èn den e meki muiti fu drai kon baka na Yehovah en organisâsi. Wi Tata di lobi fu gi sma pardon, breiti fu teki den sakafasi sma disi baka fu di den abi berow.—Yes. 44:22; 1 Petr. 2:25.

14. Fu san ede Yesus fruteri na agersitori fu a lasi manpikin?

¹⁴ Fu san ede Yesus fruteri na agersitori disi? Na wan heri moi fasi Yesus sori taki Yehovah wani taki sma di gowe libi a gemeente, drai kon baka na En. Noiti a papa na ini na agersitori lasi howpu taki en manpikin ben o drai kon baka. Di a papa si taki en manpikin ben e waka kon, aladi „a ben de fara fu oso ete”, a lon go esi-esi fu brasa en. A sani disi musu yepi den sma di gowe libi a tru anbegi, fu no draidrai fu kon baka na Yehovah. A kan taki a matifasi di den abi nanga Yehovah kon swaki èn taki den e syen fu drai kon baka noso kande a muilek gi den. Ma Yehovah, Yesus nanga den engel o breiti te den e du dati.—Luk. 15:7.

15, 16. (a) San wi e leri fu Yesus agersitori fu a lasi manpikin? Gi wan tu eksempre. (b) San disi e leri wi fu Yehovah nanga Yesus?

¹⁵ San wi kan leri fu na agersitori fu a lasi manpikin? Wi musu teki na eksempre fu Yehovah di e sori lobi gi sma. Efu wi e „denki taki [wi] na a moro bun sma di de”, dan wi no o wani teki den sma baka di ben gowe libi a gemeente. A sani dati kan „pori” a matifasi di wi abi nanga  Yehovah (Preik. 7:16). Ma wi kan leri wan tra sani tu. Efu wan sma gowe libi a gemeente, dan wi musu si en leki „wan lasi skapu”. Wi no musu si en leki wan sma di no o kon baka noiti moro (Ps. 119:176). San wi o du efu wi miti wan sma di gowe libi a gemeente, ma di de wan Kotoigi ete? Wi o yepi en na wan lobi-ati fasi fu drai kon baka na a gemeente? Wi o taigi den owruman wantewante, so taki den kan gi a sma disi a yepi di a abi fanowdu? Efu wi leri wan sani fu Yesus agersitori fu a lasi manpikin, dan wi o du disi.

¹⁶ Den sma di e drai kon baka na a gemeente breiti taki Yehovah sori sari-ati gi den èn taki a gemeente lobi den èn horibaka gi den. Wan brada di den ben puru na ini a gemeente sowan 25 yari, e taki: „Sensi di mi drai kon baka, mi e prisiri moro nanga moro fu di mi kisi ’krakti’ fu Yehovah (Tori 3:19). Ala sma e horibaka gi mi èn den e sori lobi gi mi. Now den brada nanga sisa na ini a gemeente na mi famiri.” Wan yongu sisa no ben e dini Yehovah moro èn sowan feifi yari a no kon na a gemeente. Di a drai kon baka, a taki: „Mi no man fruteri yu fa mi ben e firi di sma sori lobi gi mi na a fasi fa Yesus taki. Mi breiti srefisrefi taki mi de na ini na organisâsi fu Yehovah.”

17, 18. (a) Sortu moi sani wi leri fu den dri agersitori di wi luku? (b) Sortu bosroiti wi musu teki?

¹⁷ Sortu moi sani wi leri fu den dri agersitori disi? A fosi sani na taki wi no man taki o esi wan Bijbelstudie musu go na fesi. Un musu libi dati gi Yehovah. A di fu tu sani na taki wi no kan fruwakti taki ala den sma di e kon na den konmakandra èn di e studeri nanga wi o kon na ini a tru anbegi. A lasti sani na taki aladi a kan pasa taki son sma gowe libi a tru anbegi èn den drai baka gi Yehovah, toku wi no musu lasi howpu noiti taki den o drai kon baka. Èn efu den drai kon baka, meki wi gi den wan switikon soleki fa Yehovah e du dati.

¹⁸ Meki wi alamala tan suku sabi, frustan nanga koni. Te yu e leisi Yesus agersitori, dan aksi yusrefi san den wani taki, fu san ede den skrifi na ini Bijbel, fa yu kan du san yu leri èn san den e leri yu fu Yehovah nanga Yesus. Te wi e du dati, dan wi e sori taki wi e frustan den wortu di Yesus ben taki.