1. Fu san ede Yesus e ’prisiri pasa marki’ te den 70 disipel drai kon baka? (Luku a prenki na a bigin fu na artikel.)

PRAKSERI fa a ben sa de fu si fa Yesus e ’prisiri pasa marki èn fa santa yeye e kon na en tapu’ te den 70 disipel fu en e drai kon baka. Kande a e lafu èn en ai e brenki fu prisiri. Ma san meki a e firi so? Didyonsro a seni den disipel go preiki a bun nyunsu fu Gado Kownukondre. Now a wani sabi fa sani waka gi den. Furu bigi feanti ben de na a ten dati di no ben lobi a bun nyunsu. Wan tu fu den ben de den leriman fu Wet nanga den Fariseiman di ben kisi hei skoroleri èn di ben koni srefisrefi. Den ben wani taki sma si Yesus leki wan temreman nomo èn taki den si den bakaman fu en leki gewoon sma di ’no kisi furu skoro’ (Tori 4:13; Mark. 6:3). Ma den bakaman ben e prisiri srefisrefi di den drai kon baka. Den preiki a bun nyunsu, aladi sma nanga den ogri yeye srefi gens den. Fa a du kon taki den ben man du a preikiwroko nanga so furu prisiri èn nanga deki-ati?—Leisi Lukas 10:1, 17-21.

2. (a) Fu san ede wi kan taki dati den bakaman fu Yesus ben de leki pikin-nengre? (b) San meki den bakaman fu Yesus ben man frustan den dipi tori fu Bijbel?

² Luku san Yesus taigi Yehovah: „Mi Tata, Masra fu hemel  nanga grontapu, mi e prèise yu na fesi ala sma, bika yu kibri den sani disi gi den koniman nanga sabiman èn yu tyari den kon na krin gi den sma di de leki nyofi pikin. Iya Tata, yu feni en bun fu du sani na a fasi disi” (Mat. 11:25, 26). Yesus no ben taki dati den bakaman fu en na pikin-nengre trutru. A ben sabi taki den no ben de leki den sma di kisi hei skoroleri èn di ben e si densrefi leki koniman. San ben prenspari gi Yesus na taki den bakaman fu en ben musu de leki pikin di de klariklari fu teki leri. Den no ben musu abi heimemre, ma den ben musu abi sakafasi (Mat. 18:1-4). Fu di den ben abi sakafasi, meki Yehovah gebroiki en santa yeye fu yepi den kon frustan den dipi tori fu Bijbel. Ma den koniman di ben kisi hei skoroleri èn di ben wisiwasi den bakaman fu Yesus, no ben man frustan den tori dati fu di Satan ben breni den èn fu di den ben abi heimemre.

3. San wi o luku na ini na artikel disi?

³ Now wi kan frustan fu san ede Yesus ben e prisiri. A ben breiti fu si fa Yehovah ben meki ala sortu sma di abi sakafasi kon sabi den dipi tori fu Bijbel, awinsi sortu skoroleri den ben kisi. Yesus ben breiti taki en Papa ben horibaka gi a krin èn makriki fasi fa den bakaman fu en ben e gi leri. A de so taki Yehovah kenki? Fa a e sori te now ete taki a e horibaka gi a fasi disi fu gi leri? Te wi o luku a piki na tapu den aksi disi, dan wi srefi o prisiri tu neleki Yesus.

4. Fu san ede a makriki studie-Waktitoren ben de wan moi kado?

⁴ Na ini den yari di pasa, wi si moro nanga moro taki na organisâsi fu Yehovah gi Bijbel leri na wan fasi di krin èn makriki fu frustan. Luku dri eksempre. A fosiwan abi fu du nanga a makriki studie-Waktitoren. * A Waktitoren disi ben de wan moi kado di yepi furu sma di no man taki a tongo so bun noso di no man leisi bun. Osofamiri-edeman kon si taki now den pikin fu den e frustan A Waktitoren moro bun. Furu sma seni brifi gi a Tiri Skin fu sori fa den breiti nanga a seti disi. Wan sisa skrifi taki fosi a ben frede fu gi piki na a Waktitoren-studie. Ma now dati no de so moro. Baka di a bigin gebroiki a makriki studie-Waktitoren, a skrifi: „Now mi e gi moro piki èn mi no frede moro! Mi e taki unu nanga Yehovah tangi.”

5. San na wan tu moi sani fu na Ingrisitongo Nyun-Grontapuvertaling di den tyari kon na doro na ini 2013?

⁵ Wan tra eksempre abi fu du nanga na Ingrisitongo Nyun-Grontapuvertaling. Den tyari kenki kon na ini a nyun Bijbel disi di kon na doro na a alayari konmakandra fu a Watch Tower Bible and Tract Society of Pennsylvania di hori tapu 5 oktober 2013. * Aladi furu Bijbeltekst kon moro syatu now, toku den no e taki fu wan tra sani èn den kon moro krin fu frustan srefi. Fu eksempre, te yu e luku Yob 10:1 na ini a nyun Ingrisitongo Bijbel, dan yu o si taki a tekst disi abi 19 wortu now, na presi fu 27. Èn Odo 8:6 abi 13 wortu now, na presi fu 20. Ala tu tekst de moro krin now na ini a nyun Bijbel disi. Wan salfu brada di e dini Yehovah furu yari kaba, ben taki srefi: „Didyonsro mi kaba leisi a buku Yob na ini a nyun Bijbel èn a gersi leki now fosi mi e frustan en.” Furu sma taki wan srefi sortu sani.

6. Fa yu feni a nyun fasi fa wi e frustan Mateyus 24:45-47?

 ⁶ Luku ete wan eksempre. Prakseri wan tu fu den nyun fasi fa wi kon frustan son tekst. Fu eksempre, A Waktitoren fu 15 yuli 2013 ben taki fu a nyun fasi fa wi e frustan den wortu „a koni srafu di de fu frutrow”. Wi ben breiti srefisrefi di wi kon frustan a tori disi moro krin (Mat. 24:45-47). A Waktitoren ben e sori taki a srafu di de fu frutrow na a Tiri Skin di e prati a tru leri di de leki nyanyan. Den „futuboi” na ala den sma di e kisi a leri disi, awinsi den na salfuwan noso den na „tra skapu” (Yoh. 10:16). Wi e prisiri fu leri den sortu tru tori disi èn fu fruteri den na tra sma. Na sortu tra fasi Yehovah sori taki a e horibaka gi a krin èn makriki fasi fa wi e gi leri?

7, 8. San na wan tu eksempre fu Bijbel tori di e prenki moro bigi sani di ben o pasa bakaten?

⁷ Efu yu e dini Yehovah furu yari kaba, dan kande yu si na ini den buku fu wi taki a fasi fa wi e fruklari son Bijbel tori kon kenki. Fosi, wi ben gwenti taki dati son tori e prenki moro bigi sani di ben o pasa bakaten. Wi fruklari Bijbel tori na a fasi disi fu di wi si taki a ben de fanowdu son leisi fu du dati. Fu eksempre, Yesus ben taki fu „a marki fu a profeiti Yona”. (Leisi Mateyus 12:39, 40.) Yesus taki dati a ten di Yona tan na ini a bere fu a fisi e prenki a ten di Yesus ben o de na ini a grebi.

⁸ Yu abi tra Bijbel tori tu di e prenki moro bigi sani di ben o pasa bakaten. Na apostel Paulus e taki fu wan tu fu den. Fu eksempre, a fasi fa Abraham ben de nanga Hagar èn nanga Sara e prenki a fasi fa Yehovah ben de nanga a pipel Israel èn nanga a pisi fu Gado en organisâsi di de na hemel (Gal. 4:22-26). Na so a ben de tu nanga a tabernakel, a tempel, a spesrutu dei te a granpriester ben e tyari ofrandi gi den sondu fu a pipel, a granpriester nanga tra sani di abi fu du nanga a Wet. Ala den sani disi ben de „wan skaduw fu den bun sani di musu kon ete” (Hebr. 9:23-25; 10:1). Te wi e studeri den Bijbel tori disi èn san den e prenki, dan dati e tranga a bribi fu wi. Ma disi wani taki dati ibri sma na ini Bijbel e prenki wan tra sma? Noso taki ibri sani di Bijbel e taki fu en e prenki wan tra sani?

9. Fa wi ben e fruklari a Bijbel tori fu Nabot fosi?

⁹ Furu tron den buku fu wi ben taki dati ibri sma na ini son Bijbel tori e prenki wan tra sma èn taki ibri sani e prenki wan tra sani. Fu eksempre, luku a tori fu Nabot. Na ogri Umakownu Iseibel kiri Nabot so taki en masra Akab ben kan teki a droifidyari fu en (1 Kow. 21:1-16). Na ini 1932, A Waktitoren ben taki dati Akab nanga Iseibel ben e prenki Satan nanga na organisâsi fu en. A Waktitoren ben e taki tu dati Nabot ben e prenki Yesus èn taki a dede fu Nabot ben e prenki a kiri di sma kiri Yesus. Ma na ini 1961, a buku „Let Your Name Be Sanctified” (Yu nen musu kon santa), taki dati Nabot ben e prenki den salfuwan èn taki Iseibel ben e prenki den falsi Kresten bribi. A buku ben e taki tu dati na ogri di Iseibel du nanga Nabot ben e prenki a frufolgu di den salfuwan ben o kisi na ini den lasti dei. Furu yari langa, a fasi disi fa den buku fu wi fruklari Bijbel tori, tranga a bribi fu Gado pipel. Ma fu san ede wi e si sani tra fasi now?

10. (a) A srafu di de fu frutrow e luku moro fini now fa den e fruklari son Bijbel tori. Na sortu fasi? (b) Na sortu sani den buku fu wi e poti prakseri moro furu na ini a ten disi?

¹⁰ Na ini den yari di pasa, Yehovah yepi  „a koni srafu di de fu frutrow” fu luku moro fini fa den e fruklari sani. Na sortu fasi? Te a srafu di de fu frutrow e taki now dati wan Bijbel tori e prenki wan moro bigi sani, dan den e du dati soso te Bijbel srefi e taki krin fu dati. A fasi fa wi ben e fruklari son sani fosi ben muilek fu frustan èn fu hori na ede. A ben muilek tu fu si fa fu gebroiki den sani dati na ini wi libi. Ma a moro bigi problema ben de taki wi ben e suku tumusi furu na ini wan Bijbel tori. Disi ben meki taki sma no ben man frustan krin san den ben kan leri fu a tori dati. Sobun, na ini a ten disi den buku fu wi e fruklari Bijbel tori na wan moro makriki fasi. Den e leri wi fa wi kan abi wan tranga bribi, fa wi kan horidoro te wi e kisi tesi, fa wi kan tan dini Gado fayafaya èn tra sani di kan yepi wi fu tyari wisrefi bun. *

11. (a) Fa wi e frustan a tori fu Nabot now èn san wi kan leri fu na eksempre fu en? (b) Fu san ede wi no e leisi so furu moro na ini den buku fu wi taki wan Bijbel tori e prenki wan moro bigi sani? (Luku „Aksi fu leisiman” na ini a tijdschrift disi.)

¹¹ Prakseri a tori fu Nabot baka. Now wi e frustan a tori disi moro krin èn moro makriki. A reti-ati man disi no dede fu di a ben e prenki Yesus noso den salfuwan, ma fu di a tan dini Gado. Srefi di makti tiriman ben wani du en ogri, a tan gi yesi na a Wet fu Yehovah (Num. 36:7; 1 Kow. 21:3). Disi na wan moi eksempre gi ala futuboi fu Yehovah na ini a ten disi di e kisi frufolgu fu tiriman tu. (Leisi 2 Timoteyus 3:12.) Ala Kresten man frustan krin san wi kan leri fu sowan Bijbel tori, den man hori en na ede makriki èn den man si fa a kan tranga a bribi fu den.

12. (a) San wi no musu denki fu den Bijbel tori? (b) Fu san ede wi man fruklari Bijbel tori krin, awinsi den na dipi tori? (Luku san skrifi na a marki na ondrosei fu bladzijde 11.)

¹² Soleki fa wi si, dan Bijbel tori kan leri wi sani di wi kan gebroiki na ini wi aladei libi. Ma wi musu denki taki den no wani taki nowan enkri tra sani moro? Nôno. Now den buku fu wi e sori moro furu san Bijbel tori abi fu du nanga makandra. A  no e pasa so furu moro taki den e sori dati wan Bijbel tori e prenki wan moro bigi sani. Fu eksempre, te wi e luku a tori fu Nabot di tan gi yesi na Gado aladi sma frufolgu en èn den kiri en, dan dati e memre wi na a fasi fa Krestes nanga den salfuwan tan gi yesi Gado. Ma a e memre wi tu na a fasi fa furu „tra skapu” fu Masra horidoro di den kisi tesi. Wi kan si krin fa Yehovah e leri wi sani na wan makriki fasi. *

13. Sortu eksempre e sori taki now wi e fruklari son agersitori fu Yesus na wan moro makriki èn krin fasi?

¹³ Yesus Krestes ben de a moro bigi Leriman di oiti ben de na grontapu. A ben lobi gebroiki agersitori te a ben e gi leri (Mat. 13:34). Agersitori bun fu di den e fruklari muilek tori na wan makriki fasi. Den e yepi wi tu fu denki èn den e leri wi sani di kan naki wi ati. A de so taki den buku fu wi fruklari den agersitori fu Yesus na wan moro makriki èn krin fasi na ini den yari di pasa? Iya. Fu eksempre, A Waktitoren fu 15 yuli 2008 yepi wi fu frustan moro krin san Yesus agersitori fu a srudeki, fu a mosterd-siri èn fu a fisinèt wani taki. Now wi e si krin taki den agersitori disi abi fu du nanga Gado Kownukondre. Disi yepi furu sma fu drai baka gi na ogri grontapu disi èn fu tron bakaman fu Krestes.

14. (a) Fa wi ben gwenti fruklari na agersitori fu a Samaria man? (b) Fa wi e frustan na agersitori disi now?

¹⁴ Ma fa wi kan frustan den agersitori pe Yesus e taki finifini fu difrenti sani noso difrenti sma? Sonwan fu den agersitori abi fu du nanga profeititori èn den e prenki wan sani. Tra agersitori e leri wi wan sani di wi kan gebroiki na ini wi aladei libi. Ma fa wi kan sabi o ten wan agersitori e prenki wan sani? Na ini den yari di pasa, wi kon si moro krin o ten dati de so. Fu eksempre, luku fa wi ben gwenti fruklari a tori fu a Samaria man di ben du bun gi wan tra sma (Luk. 10:30-37). Na ini 1924, The Watch Tower taki dati a Samaria man ben prenki Yesus. A pasi di ben e saka fu Yerusalem go na Yerikow ben e prenki a fasi fa a libi fu libisma go na baka sensi di sma trangayesi Gado na ini Eden. Den fufuruman ben e prenki den bigi bisnis nanga den gridi bisnisman. A priester nanga a Leifisma ben e prenki den falsi Kresten bribi. Ma na ini a ten disi den buku fu wi e gebroiki na agersitori dati fu memre ala Kresten taki den no musu desko sma, ma taki den musu yepi ala sma di de na nowtu. Den musu du spesrutu muiti fu yepi sma kon sabi den tru tori fu Gado. Wi breiti fu si fa Yehovah e meki wi frustan den tru tori disi moro krin.

15. San wi o luku na ini a tra artikel?

¹⁵ Na ini a tra artikel, wi o luku na agersitori fu den tin nyunwenke (Mat. 25:1-13). Fa Yesus ben wani taki den bakaman fu en musu frustan a moi agersitori disi na ini den lasti dei? A ben wani taki dati ibri sma noso ibri sani na ini na agersitori e prenki wan moro bigi sani di musu pasa bakaten? Noso a de so taki Yesus ben wani taki en bakaman gebroiki na agersitori fu leri wan sani di kan yepi den na ini den lasti dei? Meki wi go luku.