1. Fu san ede wi o kon moro krosibei na Yehovah te wi teki na eksempre fu Yesus?

WI GWENTI fu teki na eksempre fu sma di wi lobi èn di wi e lespeki. Fu ala den libisma di ben de na grontapu, Yesus Krestes gi a moro bun eksempre di wan sma kan teki. Fu san ede dati de so? Yesus srefi ben taki: „A sma di si mi, si a Tata tu” (Yoh. 14:9). Yesus ben du sani soifri leki en Tata. Dati meki wi kan taki dati te wi leri sabi a Manpikin, dan wi e leri sabi a Tata tu. Sobun, te wi e teki na eksempre fu Yesus, dan wi e kon moro krosibei na Yehovah, a moro prenspari sma fu hemel nanga grontapu. Disi na wan heri moi blesi!

2, 3. (a) Fu san ede Yehovah meki sma skrifi sani fu Yesus en libi na ini Bijbel, èn san Yehovah e fruwakti fu wi? (b) Fu san wi o taki na ini na artikel disi èn na ini a trawan?

² Ma fa wi kan kon leri sabi Yesus? Na ini Bijbel, Yehovah meki sma skrifi sani fu Yesus en libi. Fu san ede a du dati?  Wi Gado wani taki wi kon sabi en Manpikin, so taki wi kan waka soifri baka na eksempre fu en. (Leisi 1 Petrus 2:21.) Bijbel e taki dati wi musu „waka” soifri na Yesus baka. Sobun, na pe Yesus puru en futu, na drape wi musu poti a di fu wi. A no de fu taki dati Yesus no abi sondu. Dati meki Yehovah no e fruwakti fu wi taki wi o man du ala sani soifri neleki fa Yesus ben du. Na presi fu dati, Yehovah wani taki wi du ala san wi man fu teki na eksempre fu Yesus aladi wi na sondu libisma.

³ Meki wi go luku wan tu fu den moi fasi fu Yesus. Na ini na artikel disi wi o taki fu a sakafasi nanga a sari-ati fu en. Na ini a trawan wi o taki fu a deki-ati fu en nanga a koni di a abi fu si sani krin. Te wi o taki fu den fasi fu Yesus, dan wi o piki dri aksi: San a fasi disi wani taki? Fa Yesus sori a fasi dati? Fa wi kan teki na eksempre fu en?

4. San na sakafasi?

⁴ San na sakafasi? Furu sma na ini a grontapu disi e denki taki wan sma di abi sakafasi na wan sma di swaki èn di e frede trawan. Ma disi no tru. Wan sma di e sori sakafasi musu abi deki-ati. So wan sma no abi heimemre nanga bigifasi. Wan sma di wani sori sakafasi no musu denki tumusi furu fu ensrefi. Wan Bijbel wortubuku e taki dati wan sma di abi sakafasi sabi heri bun o pikin a de na ini Gado ai. Efu wi abi trutru sakafasi wi no o denki tu taki wi bun moro tra sma (Rom. 12:3). A no makriki gi sondu libisma fu sori sakafasi. Ma wi kan leri fu sori sakafasi te wi e prakseri o bigi Yehovah de èn te wi e pruberi fu teki na eksempre fu Yesus.

5, 6. (a) Suma na a gran engel Mikael? (b) Fa Mikael sori sakafasi?

⁵ Fa Yesus sori sakafasi? Ala ten Gado en Manpikin ben e sori sakafasi. A ben du dati di a ben de wan makti engel na ini hemel èn di a ben de wan libisma di no ben abi sondu. Meki wi luku wan tu eksempre.

⁶ A fasi fa a ben denki fu ensrefi. Na ini a Bijbel buku Yudas wi e leisi wan sani di pasa na ini a libi fu Yesus fosi a ben kon na grontapu. (Leisi Yudas 9.) Yesus, ’a gran engel Mikael, ben abi wan kesekese nanga Didibri fu a dedeskin fu Moses’. Baka di Moses dede, Yehovah beri en skin na wan presi di nowan sma ben sabi (Deut. 34:5, 6). Kande Didibri ben wani kori den Israelsma fu gebroiki a dedeskin fu Moses fu du afkodrei. Awinsi sortu ogri Didibri ben wani du, toku Mikael ben abi a deki-ati fu tapu en. Mikael ben sori Didibri taki a no abi a reti fu teki Moses en skin. Ma a gran engel ben frustan taki a no ben abi a reti fu krutu Didibri. Na presi fu dati, a libi a tori gi a Moro Hei Krutuman Yehovah. Dati na wan heri moi eksempre fu sakafasi!

7. Fa a fasi fa Yesus ben taki èn den sani di a ben du ben sori taki a abi sakafasi?

⁷ A fasi fa Yesus ben taki èn den sani di a ben du di a ben de na grontapu ben sori taki a abi sakafasi trutru. A fasi fa a ben taki nanga sma. Noiti Yesus ben suku glori fu libisma, ma a ben wani taki en Tata kisi ala glori (Mark. 10:17, 18; Yoh. 7:16). Noiti Yesus ben taigi den disipel fu en wan sani di ben gi den a firi  taki den don noso taki a bun moro den. Na presi fu dati, a ben lespeki den èn a ben prèise den gi den bun fasi fu den (Luk. 22:31, 32; Yoh. 1:47). Den sani di a ben du. Yesus bosroiti fu no feti baka gudu (Mat. 8:20). A ben de klariklari fu du wroko di tra sma ben si leki lagi wroko (Yoh. 13:3-15). Yesus ben sori trutru sakafasi fu di a ben gi yesi na Yehovah ala ten. (Leisi Filipisma 2:5-8.) Yesus no ben de leki den sma di abi bigifasi èn di no lobi gi yesi na trawan. Ma fu di a abi sakafasi meki a du ala san Yehovah taigi en, „srefi di a ben musu dede”. A de krin fu si taki Yesus, a Manpikin fu libisma ben abi trutru „sakafasi”!—Mat. 11:29.

8, 9. Fa wi kan sori taki wi abi sakafasi?

⁸ Fa wi kan sori sakafasi neleki Yesus? A fasi fa wi e denki fu wisrefi. Efu wi abi sakafasi, dan wi o sabi taki wi no abi a reti fu du son sani. Wi e frustan taki Yehovah no gi wi a reti fu krutu trawan. Dati meki wi no o de gaw fu krutu trawan te den meki wan fowtu èn wi no o denki takru fu den (Luk. 6:37; Yak. 4:12). Te wi abi sakafasi, dan wi ’no o denki taki wi na a moro bun sma di de’ èn wi no o wisiwasi den sma di no abi den srefi koni nanga grani di wi abi (Preik. 7:16). Den owruman di abi sakafasi no o denki taki den hei moro den tra brada nanga sisa. Na presi fu dati, den skapuman disi e ’si trawan moro hei leki densrefi’.—Fil. 2:3; Luk. 9:48.

⁹ Luku a tori fu brada W. J. Thorn, di bigin dini leki kring-opziener na ini 1894. Baka di a du a wroko disi omeni yari langa, dan den poti en fu kweki fowru na a Kingdom Farm na New York. A brada disi taki: „Te mi e bigin denki tumusi furu fu misrefi, dan mi e taigi misrefi: ’Yu pikin pisi doti, san yu abi fu meki bigi?’” (Leisi Yesaya 40:12-15.) Disi na trutru sakafasi!

10. Fa a fasi fa wi e taki èn den sani di wi e du e sori taki wi abi sakafasi?

¹⁰ A fasi fa wi e taki nanga trawan. Efu wi abi trutru sakafasi, dan dati o de fu si na a fasi fa wi e taki nanga sma (Luk. 6:45). Te wi e taki nanga trawan, dan wi no o taki soso fu den sani di wi du èn fu den grani fu wi (Odo 27:2). Na presi fu dati, wi o poti prakseri na den bun sani di den brada nanga sisa fu wi e du èn wi o prèise den gi den bun fasi di den abi (Odo 15:23). Den sani di wi e du. Kresten di abi sakafasi no e suku biginen na ini a grontapu disi èn den no e feti baka gudu. Ma den de klariklari fu du wroko di trawan e si leki lagi wroko, so taki den kan gebroiki ala den ten nanga krakti fu dini Yehovah (1 Tim. 6:6, 8). A moro prenspari fasi fa wi kan sori sakafasi na te wi e gi yesi. Fu eksempre, wi musu abi sakafasi fu „gi yesi na den wan di e teki fesi” na ini a gemeente èn fu waka a pasi di Yehovah en organisâsi e sori wi.—Hebr. 13:17.

11. San na sari-ati?

¹¹ San na sari-ati? Wan sma di abi sari-ati abi switifasi èn a e firi gi trawan. Bijbel e taki dati Yehovah nanga Yesus abi trutru sari-ati (Luk. 1:78; 2 Kor. 1:3;  Fil. 1:8). Wan Bijbel wortubuku e taki dati wan sma di abi sari-ati no e firi nomo gi trawan. So wan sma e broko en ede so kefalek nanga trawan taki a e yepi den fu meki den libi kon moro bun. Sobun, sari-ati e meki taki wi e yepi trawan.

12. (a) Fa wi du sabi taki Yesus ben abi sari-ati nanga sma? (b) San Yesus du di a firi sari-ati?

¹² Fa Yesus sori taki a abi sari-ati? A ben e firi gi sma èn a ben du sani gi den. Yesus ben abi sari-ati gi sma. Fu eksempre, di Yesus si fa en mati Maria nanga den tra sma ben krei fu di Lasarus a brada fu Maria dede, dan Yesus srefi „bigin krei”. (Leisi Yohanes 11:32-35.) Sari-ati meki taki Yesus wiki a manpikin fu wan uma di lasi en masra na ini dede. Èn sari-ati meki tu taki a gi Lasarus wan opobaka (Luk. 7:11-15; Yoh. 11:38-44). A kan taki a sani disi di Yesus du gi Lasarus meki taki a kisi a howpu fu libi na hemel. Wan pisi ten na fesi Yesus ben firi „sari” gi wan bigi grupu sma di ben kon na en. A firi disi di a ben abi gi den ben meki taki „a bigin leri den furu sani” (Mark. 6:34). A libi fu den sma di du san Yesus leri den, kenki trutru! Wi si taki Yesus no ben abi sari-ati nomo nanga sma, ma taki a ben yepi den tu.—Mat. 15:32-38; 20:29-34; Mark. 1:40-42.

13. Fa Yesus ben taki nanga sma èn san ben de a bakapisi? (Luku a prenki na a bigin fu na artikel.)

¹³ A switi fasi fa a ben taki nanga sma. A lobi di Yesus ben abi gi sma ben meki taki a ben taki na wan switi fasi nanga den, spesrutu nanga den mofina sma. Na apostel Mateyus ben gebroiki den wortu disi fu Yesaya di a ben taki fu Yesus: „A no o masi wan warimbo di broko èn a no o kiri wan faya di e suku fu dede” (Yes. 42:3; Mat. 12:20). Son sma ben de leki wan warimbo di broko èn wan faya di e suku fu dede, ma te Yesus ben taki nanga den sma disi, dan den ben firi bun. A ben tyari wan boskopu fu howpu gi „den wan di e firi brokosaka” (Yes. 61:1). Yesus ben kari den wan „di musu wroko hebi èn di musu tyari hebi lai” fu kon na en so taki den ben kan „kisi krakti baka” (Mat. 11:28-30). A ben taigi den bakaman fu en taki Gado e firi gi ibriwan fu den anbegiman fu En. Yehovah e firi srefi gi den „pikinwan”, den wan di grontapusma no e si leki prenspari sma.—Mat. 18:12-14; Luk. 12:6, 7.

14. Fa wi kan sori taki wi abi sari-ati gi tra sma?

¹⁴ Fa wi kan sori sari-ati neleki Yesus? Wi musu abi sari-ati gi sma. A no makriki ala ten fu sori den firi disi, ma Bijbel e taigi wi fu meki muiti fu tron sma di „abi trutru sari-ati”. Disi na wan fu den „nyun fasi” di Yehovah wani taki ala Kresten musu abi. (Leisi Kolosesma 3:9, 10, 12.) Fa wi kan sori taki wi abi sari-ati gi tra sma? Wi musu opo wi ati gi trawan (2 Kor. 6:11-13). Arki bun te wan sma e taigi yu fa a e firi èn te a e fruteri yu sortu broko-ede a abi (Yak. 1:19). Aksi yusrefi: ’Fa mi ben o firi efu mi ben de na ini a srefi situwâsi? San mi ben o wani meki sma du gi mi?’—1 Petr. 3:8.

15. Fa wi kan yepi den sma di e sari noso di e pina?

¹⁵ Wi musu yepi sma. Te wi abi sari-ati, dan wi o wani yepi sma, spesrutu den  sma di e sari noso di e pina. Fa wi kan yepi den? Romesma 12:15 e taki: „Krei nanga sma di e krei.” Nofo tron a no de so taki wan sma di e sari wani taki wi lusu den problema fu en, ma san a abi fanowdu na trowstu. Wan sisa ben kisi trowstu fu tra Kotoigi baka di en umapikin dede. A e taki: „Mi warderi en taki den brada nanga sisa ben kon na mi èn taki den krei nanga mi.” Wi kan sori sari-ati tu te wi e du bun sani gi sma. Yu sabi wan uma di lasi en masra na ini dede? Kande wan tu sani na ini en oso broko èn a abi yepi fanowdu. Yu sabi wan owru brada noso sisa di abi yepi fanowdu fu go na den konmakandra, fu go preiki, noso fu go na datra? Srefi wan pikin sani di yu du gi wan brada noso sisa, kan de wan bigi yepi gi en (1 Yoh. 3:17, 18). A moro bun fasi fa wi kan sori sari-ati gi sma, na te wi e du ala san wi man na ini a preikiwroko. Disi na a moro bun fasi fa wi kan yepi reti-ati sma fu kon abi wan moro bun libi!

16. San wi kan taki fu gi den sma di brokosaka deki-ati?

¹⁶ Den sani di wi e taki musu sori taki wi abi sari-ati gi sma. A sari-ati di wi abi musu pusu wi fu „taki na wan fasi di e trowstu den sma di lasi-ati” (1 Tes. 5:14). San wi kan taki fu gi den sma disi deki-ati? Wi kan meki den firi bun te wi e taigi den taki wi e broko wi ede trutru nanga den. Wi kan prèise den fu meki den frustan taki den abi bun fasi èn taki den man du bun sani. Wi kan memre den taki Yehovah yepi den fu feni a tru anbegi. Disi e sori taki den de prenspari gi Yehovah (Yoh. 6:44). Wi kan yepi den fu abi a frutrow taki Yehovah lobi den futuboi fu en di „lasi-ati” èn di „brokosaka” (Ps. 34:18). Te wi e taki na wan switi fasi nanga den sma di e sari, dan dati kan trowstu den.—Odo 16:24.

17, 18. (a) Fa Yehovah wani taki den owruman musu handri nanga den skapu fu en? (b) Fu san wi o taki na ini a tra artikel?

¹⁷ Owruman, Yehovah wani taki un musu abi sari-ati nanga den skapu fu en (Tori 20:28, 29). Na unu abi a frantwortu fu gi den leri, fu gi den deki-ati èn fu meki den firi bun (Yes. 32:1, 2; 1 Petr. 5:2-4). Sobun, wan owruman di abi sari-ati no o pruberi fu basi den skapu, fu poti wet gi den noso fu dwengi den fu du moro awinsi den no man. Na presi fu dati, a e pruberi fu meki den firi prisiri. Wan owruman musu abi a frutrow taki a lobi di den brada nanga sisa abi gi Yehovah, o meki taki den o dini en nanga den heri ati.—Mat. 22:37.

¹⁸ Te wi e prakseri fa Yesus ben e sori sakafasi nanga sari-ati, dan dati o gi wi deki-ati fu teki na eksempre fu en. Na ini a tra artikel, wi o si fa wi kan abi deki-ati nanga a koni fu si sani krin neleki Yesus.