TAPU 28 april 2013, wan spesrutu konmakandra hori na Nagoya, na ini Yapan. Drape Brada Anthony Morris fu a Tiri Skin meki wan moi sani bekènti di den arkiman no ben fruwakti srefisrefi. Wan nyun buku tyari kon na doro na ini Yapan di nen The Bible—The Gospel According to Matthew (Bijbel—Na Evangelietori fu Mateyus). Ala nanga ala, moro leki 210.000 sma ben de na a programa, noso ben e luku en live tapu Internet. Den naki anu bun langa di Brada Morris meki a sani disi bekènti.

A buku disi na a Evangelietori fu Mateyus. A teki puru fu a Nyun-Grontapuvertaling na ini Yapantongo èn a abi 128 bladzijde. Brada Morris fruteri taki a meki spesrutu fu „yepi sma na ini Yapan”. Fu san ede a Bijbel buku disi de tra fasi? Fu san ede a ben de fanowdu? Fa sma ben feni en?

Yu kan skrifi den letter na ini Yapantongo fu tapusei go na ondrosei noso fu a kruktu-anusei go na a reti-anusei. Na ini furu buku den letter skrifi fu a kruktu-anusei go na a reti-anusei èn na so den buku fu wi ben skrifi tu. Dati meki furu sma fruwondru di den si fa a Mateyus-buku meki. Den letter fu a nyun buku skrifi fu tapusei go na ondrosei, soleki fa furu koranti nanga tra pôpi buku na ini a kondre skrifi. Furu sma na ini Yapan feni taki disi moro makriki fu leisi. Boiti dati, den sani di skrifi na tapusei fu den bladzijde na ini a Nyun-Grontapuvertaling, poti now leki ondro-edeprakseri na ini a buku disi. Na so leisiman kan si moro makriki san na den prenspari sani na tapu a bladzijde.

Den brada nanga sisa na Yapan bigin leisi Mateyus wantewante. Wan sisa fu 80 yari taki: „Mi leisi a buku Mateyus furu tron kaba, ma now di den letter skrifi fu tapusei go na ondrosei èn a buku abi ondro-edeprakseri, meki mi ben man frustan a Bergitaki fu Yesus moro bun.” Wan yongu sisa skrifi: „Mi leisi a heri buku Mateyus sondro fu stop. Mi gwenti leisi buku pe den letter skrifi fu a kruktu-anusei go na a reti-anusei, ma furu sma na ini Yapan lobi te den letter skrifi fu tapusei go na ondrosei.”

Fu san ede a wán Bijbel buku disi bun fu preiki gi den sma na ini Yapan? Aladi furu sma na Yapan no sabi Bijbel, toku den wani leisi en. Furu sma noiti no si wan Bijbel. Den sma disi abi na okasi now fu hori wan pisi fu a santa buku disi na ini den anu èn fu leisi en fu di den abi a Mateyus-buku.

Fu san ede den brada bosroiti fu tyari a Bijbel buku Mateyus kon na doro? Furu tron te sma na Yapan e yere a wortu „Bijbel”, den e prakseri Yesus Krestes. Sobun, den brada teki a buku Mateyus fu di a e fruteri fu sortu famiri Yesus komoto, pe a  gebore, san a taki na ini a Bergitaki fu en èn na ini den span profeititori di a fruteri fu den lasti dei. Furu sma na Yapan wani sabi moro fu den tori disi.

Den Kownukondre preikiman na Yapan bigin prati a nyun buku oso fu oso èn na den gobaka fu den. Wan sisa skrifi: „Now mi abi moro okasi fu prati Gado Wortu gi sma na ini a kontren fu wi. Mi ben man prati wan fu den Mateyus-buku na a srefi bakadina di a spesrutu konmakandra hori.”

Fa den preikiman e prati a Mateyus-buku? Furu ososma na Yapan sabi sani soleki „a smara doro”, „peri gi den agu” èn „noiti un musu broko un ede nanga tamara” (Mat. 6:34; 7:6, 13). Dati meki den e fruwondru te den si taki na Yesus Krestes ben taki den wortu disi. Te sma e si taki a skrifi na ini na Evangelietori fu Mateyus, dan furu fu den e taki: „Ala ten mi ben wani leisi Bijbel, awinsi na wán leisi nomo.”

Te den preikiman e go baka na den sma di ben teki wan Mateyus-buku, dan nofo tron den ososma e taigi den taki di den kisi a buku, dan wantewante den leisi wan pisi fu a buku noso a heri buku srefi. Wan man di pasa 60 yari, taigi wan preikiman: „Mi leisi en furu tron èn mi kisi trowstu. Grantangi, leri mi moro fu Bijbel.”

Den e prati a Mateyus-buku tu te den e du spesrutu preikiwroko na presi pe furu sma de. Wan Kotoigi di ben preiki na a fasi dati, gi en e-mail adres na wan yongu uma di ben teki a Mateyus-buku. Wán yuru baka dati, na uma seni wan e-mail gi a sisa. A taki dati a leisi wan pisi fu a Bijbel buku èn a ben wani sabi moro. Wán wiki baka dati, a sisa studeri nanga na uma disi fu a fosi leisi. Syatu baka dati na uma bigin go na den konmakandra.

Moro leki 1.600.000 Mateyus-buku seni go na den gemeente na Yapan. Ibri mun den Kotoigi e prati dusundusun fu den buku disi. Den sma di tyari a buku kon na doro, skrifi na fesisei: „Nanga wi heri ati, wi e howpu taki te yu e leisi a buku disi, dan dati o yepi yu fu kon sabi moro fu Bijbel.”