1, 2. Suma kan leri wan sani fu a buku Singi fu Salomo, èn fu san ede? (Luku a prenki na a bigin fu na artikel.)

WAN man nanga wan uma e luku makandra na ini den ai aladi den e dansi. Den e lafu èn ala sma kan si taki den lobi makandra. A brada di hori a trow-lezing fu den e luku den èn a e prakseri: ’Den o lobi makandra ete baka wan tu yari? Den o lobi makandra moro noso a lobi fu den o dede gowe?’ Te wan masra nanga en wefi lobi makandra trutru, den o tan na makandra awinsi sortu problema kon. Ma a de wan sari tori taki furu trowpaar no de koloku bakaten, èn te fu kaba den e prati. Kande yu e aksi yusrefi: ’Wan masra nanga en wefi kan lobi makandra fu ala ten?’

² Srefi na ini a ten fu Kownu Salomo furu masra nanga wefi no ben lobi makandra trutru. Fu san ede? Salomo taki: „Na mindri wán dusun sma mi feni wán krin-ati man nomo, ma mi no feni nowan krin-ati uma. Iya, san mi kon si nomo na taki a tru Gado meki libisma nanga wan krin ati, ma den go prakseri fu du tra sani” (Preik. 7:26-29). Na a ten dati furu uma fu tra kondre ben e tan na mindri den Israelsma. Den uma disi ben e libi wan yayolibi èn den ben e anbegi a gado  Bâal. A sani disi meki taki furu man nanga uma fu Israel bigin libi wan yayolibi tu. * Ma sowan 20 yari na fesi, Kownu Salomo skrifi wan puwema fu wan man nanga wan uma di ben lobi makandra trutru. A puwema disi e sori san na trutru lobi èn fa tu sma kan sori lobi gi makandra. Sobun, awinsi wi trow noso awinsi wi no trow, wi alamala kan leri furu fu a Bijbel buku Singi fu Salomo.

3. Fu san ede wan man nanga wan uma kan lobi makandra trutru?

³ Leisi Singi fu Salomo 8:6. Salomo taki dati trutru lobi de leki „a faya fu Yah”. Fu san ede? Fu di lobi na a moro prenspari fasi fu Yehovah. A meki wi na so wan fasi taki wi kan sori lobi tu (Gen. 1:26, 27). Baka di Yehovah meki a fosi man Adam, a gi en wan moi wefi. A fosi leisi di Adam si Eva, a ben breiti so te, taki a taki wan puwema fu sori fa a ben e firi. A no de fu taki dati Eva ben lobi en masra tu fu di „a ben teki puru fu a man” (Gen. 2:21-23). Sensi a bigin, Yehovah meki man nanga uma na so wan fasi taki den man lobi makandra trutru èn fu ala ten.

4, 5. Fruteri fu sortu tori Singi fu Salomo e taki.

⁴ Singi fu Salomo e taki na wan moi fasi fu a lobi di wan man nanga wan uma kan abi gi makandra. A buku disi e taki fu wan yongu uma fu a dorpu Sunem noso Sulem, di ben lobi wan yongu skapuman. A yongu uma ben e wroko na ini den droifigron fu den brada fu en. Krosibei fu den droifigron disi Kownu Salomo nanga a legre fu en ben seti kampu. Di a si na uma, a taigi den futuboi fu en fu tyari en kon na ini a kampu fu en. Salomo taigi na uma fa a moi èn a ben wani gi en furu kado. Ma na uma ben lobi a skapuman èn nanga en wawan a ben wani de (Singi 1:4-14). A skapuman go suku en te na a kampu. Di a feni en, den fruteri makandra nanga moi wortu fa den lobi makandra.—Singi 1:15-17.

⁵ Di Salomo drai go baka na Yerusalem a tyari a yongu uma go tu, ma a skapuman go na den baka (Singi 4:1-5, 8, 9). Awinsi san Salomo ben e taki noso du, a no ben man puru a lobi di na uma ben abi gi a skapuman (Singi 6:4-7; 7:1-10). Te fu kaba Kownu Salomo meki na uma go na oso baka. Na a kaba fu a buku, na uma fu Sulem e taigi en lobiwan fu lon kon miti en esi-esi „leki wan dia”.—Singi 8:14.

6. Fu san ede a kan muilek fu sabi suma e taki na ini a buku Singi fu Salomo?

⁶ A buku Singi fu Salomo na wan heri moi singi. Fu taki en leti, Bijbel e kari en „a moro moi singi di de” (Singi 1:1). Ma di Salomo skrifi a singi disi, a no skrifi suma taki san. Fu di a ben wani taki sma poti prakseri moro furu na den moi wortu, meki a no taki finifini fu ala sani di pasa. Aladi den nen fu den sma no kari, toku yu kan frustan suma e taki te yu e luku san den e taki.

7, 8. Sortu sani a skapuman nanga a yongu uma taki fu sori taki den lobi makandra?

⁷ A yongu uma nanga a skapuman gebroiki moi wortu fu sori fa den lobi makandra. Fu di den sani disi skrifi moro leki 3000 yari pasa, meki a kan taki wi na ini a ten disi no e frustan fu san ede den taki son sani. A kan taki na a kondre pe  den ben e tan, sma ben abi tra gwenti leki san wi abi. Toku wi kan frustan fa den ben e firi gi makandra. Fu eksempre, a skapuman taki dati den ai fu na uma de leki „den ai fu doifi” fu di a ben e luku na wan switi fasi (Singi 1:15). Na uma ben taki dati den ai fu a skapuman de leki doifi. (Leisi Singi fu Salomo 5:12.) Te a ben luku a kloru fu en ai èn a weti pisi fu en ai, dan a ben gersi doifi di e wasi na ini merki.

⁸ A skapuman nanga a yongu uma no ben taki nomo fa den ben moi. Den ben prèise makandra fu tra sani tu. Fu eksempre, a skapuman ben lobi fa na uma ben e taki na wan switi fasi nanga trawan. (Leisi Singi fu Salomo 4:7, 11.) Dati meki a taigi en: „Mi trowmisi, na oni fu wan onigodo e dropu komoto fu yu mofobuba.” Fu san ede a taki fu oni fu wan onigodo? We, te oni de na ini na onigodo, dan a switi moro leki te yu ben o puru en na ini na onigodo. A taki tu: „Oni nanga merki de na ondro yu tongo.” Disi e sori taki na uma ben e taki bun sani di switi fu yere. A de krin taki, di a skapuman taigi a yongu uma „yu moi srefisrefi” èn „nowan sani e mankeri na yu”, dan a no ben e taki nomo fa en skin moi, ma a ben sabi taki na uma ben abi moi fasi tu.

9. (a) Fa wan masra nanga en wefi musu lobi makandra? (b) Fu san ede a prenspari taki masra nanga wefi e taigi makandra taki den lobi makandra?

⁹ Wan trowpaar di e dini Yehovah no e si a trowlibi leki wan kruderi nomo. Den lobi makandra trutru èn den e sori makandra dati tu. Ma sortu lobi den musu abi gi makandra? A de so taki den musu sori lobi gi makandra sondro fu denki densrefi nomo, soleki fa Bijbel e taki? (1 Yoh. 4:8) Den musu lobi makandra neleki fa famiriman lobi makandra? Den musu lobi makandra leki mati? (Yoh. 11:3) Noso den musu abi a lobi di man nanga uma e firi gi makandra? (Odo 5:15-20) Fu taki en leti, efu masra nanga wefi lobi makandra trutru, dan den musu sori lobi gi makandra na ala den fasi disi. Den sani di den e taki èn e du o sori taki den lobi makandra, èn den o abi wan koloku trowlibi. Iya, a prenspari srefisrefi fu du dati, awinsi den abi furu fu du. Na ini son kondre a famiri e suku wan trowpatna gi wan man noso wan uma. A kan taki a man nanga na uma no ben sabi makandra srefi fosi a trowdei. Spesrutu na ini den situwâsi dati a prenspari taki a man nanga na uma abi a gwenti fu taigi makandra taki den lobi makandra. Disi o yepi den fu meki a lobi kon moro tranga èn fu abi wan koloku trowlibi.

10. Fu san ede a bun taki trowpatna e taigi makandra taki den lobi makandra?

¹⁰ Wan tra sani de fu san ede a bun taki trowpatna e taigi makandra taki den lobi makandra. Kownu Salomo ben wani gi a yongu uma fu Sulem ’moi edebanti fu gowtu nanga pikin solfru krara’. A ben taigi en taki a ’moi leki a furu mun èn a soifri leki a brenki son’ (Singi 1:9-11; 6:10). Ma na uma ben lobi soso a skapuman. San yepi en fu no meki a kownu tyari en ede gowe? San ben trowstu en di a no ben man de nanga en lobiwan? (Leisi Singi fu Salomo 1:2, 3.) A ben e prakseri fa a ben e firi te a skapuman ben taigi en fa a lobi en. Den sani di a skapuman ben e taki ben „switi moro win” gi en. Èn di a ben de na ini a kownu-oso e prakseri den wortu fu a skapuman, dan den wortu dati ben meki a firi switi neleki switismeri-oli  di sma kanti na tapu en ede (Ps. 23:5; 104:15). A prenspari taki masra nanga wefi abi a gwenti fu taigi makandra fa den lobi makandra fu di dati o meki a lobi kon moro tranga. Dan te den o prakseri den sani disi, a lobi di den abi gi makandra no o dede gowe.

11. San Kresten di no trow kan leri fu a sani di a yongu uma fu Sulem taigi den uma di ben e wroko na ini a kownu-oso?

¹¹ Efu yu na wan Kresten di wani trow, dan san yu kan leri fu a yongu uma fu Sulem? Na uma disi no ben lobi Kownu Salomo, èn a taigi den uma di ben e wroko na ini a kownu-oso krin: „Un no musu pruberi fu meki mi kisi lobi firi, solanga a firi disi no kon fu ensrefi” (Singi 2:7; 3:5). Fu san ede a taki dati? Fu di a no bun fu kisi lobifiri gi iniwan sma di yu e miti. Dati meki wan Kresten di wani trow musu wakti nanga pasensi teleki a feni wan sma di a kan lobi trutru.

12. Fu san ede na uma fu Sulem ben lobi a skapuman?

¹² Fu san ede na uma fu Sulem ben lobi a skapuman so? A ben lobi fa a ben moi leki „wan dia”. Den anu fu en ben tranga neleki „gowtu” èn den futu fu en ben moi èn tranga neleki „pilari fu marmer-ston”. Ma a skapuman no ben tranga èn moi nomo. Na uma ben sabi taki a skapuman ben lobi Yehovah èn taki a ben abi moi fasi. Dati meki a ben de heri tra fasi leki den tra „yonkuman”. Na uma ben si en leki „wan aprabon na mindri den bon fu busi”.—Singi 2:3, 9; 5:14, 15.

13. Fu san ede a skapuman ben lobi a yongu uma fu Sulem?

¹³ Na uma fu Sulem ben moi srefisrefi tu. Srefi Kownu Salomo ben lobi en, aladi na a ten dati a ben abi ’siksitenti uma leki wefi èn a ben e libi nanga ete aititenti uma’. Boiti dati, a ben e libi tu nanga „someni yonguwenke”. Ma a skapuman no ben lobi na uma soso fu di a ben moi. A ben sabi taki na uma ben lobi Yehovah tu èn a ben abi moi fasi. Fu eksempre, na uma ben abi sakafasi èn a ben agersi ensrefi leki „wan safraan-bromki nomo di e gro na sesyoro”. Ma gi a skapuman, na uma disi ben de wan spesrutu uma, neleki „wan leilibromki na mindri makabusi”.—Singi 2:1, 2; 6:8.

14. San wan Kresten di wani trow kan leri fu a skapuman nanga a yongu uma fu Sulem?

 ¹⁴ Yehovah taki dati den futuboi fu en musu trow „soso nanga wan sma di de wan bakaman fu Masra” (1 Kor. 7:39). Disi wani taki dati wi musu meki mofo noso trow soso nanga wan sma di de wan dopu futuboi fu Yehovah. Fu san ede disi bun? Wan masra nanga en wefi o kisi fu du nanga broko-ede fu na aladei libi. Ma efu ala tu de bun mati fu Yehovah, dan den no o meki trobi èn den o de koloku. Sobun, efu yu wani trow, dan teki na eksempre fu a skapuman nanga a yongu uma fu Sulem. Suku wan sma di abi moi fasi èn di lobi Yehovah trutru.

15. Fa a yongu uma fu Sulem de wan bun eksempre gi Kresten di meki mofo fu trow?

¹⁵ Leisi Singi fu Salomo 4:12. Fu san ede a skapuman taki dati en lobiwan de leki „wan moi dyari di tapu lontu nanga wan skotu”? Wan dyari di tapu lontu nanga wan skotu no opo gi ala sma. A wan-enkri fasi fa wan sma kan go na ini, na fu pasa wan doro di abi wan sroto na tapu. Na yongu uma fu Sulem ben de neleki so wan dyari fu di a ben lobi a skapuman wawan. A ben o trow nanga en, èn dati meki a no ben meki a kownu drai en ede. A no ben o kenki prakseri noiti. A ben de leki „wan skotu”, a no ben de leki „wan doro” di iniwan sma kan opo (Singi 8:8-10). Na so a de tu taki Kresten di meki mofo fu trow nanga makandra musu sori lobi gi makandra wawan. Den no musu kweki lobifiri gi nowan tra sma.

16. San Kresten di abi mofo fu trow kan leri fu a buku Singi fu Salomo?

¹⁶ Di a skapuman aksi a yongu uma fu Sulem fu go koiri nanga en, den brada fu na uma no ben wani. Na presi fu dati den seni en go hori wakti na den droifigron. Fu san ede den brada du dati? Na fu di den no ben frutrow en? Na fu di den ben denki taki a ben wani go du hurudu nanga a skapuman? Nôno. Den brada fu en ben wani kibri en. Den no ben wani taki a kon na ini wan situwâsi pe a ben kan du wan sondu (Singi 1:6; 2:10-15). Sobun, san Kresten di no trow kan leri fu a tori disi? Te den abi mofo fu trow nanga wan sma, dan den no musu poti densrefi na ini situwâsi pe den kan du hurudu. Sorgu taki noiti unu de na wan presi pe unu wawan de. Unu kan sori taki un lobi makandra, ma du dati na wan fasi di fiti.

17, 18. San yu leri fu a buku Singi fu Salomo?

¹⁷ Yehovah wani taki masra nanga wefi musu tan na makandra fu ala ten. A wani taki den musu lobi makandra. A tru taki den abi lobi gi makandra te den trow. Ma efu den wani tan na makandra fu ala ten, den musu sorgu taki a lobi fu den tan tranga, neleki wan faya di no e dede noiti.—Mark. 10:6-9.

¹⁸ Efu yu wani trow, dan suku wan sma di yu kan lobi nanga yu heri ati. Te yu feni a sma dati, dan unu ala tu musu du muiti fu tan lobi makandra ala ten. Singi fu Salomo e sori taki masra nanga wefi kan lobi makandra fu ala ten, fu di a lobi dati de leki „a faya fu Yah”.—Singi 8:6.