WAN TU yongu Kresten bosroiti fu go luku wan felem. Den yere taki furu fu den skoromati fu den ben lobi en. Te den doro a theater den e si bigi poster fu a felem. Ma na tapu den poster den e si ala sortu kefalek fetisani nanga umasma di weri krosi di no fiti srefisrefi. San den o du? Den o go na inisei èn luku a felem?

Ibri dei wi abi fu teki bosroiti di o meki wi kisi wan moro bun matifasi nanga Yehovah noso di o pori a matifasi di wi abi nanga en. Son leisi yu kan abi na prakseri fu du wan sani. Ma dan yu e denki ete wan leisi fu a tori èn yu e kenki prakseri. Disi wani taki dati yu no man teki bun bosroiti? Noso a fiti taki yu e kenki prakseri son leisi?

Fu di wi lobi Yehovah, meki wi gi wi libi abra na en èn wi teki dopu. Wi pramisi en taki wi o tan dini en nanga wi heri ati. Ma wi feanti Satan Didibri e du ala san a man fu meki wi trangayesi Gado (Openb. 12:17). Wi teki a bosroiti fu dini Yehovah èn fu gi yesi na den wet fu en. A ben o de wan sari sani efu wi ben o kenki prakseri èn no hori wisrefi na a bosroiti dati di wi teki. Disi kan meki wi lasi wi libi.

Moro leki 2600 yari pasa, Kownu Nebukadnesar fu Babilon ben meki wan bun bigi popki fu gowtu. A ben taki dati ala sma musu saka kindi boigi go na gron fu anbegi a gowtu popki. Efu wan sma no ben o du dati, dan den ben o trowe en go na ini wan faya onfu. Sadrak, Meisak, nanga Abedneikow, ben de dri yonguman di ben e anbegi Yehovah. Fu di den no ben wani trangayesi Yehovah, meki den no boigi gi a popki dati. Dati meki sma trowe den go na ini a faya onfu. Aladi Yehovah du wan wondru so taki den no dede, toku den ben de  klariklari fu dede na presi fu trangayesi Gado.—Dan. 3:1-27.

Bakaten yu ben abi a profeiti Danièl di no tapu fu begi Gado, aladi a ben sabi taki sma ben kan trowe en na ini a lew-olo. Iya, Danièl ben tan begi Yehovah dri tron wan dei, soleki fa a ben gwenti du. Danièl no kenki a bosroiti di a ben teki fu anbegi a tru Gado. A bakapisi ben de taki Yehovah kibri a profeiti „so taki den lew no kiri en”.—Dan. 6:1-27.

Den futuboi fu Gado na ini a ten disi e du tu san den pramisi en di den gi den libi abra na en. Na Afrika wan grupu studenti di de Kotoigi fu Yehovah no ben wani singi gi a fraga. Den sma fu a skoro ben o yagi den efu den no ben o singi makandra nanga den tra studenti. Syatu baka dati a minister fu skoro afersi ben kon na a foto dati èn a ben taki nanga wan tu fu den Kotoigi na a skoro. Sondro fu frede, den yongu Kotoigi disi taki na wan lespeki fasi nanga a minister èn den fruteri en fu san ede den teki a bosroiti fu no singi gi a fraga. Sensi a ten dati den Kotoigi no kisi problema nanga a tori disi. Den yongu brada nanga sisa man go na skoro sondro taki sma e dwengi den fu trangayesi Yehovah.

Luku sosrefi na eksempre fu Joseph. A wefi fu a brada disi ben abi kanker èn syatu baka dati a dede. A famiri fu Joseph ben frustan san a ben wani gi a beri èn den ben lespeki dati. Ma a famiri fu en wefi no de na bribi èn den ben wani sreka son sani gi a beri, di Gado no feni bun. Joseph e fruteri: „Fu di mi no kenki prakseri, meki den go na mi pikin èn den suku fu meki den kenki prakseri. Ma nowan fu den pikin du san den famiriman ben wani. Den famiriman pruberi fu brokodei tu na mi oso, soleki fa sma gwenti du. Ma mi taigi den taki efu den de nomonomo fu brokodei, dan dati no o pasa na mi oso. Den ben sabi taki a gwenti fu brokodei no e kruderi nanga san mi e bribi èn san mi wefi ben bribi. Sobun, baka di wi taki bun langa fu a sani disi, den go brokodei na wan tra presi.

Na ini a muilek ten dati di wi ben e sari, mi begi Yehovah fu yepi mi nanga mi osofamiri fu tan hori den wet fu en. A arki den begi fu mi èn a yepi wi fu tan gi yesi na en aladi den famiriman ben wani dwengi wi fu kenki prakseri.” Joseph nanga den pikin fu en no ben denki srefi fu kenki prakseri èn trangayesi Yehovah.

Syatu baka a Paskafesa fu a yari 32, wan uma di no ben de wan Dyu, go na Yesus Krestes di a ben de na ini a kontren fu Sidon. Na uma disi tan begi Yesus fu puru wan ogri yeye na en umapikin tapu. Na a bigin, Yesus no piki en noti. A taigi den disipel fu en: „Gado seni mi go soso na den lasi skapu fu a pipel fu Israel.” Di na uma tan aksi Yesus fu yepi en, a taigi en: „A no bun fu teki a brede fu den pikin èn trowe dati gi den pikin dagu.” Fu di na uma disi ben abi wan tranga bribi, meki a taki: „Iya mi Masra, ma toku den pikin dagu e nyan den pikin pisi brede di e fadon komoto na a tafra fu den basi fu den.” Disi meki taki Yesus kenki prakseri èn a puru na ogri yeye na a umapikin tapu.—Mat. 15:21-28.

Di Yesus du dati, dan a sori taki a teki na eksempre fu Yehovah di de klariklari fu kenki prakseri te a fiti. Fu eksempre, di den Israelsma trangayesi Yehovah fu di den anbegi wan pikin kaw fu gowtu, dan A bosroiti fu kiri den. Ma di Moses begi en fu no du dati, dan Yehovah ben de klariklari fu kenki prakseri.—Eks. 32:7-14.

Na apostel Paulus teki na eksempre fu Yehovah nanga Yesus. Wan pisi ten, Paulus no ben wani taki Yohanes Markus kon nanga en na den presi pe a ben e go leki zendeling, fu di a ben gowe libi Paulus nanga  Barnabas a fosi leisi. Ma bakaten Paulus ben kon si taki Markus ben go na fesi èn taki a ben kan yepi en. Dati meki Paulus taigi Timoteyus: „Tyari Markus kon nanga yu, bika a kan yepi mi nanga a wroko.”—2 Tim. 4:11.

San wi e leri fu den tori disi? Aladi Yehovah no abi sondu, toku a de klariklari fu kenki prakseri fu di a abi sari-ati nanga pasensi èn a lobi wi. Ma wi na sma di abi sondu, sobun wi no e si sani na wan yoisti fasi ala ten. Dati meki wi o abi fu kenki prakseri son leisi. Fu eksempre, wi kan kenki a fasi fa wi e denki fu trawan te wi e kon frustan a situwâsi fu den.

A kan bun fu kenki prakseri son leisi te a abi fu du nanga den sani di wi wani du na ini a diniwroko. Son sma di e studeri Bijbel èn di e kon na den konmakandra wan pisi ten kaba no wani dopu ete. Noso son brada e draidrai fu go pionier, aladi den abi na okasi fu du dati. Trawan kande no wani dini leki dinari ini a diniwroko noso owruman na ini a gemeente (1 Tim. 3:1). Na so yu e denki tu? Yu denki taki yu kan kenki prakseri? Yehovah wani taki yu kisi den grani disi èn taki yu de nanga prisiri te yu e dini en nanga trawan.

Ella, wan sisa di e wroko na wan bijkantoro fu Yehovah Kotoigi na Afrika, e taki: „Di mi kon na Betel, mi no ben de seiker efu mi ben o man tan langa. Mi ben wani dini Yehovah nanga mi heri ati, ma mi ben gwenti de nanga mi famiri tu. Na a bigin mi ben misi den srefisrefi! Ma a sisa di ben tan nanga mi na ini wan kamra, gi mi deki-ati èn dati meki mi bosroiti fu tan na Betel. Now di mi de tin yari na Betel kaba, mi wani tan dyaso fu dini mi brada nanga sisa solanga mi man.”

Yu e memre ete san pasa di Kain dyarusu tapu en brada èn di a kisi bigi atibron? Gado taigi en taki efu a ben o du bun, dan a ben o feni en bun baka. Gado warskow Kain taki a ben musu basi a ’sondu di ben de leti na en doro e luru en’. Kain ben kan kenki a fasi fa a ben e denki, ma a bosroiti fu no teki a rai fu Gado. A sari taki Kain kiri en brada èn a tron a fosi libisma di kiri wan trawan.—Gen. 4:2-8.

Luku na eksempre fu Kownu Usia. Na a bigin a ben e du san Yehovah feni bun èn a ben tan suku Gado. Ma a sari taki Usia pori a bun nen di a ben abi fu di a ben kon kisi bigifasi. A ben go na ini a tempel fu bron switismeri aladi a no ben de wan priester. Den priester warskow en fu no du a sani disi. San a du? Usia no kenki prakseri. Na presi fu dati en „ati kon bron srefisrefi” èn a no arki den. Dati meki Yehovah naki en nanga gwasi.—2 Kron. 26:3-5, 16-20.

Iya, a de krin taki wi musu kenki prakseri son leisi. Luku wan eksempre fu a ten disi. Joachim teki dopu na ini 1955, ma na ini 1978 den puru en fu a gemeente. Moro leki 20 yari baka dati, a sori berow èn a tron wan Kotoigi fu Yehovah baka. No so langa pasa wan owruman aksi en fu san ede a wakti so langa fu kon baka. Joachim taki: „Mi ati ben e bron èn mi ben abi bigifasi. A e hati mi taki mi wakti so langa. Aladi mi no ben de wan Kotoigi fu Yehovah moro, toku mi ben sabi taki den abi a tru anbegi.” Joachim ben musu kenki a fasi fa a ben e denki èn a ben musu sori berow.

Kande a de fanowdu son leisi fu kenki prakseri èn fu kenki a fasi fa wi e tyari wisrefi. Te wi de klariklari fu du disi, dan Yehovah o breiti nanga wi.—Ps. 34:8.